Monday, November 28, 2016

မူဆယ်(၁၀၅)မိုင် ကုန်သွယ်ရေးဇုန် ပြန်လည်ဖွင့်ပြီဖြစ်သောကြောင့် ကုန်သွယ်မှုလုပ်ငန်းများ စတင် ဆောင်ရွက်

ရှမ်းပြည်နယ်(မြောက်ပိုင်း)၊ မူဆယ်ခရိုင်၊ မူဆယ်မြို့၊ မိုင်းယု(၁၀၅)မိုင် ကုန်သွယ်ရေးဇုန်ကြီး အနီး တစ်ဝိုက်၌ နိုဝင်ဘာ (၂၀)ရက်နေ့ နံနက်(၆)နာရီ (၃၀)မိနစ် အချိန်ခန့် KIA,TNLA,MNDAA တပ် ပေါင်းစုနှင့် တပ်မတော် တိုက်ပွဲဖြစ်ပွားမှုကြောင့် ပြည်သူလူထုအပါအ၀င် ၀န်ထမ်း တချို့ တိမ်းရှောင် ခဲ့ပြီး ကုန်သွယ်ရေးဇုန်ကြီးနှင့် ယာဉ်ငယ်စစ်ဆေးရေး ဂိတ်များ ခေတ္တပိတ်ထားခဲ့ရပါသည်။ မူဆယ်(၁၀၅)မိုင်ကုန်သွယ်ရေးဇုန်တွင် ဌာနအားဖြင့် (၆)ခုရှိပြီး တိုက်ပွဲဖြစ်သည့်နေ့မှစ၍ OSS ဌာများဖြစ်သည့် အကောက် ခွန်၊ ပြည်တွင်းအခွန်၊ မြန်မာ့စီးပွားရေးဘဏ်နှင့် လူဝင်မှုကြီးကြပ်ရေးအဖွဲ့ များသည် လုံခြုံရေးအခြေအနေအရ မူဆယ်မြို့မှ လာရောက် တာဝန် ထမ်းဆောင်ရမည် ဖြစ်သဖြင့် ကွင်းကြီး၏ လုံခြုံရေးကို နိုဝင်ဘာ(၂၁)ရက်နေ့ မှ (၂၄)ရက်နေ့အထိ ကုန်ယွယ်ရေး ဦးစီးဌာန ၀န်ထမ်း များနှင့် မြန်မာနိုင်ငံရဲတပ်ဖွဲ့များမှ နေ့ရောညပါ လုံခြုံရေးနှင့် စည်းကမ်း ထိန်းသိမ်းရေးကို စနစ်တကျ တာဝန်ယူဆောင်ရွက်ပေးခဲ့ကြောင်း သိရသည်။



မူဆယ်ခရိုင်၊ မူဆယ်မြို့နယ်အတွင်း နိုဝင်ဘာလ(၂၅)ရက်နေ့မှစ၍ နယ်မြေအခြေအနေအရ အတော် အသင့် တည်ငြိမ်အေးချမ်း သွားပြီဖြစ်သောကြောင့် ကုန်သွယ်ရေးဇုန်အတွင်းသို့ ကုန်တင်ကားများ နံနက်(၉)နာရီကျော်ခန့်တွင် စတင်ဝင်ရောက်လာကြောင်း သိရသည်။

မူဆယ်ခရိုင်အတွင်း ပုံမှန်အနေအထားမရှိသေးသော်လည်း နိုဝင်ဘာ(၂၅) ရက်နေ့က OSS ဌာနများမှ အဓိကဌာနသုံးခုမှ ၀န်ထမ်းတချို့ ပြန်လည်တာဝန် ထမ်းဆောင်သည့်အတွက် ကုန်သွယ်ရေးဇုန် အတွင်း၌ နေ့လည်ပိုင်း(၁၁)နာရီမှစ၍ ပို့ကုန်/သွင်းကုန်ကားများ အတော်များများ ၀င်ရောက်လာပြီး ၀န်ထမ်းများမှ လုပ်ငန်းရှင်များလွယ်လွယ်ကူကူ လုပ်ကိုင်ဆောင်ရွက်နိုင်ရန် ညှိနှိုင်းပြီး စတင်ဆောင်ရွက်နေပြီဖြစ်ကြောင်း သိရသည်။

နိုဝင်ဘာ(၂၆)ရက်နေ့တွင် လမ်းကြောင်းအခြေအနေ ပိုကောင်းလာသည့် အတွက် ပို့ကုန်/သွင်း ကုန်ကားများ အတက် အဆင်းမှ နိုဝင်ဘာ(၂၅)ရက်နေ့ကထက် ပိုမိုများပြားလာကြောင်း၊ ယခုလတွင် ဖြစ်ပေါ်နေသည့် အတက်အဆင်းပုံမှန်ရနိုင်ရန် နယ်မြေ လုံခြုံရေးအေးချမ်းမှုသည် အဓိကအရေးကြီး ကြောင်းဖြစ်ပြီး ကုန်သွယ်ရေး ဇုန်အနေဖြင့် ကုန်သွယ်မှုပမာဏအားဖြင့် ဒေါ်လာ ၁၃ သန်းမှ ၁၅ သန်း ၀န်းကျင်အထိ ရရှိခဲ့သော်လည်း ယခုထိတွေ့ ပစ်ခတ်မှုဖြစ်ပြီးနောက်ပိုင်း နိုဝင်ဘာ ၂၅ ရက်နေ့တွင် ဒေါ်လာ ၁ သန်းနီးပါးခန့်သာ အလုပ်လုပ်နိုင်ခဲ့ကြောင်း ၂၆ ရက်နေ့ လုပ်ဆောင်ချက် အနေအထားအရ နိုဝင်ဘာ ၂၅ ရက်နေ့ထက်ပိုမို အဆင်ပြေလာမည်ဖြစ်ကြောင်း သိရသည်။

OSS အဖွဲ့၏ Online System ကတော့ လောလောဆယ် ဘဏ်နဲ့ချိတ်ဆက်လုပ်ဆောင်ရသည့် အနေအထားမရှိသည့်အတွက် လုပ်ငန်းအနေဖြင့် ယခုချိန်တွင်ပုံမှလုပ်ငန်းစဉ်များအတိုင်းပြန်လည် မလုပ်ဆောင်နိုင်သေးကြောင်း၊ သို့သော် ယခင်ပုံမှန်လုပ်ငန်းစဉ်မဟုတ်သော်လည်း လက်ရှိလုပ်ငန်းရှင် များ တရားဝင်အခွန်အခနိုင်ငံတော် အခွန်အခပေးဆောင်ပြီး သွားလာနိုင်ရန် တာဝန်ရှိသူများမှ ကြိုးစားပြီး ၀ိုင်းဝန်းကူညီဆောင်ရွက်ပေးကြောင်း၊ ယခုအချိန်ပွင့်လင်းရာသီဖြစ်သည့်အတွက် ပို့ကန်ု (Export)အဖြစ် လယ်ယာထွက်ကုန်ပစ္စည်းများ ဆန်၊ ပဲအမျိုးမျိုး၊ ပြောင်း၊ သကြားနှင့် ဖရဲ၊ သခွားများ ၀င်ရောက်လျက်ရှိပြီး၊ ၁ ရက် ကားအစီးရေ(၁၀၀)ကျော်ခန့် တက်လာသော်လည်း၊ သွင်းကုန် (Inport) အနေဖြင့် ဓာတ်မြေသြဇာ၊ လူသုံးကုန်၊ အိမ်သုံးပစ္စည်း၊ စက်ယန္တယားများ ၀င်ရောက်ပြီး ၁ ရက်လျှင် ကုန်တင်ကားအစီးရေ (၁၀၀)နီးပါးရှိပြီး ပို့ကုန်/သွင်းကုန်နှစ်ခုပေါင်း ၀င်ရောက်မှု ကားအစီးရေ (၂၀၀) ၀န်းကျင်ခန့် ရှိကြောင်း သိရပြီး ကုန်တင်ကားများ၏ ကားခဈေးနှုန်းသည် အတက် ကားခ တစ်ပိဿာ လျှင် (၈၀)ကျပ်မှ (၈၄) ကျပ်အထိရရှိပြီး အဆင်းကားခမှာ ကုန်ချိန်တစ်ပိဿာလျှင် (၅၀)ကျပ်မှ (၅၂)ကျပ် အထိရရှိခဲ့ကြောင်း သိရပါသည်။
ယခုလောလောဆယ်အနေအထားအရ သွင်းကုန် ကားများထက် ပို့ကုန်ကားများ ပို၍၀င်ရောက်မှုရှိကြောင်း သိရသည်။

ပို့ကုန်/သွင်းကုန်သဘောတရားအရ ယခင်နှင့် လက်ရှိအခြေအနေများတွင် ကားအစီးရေနှင့် ပို့ကုန် တန်ဖိုးအရေအတွက် ပိုမိုများကြောင်းသိရသည်။ မူဆယ် (၁၀၅) မိုင်တွင် ဖြစ်ပွားခဲ့သည့် တိုက်ပွဲသည် သောင်းကျန်းသူများက အကြောင်းမဲ့ ၀င်ရောက်လာပြီး နိုင်ငံတော်ကုန်သွယ်မှုကို အဟန့်အတား ဖြစ်ရန် ရည်ရွယ်ချက်ဖြင့် ဖြစ်နိုင်ကြောင်း၊ ကုန်သွယ်ရေး ဇုန်တွင် နေ့စဉ် အရှေ့မြောက်တံခါး၊ ခွာညိုမြန်မာတံခွန်ပွဲရုံတွင် တရုတ်-မြန်မာသစ်သီးရောင်းဝယ်ရေး လုပ်ငန်းကိုဆောင်ရွက်နေသည့် လူဦးရေမှာ ၁၅၀ ဦး မှ ၂၀၀ ဦးခန့်ရှိပြီး၊ လုပ်ငန်း လုပ်ကိုင် ဆောင်ရွက်နေသောသူများကို စိုးရိမ် ကြောက်လန့်မှု ဖြစ်စေရန်နှင့် လူများသည့်နေရာကို အခွင့်ကောင်းယူ အကာအကွယ်ယူကာ တိုက်ခိုက် သွားနိုင်ကြောင်း၊ တိုက်ပွဲစဖြစ်သည့် အချိန်ကုန်သွယ်ရေးဇုန် တာဝန်ရှိသူများနှင့် မြန်မာနိုင်ငံရဲတပ်ဖွဲ့၊ ပြည်သူ့စစ်တပ်ဖွဲ့များမှ လုံခြုံရေး အပြည့်ဆောင်ရွက်ထားကြောင်း သိရှိရသည်။

မူဆယ် ၁၀၅ မိုင်အတွင်း တိုက်ပွဲဖြစ်ပွားမှုကြောင့် မြို့နယ်ကုန်တင် ၊ ကုန်ချအလုပ်သမား များလည်း ခေတ္တထွက်ပြေးတိမ်းရှောင်သွားကြသော်လည်း နိုဝင်ဘာ ၂၅ ရက်နေ့ မှစ၍ ကုန်တင် ကုန်ချဦးစီးမှူး ဦးဝင်ခိုင်ဦး၏ ညွှန်ကြားချက်ဖြင့် အလုပ်သမားဦးရေ (၂၀၀)ကျော် မှ (၅၀၀)ကျော်အထိ ပြန်လည် ၀င်ရောက် လုပ်ကိုင်ခဲ့ကြပြီး လုပ်အားခအနေဖြင့် ငွေကျပ်(၅၀၀၀)ကျော် မှ (၆၀၀၀)ကျော်အထိ ရရှိ ကြောင်း သိရသည်။

မူဆယ်(၁၀၅)မိုင်ကုန်သွယ်ရေးဇုန်တွင် တိုက်ပွဲမဖြစ်ခင် လုပ်ဆောင်ချက်အနေဖြင့် (One Stop Service) ကုန်သွယ်ရေး၊ အကောက်အခွန်၊ ပြည်တွင်းအခွန်၊ ဘဏ်နှင့် မြန်မာနိုင်ငံ ရဲတပ်ဖွဲ့တို့ ပူးပေါင်းလုပ်ဆောင်ကြပြီး ပစ်ခတ်မှုဖြစ်ပြီးသည့်နောက်ပိုင်းတွင် အခြေအနေအေးဆေးနေသော်လည်း မူလအခြေအနေ ထိ ပြန်လည်မရောက်သေးကြောင်း၊ ဘဏ်နှင့် ပြည်တွင်းအခွန် ဌာနသည် ငွေဖြင့် လုပ်ကိုင် ဆောင်ရွက်ရသည့် ဌာနဖြစ်သောကြောင့် ငွေအပို့/အကြို အနေဖြင့် စိတ်မချရသေးသဖြင့် မူဆယ်မြို့ပေါ်ရှိ ဌာနရုံးများတွင် ငွေလက်ခံကြောင်း သိရှိရသည်။

ငွေလက်ခံပြီး(Online)ဖြင့် လုပ်ကိုင်ဆောင်ရွက်နိုင်သူများက ကိုယ်စားလှယ်ယူပြီး မူဆယ်မြို့ ပေါ်တွင် ငွေသွင်းပြီး ငွေလက်ငင်းဖြတ်ပိုင်း ရရှိပါက (Online)ဖြင့် လုပ်ကိုင်ဆောင်ရွက် ပေးကြောင်းနှင့် အကောက်အခွန် ဦးစီးဌာနအနေဖြင့်လည်း လုပ်ထုံးလုပ်နည်းအရ ယခင် ကတည်းက ဆောင်ရွက်နေသည့် အစီအစဉ် အတိုင်း ဆောင်ရွက်နေကြောင်းသိရှိရသည်။

နိုဝင်ဘာ ၂၇ ရက်နေ့မှစ၍ ၁၀၅ မိုင်ကုန်သွယ်ရေးဇုန်အတွင်းသို့ ကုန်တင်ကားများ အ၀င်/ အထွက် များသော်လည်း မြန်မာ့စီးပွားရေးဘဏ်နှင့် အခြားပုဂ္ဂလိကဘဏ်များ ယခုရက်ပိုင်အတွင်း ပိတ်ထား သဖြင့် ကုန်သည်များ ငွေလည်ပတ်မှု မရှိကြောင်း၊ နိုဝင်ဘာ (၂၈)ရက်နေ့တွင် ဘဏ်များ ပြန်လည် ဖွင့်လှစ်မည်ဟု သိရှိရပြီး ဘဏ်များဖွင့်လှစ်လျှင် ကုန်သည်များအနေဖြင့် ငွေလည်ပတ်မှုရှိပြီး ကုန်သွယ်ရေးဇုန်အတွင်း ကုန်စည်စီးဆင်းမှုသည် ယခုထက်မက ပိုမိုများပြားလာနိုင်ကြောင်း သိရ သည်။

မူဆယ် ၁၀၅ မိုင်ကုန်သွယ်ရေးဇုန်တွင် နိုဝင်ဘာ ၂၃ ရက်နှင့် ၂၄ ရက်နေ့များတွင် ယခင် ကုန်သွယ်ရေး ဇုန်အတွင်းသို့ သွင်းထားသော ကား(၅)စီးခန့်သာ သွားလာနိုင်ပြီး နိုဝင်ဘာလ ၂၅ ရက်နေ့မှစ၍ လုပ်ငန်းများစတင်ဆောင်ရွက်ခဲ့ပါသည်။ မူဆယ်-ကွတ်ခိုင် လမ်းကြောင်းများတွင် တိုက်ပွဲ များဖြစ်ပွားသည့်အတွက် ၂၅ ရက်နေ့မှစ၍ ကုန်တင်ကား ၁၀၀ ကျော် လုပ်ကိုင်ဆောင်ရွက်ရပြီး၊ ၂၆ ရက်နေ့တွင် ကားအစီးရေ(၃၀၀)ကျော်နှင့် ယနေ့ ၂၇ ရက်နေ့တွင် အစီးရေ ၆၀၀ ကျော်ခန့် ရောက်ရှိ လာနိုင်သည်ဟု သိရှိရသည်။

ယခုရက်ပိုင်းအတွင်း တပ်မတော်စစ်ကြောင်း များနှင့် မြန်မာနိုင်ငံ ရဲတပ်ဖွဲ့၊ ပြည်သူ့စစ်တပ်ဖွဲ့ဝင်များ၊ လုံခြုံရေးများ ချထားပြီးဖြစ်သည့် အတွက် နောက်ရက်များတွင် ကုန်တင်ကားများ ပိုမိုဝင်ရောက် လာနိုင်မည်ဖြစ်ကြောင်း သိရှိရပြီး မကြာခင်ရက်ပိုင်းအတွင်း ပုံမှန်အတိုင်း ပြန်လည် လည်ပတ်ဆောင် ရွက်နိုင်မည်ဖြစ်ကြောင်း သိရသည်။

မူဆယ်-ကွတ်ခိုင်-လားရှိုးတစ်လျှောက် လမ်းကြောများသည် အထိုက်အလျှောက်ပြန်လည် သွားလာ နိုင်၍ သော်လည်းကောင်း၊ ၁၀၅ မိုင်ကုန်သွယ်ရေးဇုန် ဘေးပတ်လည်အတွင်း တပ်မတော် စစ်ကြောင်း များ၊ မြန်မာနိုင်ငံရဲတပ်ဖွဲ့ဝင်များ၊ ပြည်သူ့စစ်တပ်ဖွဲ့ဝင်များက အတွင်းအပြင်လုံခြုံရေး တာဝန်ယူ ဆောင်ရွက်ထားကြောင်းသိရှိရသဖြင့် ကုန်သွယ်ရေးဇုန်ကြီးကို ကောင်းမွန်စွာပြန်လည် ဖွင့်လှစ်နိုင်ပြီး လုပ်ငန်းစတင်လည်ပတ်နေပြီဖြစ်ကြောင်း မူဆယ်(၁၀၅)မိုင် ကုန်သွယ်မှု လတ်တလော အခြေအနေ အား သိရှိနိုင်ပါရန် အချုပ်တင်ပြလိုက်ရပါသည်။

ခရိုင်ပြန်/ဆက်

No comments:

Post a Comment