Saturday, November 19, 2016

ရုရှားသမ္မတလေယာဉ်ကို ဆွစ်လေတပ် အနီးကပ် စောင့်ကြည့်ပျံသန်း

ရုရှားသမ္မတ အသုံးပြုသည့် လေယာဉ်တစ်စီးကို ဆွစ်ဇာလန် တိုက်လေယာဉ်များက ခြံရံလိုက်ပါ စောင့်ကြည့်ပျံသန်းခဲ့ကြောင်း သိရသည်။ ရုရှားသမ္မတ ဗလာဒီမာပူတင် စီးနင်းအသုံးပြုလေ့ရှိသည့် လေယာဉ်တစ်စီးသည် ယခုသီတင်းပတ်အတွင်း ဆွစ်ဇာလန် လေပိုင်နက်ကို ဖြတ်ကျော်ပျံသန်းနေချိန်တွင် ဆွစ်လေတပ်က ယခုလို စောင့်ကြည့် ပျံသန်းခဲ့ခြင်း ဖြစ်သည်။ ပီရူးသို့ ဦးတည်သည့် အဆိုပါ ခရီးစဉ်တွင် ပူတင် ပါဝင်ခဲ့ခြင်း မရှိသော်လည်း ရုရှားအစိုးရ အရာရှိများနှင့် ဂျာနယ်လစ်များ လိုက်ပါလာကြသည်။



ရုရှားသမ္မတ လေယာဉ်ကို ဆွစ်တိုက်လေယာဉ်များက လိုက်ပါစောင့်ကြည့်ခြင်းသည် အနောက်အုပ်စု နိုင်ငံများနှင့် ရုရှားတို့ကြား တင်းမာမှုများ ရှိနေသည်ကို ပိုမို ပေါ်လွင်စေခဲ့သည်။ သမ္မတ လေယာဉ်ပေါ်မှ တစ်ဦးက ဘေးဘက်ရှိ တိုက်လေယာဉ်ကို ဗီဒီယို ရိုက်ယူထားရာ ဆွစ်လေတပ်၏ အမှတ်အသားများကို ထင်ရှားစွာ တွေ့မြင်နေရသည်။

ရုရှားမဂ္ဂဇင်း တစ်ခုဖြစ်သည့် Russian Pioneerမှ အယ်ဒီတာချုပ် အန်ရီ ကိုလက်စ်နီကော့ဗ်က “ကျွန်တော်တို့က ဆွစ်ဇာလန်ကို ဖြတ်ပျံနေတဲ့ အချိန်ပါ။ လေယာဉ်ပေါ်မှာ အစိုးရ ကိုယ်စားလှယ်တွေနဲ့ ဂျာနယ်လစ်တွေ ပါလာပါတယ်။ အဲဒီနောက်မှာ တိုက်လေယာဉ် သုံးစီးက ဝိုင်းပတ်ခြံရံပြီး လိုက်ပျံခဲ့ကြတာ ဖြစ်ပါတယ်”ဟု ပြောကြားခဲ့သည်။

၎င်းက ဆွစ်တိုက်လေယာဉ်များမှာ နီးကပ်လွန်းသဖြင့် တိုက်လေယာဉ်မှူးများ၏ မျက်နှာကိုပင် လှမ်းမြင်နေရကြောင်း၊ ထိုထက်ပို၍ နီးကပ်ခဲ့ပါက လေယာဉ်ချင်း တိုက်မိပြီး ပျက်ကျသွားနိုင်ကြောင်းလည်း ဆိုသည်။ ဆွစ်တိုက်လေယာဉ်များသည် နိုင်ငံနယ်နိမိတ် အစွန်ထိသာ လိုက်ပါပျံသန်းပြီးနောက် ပြန်လည် ထွက်ခွာသွားကြောင်း သိရသည်။

ရုရှားသည် အရှေ့ဥရောပတွင် စစ်ရေးလှုပ်ရှားမှုများ မြှင့်တင်လာခြင်း၊ ဆီးရီးယားအရေးတွင် ပေါ်ပေါ်ထင်ထင် စွက်ဖက်လာခြင်း၊ နျူကလီးယား တိုက်ခိုက်ရေးစွမ်းရည်ကို မွမ်းမံအားဖြည့်လာခြင်းများကြောင့် အမေရိကန်နှင့် အနောက်ဥရောပ နိုင်ငံများအတွက် စိုးရိမ်စရာ ဖြစ်လာသည်။

ရုရှားသည် မြန်နှုန်းမြင့် စူပါဆောနစ် ဒုံးကျည်တစ်စီးကိုလည်း လတ်တလော စမ်းသပ်ပစ်လွှတ်ထားသေးသည်။ အဆိုပါ Object 4202 ဒုံးကျည်သည် ရုရှားရှိ ယက်စ်နီ ဒုံးကျည်ပစ်စင်မှ လွှတ်တင်လိုက်ပါက မိုင်ထောင်ပေါင်းများစွာ ဝေးလံသည့် ဗြိတိန်နိုင်ငံသို့ ၁၃ မိနစ်အတွင်း ရောက်ရှိနိုင်စွမ်း ရှိနေသည်။ ကရင်မလင် နန်းတော်က အဆိုပါ ဒုံးကျည်စမ်းသပ်မှုမှာ မျှော်မှန်းချက်များနှင့် ကိုက်ညီစွာ အောင်မြင်မှု ရရှိခဲ့ကြောင်းလည်း ကြေညာထားသည်။

Ref: Daily Mail

No comments:

Post a Comment