Thursday, November 24, 2016

နှစ်ရက်အတွင်း ကျောက်မျက်၊ ကျောက်စိမ်း ယူရို ၄၅ သန်းကျော်ဖိုး ရောင်းချ

နေပြည်တော်တွင်ပြုလုပ်နေသည့် နှစ်လယ်မြန်မာ့ ကျောက်မျက်ရတနာပြပွဲ ပထမ ရက်နှင့် ဒုတိယရက် စုစုပေါင်း ကျောက်မျက်၊ ကျောက်စိမ်း ရောင်းချရမှုမှ ယူရို ၄၅ ဒသမ ၆၂ သန်းကျော် ရရှိခဲ့ကြောင်း ပြပွဲကော်မတီက ထုတ်ပြန်သည်။ နိုဝင်ဘာ ၂၂ ရက်တွင် တင်ဒါနှင့် ဈေးပြိုင်စနစ်ဖြင့် ကျောက်မျက်အတွဲပေါင်း ၄၄ တွဲ၊ နိုဝင်ဘာ ၂၃ ရက်တွင် တင်ဒါစနစ်တစ်မျိုး တည်းဖြင့် ကျောက်စိမ်း အတွဲ ၉၄၇ တွဲ ရောင်းချခဲ့ရကြောင်း သတင်းရရှိသည်။ ‘‘ကျောက်မျက်တင်ဒါစနစ် မှာ ၃၄ တွဲနဲ့ ဈေးပြိုင်စနစ် ၁၀ တွဲ ရောင်းချနိုင်ခဲ့တယ်။ ငွေကြေး အားဖြင့် ယူရို ၁ ဒသမ ၆၇ သန်း ရရှိခဲ့ပြီးတော့ ကျောက်စိမ်း ၉၄၇ တွဲကို တင်ဒါစနစ်နဲ့ ရောင်းချပေး ခဲ့ပြီး ယူရို ၄၃ ဒသမ ၉၅ သန်း ရရှိခဲ့ပါတယ်’’ ဟု ပြပွဲ ကျင်းပရေး ကော်မတီဒုတိယဥက္ကဋ္ဌ ဦးသန်း ဇော်ဦးက ပြောသည်။



 ‘‘အများစုက ပြည်တွင်း ကုန်သည်များတယ်။ သူတို့က ကျောက်မျက်အရိုင်းကို ဦးစားပေး ဝယ်ကြတယ်။ ကျွန်တော်တို့ ဒီပွဲ မှာက အရိုင်းတင်ပြမှုအရေအ တွက်အရဆိုရင် အရင်ပွဲတုန်းက အတွဲ ၂၀၀ တင်ပြခဲ့တယ်။ ဒီပွဲမှာ ဆိုရင် ၁၃၇ တွဲပဲ တင်ပြနိုင်ခဲ့ တယ်။ တင်ပြနိုင်တဲ့ အရိုင်းအတွဲလည်း နည်းသွားတဲ့အတွက် ရောင်းချရမှုနည်းသွားတာလည်း ပါမယ်’’ဟု ကျောက်မျက်လုပ်ငန်း ကော်မတီမှ လက်ထောက်ညွှန် ကြားရေးမှူး ဦးဝင်းနိုင်က ပြော သည်။ယခင်ပြပွဲများတွင် ကျောက် တွဲများဝယ်ယူရာ၌ ကျောက်မျက် လုပ်ငန်းကော်မတီမှ အထူးကုန် စည်ခွန်၊ ဝန်ဆောင်ခနှင့် ကုန် သွယ်လုပ်ငန်းခွန်များကို ရောင်းချ သူထံမှ ကောက်ယူခဲ့ခြင်း ဖြစ် သော်လည်း ယခုပြပွဲတွင် ကုန် သွယ်လုပ်ငန်းခွန် ၅ ရာခိုင်နှုန်းကို ကျောက်တွဲဝယ်ယူသူထံမှ စတင် ကောက်ခံခဲ့သည်။

‘‘ယခင်ပွဲထက် ပြောင်းလဲ ထားတာလေးက ဒီပွဲမှာ ဝယ်ယူ သူသည် ကုန်သွယ်လုပ်ငန်းခွန် ၅ ရာခိုင်နှုန်းကို ပေးရမယ်လို့ပြော ထားတယ်။ အဲဒါကြောင့် ဒါလေး မှာလည်း ဝယ်ယူတဲ့နေရာမှာ နည်းနည်း တွန့်သွားတဲ့ သဘောရှိ တယ်’’ဟု ဦးဝင်းနိုင်က ဆိုသည်။

       ယခု နှစ်လယ်မြန်မာ့ကျောက်မျက်ရတနာပြပွဲသို့ ပြည်တွင်းကုန်သည် ၁,၇၂၃ ဦးနှင့် ပြည်ပကုန်သည် ၁,၇၉၃ ဦး တက်ရောက်လျက်ရှိသည်။

ပြပွဲကို နိုဝင်ဘာ ၂၀ ရက် တွင် စတင် ကျင်းပခဲ့ပြီး ကျန်ရှိသော ကျောက်စိမ်းတွဲ ၄,၇၈၈ တွဲကို နိုဝင်ဘာ ၂၉ ရက်အထိ ဆက်လက်ရောင်းချပေးမည်ဖြစ်သည်။ ပိုင်စိုးသူ

No comments:

Post a Comment