Tuesday, November 22, 2016

မဏ္ဍိုင်နှစ်ခု ရှေ့ခရီး ဘယ်လိုဆက်မလဲ

၂၀၁၅ ခုနှစ် ရွေးကောက်ပွဲအလွန် လွှတ်တော်သက်တမ်း တစ်နှစ်ပြည့်ခဲ့ပါပြီ။ ဒီအချိန်မှာပဲ ဥပဒေပြုရေးမဏ္ဍိုင် လွှတ်တော်အခန်းကဏ္ဍနဲ့ အုပ်ချုပ်ရေးမဏ္ဍိုင် အစိုးရအဖွဲ့တို့အကြား ရှေ့ခရီး ဘယ်လိုဆက်မလဲဆိုတာ မေးစရာဖြစ်လာပါတယ်။

အုပ်ချုပ်ရေးပိုင်း ပြောင်းလဲမှု
ရွေးကောက်ပွဲအပြီး NLD ပါတီ ဦးဆောင်တဲ့ အုပ်ချုပ်ရေးအဖွဲ့ အစိုးရတာဝန်ကို ယူပြီးချိန် အုပ်ချုပ်ရေးပိုင်းမှာ သိသာထင်ရှားတဲ့ ပြောင်းလဲမှုတွေ လုပ်ခဲ့ပါတယ်။ အစိုးရဟောင်းက ဖွဲ့စည်းထားတဲ့ ၀န်ကြီးဌာန ၃၆ ခုကို ၂၁ ခုအထိ လျှော့ချပြီး ပြင်ဆင်ဖွဲ့စည်းခဲ့တာ ဖြစ်ပါတယ်။ နောက်ပိုင်းမှာ နိုင်ငံတော်အတိုင်ပင်ခံရုံး ၀န်ကြီးဌာနတစ်ခု တိုးချဲ့လိုက်တာကြောင့် ၀န်ကြီးဌာန ၂၂ ခု ဖြစ်ခဲ့ပါတယ်။ ၀န်ကြီးဌာန ၂၂ ခု ဆိုပေမယ့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နိုင်ငံခြားရေးနဲ့ သမ္မတရုံးဝန်ကြီး တာဝန်ယူခဲ့တာကြောင့် ပြည်ထောင်စုဝန်ကြီး ဦးရေဟာ ၂၁ ဦး ရှိခဲ့ပါတယ်။ ဒုတိယ၀န်ကြီး ၁၀ ဦး ရှိပါတယ်။ နိုဝင်ဘာ ၁၉ ရက်မှာ စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန ဒုတိယ၀န်ကြီး ဒေါက်တာထွန်းဝင်းကို တာဝန်က ရပ်စဲလိုက်တာကြောင့် ဒုတိယ၀န်ကြီး ကိုးဦးပဲ ကျန်ပါတော့တယ်။



ဒါကြောင့် လက်ရှိအစိုးရအဖွဲ့မှာ ၀န်ကြီး ၂၁ ဦး၊ ဒုတိယ၀န်ကြီး ကိုးဦးနဲ့ အုပ်ချုပ်ရေး ဦးဆောင်ယန္တရား လည်ပတ်နေပြီး ဒီယန္တရားမှာ အဓိကကျနေသူတွေဟာ အမြဲတမ်း အတွင်းဝန်တွေနဲ့ ညွှန်ကြားရေးမှူးချုပ်တွေ ဖြစ်နေပါတယ်။

အမြဲတမ်းအတွင်းဝန်တွေနဲ့ ညွှန်ကြားရေးမှူးချုပ်တွေက အစိုးရဟောင်းယန္တရားမှာ အဓိကကျတဲ့နေရာမှာ လုပ်ဆောင်ခဲ့သူတွေ ဖြစ်တာကြောင့် သုံးတတ်ရင် ဆေး၊ မသုံးတတ်ရင် ဘေးဖြစ်မယ့် အခြေအနေ ရှိနေပါတယ်။

ဒေါက်တာထွန်းဝင်း ဥပမာ

စိုက်ပျိုးရေး ပညာရှင်တစ်ဦးဖြစ်တဲ့ ဒေါက်တာထွန်းဝင်းကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယ၀န်ကြီး တာဝန်ပေးချိန်မှာ “လူမှန်၊ နေရာမှန်” ဖြစ်တယ်ဆိုတဲ့ ချီးကျူးထောပနာပြုမှုတွေ ရှိခဲ့ပါတယ်။

ဒါပေမဲ့ သူ့ကို တာဝန်ကရပ်စဲချိန်မှာ အကြောင်းပြချက် နှစ်ခုထွက်ပေါ်ခဲ့ပါတယ်။ ပထမတစ်ခုက ညှိနှိုင်းဆောင်ရွက်မှု အားနည်းခြင်းလို့ ဆိုပါတယ်။ ဒုတိယတစ်ခုက အုပ်ချုပ်ရေးကိစ္စတွေမှာ ချော့မွေ့အောင် ဆောင်ရွက်နိုင်မှုမရှိဘူးလို့ ဆိုခဲ့ပါတယ်။

ဒီနှစ်ချက်ကို ဒေါက်တာထွန်းဝင်းက ရှင်းရှင်းလင်းလင်း ထုချေမှုရှိခဲ့တယ်လို့ သိရပါတယ်။ အုပ်ချုပ်ရေးဆိုင်ရာ ကိစ္စရပ်ချောမွေ့အောင် မလုပ်နိုင်မှုဆိုတဲ့ ပြောဆိုမှုမှာ သူနဲ့အစိုးရဟောင်း ယန္တရားမှာ ပါဝင်ခဲ့သူတွေဖြစ်တဲ့ အမြဲတမ်းအတွင်းဝန် ဒေါက်တာတင်ထွဋ်၊ စိုက်ပျိုးရေးဦးစီးဌာန ညွှန်ကြားရေးမှူးချုပ် ဒေါက်တာ ရဲတင့်ထွန်း၊ ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန ညွှန်ကြားရေးမှူးချုပ် ဦးကျော်မြင့်လှိုင် တို့အကြား အဆင်မပြေတာတွေ ရှိခဲ့တာကိုလည်း ၀န်ခံပြောဆိုမှု ရှိခဲ့တယ်လို့ သိရပါတယ်။

ညှိနှိုင်းဆောင်ရွက်မှု အားနည်းတယ်ဆိုတဲ့ အပိုင်းမှာလည်း သူ့ဘက်က လုပ်ဆောင်ခဲ့တာတွေကို ဒေါက်တာထွန်းဝင်း တင်ပြခဲ့တာတွေ ရှိပါတယ်။

ဥပမာအားဖြင့် ပုဂ္ဂလိကလုပ်ငန်းရှင်တွေထံ ငှားရမ်းထားတဲ့ ၀န်ကြီးဌာနပိုင်မြေ၊ အဆောက်အအုံတွေနဲ့ ဆက်စပ်ပြီး ငှားရမ်းထားတဲ့မြေ ၂၅၈၉၆ ဒသမ ၇၈ ဧက၊ အဆောက်အအုံ ၂၇၅၄ ခုကို စာရင်းပြုစုပြီး နိုင်ငံတော်နဲ့ ၀န်ကြီးဌာနအတွက် အကျိုးပြုစေဖို့ ပြန်လည်သုံးသပ် အရေးယူဆောင်ရွက်ဖို့ တင်ပြချက်ကို တာဝန် စတင်ထမ်းဆောင်ချိန်ကတည်းက တင်ပြမှုရှိခဲ့တယ်လို့ သိရပါတယ်။ ဒါပေမဲ့ ဒါတွေကို ၀န်ကြီးဌာနပိုင်းက အရေးယူဆောင်ရွက်မှုမရှိခဲ့ဘဲ နိုင်ငံတော်သမ္မတရုံး အကြောင်းကြားစာရမှ တင်ပြခဲ့တယ်လို့ ဒေါက်တာထွန်းဝင်းရဲ့ ပြောဆိုချက်တွေအရ သိရပါတယ်။

အနီးကပ်ဆုံး ဖြစ်စဉ်အနေနဲ့ ဆည်ရေကို ယခင်အတိုင်း နွေစပါးဧက နှစ်သန်းအတွက်သာ မိုးတွင်းမှာ သိုလှောင်ခြင်းမပြုစေဘဲ မိုးစပါး ဧက ၁၅ သန်းအတွက် အချိန်မရွေးပေးနိုင်အောင် အဆိုပြုချက်၊ ဆည်များအတွင်း ငါးမျိုးစုံ ထည့်သွင်းမွေးမြူစေပြီး မြန်မာနိုင်ငံမှာရှိတဲ့ အလုပ်လက်မဲ့ လေးသန်းအတွက် စုပေါင်းမွေးမြူစနစ်နဲ့ အလုပ်အကိုင်၊ ၀င်ငွေဖန်တီးပေးဖို့ အဆိုပြုချက်၊ ဧရာဝတီတိုင်း မြစ်ဝကျွန်းပေါ်ဒေသမှာ နွေရာသီ မြစ်ရေတင် စီမံကိန်းတွေလုပ်ပြီး မိုးရာသီကာလ သီးနှံတစ်သီးသာ စိုက်ပျိုးခြင်းထက် အထွက်နှုန်း သုံးဆတိုးစေခြင်း အဆိုပြုချက် ဒီသုံးချက်ကို ဒေါက်တာထွန်းဝင်းက တင်ပြခဲ့တယ်လို့ ဆိုပါတယ်။

အဲဒီသုံးချက် ပယ်ချခံခဲ့ရာကအစပြုပြီး ဒါကိုပြန်လည် စောဒကပြု ရာကတစ်ဆင့် နောက်ဆုံးတာဝန်က ရပ်စဲခံရတဲ့ အခြေအနေအထိ ဆိုက်ရောက်ခဲ့တာ ဖြစ်ပါတယ်။

ဒီဖြစ်စဉ်မှာ စိုက်ပျိုးရေး ပညာရှင်တစ်ဦးရဲ့ စိတ်အားထက်သန်မှုနဲ့ အုပ်ချုပ်ရေးယန္တရားပိုင်းက အယူအဆမတူတွေအကြား ထိပ်တိုက်တိုးမှုရှိခဲ့တာကို သက်သေပြနေပြီး ပညာရှင်တစ်ဦး အုပ်ချုပ်ရေးပိုင်းက ဖယ်ထုတ်ခံလိုက်ရတာပဲ နိုင်ငံအတွက် နစ်နာမှု ဖြစ်စေခဲ့ပါတယ်။ ဒီနေရာမှာ NLD ပါတီ ဗဟိုအလုပ်အမှုဆောင်၊ ဗဟိုအတွင်းရေးမှူးအဖွဲ့ဝင် ဦးဝင်းထိန်က (ဒေါက်တာထွန်းဝင်း၏ ပြောဆိုချက်များအရ) တစ်စိတ်တစ်ပိုင်းအားဖြင့် ပါဝင်ပတ်သက်နေတာကလည်း အငြင်းပွားစရာ ဖြစ်စေခဲ့ပါတယ်။

ဘယ်လိုအခြေအနေ ကြုံနေသလဲ

ဒေါက်တာထွန်းဝင်း ကိစ္စဟာ အများဝေဖန်စရာ ဖြစ်ခဲ့ပေမယ့် ကျန်တဲ့ဌာနတွင်းမှာ သူ့လိုအခြေအနေ ရင်ဆိုင်နေရသူ ဘယ်လောက်ရှိနေသလဲဆိုတာ စဉ်းစားရမယ့် ကိစ္စဖြစ်ပါတယ်။

လက်ရှိအစိုးရ ခန့်အပ်ထားတဲ့ ပြည်ထောင်စုဝန်ကြီးတွေထဲမှာ အခြေအနေအချိန်အခါအရ ပြောသင့်ပြောထိုက်၊ လုပ်သင့်လုပ်ထိုက်တာတွေ လုပ်နေတယ်လို့ ပြည်သူအများက ထင်ကြေးပေးခံထားရတဲ့ ၀န်ကြီး သုံးဦး ရှိပါတယ်။

ပထမတစ်ဦးက ပို့ဆောင်ရေးနှင့် ဆက်သွယ်ရေး ၀န်ကြီးဌာန ပြည်ထောင်စုဝန်ကြီး ဦးသန့်စင်မောင် ဖြစ်ပါတယ်။ ဒုတိယတစ်ဦးက ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး ဖြစ်ပြီး တတိယတစ်ဦးက လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး ဖြစ်ပါတယ်။

သူတို့သုံးဦးဟာ အခုချိန်အထိ အောင်မှတ်အထက်မှာ ရှိနေဆဲဖြစ်ပြီး လွှတ်တော်ကို လာရောက်ဖြေဆိုတဲ့ သူတို့ရဲ့ ဖြေကြားချက်တွေဟာလည်း ပြည်သူတွေကြားမှာ ကျေနပ်စရာ ဖြစ်စေခဲ့ပါတယ်။

ဥပမာအားဖြင့် သီခြားအတည်ပြုနိုင်ခြင်း မရှိခဲ့ပေမယ့် ရန်ကုန်ဆေးရုံကြီးအနီး ကျန်းမာရေးဝန်ကြီးဌာန ပိုင်မြေ၊ နိုင်ငံပိုင်မြေပေါ်မှာ တည်ဆောက်မယ့် Parkway ဆေးရုံစီမံကိန်း ရပ်ဆိုင်းတဲ့ကိစ္စမှာ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက (အောက်ကတင်ပြလာတာတွေကို မစဉ်းစားဘဲ) သူတစ်ဦးတည်းရဲ့ ဆင်ခြင်ဆုံးဖြတ်မှုနဲ့ စီမံကိန်းကို ရပ်ဆိုင်းခဲ့တယ်လို့ သတင်းထွက်ပေါ်မှုတွေ ရှိခဲ့ပါတယ်။

ဘယ်လိုပဲဖြစ်ဖြစ် ဒေါက်တာမြင့်ထွေးလိုမျိုး လုပ်ဆောင်မှုနဲ့ ဆုံးဖြတ်မှုမျိုးဟာ အတုယူစရာဖြစ်ပြီး စံနမူနာပြ တစ်ခုလည်း ဖြစ်ပါတယ်။

အခြား ပြည်ထောင်စုဝန်ကြီးတွေ အနေနဲ့လည်း သူတို့လို လုပ်ကိုင်ပြောဆိုချင်စိတ်ရှိမှာကို သံသယဖြစ်စရာ မရှိပါဘူး။ ဒါပေမဲ့ သူတို့တွေ ဘယ်လိုအခက်အခဲမျိုးနဲ့ ရင်ဆိုင်နေရသလဲဆိုတာ သူတို့ကိုယ်တိုင် တရားဝင်ထုတ်ပြောမှပဲ ပြည်သူတွေသိနိုင်မှာ ဖြစ်ပါတယ်။ ထုတ်မပြောနိုင်ရင် ပြည်သူတွေအကြား အထင်လွဲမှုတွေ ရှိလာနိုင်ပါတယ်။ ဒီအတွက် ဥပမာတစ်ခုက စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဒေါက်တာသန်းမြင့် ဖြစ်ပါတယ်။

ဒေါက်တာသန်းမြင့် ဥပမာ

ပြီးခဲ့တဲ့ နိုဝင်ဘာ ၁၆ ရက်က ကျင်းပခဲ့တဲ့ ပြည်သူ့လွှတ်တော် ဒုတိယအကြိမ် တတိယပုံမှန် အစည်းအဝေးမှာ ပန်းတောင်းမဲဆန္ဒနယ်က လွှတ်တော်ကိုယ်စားလှယ် ဒေါ်ခင်နှင်းသစ်ရဲ့ မေးမြန်းမှုကို စီးပွားရေးနှင့် ကူးသန်းရောင်းဝယ်ရေး ပြည်ထောင်စုဝန်ကြီး ဒေါက်တာသန်းမြင့်က လုံလောက်တဲ့ဖြေဆိုမှု မပေးနိုင်ခဲ့ပါဘူး။

“အရပ်ရပ်ကုန်ဈေးနှုန်း တရိပ်ရိပ်တက်နေမှုအား ထိန်းချုပ်မည့်အစီအစဉ် ရှိ၊ မရှိ” အပေါ် ဒေါ်ခင်နှင်းသစ်က မေးမြန်းတာ ဖြစ်ပါတယ်။

ဒါကို ဒေါက်တာသန်းမြင့်က ပြန်ဖြေတဲ့အခါ ငွေကြေးဖောင်းပွမှု အခြေအနေ၊ ကုန်ဈေးနှုန်းမြင့်လာတဲ့ ကိန်းဂဏန်း ဖော်ပြချက်ဒါတွေကိုပဲ အသေးစိတ်ပြောဆိုခဲ့ပြီး ထိန်းချုပ်မယ့် အစီအစဉ်ကို မဖြေနိုင်ခဲ့ပါဘူး။ ဒီအတွက်လည်း မေးမြန်းတဲ့မေးခွန်းကို ထိထိရောက်ရောက် ဖြေဆိုဖို့ပြည်သူ့လွှတ်တော်ဥက္ကဋ္ဌ ဦးဝင်းမြင့်က သတိပေးခဲ့ရပါတယ်။

“ပြည်ထောင်စုဝန်ကြီးအနေနဲ့ ပန်းတောင်း မဲဆန္ဒနယ်မှ ဒေါ်ခင်နှင်းသစ် မေးတဲ့မေးခွန်းကို ထိထိရောက်ရောက်လေး ဖြေစေချင်ပါတယ်။ ဒီပြင်ဟာမဟုတ်ပါဘူး။ မေးတဲ့မေးခွန်းက အရပ်ရပ်ကုန်ဈေးနှုန်း တရိပ်ရိပ်တက်နေမှုအား ထိန်းချုပ်မည့် အစီအစဉ် ရှိ၊ မရှိကို မေးတာပါ။ အခုဒီမှာက ငွေကြေးဖောင်းပွမှု အခြေအနေတွေ ရှင်းလင်းတင်ပြတယ်။ ပြည့်စုံမှုရှိပါတယ်။ ကိုယ်စားလှယ် အားလုံးလည်း ဗဟုသုတရပါတယ်။ နောက်တစ်ခါ ကုန်ဈေးနှုန်း တက်လာတဲ့ အကြောင်းရင်းတွေလည်း အကျယ်တ၀င့် ပြောသွားပါတယ်။ ပြီးတဲ့အခါကျတော့ ကုန်ဈေးနှုန်း မြင့်မားလာတဲ့ နှုန်းထားတွေကိုလည်း အသေးစိတ်ပြောသွားပါတယ်။ ကျွန်တော်တို့ ကိုယ်စားလှယ်တွေ ဗဟုသုတရပါတယ်။ သို့သော် ကျွန်တော်တို့က သတ်မှတ်ချိန်နဲ့  ပြည်ထောင်စုဝန်ကြီးဌာနက ဖြေရတဲ့အခါ ဖြစ်တာကျတော့ ကျွန်တော်တို့အခု ငါးမိနစ် နှစ်ကြိမ်တိုးပြီးတော့ ဆယ်မိနစ်အထိ ပေးထားပါတယ်။ မေးတဲ့မေးခွန်းက ထိန်းချုပ်မည့် အစီအစဉ် မေးတာပါ။ ဒီတက်တဲ့ အကြောင်းရင်း၊ တက်တဲ့ နှုန်းထားတွေ၊ ငွေကြေးဖောင်းပွတဲ့ အခြေအနေတွေ အဲဒီဟာတွေကို အကျယ်တ၀င့် အသေးစိတ်ပြောမယ့်အစား ကုန်ဈေးနှုန်းတက်တဲ့ အခြေအနေကို ထိန်းချုပ်မယ့် အစီအစဉ်မေးတာပါ။ အဲဒီလို တိုတိုနဲ့လိုရင်းကို သတ်မှတ်ချိန်အတွင်းမှာ ပြီးစေချင်ပါတယ်” လို့ ဦးဝင်းမြင့်က သတိပေးခဲ့တာပါ။

ဒီလိုသတိပေးပြီးလို့ ပြန်ဖြေချိန်မှာလည်း တိတိကျကျ ဖြေကြားမှုမရှိတဲ့အတွက် ဒေါ်ခင်နှင်းသစ်က ထပ်ဆင့်မေးမြန်းခဲ့ပါတယ်။

ဒီတစ်ကြိမ်မှာတော့ ပြည်သူ့လွှတ်တော်ဥက္ကဋ္ဌ ဦးဝင်းမြင့်ရဲ့ ကြားဝင်ပြောဆိုမှုနဲ့အတူ ဖြေဆိုဖို့အဆင်သင့် မဖြစ်သေးတာကြောင့် နောက်မှဖြေဆိုခွင့်ပြုဖို့ ဒေါက်တာသန်းမြင့် မေတ္တာရပ်ခံခဲ့ပါတယ်။

အစိုးရပိုင်းက ကုန်ဈေးနှုန်းထိန်းချုပ်နိုင်မှု ရှိ၊ မရှိအပေါ် ဒေါ်ခင်နှင်းသစ်ရဲ့ မေးခွန်းကနည်းနာအရ လွဲချော်မှု ရှိကောင်းရှိနိုင်ပေမယ့် ကုန်ဈေးနှုန်း တက်နေတာကို လှိမ့်ခံနေရတဲ့ ပြည်သူတွေအတွက် အစိုးရက ဘာလုပ်ပေးမလဲဆိုတာ မျှော်လင့်ချက် ဖြစ်စေခဲ့ပါတယ်။ လုပ်ပေးနိုင်တဲ့ အစီအစဉ်နဲ့ အကြောင်းပြဖြေကြားမှု မရေရာတဲ့အခါ မေးတဲ့မေးခွန်းထက် ဖြေဆိုမှုအပေါ် စိတ်ပျက်မှု ဖြစ်စေခဲ့ပါတယ်။

ဒေါက်တာသန်းမြင့်ရဲ့ ဖြေဆိုမှုကို ကြည့်ရင်လည်း ကြိုတင်ရေးသားထားတဲ့ စာရွက်ကို ကြည့်ပြီးဖြေဆိုတာ ဖြစ်နေတဲ့အတွက် စာမှာပါဝင်တဲ့ အကြောင်းအရာတွေဟာ သူကိုယ်တိုင် ရေးသားထားသလား၊ သူ့ရဲ့အောက်မှာ လုပ်ဆောင်နေသူတွေက တင်ပြထားတာလားဆိုတာ မသဲကွဲမှု ဖြစ်စေပါတယ်။ တကယ်တော့ အတွေ့အကြုံများစွာ ရှိထားပြီးဖြစ်တဲ့ ဒေါက်တာသန်းမြင့်အဖို့ ဒေါ်ခင်နှင်းသစ်ရဲ့ မေးခွန်းကို လက်တန်းဖြေဆိုမယ်ဆိုရင်လည်း ဖြေနိုင်တဲ့အရည်အချင်း သူ့မှာရှိပါတယ်။

ဘယ်လိုဝေဖန်ကြသလဲ

ဒေါက်တာသန်းမြင့်ရဲ့ ဖြေဆိုမှုအပေါ် လွှတ်တော်ကိုယ်စားလှယ်တွေကိုယ်တိုင် ဝေဖန်ပြောဆိုမှုတွေ ရှိခဲ့ပါတယ်။ ဒါကလည်း အရင်အစိုးရ၊ အရင်လွှတ်တော်သက်တမ်းမှာ ကြုံတွေ့ခဲ့ရပြီးဖြစ်လို့ ဝေဖန်ခဲ့တာ ဖြစ်ပါတယ်။ လွှတ်တော်အမေးနဲ့ ၀န်ကြီးဌာနအဖြေ ကွဲလွဲမှုတွေဟာ ဒီအချိန်မှာ မရှိသင့်တော့ပါဘူး။

“၀န်ကြီးဌာနတွေကို လွှတ်တော်မှာ လာဖြေဖို့ ဖိတ်လိုက်တဲ့အခါ လာဖြေကြတယ်။ လာဖြေတဲ့အခါ ၀န်ကြီးဌာနအများစုက အောက်ကဌာနဆိုင်ရာတွေက ရေးပေးလိုက်တာတွေကို လာဖတ်တာများတယ်။ အဲဒီလို လာဖတ်တာများတဲ့အတွက် လွှတ်တော်ကိုယ်စားလှယ်တွေက နောက်ဆက်တွဲ မေးခွန်းတွေမေးတဲ့အခါ အဲဒီဝန်ကြီးတွေ ပြန်ဖြေရတာ တော်တော်အခက်အခဲ တွေ့တာကို အရင်လွှတ်တော်တုန်းကလည်း ကြုံခဲ့ရတယ်။ အခုလည်းကြုံနေရတယ်” လို့ ပြည်သူ့လွှတ်တော်ကိုယ်စားလှယ် ဦးဘရှိန်က ဆိုပါတယ်။

“လွှတ်တော်ကို လာဖြေတဲ့ဝန်ကြီးက ကိုယ်ရေးတဲ့စာကို လွှတ်တော်မှာ လာဖြေတာမှမဟုတ်ဘဲ။ လွှတ်တော်က မေးခွန်းမေးလိုက်ရင် မေးခွန်းမှာ ၀န်ကြီးဌာနတစ်ခုမက နှစ်ခုသုံးခုမက ဆက်စပ်ဌာနတွေလည်း ပါလာတယ်။ အဲဒီမေးခွန်းတွေကို အဲဒီဌာနတွေက ဖြေလိုက်တယ်။ ဖြေလိုက်တဲ့ဟာကို စုပေါင်းပြီးတော့လာဖြေမယ့် ၀န်ကြီးဌာနက ရေးလိုက်တယ်။ ၀န်ကြီးရေးတာမဟုတ်ဘူး။ ဌာနမှာ ညွှန်ချုပ်လောက်ရှိမှာပေါ့။ ပြည်နယ်မှာဆိုရင်လည်း ပြည်နယ်မှူးလောက် ရှိမှာပေါ့။ အဲဒီလူတွေက ရေးတယ်။ ရေးတဲ့ဟာကို ၀န်ကြီးကလာဖတ်တာပဲ။ လာဖတ်တဲ့အခါ အောက်ခြေမှာ တကယ်ဖြစ်နေတဲ့ အဖြစ်အပျက်တွေနဲ့ တလွဲတွေအများကြီးပဲ” လို့ ဦးဘရှိန်က ဆက်ပြောခဲ့ပါတယ်။

ဒါပေမဲ့ စွမ်းဆောင်ရည်ရှိတဲ့ ၀န်ကြီးတစ်ဦးအနေနဲ့ဆိုရင် ဒီိလိုမျိုးလုပ်ဆောင်မှာ မဟုတ်ဘူးလို့ ရွေးကောက်ပွဲ လေ့လာစောင့်ကြည့်ရေး ဆောင်ရွက်ခဲ့သူ ကိုမင်းသူဇင်က ပြောခဲ့သလို ဘာမှမပြောင်းလဲ အောက်ခြေကတင်ပြတဲ့အတိုင်း ဆက်လုပ်နေမယ်ဆိုရင် လွှတ်တော်လည်း သိက္ခာကျသလို၊ ဖြေဆိုသူဝန်ကြီးရဲ့ ဂုဏ်သိက္ခာလည်း ထိခိုက်မယ်လို့ နိုင်ငံရေး အကျဉ်းသားဟောင်းများအဖွဲ့က ဦးထွန်းကြည်က ပြောခဲ့ပါတယ်။

“(လွှတ်တော်က) မေးခွန်းတစ်ခု မေးတယ်ဆိုတာ အဲဒီမေးခွန်းကို သူတို့အနည်းဆုံး တစ်လလောက်တော့ အချိန်ရတယ်ဗျ။ တစ်လလောက် အချိန်ရရင် အဲဒီအပိုင်းကိုတော့ ဆင်းနိုင်မှာမဟုတ်ဘူး။ ဆင်းနိုင်မှာ မဟုတ်ဘူးဆိုရင် သက်ဆိုင်ရာပေါ့လေ။ ညွှန်မှူးတို့ဘာတို့ပေါ့။ အောက်ခြေကလူတွေက အဲဒါနဲ့ ပတ်သက်ပြီး ဖြေရှင်းချက်ပေးလိမ့်မယ်။ ဖြေရှင်းချက်ပေးတာကို ယူလာလိမ့်မယ်။ ယူတယ်ဆိုတာက အချက်အလက်တွေပဲ ယူလာလိမ့်မယ်။ ဒါပေမဲ့ တချို့မေးခွန်းတွေက ပေါ်လစီပိုင်းဆိုင်ရာ ကိုယ်ကတာဝန်ယူပြီး ပြောရမယ့်အပိုင်းတွေ ရှိတယ်။ အဲဒီတော့ ပေါ်လစီပိုင်းဆိုင်ရာတွေ မပါဘူး။ သူတို့လုပ်ပြီးပြီ၊ လုပ်မယ်၊ မလုပ်နိုင်ဘူး။ ဒါပဲ။ အဲဒီတော့ သူတို့အရင်က လုပ်ခဲ့တဲ့ဟာတွေ လုပ်ခဲ့တဲ့ဟာတွေဆိုတာ ဦးသိန်းစိန်လက်ထက်က လုပ်ခဲ့တာတွေလည်း အဲဒါတွေ ပြန်ပြောင်းပြောတယ်။ ကျွန်တော်တို့က အဲဒီလို မဖြစ်စေချင်ဘူး။ တချို့ဝန်ကြီးတွေက ပေးထားတဲ့ဟာ တကယ်ဆိုရင် ရှည်ရှည်မျောမျောကြီး ဖြစ်နေတယ်ဆိုရင် ဖြတ်တောက်ပြီးတော့ တိုတိုနဲ့လိုရင်း ထိမိအောင်ဖြေရမယ်။ အဲဒါမျိုးမဟုတ်ဘဲနဲ့ ပေးလိုက်တဲ့အတိုင်း အောက်က ရေးပေးလိုက်တဲ့အတိုင်း ၏သည်မလွဲ ဖြေနေကြတာ မြင်နေရတယ်။ ဒါဝန်ကြီးတစ်ဦးရဲ့ အရည်အချင်းမဟုတ်ဘူး။ သူကသူကိုယ်တိုင် သိထားတဲ့ အချက်အလက်တွေနဲ့ အောက်ခြေက တင်ထားတာတွေနဲ့ အချက်အလက်တွေနဲ့ စုပေါင်းပြီးမှ အဖြေကို ချပေးရမှာ။ အဲဒါမျိုးချပေးနိုင်တာ တချို့ပဲရှိတယ်။ တော်တော်များများကတော့ စိတ်ပျက်ဖို့ကောင်းတယ်” လို့ ပြည်သူ့လွှတ်တော်ကိုယ်စားလှယ် ဦးဦးလှစောကလည်း ဝေဖန်ခဲ့ပါတယ်။

ထိန်းကျောင်းခြင်း

လက်ရှိအခြေအနေတွေနဲ့ ပတ်သက်ပြီး ၀န်ကြီးဌာန၊ ၀န်ကြီးဌာနတွေရဲ့ စွမ်းဆောင်ရည်ပြည့်စေဖို့၊ အောက်ခြေက အဟန့်အတားတွေကို ကျော်လွှားနိုင်ဖို့ဆိုရင် လွှတ်တော်ရဲ့ ထိန်းကျောင်းမှုက အရေးပါလာပါတယ်။ မဏ္ဍိုင်နှစ်ခုစလုံးက ပြည်သူ့အတွက်ဆိုတာကို ဦးတည်ပြီး ၀န်ကြီးဌာနတွေမှာ စီမံခန့်ခွဲမှု အမှားအယွင်းတွေရှိမယ်ဆိုရင် လွှတ်တော်က ထောက်ပြဖော်ထုတ်ဖို့ တာဝန်ရှိသလို ၀န်ကြီးဌာန၊ ပြည်ထောင်စုဝန်ကြီးတွေ အပိုင်းကလည်း လွှတ်တော်က မေးမြန်းတာတွေကို တိတိကျကျ၊ ရှင်းရှင်းလင်းလင်း ဖြေဆိုဖို့ တာဝန်ရှိနေပါတယ်။

ပြည်သူ့လွှတ်တော်ကိုယ်စားလှယ် ဒေါက်တာမောင်သင်းကတော့ လက်ရှိဖြစ်နေတဲ့ အခြေအနေတွေအပေါ် အားနည်းချက်၊ အားသာချက်တွေကို ထောက်ပြပြီး အရင်အစိုးရထက်ပိုဖြစ်သင့်တဲ့ အခြေအနေကို ပြောခဲ့ပါတယ်။

“တချို့ဟာတွေက သူတို့ပြတဲ့ ဓာတ်ပုံတွေက ဘာဖြစ်လဲဆိုရင် ဒီကမေးခွန်းမေးပြီးတော့ လှုပ်ရှားတဲ့ ဥစ္စာမျိုးလေးတွေရှိတယ်။ ဆိုလိုတာက တိတိကျကျ ပီပီပြင်ပြင်နဲ့ သူတို့လုပ်တာမရှိဘူး။ အဲဒီလိုပုံစံမျိုးလေးတွေပေါ့။ အဲလိုဟာမျိုးတွေကျ ကျေနပ်စရာမရှိဘူး။ တချို့ဟာတွေကျတော့ သူတို့လက်တွေ့ အကောင်အထည်ဖော်နေတဲ့ လုပ်ငန်းတွေတော့ ရှိတာပေါ့။ ကျေးရွာမီးလင်းရေးတို့ ဘာတို့၊ တချို့လုပ်ငန်းတွေမှာ တကယ့်ကို အကောင်အထည်ဖော် ဆောင်ရွက်နေတာရှိတယ်။ ရာသီဥတု ဆိုးရွားတဲ့ဒဏ်ကြောင့် ဘာတွေရှိပါသလဲ မေးတဲ့အခါမှာ သူတို့လက်တွေ့ ဆောင်ရွက်နေတာရှိတယ်။ ဒါတွေကျ အားရစရာပါ။ အခုချိန်မှာတော့ အားနည်းမှုရှိတယ်လို့ မြင်ပါတယ်။ တကယ်တမ်းကျတော့ လွှတ်တော်ကိုယ်စားလှယ်တွေရဲ့ အလုပ်က ဥပဒေပြုရေး ဒေသဖွံ့ဖြိုးရေးအပြင်ကို တည်ရှိနေတဲ့ အစိုးရကို check and balance လုပ်ရမှာပေါ့။ သူအရှိန်အဟုန်နည်းရင် တွန်းမယ်။ တိမ်းစောင်းနေရင် တည့်မယ်။ လက်ရှိအခြေအနေမှာ လွှတ်တော်ရဲ့ ထိန်းကျောင်းမှုကို အားမရဘူး။ ပြောချင်တာက လွှတ်တော်အနေနဲ့ ထိန်းကျောင်းမှုကို ဒီထက်ပိုပြီး အရှိန်အဟုန်မြင့် လုပ်ရမယ်။ ထို့အတူပဲ အစိုးရတစ်ရပ်အနေနဲ့ ဘာဖြစ်လဲဆိုရင် သူက change ဆိုတော့ ပြည်သူလူထုရဲ့ နိုင်ငံဖွံ့ဖြိုးမှုအတွက်ကို တကယ်တမ်းကျတော့ သူများထက်သာတဲ့ speed နဲ့သွားရမယ်။ အရင်ငါးနှစ် အစိုးရထက် speed ပိုမြန်ရမှာပေါ့။ အဲဒီလိုပုံစံမျိုးနဲ့ သွားရမှာပေါ့။ လက်ရှိအခြေအနေမှာတော့ အဲဒီအခြေအနေကို မရောက်နိုင်သေးဘူး” လို့ ဒေါက်တာမောင်သင်းက ပြောခဲ့ပါတယ်။
Writer:
ဆန်းမိုးထွန်း

No comments:

Post a Comment