Friday, November 18, 2016

ဂျာနယ်လစ်ဇင်နှင့် မိမိဘာသာ ဆင်ဆာဖြတ်ရခြင်း

ဂျာနယ်လစ်တို့၏ တာဝန်မှာ အမှန်တရားကို ပြည်သူများထံ အစီရင်ခံရခြင်းဖြစ်သည်။ သို့သော် “စာနယ်ဇင်း လွတ်လပ်ခွင့်ကို မြှင့်တင်ပါမည်” ဟု အခိုင်အမာဆိုထားသော မီဒီယာများ၌ အလုပ်လုပ်နေသည့် အချို့သော ဂျာနယ်လစ်များသည်ပင်လျှင် သူတို့၏ရေးသားမှု သို့မဟုတ် အစီရင်ခံမှုများ၌ “ကိုယ့်ဘာသာ ဆင်ဆာဖြတ်ရခြင်း”  ပြုလုပ်ကြသည်။ မီဒီယာများ၌ ဆင်ဆာဖြတ်ခြင်းဟူသည် “ဆင်ဆာဖြတ်ခြင်း”  (Censorship) နှင့် “ကိုယ့်ဘာသာ ဆင်ဆာဖြတ်ရခြင်း” (Self-Censorship) ဟူ၍ ပုံစံနှစ်ရပ်ရှိသည်။ နိုင်ငံတော် အစိုးရတစ်ရပ်၊ နိုင်ငံရေးပါတီ တစ်ခု၊ ဘာသာရေး သို့မဟုတ် ပုဂ္ဂလိက အဖွဲ့အစည်းတစ်ရပ်က သတင်းအချက်အလက်များအား ပြည်သူများထံ ရောက်ရှိခြင်း မရှိအောင် တားဆီးခြင်းကို “ဆင်ဆာဖြတ်ခြင်း” ဟု ခေါ်သည်။ ဂျာနယ်လစ်များ ကိုယ်တိုင်က သတင်းအချက်အလက်များကို ဖြတ်တောက်ထားရခြင်းကိုမူ “မိမိဘာသာ ဆင်ဆာဖြတ်ရခြင်း” ဟု  ခေါ်သည်။ ဂျာနယ်လစ်များ မိမိဘာသာ ဆင်ဆာဖြတ်ရခြင်းမှာ အချို့သော သတင်းအချက်အလက်များကို ထုတ်ဝေဖြန့်ချိခဲ့လျှင် ဖြစ်လာမည့် အရာများကို ကြောက်ရွံ့ရသောကြောင့်ဖြစ်သည်။ ဂျာနယ်လစ်များသည် မိမိတို့ကိုယ်တိုင် သို့မဟုတ် မိမိတို့မိသားစုအား ထိခိုက်မည်ကို ကြောက်ရွံ့ရခြင်း၊ တရားစွဲဆိုခံရမည်ကို ကြောက်ရွံ့ရခြင်းနှင့် အခြား စီးပွားရေးနှင့် ဆိုင်သည့် အကျိုးဆက်များကို ကြောက်ရွံ့ရခြင်းတို့ကြောင့် ဖြစ်သည်။
မိမိဘာသာ ဆင်ဆာဖြတ်ရခြင်းကို အစိုးရအဖွဲ့များ၌ တရားဝင် မီဒီယာများကို ဆင်ဆာ ဖြတ်တောက်သည့် မူဝါဒများရှိသည့် လူ့အဖွဲ့အစည်းများနှင့် ဂျာနယ်လစ်များအနေဖြင့် ကန့်သတ်ထားသော အချက်များကို မလိုက်နာပါက ထောင်ချခြင်း၊ ဒဏ်ငွေရိုက်ခြင်းနှင့် အလုပ်မှ ထုတ်ပယ်စေခြင်းတို့ ပြုလုပ်သည့် လူ့အဖွဲ့အစည်းများအတွင်း အကြီးအကျယ် ကျင့်သုံးရသည်။


ဂျာနယ်လစ်များအနေဖြင့် စစ်ရေးဆိုင်ရာ လျှို့ဝှက်ချက်များကို မတော်တဆ ဖော်ပြမိခြင်း မရှိအောင် ကာကွယ်ရန် စစ်ဘက်ဆိုင်ရာ အာဏာပိုင်များ၏ အကြံပြုချက်များကို တမင်လိုက်နာကာ ဆင်ဆာဖြတ်ရသည်လည်း ရှိသည်။
၂၀၀၉ ခုနှစ်တွင် နယူးယောက်တိုင်းမ် သတင်းစာသည် အာဖဂန်နစ္စတန်တွင် သတင်းထောက်တစ်ဦး ပြန်ပေးဆွဲခံရသည့် သတင်းကို ခုနစ်လကြာ (သူလွတ်မြောက်လာချိန်အထိ) ရေးသားဖော်ပြခြင်း မပြုဘဲ ထားခဲ့ဖူးသည်။ အဆိုပါ သတင်းထောက်နှင့် အခြားဓားစာခံများအပေါ် ကျရောက်မည့် အန္တရာယ်ကို လျော့နည်းစေလိုသောကြောင့် ဖြစ်သည်။ ရုရှားနိုင်ငံတွင် ၂၀၀၀ ပြည့်လွန် နှစ်များအတွင်း အစိုးရက မီဒီယာများကို လွှဲယူလိုက်ခြင်းနှင့် ပူးပေါင်းခိုင်းခြင်းတို့ ပြုလုပ်ခဲ့ပြီးနောက် မိမိဘာသာ ဆင်ဆာဖြတ်ရခြင်းကို အကြီးအကျယ် ကျင့်သုံးကြရတော့သည်။ ရုရှား၌ ၂၀၁၄-၂၀၁၅ ခုနှစ်တွင် မတရားအသင်း ဥပဒေများ ထွက်ပေါ်လာသည့်အခါ အနေအထားမှာ ပိုမိုဆိုးရွား၍ သွားတော့သည်။

မိမိဘာသာ ဆင်ဆာဖြတ်ရခြင်းကို ဈေးကွက် မျှော်မှန်းချက်များအတွက် ပြုလုပ်ရလေ့ ရှိသည်များလည်း ရှိ၏။ ဥပမာအားဖြင့် အယ်ဒီတာတစ်ဦးအနေဖြင့် ကြော်ငြာထည့်သူများ၊ စာဖတ်သူများနှင့် ပိုင်ရှင်များ ဒေါသဖြစ်စေနိုင်သည့် အကြောင်းအရာများကို သိစိတ်ဖြင့်ဖြစ်စေ မသိစိတ်ဖြင့်ဖြစ်စေ ရှောင်ရှားသည်လည်း ရှိသည်။ ယင်းသို့ ရှောင်ရှားခြင်းမှာ  တိုက်ရိုက်သဘောအရကြည့်လျှင် အလုပ်ထုတ်ခံရမည်ကို ကြောက်ခြင်းကဲ့သို့သော မိမိဘ၀ ရှင်သန်ရေးကို ကာကွယ်ရန်ဖြစ်ပြီး သွယ်ဝိုက်သဘောအရကြည့်လျှင် သက်ဆိုင်ရာစာနယ်ဇင်း၏ စီးပွားရေးအကျိုးအရ ဖြစ်သည်။ ယင်းအမျိုးအစားကို 'ဆင်ဆာအပျော့စား' (Soft-Censorship) ဟုခေါ်သည်။ သို့သော် ယင်းသည်လည်း ဂုဏ်သိက္ခာရှိသော ဂျာနယ်လစ်များ မလုပ်သင့်သည့်ကိစ္စဖြစ်သည်။

မည်သို့ပင်ဆိုစေကာမူ မိမိဘာသာ ဆင်ဆာဖြတ်ရခြင်းသည် နိုင်ငံသားများ၏ သတင်း သိပိုင်ခွင့်နှင့် ဂျာနယ်လစ်များ၏ စာနယ်ဇင်း လွတ်လပ်ခွင့်ကို ငြင်းပယ်မှုဖြစ်သောကြောင့် ဒီမိုကရေစီ စံနှုန်းများနှင့် ကိုက်ညီမှု မရှိပါကြောင်း The Daily Eleven သတင်းစာက ရေးသားအပ်ပါသည်။

No comments:

Post a Comment