Saturday, November 26, 2016

စတီဗင်ဆီးဂဲလ်ကို ရုရှားပတ်စ်ပို့တ် ကိုယ်တိုင် ပေးအပ်ခဲ့သည့် ပူတင်

ဟောလိဝုဒ် အက်ရှင်မင်းသား စတီဗင်ဆီးဂဲလ်ကို နိုင်ငံသားအဖြစ် ရုရှားသမ္မတ ဗလာဒီမာ ပူတင်ကိုယ်တိုင်က ဂုဏ်ပြု သတ်မှတ်ခဲ့ကြောင်း သိရသည်။ နိုဝင်ဘာ ၂၅ ရက်တွင် အမေရိကန် ရုပ်ရှင်မင်းသားသည် မော်စကိုမြို့တော်ရှိ ကရင်မလင် နန်းတော်၌ ကျင်းပသော အခမ်းအနားသို့ တက်ရောက်၍ ပူတင်ထံမှ ရုရှားနိုင်ငံသား ပတ်စ်ပို့တ်ကို လက်ခံယူခဲ့သည်။ ထိုအခမ်းအနားတွင် ဆီးဂဲလ်က အမေရိကန်နှင့် ရုရှားနိုင်ငံများကြား ဆက်ဆံရေး ပိုမိုတိုးတက် ကောင်းမွန်လာစေရန် ၎င်းအနေဖြင့် တတ်စွမ်းသမျှ ပါဝင်ကူညီလိုကြောင်း ပြောကြားခဲ့သည်။ ပူတင်က ဆီးဂဲလ်ကို ကိုယ်တိုင် ပတ်စ်ပို့တ် ပေးအပ်ပြီးနောက် “ရုရှားနိုင်ငံသား ဖြစ်လာတဲ့အတွက် ဂုဏ်ယူပါတယ်။ ဒါဟာ ကျုပ်တို့ နှစ်နိုင်ငံကြားက ဆက်ဆံရေးကို မြှင့်တင်နိုင်ဖို့ သေးငယ်ပေမယ့် အရေးပါတဲ့ သင်္ကေတတစ်ရပ် ဖြစ်လာမယ်လို့ မျှော်လင့်ပါတယ်”ဟု ဆိုသည်။
ထို့နောက် ပူတင်က သာကြောင်းမာကြောင်း မေးမြန်းခဲ့ပြီး ဆီးဂဲလ်က “အဆင်ပြေပါတယ် သမ္မတကြီး။ ကျွန်တော်တို့ချင်း နောက်မှ သက်သက် စကားပြောချင်ပါသေးတယ်။ အခုကတော့ ဒီကို ရောက်လာခွင့် ရတာကိုက ဂုဏ်ပြုမှု တစ်ရပ်လို့ ခံစားမိပါတယ်”ဟု တုံ့ပြန်ခဲ့သည်။


ကရင်မလင် ပြောရေးဆိုခွင့်ရ အရာရှိ တစ်ဦးက ဆီးဂဲလ်အနေဖြင့် ရုရှားအပေါ် နွေးထွေးသည့် သဘောထားမျိုး ရှိနေကြောင်း ဆိုသည်။

ပူတင်သည် ကိုယ်ခံသိုင်းပညာရပ်များကို နှစ်သက်လိုက်စားသူ တစ်ဦးဖြစ်ရာ ဟောလိဝုဒ်၏ အကျွမ်းကျင်ဆုံး တိုက်ခိုက်ရေး ပညာရှင် တစ်ဦးအဖြစ် သတ်မှတ်နိုင်သော ဆီးဂဲလ်၏ အမာခံ ပရိသတ် တစ်ဦးလည်း ဖြစ်သည်။ ဆီးဂဲလ်သည် ယခင်ကတည်းက ရုရှားသို့ မကြာခဏ သွားရောက် လည်ပတ်လေ့ ရှိသလို Under Siege၊ Sniper: Special Opsကဲ့သို့ ဇာတ်ကားများသည် ရုရှားပရိသတ်များကြား အထူးရေပန်းစားခဲ့ကြောင်း သိရသည်။

Ref: RT

No comments:

Post a Comment