Saturday, November 19, 2016

ရာထူးမှ အထုတ်ခံရမှု အကြောင်းပြချက် မပေးဟု ဒု ဝန်ကြီး ဒေါက်တာ ထွန်းဝင်း ပြော

အာဏာရ အမျိုးသား ဒီမိုကရေစီ အဖွဲ့ချုပ် (NLD) အစိုးရ ဦးဆောင်နေသည့် ဒီမိုကရေစီ အစိုးရလက်ထက်တွင် ရာထူးမှ ထုတ်ပယ်ခံရသည့် အပေါ် အကြောင်းပြချက် ပေးခြင်းမရှိကြောင်း ထုတ်ပယ်ခံရသူ စိုက်ပျိုးရေး၊ မွေးမြူရေးနှင့် ဆည်မြောင်း ဒုတိယ ဝန်ကြီး ဒေါက်တာ ထွန်းဝင်းက ပြောသည်။ “ကျနော်ကို နုတ်ထွက်ခိုင်းတယ်။ မထွက်နိုင်ဘူးဆိုတော့ တခြား ဌာနတခုကို ပြောင်းခိုင်းတယ်။ ကျနော် ဒီကိုလာတာ နေရာအတွက် လာတာမဟုတ်ဘူး။ အလုပ်လုပ်ချင်လို့ လာတာပါ။ ကိုယ်ကျွမ်းကျင်တဲ့ နေရာမှာပဲ နေချင်တယ်” ဟု ဒေါက်တာ ထွန်းဝင်းက ဧရာဝတီသို့ ပြောသည်။ ၄င်းကို နိုဝင်ဘာလ ၅ ရက်နေ့ကပင် သမ္မတရုံးက နုတ်ထွက်ရန် ညွှန်ကြားခဲ့သော်လည်း ငြင်းဆိုခဲ့ကြောင်း၊ ဘာကြောင့် ထွက်ခိုင်းသည်ကိုလည်း မေး၍ မရကြောင်း သိရသည်။



ဒေါက်တာ ထွန်းဝင်းကို နေပြည်တော် ကောင်စီသို့ ပြောင်းခိုင်းခဲ့ခြင်း ဖြစ်ကြောင်း သိရသည်။

စိုက်ပျိုးရေး၊ မွေးမြူရေးနှင့် ဆည်မြောင်း ဒု ဝန်ကြီး ဒေါက်တာ ထွန်းဝင်းကို သမ္မတ ဦးထင်ကျော်က တာဝန်မှ ရပ်စဲလိုက်ကြောင်း နိုဝင်ဘာ ၁၈ ရက်နေ့ နေ့စွဲဖြင့် အမိန့်တရပ် ထုတ်ပြန်ခဲ့သည်။

“ဒီမိုကရေစီခေတ်မှာ အခုလို လုပ်ခံရတာ စိတ်မကောင်းဘူး။ ကျနော်က အလုပ်တွေကို အားသွန်ခွန်စိုက် လုပ်တော့ ပြောမှား ဆိုမှား၊ လုပ်မှား ကိုင်မှားတွေတော့ ရှိတာပေါ့။ ဒါပေမယ့် အကုန် စေတနာနဲ့ချည်း လုပ်တာ။ အခုလို အရေးယူလိ့မ်မယ်လို့ မထင်ခဲ့ဘူး” ဟု ဒေါက်တာ ထွန်းဝင်းက ဆိုသည်။

“အခုလို ထုတ်ပယ်ခံရတာကို နိုင်ငံတော်မှာ အဓိက ဆုံးဖြတ်တဲ့သူဆီက လာတာလို့ သိရတော့ ပိုစိတ်မကောင်းဘူး။ ကျနော်ဘက်က မရပ်တည်ဘဲ တခြားဘက်က ရပ်တည်သွားတယ်။ ဘာကြောင့် နုတ်ထွက်ခိုင်းတယ်ဆိုတာကို အကြောင်းပြချက် မပေးဘူး” ဟု ဒေါက်တာ ထွန်းဝင်းက ဆက်ပြောသည်။

ယခုကိစ္စနှင့် ပတ်သက်၍ သမ္မတရုံး ဒု ညွှန်ချုပ် ဦးဇော်ဌေးကမူ သဘောထား မှတ်ချက် မပေးလိုကြောင်း၊ ယခင် ဖြစ်စဉ်များတွင်လည်း ထုတ်ပယ်သည့် အကြောင်းကို ဖော်ပြလေ့ မရှိကြောင်း ဧရာဝတီသို့ ပြောသည်။

ယခုအချိန်တွင် ဒေါက်တာ ထွန်းဝင်းသည် နေပြည်တော်တွင် ရှိနေသေးပြီး ညနေတွင် ရန်ကုန်မြို့သို့ ပြန်ရန် ပစ္စည်း သိမ်းနေပြီဟု သိရသည်။

ဒေါက်တာ ထွန်းဝင်းသည် သူ၏ ဒုဝန်ကြီး သက်တမ်းအတွင်း လုပ်ဆောင်ချက် တချို့နှင့် ပြောဆိုချက်များကြောင့် နေပြည်တော် အသိုင်းအဝိုင်းတွင် နာမည်ကောင်း ရနေသူတဦး ဖြစ်သည်ဟု သိရသည်။

ဒေါက်တာ ထွန်းဝင်း ယခုကဲ့သို့ အထုတ်ခံရခြင်းသည် NLD အစိုးရလက်ထက် အဆင့်မြင့်အရာရှိတဦး ပထမဆုံးအကြိမ် ထုတ်ပယ်ခံရခြင်းလည်း ဖြစ်သည်။ ထက်နိုင်ဇော်

No comments:

Post a Comment