Tuesday, November 29, 2016

မြစ်ဆုံစီမံကိန်းကို ကချင်ပြည်နယ် လွှတ်တော်ကိုယ်စားလှယ်တွေ ကန့်ကွက်

ဧရာဝတီမြစ်ဆုံစီမံကိန်းကို အကောင်အထည်မဖော်သင့်ကြောင်း ကချင်ပြည်နယ်လွှတ်တော် ကိုယ်စားလှယ်တွေ က ဧရာဝတီမြစ်ဆုံ မြစ်ညှာ မြစ်ဝှမ်း ရေအားလျှပ်စစ်စီမံကိန်းများ လေ့လာ၊ စိစစ်သုံးသပ်ရေးကော်မရှင် စေလွှတ် ထားတဲ့ မြန်မာ့ပတ်ဝန်းကျင် သိပ္ပံသုတေသနအဖွဲ့ ကွင်းဆင်းလေ့လာစဉ် ကန့်ကွက်လိုက်ပါတယ်။ ကချင်ပြည်နယ်အစိုးရအဖွဲ့ရုံးမှာ မြန်မာ့ပတ်ဝန်းကျင်သိပ္ပံသုတေသန MEI အဖွဲ့နဲ့ မနေ့က တွေ့ဆုံချိန်မှာ လွှတ်တော်ကိုယ်စားလှယ်တွေက ကန့်ကွက်ဆွေးနွေးခဲ့ကြတာဖြစ်တယ်လို့ ပြည်နယ်လွှတ်တော် သစ်တော၊ သတ္တု၊ သဘာဝပတ်ဝန်းကျင်ထိန်းသိမ်းရေး၊ စိုက်ပျိုးရေး နဲ့ မွေးမြူရေးဆိုင်ရာကော်မတီ ဥက္ကဋ္ဌ ဦးကျော်ကျော်ဝင်း က ပြော ပါတယ်။



ဧရာဝတီမြစ်ဆုံ မြစ်ညှာ မြစ်ဝှမ်း ရေအားလျှပ်စစ်စီမံကိန်းများ လေ့လာစိစစ် သုံးသပ်ရေးကော်မရှင်က မြန်မာ့ ပတ်ဝန်းကျင်သိပ္ပံသုတေသနအဖွဲ့ကို ကွင်းဆင်းလေ့လာဖို့ စေလွှတ်ထားတာဖြစ်ပြီး အဲဒီအဖွဲ့ဟာ ဧရာဝတီမြစ်နဲ့ ဆက်စပ်မြို့နယ်တွေက ဒေသခံတွေနဲ့လည်း သွားရောက်တွေ့ဆုံခဲ့ပါတယ်။

မနေ့ကတွေ့ဆုံပွဲကို ခေါင်လန်ဖူး၊ ပူတာအို၊ နောင်မွန်း အင်ဂျန်းယန်၊ ဆွမ်ပရာဘွမ်၊ ဗန်းမော် စတဲ့ ဧရာဝတီမြစ်နဲ့ ဆက်စပ်တဲ့ ဒေသတွေမှာ နေထိုင်တဲ့ကိုယ်စားလှယ်တွေ အပါအဝင် ပြည်နယ်လွှတ်တော်က ဖွဲ့စည်းထားတဲ့ သစ်တော၊ သတ္တု၊ သဘာဝပတ်ဝန်းကျင်ထိန်းသိမ်းရေး၊ စိုက်ပျိုးရေးနဲ့ မွေးမြူရေးဆိုင်ရာကော်မတီက လွှတ်တော် ကိုယ်စားလှယ်တွေ စုစုပေါင်း ၂ဝ ဝန်းကျင် တက်ရောက်ခဲ့ပါတယ်။

မြန်မာနိုင်ငံမြောက်ဖျား ရေခဲတောင်ဒေသတွေကနေမြစ်ဖျားခံပြီး မေခ နဲ့ မလိခ မြစ်နှစ်သွယ် ပေါင်းဆုံ လို့ ဖြစ်ပေါ်လာတဲ့ ဧရာဝတီမြစ်ပေါ်က မြစ်ဆုံရေကာတာ စီမံကိန်းအပါအဝင် မေခနဲ့ မလိခမြစ်တွေပေါ်မှာပါ တည်ဆောက်ဖို့ စီစဉ်နေတဲ့ ရေကတာစီမံကိန်း ၇ ခုကို အပြီးတိုင်ဖျက်သိမ်းဖို့ အလွှာအသီးသီးက ပြည်သူတွေ က တောင်းဆိုနေကြတာလည်းဖြစ်ပါတယ်။

RFA Burmese

No comments:

Post a Comment