Wednesday, November 30, 2016

ရှမ်းမြောက်တိုက်ပွဲနှင့် ၀ိရောဓိများ

ည အမှောင်ဝင်သည်နှင့်    နယ်စပ် မြို့လေးမှာ ခြောက်ကပ် တိတ်ဆိတ်သွားသည်။ ယခင်က ကြက်ပျံမကျ စည်ကားခဲ့သည့် တရုတ်နယ်စပ်ကုန်သွယ်ရေး မြို့လေး၏ မြို့လယ်လမ်းမကြီးထက်တွင် အသွားအလာ ရှင်းလင်းေ နပြီး နေအိမ်၊ ဈေးဆိုင်၊ အဆောက်အအုံအားလုံးနီးပါး တံခါးများပိတ်ထားကြသည်။ လက်နက်အပြည့်အစုံဖြင့် လုံခြုံရေးတပ်ဖွဲ့ဝင်များက အသင့်အနေအထားဖြင့် မြို့အတွင်း ကင်းလှည့်နေသည်ကိုလည်း မကြာခဏေ တွ့ရသည်။  တစ်နိုင်ငံလုံး နယ်စပ်ကုန် သွယ်ရေး၏ ၇၀ ရာခိုင်နှုန်းကျော် ကုန်သွယ်မှုပြုလုပ်နေသော အဓိ က နယ်စပ်ကုန်သွယ်ရေး ဂိတ် ပေါက်ဖြစ်သည့် မူဆယ်မြို့ကို နိုဝင်ဘာ တတိယပတ်က မြင်တွေ့ ခဲ့ခြင်းဖြစ်သည်။ မူဆယ်ဒေသတွင် နိုဝင်ဘာ တတိယပတ်က ကြား လိုက်ရသည့် သေနတ်သံများက ပြည်သူများကို စိတ်မသက်မသာ ဖြစ်စေခဲ့သည်။ အထူးသဖြင့် တရုတ်နိုင်ငံနှင့် ကပ်နေသော အဓိကကုန် သွယ်ရေးနယ်မြေတွင် တိုက်ပွဲများဖြစ်ပွား၍ နိုင်ငံတကာ ကပါ စောင့်ကြည့်ခဲ့သည်။


မူဆယ် ၁၀၅ မိုင် ကုန်သွယ် ရေးစခန်း အပါအ၀င် မူဆယ်ဒေ သရှိ တပ်မတော်နှင့် ရဲတပ်ဖွဲ့စခန်းများကို ကေအိုင်အေ၊တအာင်န်းနှင့် ကိုးကန့်ပူးပေါင်းအဖွဲ့များက နိုဝင်ဘာတွင် ၀င်ရောက် တိုက် ခိုက်ခဲ့ခြင်းဖြစ်သည်။ ယင်းဖြစ်စဉ် ကစ၍ တရုတ်နယ်စပ်ရှမ်းမြောက် ဒေသများတွင် တပ်မတော်နှင့် တိုင်းရင်းသားလက်နက်ကိုင် ပူး ပေါင်းအဖွဲ့များအကြား တစ်ပတ် ကျော် တိုက်ပွဲများပြင်းထန်စွာ ဆက်လက်ဖြစ်ပွားခဲ့သည်။

အစိုးရသစ်လက်ထက်တွင် ဒေါ်အောင်ဆန်းစုကြည်ဦးဆောင် ၍ ငြိမ်းချမ်းရေးလုပ်ငန်းစဉ် အရှိန် အဟုန်မြှင့်ဆောင်ရွက်နေသော် လည်း ယမ်းငွေ့များ မစဲနိုင်သေး ခြင်းက ပြည်သူများစိတ်တွင် စိုးရိမ်ပူပန်မှုများကို ဒီရေအလား တိုး ပွားစေခဲ့သည်။

  တရုတ်နယ်စပ်ကုန်သွယ် ရေးဒေသကို ၀င်ရောက်တိုက်ခိုက် ခဲ့သည့် ကေအိုင်အေ၊ TNLA နှင့် ကိုးကန့်အဖွဲ့များသည် အစိုးရနှင့် အပစ်အခတ်ရပ်စဲထားခြင်းမရှိဘဲ တပ်မတော်နှင့် ထိပ်တိုက်ရင်ဆိုင် မှုများ အဓိကဖြစ်ပွား
နေသည့် အ ဖွဲ့များဖြစ်သည်။ ထို့အပြင် ယင်း အဖွဲ့များမှ တစ်နိုင်ငံလုံး ပစ်ခတ် တိုက်ခိုက်မှု ရပ်စဲရေး သဘောတူ စာချုပ် (NCA) တွင်လည်း ပါဝင် ခြင်းမရှိပေ။ ပူးပေါင်းအဖွဲ့က လိုင် ဇာအခြေစိုက် ကေအိုင်အေမဟာမိတ် ရခိုင်အဖွဲ့ဖြစ်သည့် AA မှာလည်း ရှမ်းမြောက်ဒေသ တိုက်ပွဲများတွင် ပါဝင်ကြောင်း ထုတ်ပြန်ထားသည်။

ကိုးကန့်၊ TNLA နှင့် AA အ  ဖွဲ့များကို ယခင်အစိုးရလက်ထက်က ငြိမ်းချမ်းရေးလုပ်ငန်းစဉ်တွင် အသိအမှတ်ပြုထားခြင်းမရှိပေ။ အဆိုပါအဖွဲ့များသည် ငြိမ်းချမ်းရေး ဖိတ်ခေါ်ကမ်းလှမ်းပြီး နောက်ပိုင်းတွင်မှ လက်နက်စွဲကိုင်
တော်လှန်ခဲ့၍ လက်နက်စွန့်ရန်လိုအပ်ကြောင်း တပ်မတော်ဘက်ကအတိအလင်း ထုတ်ဖော်ပြောကြားထားသည်။

  ကေအိုင်အို ဥက္ကဋ္ဌအဖြစ် ဆောင်ရွက်သည့် တိုင်းရင်းသား တပ်ပေါင်းစုဖြစ်သော ညီညွတ် သော တိုင်းရင်းသားလူမျိုးများ ဖက်ဒရယ်ကောင်စီ (UNFC)မှ တစ်ဆင့် အစိုးရသစ်နှင့် တွေ့ဆုံ ညှိနှိုင်းမှုများ အဆက်မပြတ်ပြု လုပ်နေသော်လည်း သိသာထင် ရှားသည့် တိုးတက်မှုများမှာ လက် ရှိအချိန်အထိ ဖြစ်ပေါ်လာခြင်းမရှိ သေးပေ။ NCA လက်မှတ်ရေးထိုး ရန် အချက်ရှစ်ချက်ကို UNFC ဘက်က အဆိုပြုထားပြီး တစ်နိုင်ငံလုံး အပစ်အခတ် ရပ်စဲရေးကို တစ် ပြိုင်နက်တည်းကြေညာရန် အပါ အ၀င် အချက်လေးချက်ခန့်မှာ ပြီး ပြတ်ခြင်း မရှိသေးပေ။

 ထို့အပြင် တိုင်းရင်းသား လက်နက်ကိုင်များဘက်က စွဲကိုင် ထားသည့် အားလုံးပါဝင်ရေးမူနှင့် ပတ်သက်၍လည်း အဓိက ဆွေး နွေးညှိနှိုင်းရန် လိုအပ်နေဆဲဖြစ် သည်။ TNLA နှင့် ကိုးကန့်အဖွဲ့မှာ ကေအိုင်အေနှင့် မဟာမိတ်
ဖြစ် သော်လည်း UNFC မှ ယာယီနုတ် ထွက်ထားသည်။ အစိုးရသစ်လက် ထက်တွင် TNLA၊ AA၊ ကိုးကန့်အ ဖွဲ့ သုံးဖွဲ့နှင့် အလွတ်သဘောတစ် ကြိမ်တွေ့ဆုံခဲ့သော်လည်း ငြိမ်း ချမ်းရေးအတွက် ထူးခြားသည့် တိုးတက်မှု မရှိခဲ့ပေ။ ငြိမ်းချမ်းရေး ဆွေးနွေးပွဲများက ပြည်သူများ စောင့်မျှော်နေသည့် ရလဒ်မထွက် ပေါ်သေးချိန်တွင် တရုတ်နယ်စပ် ဒေသ၌ တိုက်ပွဲများ ဆက်လက် ဖြစ်ပွားခဲ့ခြင်းဖြစ်သည်။

နိုဝင်ဘာ၂၀ ရက်ကစ၍ ဖြစ် ပွားခဲ့သည့် ရှမ်းမြောက်ပိုင်းမှ တိုက်ပွဲများကြောင့် အရပ်သားကိုး ဦးထက်မနည်း သေဆုံးပြီး လုံခြုံ ရေးတပ်ဖွဲ့ဝင်များအပါအ၀င် ၂၁ ဦးထက်မနည်း ထိခိုက်ဒဏ်ရာရရှိ ခဲ့သည်။ တပ်မတော် အပါအ၀င် လုံခြုံရေးတပ်ဖွဲ့များနှင့် တိုင်းရင်း သားလက်နက်ကိုင်အဖွဲ့များဘက် က ထိခိုက်သေဆုံးမှုများရှိသော် လည်း အသေးစိတ်ထုတ်ပြန်ပြော ဆိုခြင်းများမရှိသေးပေ။

  မူဆယ်နယ်စပ်ကုန်သွယ် ရေးဒေသကို ၀င်ရောက်တိုက်ခိုက် မှုနှင့်ပတ်သက်၍ တပ်မတော်က ၎င်းတို့ဒေသများတွင် စစ်ရေးလှုပ် ရှားမှုများ တိုးမြင့်နေခြင်းကြောင့် တုံ့ပြန်ခြင်းဖြစ်သည်ဟု ပူးပေါင်း လက်နက်ကိုင်အဖွဲ့က ဆိုသည်။ ကန့်သတ်စစ် ဆောင်ရွက်ခြင်းဖြစ် သည်ဟု ကေအိုင်အိုကဆိုပြီး စစ် ဆင်ရေးကာလအတွင်း ရှမ်း မြောက်ဒေသ၌ ပြည်သူများအနေ ဖြင့် ခရီးသွားလာခြင်းများ မပြု လုပ်ရန်လည်း ၎င်းတို့က ထုတ်ပြန် ခဲ့သည်။

သို့သော် အရပ်သားပြည်သူ များကို ပစ်ခတ်ခြင်း၊ အဓိက နယ် စပ်ကုန်သွယ်ရေးလမ်းကြောင်း ဖြစ်သည့် မူဆယ်-လားရှိုး-မန္တ လေး လမ်းမကြီးတွင် ဖောက်ခွဲမှု များ ပြုလုပ်ခြင်းနှင့် အရပ်သားခရီး သည်တင်ကားများကို ဖျက်ဆီး ခြင်းများကြောင့် ဝေဖန်ပြစ်တင်မှု များလည်း မြင့်တက်လာသည်။ နိုင်ငံရေးပြဿနာကို နိုင်ငံရေးနည်း ဖြင့် ဖြေရှင်းသင့်ပြီး မလွှဲမရှောင် သာ တိုက်ပွဲများဖြစ်ပွားပါက ပြည် သူလူထုကို မထိခိုက်စေရန် လိုအပ်ကြောင်း လည်း လေ့လာသူ များက သုံးသပ်သည်။

‘‘လူထုကို မထိခိုက်အောင် ရှောင်ကြဉ်ဖို့လိုတယ်။ စစ်ဥပဒေ တွေကို တိတိကျကျလိုက်နာဖို့လို အပ်ပါတယ်’’ဟု ရှမ်းတိုင်းရင်း သားများ ဒီမိုကရေစီအဖွဲ့ချုပ် (SNLD) ပြောရေးဆိုခွင့်ရှိသူ ဦးစိုင်းလိတ်က မှတ်ချက်ပြုသည်။

တိုင်းရင်းသားလက်နက်ကိုင် ပူးပေါင်းအဖွဲ့က တပ်မတော် ဘက်က စစ်ရေးဖိအားများကြောင့် မလွှဲမရှောင်သာ ကန့်သတ် ပူး ပေါင်းစစ်ဆင်ရေးဆောင်ရွက်ရ ခြင်းဖြစ်သည်ဟုဆိုပြီး သမ္မတရုံး ၀န်ကြီးဌာန ပြောခွင့်ရပုဂ္ဂိုလ် ဦးဇော်ဌေးက ယခုကဲ့သို့ တုံ့ပြန် သည်။

 ‘‘အခု သေဆုံးဒဏ်ရာရတာ က ပြန်ပြီးတွက်လိုက်ရင် တပ်မ တော်သားရယ်၊ လုံခြုံရေးရဲတပ်ဖွဲ့ ၀င်ရယ်၊ အရပ်သားရယ် ဘယ်သူ များလဲဆိုရင် အရပ်သားက အ များဆုံးဖြစ်နေတယ်။ အရပ်သား အများဆုံးဖြစ်နေတာ တစ်ချက် တည်းနဲ့တင် ကန့်သတ်စစ်ဆိုတာ ကို ကျွန်တော်တို့ကငြင်းလို့ရတယ်၊ ပယ်ချလို့ရတယ်’’ဟု သမ္မတရုံး ၀န်ကြီးဌာန ဒုတိယညွှန်ကြားရေး မှူးချုပ် ဦးဇော်ဌေးက ပြောသည်။

ဦးဇော်ဌေးက နိုင်ငံ၏အ သက်သွေးကြော မူဆယ်နယ်စပ် ကုန်သွယ်ရေးလမ်းကြောင်းကို ရွေးချယ်တိုက်ခိုက်သည့်အကျိုး ဆက်များကို စဉ်းစားကြည့်နိုင်ပြီး အစိုးရ၏ အဓိကဆောင်ရွက်နေ သည့် ၂၁ရာစုပင်လုံလမ်းကြောင်း ကို အဆိုပါအဖွဲ့များက မယုံကြည် သည့်သဘော မေးခွန်းထုတ်စရာ ဖြစ်နေကြောင်း ဆက်လက်ပြော ကြားသည်။

ရှမ်းမြောက်ဒေသတွင် ဖြစ် ပွားခဲ့သည့်  တိုက်ပွဲဖြစ်စဉ်များက ငြိမ်းချမ်းရေးလုပ်ငန်းစဉ်များတွင် နှစ်ဖက်ယုံကြည်မှုတည်ဆောက် နေခြင်းကို ထိခိုက်စေကြောင်း စောင့်ကြည့်လေ့လာသူများကသုံး သပ်သည်။

တိုင်းရင်းသားလက်နက်ကိုင် ပူးပေါင်းအဖွဲ့က ၎င်းတို့ဒေသတွင် ၂၁ရာစုပင်လုံညီလာခံကျင်းပပြီးနောက်ပိုင်း တပ်မတော်၏ စစ်ရေးဖိအားပေးမှုများနှင့်ပတ်သက်၍ အစိုးရမှ တစ်စုံတစ်ရာထုတ်ဖော်ပြောဆိုခြင်းမရှိ၍လည်း ငြိမ်းချမ်းရေး လုပ်ငန်းစဉ် အတွက် ယုံကြည်မှုတည်ဆောက်ရန် ခဲယဉ်းစေကြောင်း ဆိုသည်။

ပူးပေါင်းအဖွဲ့မှ TNLA အ ထွေထွေအတွင်းရေးမှူး ဗိုလ်မှူး ကြီး တာ့ဘုန်းကျော်က ‘‘အရပ်သား အစိုးရကို ပြောချင်တာက မြန်မာနိုင်ငံရဲ့ ပြည်တွင်းစစ်ကို ရပ်စဲအောင်လုပ်ဖို့လိုတယ်။ အပြောနဲ့မဟုတ်ဘူး။ လက်တွေ့တကယ်
ဆောင်ရွက်ဖို့လိုတယ်။ အခုက အပြောတောင်မရှိဘူး။ ကျွန်တော်တို့ တိုင်းရင်းသားဒေသတွေ မှာ တိုက်ပွဲပြင်းထန်နေတယ်။ ဒေါ်အောင်ဆန်းစုကြည်က တစ်ခွန်းတောင် ၀င်မပြောဘူး။ ဒါက မြန်မာနိုင်ငံငြိမ်းချမ်းရေး တကယ်ရဖို့ အင်မတန်မှ ခက်ခဲပါတယ်။ အစိုးရရဲ့ ငြိမ်းချမ်းရေးမူကို သေချာပြန်လည် သုံးသပ်ဖို့လိုတယ်။ လက်တွေ့ကျကျ ဘယ်လိုအလုပ် လုပ်မယ်ဆိုတာကို ဆောင်ရွက်ဖို့လိုတယ်လို့ ပြောချင်ပါတယ်’’ဟု ဆိုသည်။

အစိုးရဘက်က တိုင်းရင်း သား လက်နက်ကိုင်အဖွဲ့များက နှစ်ဖက်သဘောတူညီချက်များကို လိုက်နာခြင်းမရှိဘဲ နယ်မြေချဲ့ထွင်ခြင်း၊ လူသစ်စုဆောင်းခြင်း၊ ဆက်ကြေးကောက်ခံခြင်းများ ပြုလုပ်နေခြင်းကြောင့် တပ်မတော်နှင့် တိုက်ပွဲများ ဖြစ်ပွားနေရခြင်းဖြစ်ကြောင်း တုံ့ပြန်သည်။

‘‘သူလှုပ်ရှားရမယ့် မြေအ တိုင်းအတာရှိတယ်။ ဘောင်ရှိ တယ်။ အဲဒီဘောင်ကိုကျော်ပြီး က စားတယ်။ ရွာသူရွာသားတွေကို ဖမ်းတာရှိတယ်။ ဒါတွေက တပ်မ တော်ပိုင်းက လက်တွေ့ကျတော့ သူတို့က ဖြေရှင်းရတာဖြစ်တယ်’’ ဟု ဦးဇော်ဌေးကပြောသည်။ဆက် လက်၍ ‘‘ဒီဟာတွေ တိုက်နေတာ ကို အစိုးရဘက်က ဘာမှမပြော ဘူး။ ကျွန်တော်တို့က ပြန်မေးချင် တယ်။ အဲဒီဟာတွေတိုက်နေတယ် ဆိုတာ သူတို့က ဘယ်လိုလုပ်ပြီး အဲဒီလို တိုက်ပွဲတွေ
ပြန်ဖြစ်နေတာ လဲ။ အဲဒါကို ကိုယ့်ဟာကိုယ် ပြန် မေးပါ။ ကျွန်တော်တို့က တပ်မ တော်ဘက်က လိုက်နေတာ မဟုတ်ဘူး။ ဒီဖြစ်စဉ်တွေ ဖြစ်သမျှအကုန်သိတယ်အစိုးရက’’ဟု ဆိုသည်။

ရှမ်းမြောက်ဒေသ တိုက်ပွဲ များနှင့် ပတ်သက်၍ စားပွဲဝိုင်းများ မှတစ်ဆင့် ဆွေးနွေးအဖြေရှာရန် လည်း စောင့်ကြည့်လေ့လာသူများက အကြံပြုတိုက်တွန်းကြသည်။ အစိုးရဘက်က တိုက်ပွဲဖြစ်စဉ်များနှင့်ပတ်သက်၍ စစ်ရေး နည်းလမ်းအရ ဆောင်ရွက်မှုများရှိသလို ဆွေးနွေးမှုများလည်း ပြုလုပ်နေကြောင်း ပြောသည်။

‘‘တစ်ဖက်မှာ ပဋိပက္ခဖြေရှင်း ရေးကို စားပွဲဝိုင်းနည်းအရ သွား မယ်။ တစ်ချိန်တည်းမှာပဲ ဒီဘက် က စစ်ရေးနည်းလမ်းနဲ့ လုပ်နေပါ တယ်’’ဟု ဦးဇော်ဌေးကဆိုသည်။

လာမည့် နိုင်ငံရေးဆွေးနွေးပွဲများတွင် NCA ရေးထိုးပြီးမှသာ တိုင်းရင်းသားလက်နက်ကိုင်အဖွဲ့ များအနေဖြင့် ပါဝင်နိုင်မည်ဖြစ် သည်။ ထို့ကြောင့် နှစ်ပေါင်း ၆၀ ကျော် ကြာမြင့်ခဲ့ပြီဖြစ်သည့် ပြည်တွင်းလက်နက်ကိုင် ပဋိပက္ခကို
ဖြေရှင်းနိုင်ရေး NCA ကို စားပွဲဝိုင်းမှတစ်ဆင့် ပြေလည်အောင်ညှိနှိုင်း နိုင်ရန် အရေးတကြီး လိုအပ်နေပြီ ဖြစ်သည်။

ဦးစိုင်းလိတ်က ခိုင်မာသည့် အာမခံချက်မပေးနိုင်ပါက NCA လက်မှတ်ရေးထိုးရန် တိုင်းရင်း သားအဖွဲ့များဘက်တွင် အခက်အခဲရှိနိုင်ကြောင်း သုံးသပ်သည်။ ‘‘လက်မှတ်ထိုးလို့ရှိရင် ဒီလိုနိုင်ငံ ရေးအရ အာမခံချက်ပေးနိုင်တယ် ဆိုရင်တော့ လက်မှတ်မထိုးဘဲနေ  ကြမှာမဟုတ်ဘူးလို့ မြင်ပါတယ်’’ ဟု ဦးစိုင်းလိတ်က သူ၏အမြင်ကို ပြေသည်။

ဆက်လက်၍ ‘‘အစိုးရဘက် က၊ UPDJC ဘက်က တိကျခိုင်မာတဲ့ နိုင်ငံရေးအာမခံချက်မပေးနိုင်သရွေ့ NCA သွားနေတဲ့လမ်းကြောင်းကြီးက ဇာတ်မျောကြီးဖြစ်နေမယ်လို့မြင်ပါတယ်’’ဟု ပြောသည်။ သို့သော် နိုင်ငံရေးပြဿနာကို လက်နက်ကိုင်နည်းလမ်းဖြင့်မဖြေရှင်းသင့်ကြောင်း ဦးစိုင်းလိတ်က ‘‘စစ်ရေးနည်းနဲ့ ဖြေရှင်းရင်တော့ ဘယ်သူကပဲစစပေါ့။ နိုင်ငံရေးအရ ဆွေးနွေးခွင့်မရှိလို့ စစ်တိုက်ရပါတယ် ဆိုလို့ရှိရင်လည်း တိုက်လာတာ နှစ်ပေါင်း ၆၀ ကျော် နေပြီလေ။ ဒီနည်းလမ်းက အဖြေဟုတ်ရဲ့လားဆိုတာကို ပြန်သုံးသပ်ဖို့လိုပါတယ်’’ဟု ဆက်လက်ပြောသည်။

နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ရှမ်းမြောက်တိုက်ပွဲများနှင့် ပတ် သက်၍ အောက်ပါအတိုင်း ကြေ ညာချက် ထုတ်ပြန်ထားသည်။ ‘လက်နက်ကိုင်ပဋိပက္ခများ ချုပ် ငြိမ်းပြီး ရေရှည်တည်တံ့သည့် ငြိမ်းချမ်းရေး တည်ဆောက်နိုင်ရေးအတွက် ပြည်ထောင်စုငြိမ်းချမ်းရေးညီလာခံ ၂၁ ရာစုပင်လုံသည်တစ်ခုတည်းသော လမ်းကြောင်းဖြစ်ပါသည်။ ထိုငြိမ်းချမ်းရေးဖြစ်စဉ်တွင် ပါဝင်သင့်ပါဝင်ထိုက်သူအားလုံး ပါဝင်နိုင်ရေးအတွက် ငြိမ်းချမ်းရေးတံခါးများ အစဉ်အမြဲဖွင့်လှစ်ထားပြီး တန်းတူရည်တူပါဝင်နိုင်ရေးအတွက် ကြိုဆိုဖိတ်ခေါ်လျက်ရှိပါသည်။ လက်နက်ကိုင်ပဋိပက္ခ ရပ်ဆိုင်းနိုင်ရေးအ တွက် တစ်နိုင်ငံလုံး ပစ်ခတ်တိုက် ခိုက်မှုရပ်စဲရေး သဘောတူညီချက် (NCA) လက်မှတ်ရေးထိုးရန် လိုအပ်လျက်ရှိပါသည်။

သို့ဖြစ်ပါ၍ ရှမ်းပြည်အရှေ့ မြောက်ဒေသတွင် ဖြစ်ပွားနေသော လက်နက်ကိုင်ပဋိပက္ခများ အမြန်ဆုံးငြိမ်းချမ်းနိုင်ရေးအတွက် နိုင်ငံတော်အစိုးရ၏ ငြိမ်းချမ်းရေးဖြစ်စဉ်တွင် အမြန်ဆုံးပါဝင်နိုင်ရေး၊ NCA တွင် အမြန်ဆုံးလက်မှတ်
ရေးထိုးပြီး ပစ်ခတ်တိုက်ခိုက်မှုရပ်စဲရေး၊ NCAရေးထိုးပြီးနောက် နှစ်ဖက်ချိုးဖောက်မှုများ မရှိစေရေးအတွက် စောင့်ကြည့်ဖြေရှင်း ရေးယန္တရားများ ပိုမိုခိုင်မာစေရန်အတွက် အရပ်ဘက်အဖွဲ့အစည်းများနှင့်အတူ ၀ိုင်းဝန်းဆွေးနွေး နည်းလမ်းရှာဖွေရေး၊ ပြည်သူအများ မျှော်လင့်တောင့်တနေသည့် ငြိမ်းချမ်းရေးပန်းတိုင်ကို  အရောက်လှမ်းနိုင်ရေး၊ ၂၀၁၇ ဖေဖော်ဝါရီလအတွင်း ကျင်းပမည့် ပြည်ထောင်စုညီလာခံ ၂၁ ရာစုပင်လုံ ဒုတိယအစည်းအဝေးတွင် တန်းတူညီတူပါဝင်နိုင်ရေး စသည်တို့ကို ရှေးရှုလျက် ငြိမ်းချမ်းရေးခရီးကို အတူတကွလက်တွဲ၍ လျှောက်လှမ်းကြပါရန် အလေးအနက်တိုက်တွန်းအပ်ပါသည်’ ဟု ဒေါ်အောင်ဆန်းစုကြည်က ထုတ်ပြန်ထားသည်။ အောင်ခိုင်

No comments:

Post a Comment