Tuesday, November 22, 2016

၆၆(ဃ)ကို အဘယ်ကြောင့်

အများပြည်သူ လိုက်နာရန် ပြဋ္ဌာန်းထားသည့် ဥပဒေတစ်ရပ် က လူတစ်စုတစ်ဖွဲ့၏ သဘောရိုး ဖြင့်မဟုတ်သည့် လုပ်ငန်းဆောင် တာတို့ကို ထိခိုက်ဖွယ်ရာရှိသော အကြောင်းကြောင့် ပယ်ဖျက်ရမည်ဆိုသည်ကို ကျွန်တော်မထောက်ခံပါ။ သို့သော် ထိုဥပဒေသည် သဘောရိုးဖြင့်ပြုသည့် အများပြည်သူကိုပါ ဘေးအန္တရာယ်ကျရောက်စေမည်ဆိုပါက ပယ်ဖျက်ရမည်ပဲ ဖြစ်ပါသည်။ အချိန်အခါကောင်းဖြစ်သည် ဟု မဆိုသာနိုင်စေကာမူ ဆက် သွယ်ရေးဥပဒေပုဒ်မ ၆၆(ဃ)ကို ပြင်ဆင်ပယ်ဖျက်ရန် သင့်၊ မသင့် တရားဥပဒေရှုထောင့်မှ ဆွေးနွေး လိုခြင်းဖြစ်ပါသည်။ ယခုအခါ ပြည်သူများအ ကြား အငြင်းပွားဖွယ်ရာ ကျော် စောထင်ရှားနေသည့် ဆက်သွယ် ရေးဥပဒေကို ပထမအကြိမ်လွှတ် တော်သက်တမ်းကာလ ၂၀၁၃ တွင် ပြဋ္ဌာန်းခဲ့ပြီး ယင်းဥပဒေတွင် အခန်း ၁၉ ခန်းနှင့် ပုဒ်မပေါင်း ၈၉ ခု ပါဝင်ပါသည်။



ယင်းဥပဒေပုဒ်မ ၆၆ တွင် ‘မည်သူမဆို အောက်ပါပြုလုပ်မှု တစ်ရပ်ရပ်ကို ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူအား သုံးနှစ်ထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ် စေ၊ ဒဏ်နှစ်ရပ်စလုံးဖြစ်စေ ချ မှတ်ရမည်’ဟု ဖော်ပြထားပြီး ပုဒ်မ ခွဲ (ဃ)တွင် ဆက်သွယ်ရေးကွန် ရက်တစ်ခုခုကို အသုံးပြု၍ ပုဂ္ဂိုလ် တစ်ဦးဦးအား ခြောက်လှန့်တောင်း ယူခြင်း၊ အနိုင်အထက်ပြုခြင်း၊ မတရားတားဆီးကန့်ကွက်ခြင်း၊ အသရေဖျက်ခြင်း၊ နှောင့်ယှက် ခြင်း၊ မလျော်ဩဇာသုံးခြင်း (သို့ မဟုတ်) ခြိမ်းခြောက်ခြင်းဟု ဖော် ပြထားသည်။

ပုဒ်မခွဲ (ဃ)တွင် ဖော်ပြသော စကားရပ်များအနက် ‘ဆက်သွယ် ရေးကွန်ရက်’ဆိုသည့် စကားရပ် တစ်ခုတည်းကိုသာ ယင်းဥပဒေ ပုဒ်မ ၃(ဃ)၌ အနက်အဓိပ္ပာယ်ဖွင့်ဆိုခဲ့ပြီး ခြောက်လှန့်တောင်းယူ ခြင်း၊ အနိုင်အထက်ပြုခြင်း၊ မတရားတားဆီးကန့်ကွက်ခြင်း၊ အသရေ ဖျက်ခြင်း၊ ခြိမ်းခြောက်ခြင်း အစရှိသည့်စကားရပ်များကို အနက်အဓိပ္ပာယ်ဖွင့်ဆိုထားကြောင်း မတွေ့ရချေ။ ယင်းစကားရပ်များ အဓိပ္ပာယ်ဖွင့်ဆိုချက်ကို ‘ရာဇသတ်ကြီး’တွင်သာ တွေ့ရှိရပြီး အဆိုပါ ပြုလုပ်မှုများနှင့်စပ်လျဉ်း၍လည်း  ပြစ်ဒဏ်များပြဋ္ဌာန်းထားရာ ယင်းပြဋ္ဌာန်းချက်များမှာ ယခုတိုင် အတည်ဖြစ်ဆဲရှိပါသည်။

ရာဇသတ်ကြီးပြဋ္ဌာန်းချက် ကို အကြမ်းဖျင်းဖော်ပြပါမည်။ ခြောက်လှန့်တောင်းယူမှုကို ကျူး လွန်လျှင် ပုဒ်မ ၃၈၄ အရ ထောင် ဒဏ်သုံးနှစ်အထိ၊ ရာဇဝတ်မကင်း သော အနိုင်အထက်ပြုမှုကို ကျူး လွန်လျှင် ပုဒ်မ ၃၅၂ အရ ထောင် ဒဏ်သုံးလအထိ၊ မတရားတား ဆီးကန့်ကွက်မှု (သို့မဟုတ်) မတရားဖမ်းဆီးချုပ်နှောင်မှုကို ကျူးလွန်လျှင် ပုဒ်မ ၃၄၁ အရ အလုပ်မဲ့ထောင်ဒဏ်တစ်လအထိ၊ အသရေဖျက်မှုကို ကျူးလွန်လျှင် ပုဒ်မ ၅၀၀ အရ အလုပ်မဲ့ ထောင်ဒဏ် ၂ နှစ်အထိ၊ ရာဇဝတ်မကင်း သော ခြောက်လှန့်မှု၊ စော်ကားမှု နှင့် စိတ်ငြိုငြင်စေမှုတို့ကို ကျူးလွန်လျှင် ပုဒ်မ ၅၀၆ အရ ၂ နှစ်အထိထောင်ဒဏ် စသည်ဖြင့်ပြဋ္ဌာန်း လျက် မြန်မာနိုင်ငံတရားရုံးများနှင့် တရားဥပဒေဆိုင်ရာအဖွဲ့အစည်း များက လိုက်နာကျင့်သုံးခဲ့သည် မှာ နှစ်ပရိစ္ဆေဒများစွာ ကြာမြင့်ခဲ့ ပါပြီ။

ပြစ်မှုတစ်ခုချင်းတွင် တိကျ သော အဓိပ္ပာယ်ဖွင့်ဆိုချက်များ နှင့် ပြစ်ဒဏ်ချက်များပါရှိပြီးဖြစ် ပါလျက် ‘ဆက်သွယ်ရေးကွန်ရက် ကို အသုံးပြု၍’ဟူသော စကား ရပ်ကို ဆက်သွယ်ရေးဥပဒေတွင် ထပ်မံထည့်သွင်း၍ ‘သုံးနှစ်ထက် မပိုသော ထောင်ဒဏ်’ဟူ၍ ရော ထွေးပြဋ္ဌာန်းလိုက်ခြင်းသည် မှန် ကန်မျှတမှု ရှိ၊ မရှိ၊ သဘာဝကျမှု ရှိ၊ မရှိ ဆင်ခြင်သင့်ပြီဖြစ်ပါသည်။

သဘာဝကျသည်ဟု လက်ခံ ရန် ခဲယဉ်းသောအချက်တစ်ချက် ကို ဦးစွာပြောလိုပါသည်။

ပုဒ်မ ၆၆(ဃ)ပါ ဆက်သွယ်ရေးကွန်ရက်တစ်ခုခုကို အသုံးပြု ၍ ခြောက်လှန့်တောင်းယူခြင်း၊ အသရေဖျက်ခြင်း စသည်တို့မှာ ဖြစ်ကောင်းဖြစ်နိုင်ပါသည်။ ယင်း ပြစ်မှုများမှာ ဆက်သွယ်ရေးကွန် ရက်ကို အသုံးပြု၍ ကျူးလွန်နိုင် သော ပြစ်မှုများဖြစ်သည်ဟု လက် ခံနိုင်စရာရှိပါသည်။ သို့သော် ဆက်သွယ်ရေးကွန်ရက်ကို အသုံးပြု၍ မတရားတားဆီးကန့်ကွက် ခြင်းဆိုသည်ကိုမူ စဉ်းစားရပါ မည်။ ဆက်သွယ်ရေးကွန်ရက်ကို အသုံးပြု၍ အနိုင်အထက်ပြုခြင်း ဆိုသည်ကိုလည်း စဉ်းစားရပါ မည်။

မတရားတားဆီးကန့်ကွက် မှုကို ရာဇသတ်ကြီးပုဒ်မ ၃၃၉ က ဤသို့ ဖွင့်ဆိုပါသည်။

‘တစ်ဦးတစ်ယောက်သော သူ သွားလာပိုင်ခွင့်ရှိသောအရပ် သို့ မသွားမလာရအောင်တားဆီး ရန် မည်သူမဆို ထိုသူအား မိမိအ လိုအလျောက် ပိတ်ပင်လျှင် ထို ပိတ်ပင်သူသည် မတရားတားဆီး ကန့်ကွက်သည်မည်၏’။ ဥပမာ- လမ်းကို ပိတ်နိုင်ကြောင်း သဘော ရိုးနှင့် ယုံကြည်ခြင်းမရှိဘဲ မောင် ဖြူသည် မောင်မဲသွားလာပိုင်ခွင့်ရှိ သောလမ်းကို ပိတ်ပင်၏။ ထို့ ကြောင့် မောင်မဲသည် တားဆီးခံ ရသည်။ မောင်ဖြူသည် မောင်မဲ ကို မတရားတားဆီးကန့်ကွက် သည်မည်၏။ ဆိုပါစို့။ မောင်ဖြူ သည် မောင်မဲသွားလာပိုင်ခွင့်ရှိ သောလမ်းကို မသွားနိုင်ရန် ဆက် သွယ်ရေးကွန်ရက်တစ်ခုဖြစ် သည့် Facebook သုံး၍ ပိတ်ပင် ၏။ မောင်မဲသည် တားဆီးခံရ သည်။ ဤပြစ်မှုမျိုးသည် ကိုယ် တိုင်ပြုလုပ်ကျူးလွန်မှသာလျှင် အထမြောက်နိုင်ပြီး ‘ဆက်သွယ် ရေးကွန်ရက်ကို အသုံးပြု၍’အထမြောက်အောင် ကျူးလွန်ဖို့ရာ ဖြစ် နိုင်ခြေ ရှိ၊ မရှိ တော်တော့်ကို စဉ်း စားရမည့်ကိစ္စဖြစ်ပါသည်။ အထ မြောက်နိုင်သည်ဆိုစေဦး မည်သို့ သော ပြုလုပ်မှုက ပို၍ကြီးလေး သော ပြစ်ဒဏ်ချမှတ်သင့်သည်ကို ဆင်ခြင်ရန်ဖြစ်ပါသည်။

မောင်မဲအား ကိုယ်တိုင် ကိုယ်ကျ မတရားတားဆီးကန့် ကွက်မှုပြုသော မောင်ဖြူသည် ရာဇသတ်ကြီးပုဒ်မ ၃၄၁ အရ အ လုပ်မဲ့ထောင်ဒဏ် တစ်လအထိ သာ ကျခံရနိုင်သည်။ Facebookကို အသုံးပြု၍ မတရားတားဆီး ကန့်ကွက်မှုပြုပါက မောင်ဖြူ သည် ဆက်သွယ်ရေးဥပဒေပုဒ်မ ၆၆(ဃ)အရ ထောင်ဒဏ်သုံးနှစ် အထိ ကျခံရနိုင်သည်။ သင့်လျော် မည်ဟု မထင်ပါ။

ရာဇသတ်ကြီးအရ သုံးနှစ်၊ ၂ နှစ်၊ သုံးလ၊ တစ်လ စသည်ဖြင့် ချမှတ်နိုင်သော ပြစ်မှုများဖြစ်စေ ကာမူ ‘ဆက်သွယ်ရေးကွန်ရက် ကို အသုံးပြု၍ ကျူးလွန်ခြင်း’ဖြစ် ပါက ပုဒ်မ ၆၆(ဃ)အရ ‘ထောင် ဒဏ်သုံးနှစ်အထိ’ ပြစ်ဒဏ်ဖြစ် သွားသည့်အတွက် ပေါ်ပေါက် လာနိုင်သော ဆိုးကျိုးများရှိပါ သည်။

ဆက်သွယ်ရေးဥပဒေသည် အထူးဥပဒေဖြစ်ရာ အထူးဥပဒေ တစ်ရပ်တွင် ထောင်ဒဏ်သုံးနှစ် နှင့် ယင်းအထက် ပြစ်ဒဏ်သတ် မှတ်ပါက ‘ရဲက ဝရမ်းမပါဘဲ ဖမ်း ဆီးခွင့်ရှိသည့်’ (ရဲအရေးပိုင်မှုဟု ဆိုလိုသည်) အမှုအခင်းအဖြစ်သို့ လည်းကောင်း၊ ‘အာမခံမပေးနိုင် သော ပြစ်မှု’အဖြစ်သို့လည်း ကောင်း အလိုလိုရောက်ရှိသွားပါ သည်။ (ရာဇဝတ်ကျင့်ထုံးဥပဒေ၊ နောက်ဆက်တွဲဇယား-၂၊ စာ တိုင်-၃ နှင့် စာတိုင်-၅ ကိုညွှန်း)

(၁) ရာဇသတ်ကြီးပုဒ်မ ၅၀၀ (အသရေဖျက်မှု)သည် ရဲအရေး မပိုင်ပါ။ နစ်နာသူက တိုင်တန်း ခြင်းမဟုတ်လျှင် မည်သည့်တရား ရုံးကမျှ အရေးယူခွင့်မရှိပါ။ ကျေ အေးခွင့်ရှိပါသည်။ သို့သော် ဆက်သွယ်ရေးဥပဒေပုဒ်မ ၆၆(ဃ)အရအသရေဖျက်မှုသည် ရဲအရေးယူ ပိုင်သောအမှုဖြစ်သည့်အတွက် မည်သူကမဆို တရားလိုပြုတိုင် တန်းနိုင်သည့် သဘောဖြစ်ပါ သည်။ ဥပမာ-ဝန်ကြီး (သို့မဟုတ်)ဂေါပကတစ်ဦးဦးအား ဆက် သွယ်ရေးကွန်ရက်ကို အသုံးပြု၍ အသရေဖျက်မှုကျူးလွန်လျှင် (ထို ဝန်ကြီးက အရေးယူခြင်းမပြုစေ လိုကာမူ) ဆယ်အိမ်ခေါင်းကတိုင်လျှင်လည်း ရဲကအမှုဖွင့်ပေးရပါ မည်။ ပလတ်စတစ်ကောက်သူက တိုင်လျှင်လည်း ရဲကအမှုဖွင့်ပေး ရပါမည်။ ကျေအေးခွင့်မရှိပါ။ (ရဲအရေးပိုင်မှုဖြစ်သွားသောကြောင့် ပေါ်ပေါက်လာသောဆိုးကျိုးဖြစ် ပါသည်)

(၂) အာမခံမပေးနိုင်သော ပြစ်မှု ဖြစ်လာခြင်းကြောင့် ပေါ်ပေါက် လာသည့် ဆိုးကျိုးများအနက် အ ထင်ရှားဆုံးတစ်ချက်မှာ မညီမျှမှု ဖြစ်ပါသည်။ ဝန်ကြီးက ဆယ် အိမ်ခေါင်းအား အသရေပျက်စေ ပါသည်ဟု တိုင်တန်းသောအမှုကို ရဲက လွယ်လင့်တကူဖမ်းဆီး၍ရမန်ယူချုပ်နှောင်ခြင်းပြုနိုင်သော် လည်း ဆယ်အိမ်ခေါင်းက တိုင် တန်းသောအမှုတွင် ရဲကဝန်ကြီး (သို့မဟုတ်) အခွင့်အာဏာရှိသူ တစ်ယောက်ကို လွယ်လင့်တကူ ဖမ်းဆီး၍ ရမန်ယူချုပ်နှောင်ခြင်း ပြုနိုင်ပါမည်လား။ စဉ်းစားဖို့ပင် မလိုတော့ဟု ထင်ပါသည်။

(၃) အချို့သောကိစ္စများတွင် အ ခွင့်အာဏာရှိသူက အာမခံမပေး နိုင်သော ပြစ်မှုဖြင့် အရေးယူပေး ရန် တိုင်တန်းသည်ကို ပြစ်မှုမြောက်မည်၊ မမြောက်မည် မသေချာစေကာမူ ဖမ်းဆီးချုပ်နှောင်ခြင်းခံရ မည်ကို စိုးရိမ်သဖြင့် အမှားအ ယွင်းမရှိခဲ့သူကပင် ဝန်ချတောင်းပန်ရသည့် မတော်တဆမှုမျိုးအ ထိ ဖြစ်လာနိုင်ပါသည်။ အခွင့်အာ ဏာရှိသူနှင့် အခွင့်အာဏာမဲ့သူ အကြား နာကျင်ခံစားရစေနိုင်သော မညီမျှမှုဖြစ်လာစေပါသည်။

(၄) အကျည်းတန်ဆုံးပြဿနာ တစ်ရပ်မှာ ရာဇသတ်ကြီးတွင် အတိအလင်းပြဋ္ဌာန်းပြီးသည့် အလားတူပြစ်မှုများကို အထူးဥပဒေ တစ်ခုတွင် ထပ်မံပြဋ္ဌာန်းလိုက် ခြင်းကြောင့် ကွဲလွဲမှု၊ ရှုပ်ထွေးမှု၊ မညီမျှမှုများနှင့် အခွင့်အာဏာရှိ သူက လိုသလိုဆွဲယူအသုံးပြုနိုင် သည့်အခွင့်အရေးကို ဖန်တီးပေး ရာရောက်သွားခြင်းပဲဖြစ်ပါသည်။

(၅) ထို့ကြောင့် ဆက်သွယ်ရေး ဥပဒေပုဒ်မ ၆၆(ဃ)ကို ခြွင်းချက် မရှိ ပယ်ဖျက်သင့်ပါသည်။

×××××××××××××××××

‘ကျဉ်တုပ်ခံဝံ့ မခံဝံ့’ဟူသော ဝတ္ထုတစ်ပုဒ်ကို လွန်ခဲ့သော နှစ်ပေါင်းသုံးဆယ်က ဖတ်ခဲ့ရပါသည်။

(ထိုစဉ်က) ကျောင်းသား ခေါင်းဆောင် မောင်ထွန်းနောင် ကို အက်စ်ဘီဟုခေါ်သော အထူး သတင်းတပ်ဖွဲ့က မန္တလေးထောင်သို့ အဝတ်အိတ်ခေါင်းစွပ်၍ ဖမ်းဆီးသွားသည်။ ကိုထွန်းနောင်ကိုအိပ်ခွင့်မပြုဘဲ တစ်ညလုံးစစ် ကြောသည်။ မျက်နှာကို မီးမောင်း ကြီး ထိုးထားသည်။ ခေါင်းကို ရေတဗွမ်းဗွမ်းလောင်းချသည်။ သည်းမခံနိုင်သည့်အဆုံး ကိုထွန်း နောင်က သတင်းတပ်ဖွဲ့အရာရှိ ကို ကြိမ်းသည်။

‘‘ခင်ဗျားတို့ မတရားဘူး။ ကျုပ်တို့အာဏာရလာရင် သိ မယ်’’

‘‘မပူပါနဲ့ ကိုထွန်းနောင်ရယ်၊ ခင်ဗျားတို့ အာဏာရရင်လည်း ကျုပ်တို့ကို လိုအပ်နေဦးမှာပါ’’

ဤအချက်ကိုလည်း ထည့် သွင်းစဉ်စားလိုက စဉ်းစားနိုင်ပါ သည်။ ဆက်သွယ်ရေးဥပဒေပုဒ်မ ၆၆(ဃ)ကို ခြွင်းချက်မရှိ ပယ်ဖျက်သင့်ပါသည်။။ ပြေလွင်မြင့်

No comments:

Post a Comment