Wednesday, November 30, 2016

အသံလုံခန်းအပြင်ထွက်ပေးပါ

‘‘ဒီမြို့တော်ကနေ အပြင်ကို ထွက်၊ ပြည်သူလူထုနဲ့ အချိန်ပို ပေးပြီး တွေ့ဆုံ၊ သူတို့ပြောတာ နားထောင်၊ နောက်ပြီး နိုင်ငံတစ် နိုင်ငံအနေနဲ့ ကျွန်တော်တို့ တစ်တွေ အတူတကွ ဘယ်ကိုသွားကြ မလဲဆိုတဲ့ အကြောင်း သူတို့နဲ့ စကားဝိုင်းဖွဲ့ပြော၊ အဲဒီလို ပို ကောင်းတဲ့ လုပ်ဆောင်မှုကို ကျွန်တော့်ရဲ့ (သမ္မတ) ဒုတိယသက် တမ်းမှာ ကျွန်တော်လုပ်ဖို့ လိုအပ် ပါတယ်’’ ဤစကားမှာ သမ္မတအိုဘား မား သူ၏ ပထမသက်တမ်းအပြီး တွင် ၀န်ခံပြောခဲ့သော စကားဖြစ် သည်။  အသံလုံခန်းထဲရောက်နေသကဲ့သို့ သူ့မူဝါဒအတွေးအကြံ များကိုသာ ပဲ့တင်ထပ်ပြန်ကြားခဲ့ရ ပြီး အစိုးရယန္တရားပြင်ပလက်တွေ့ မြေပြင်မှ မတူကွဲပြားသောအမြင် များနှင့် အနည်းငယ်ကင်းကွာသ လို ဖြစ်ခဲ့သော သမ္မတသက်တမ်း အစောပိုင်း အခိုက်အတန့်ကို နောင်တရမိကြောင်း အိုဘားမား က ၀န်ခံခဲ့သည်။



ကမ္ဘာပေါ်တွင် အလွတ်လပ် ဆုံးနိုင်ငံ၊ ဒီမိုကရေစီဘိုးအေနိုင်ငံ၊ သတင်းအချက်အလက်နည်းပ ညာအထွန်းကားဆုံးနိုင်ငံဟု တင် စားခဲ့ရသော အမေရိကန် ပြည် ထောင်စု၏ ခေါင်းဆောင်တစ်ဦး က အိမ်ဖြူတော်ရုံးမှာပင် သူ့ကိုယ် သူအသံလုံခန်းထဲရောက်သကဲ့သို့ ခံစားခဲ့မိသည်ဆိုလျှင် မြန်မာကဲ့သို့  အသွင်ကူးပြောင်းဆဲ ပဋိပက္ခများ စွာနှင့် ဆင်းရဲသော နိုင်ငံငယ်လေး မှ ခေါင်းဆောင်များအတွက် စိန် ခေါ်မှုပိုကြီးမားကြောင်း လေ့လာ  စောင့်ကြည့်သူများက စိုးရိမ်လျက် ရှိသည်။

အစိုးရ ပြောင်းသည်ဟုဆိုသော်လည်း ယခင်က လည်ပတ်သည့် ဗျူရိုကရက်ယန္တရားအတိုင်းသာ ဆက်လက်လည်ပတ်မှုရှိနေပြီး အသစ်နှင့် အဟောင်းပူးပေါင်းလုပ်ရာတွင် သတင်းစီးဆင်းမှု၊ ပညာပြမှုအချို့ရှိနေ၍ ထင်တိုင်းမပေါက်ဘဲ လူထုထောက်ခံမှုနှုန်း ကျလာသော ဒေသတွင်းအိမ်နီး ချင်း အင်ဒိုနီးရှား၏ ၀ီဒိုဒိုအစိုးရဥပမာကလည်း မျက်စိအောက်မှာ တင် မြင်နေရသည်။ ဂျိုကိုဝီဒိုဒိုသည် ၎င်း၏ အစိုးရအဖွဲ့ကို တစ်နှစ်အတွင်း နှစ်ကြိမ်အပြောင်းအလဲ လုပ်ပြီးဖြစ်သည်။

အမျိုးသား ပြန်လည်သင့် မြတ်ရေးမူဝါဒဖြင့် တက်လာခဲ့ သော ဒေါ်အောင်ဆန်းစုကြည် ခေါင်းဆောင်သည့် အစိုးရသည် အစိုးရအဖွဲ့၏ ယန္တရားအဆင့် ဆင့်တွင် လူဟောင်း၊ လူသစ်အား လုံးတာဝန်ပေးထားသည့်အနက် အခရာကျသော သတင်းအချက် အလက်စီးဆင်းမှုသည် လူဟောင်း များထံမှ ဖြတ်သန်းနေရဆဲပင်ဖြစ် သည်။ ထုိ့အပြင် အင်စတီကျူး ရှင်းအားကောင်းမှုမရှိသေးသည့် အလျောက် ခေါင်းဆောင်တစ်ဦး တည်းကို ဦးတည်သည့်စနစ်ဖြင့်  လည်ပတ်နေသော မြန်မာ့အခြေ အနေက ထောက်ပြစရာဖြစ်နေ သည်။

‘‘တပ်မတော်ခေါင်းဆောင်  ပိုင်းရော၊ အရပ်ဘက် ခေါင်း ဆောင်ပိုင်းရော၊ အရပ်ဘက်လူ့ အဖွဲ့အစည်းခေါင်းဆောင်ပိုင်း ရော၊ ကျွန်တော်တို့အနေနဲ့ Echo Room ထဲက ထွက်ဖို့လိုလာတယ်’’ ဟု မဟာဗျူဟာနှင့် မူဝါဒလေ့လာ ရေးအဖွဲ့ မြန်မာ၏ အမှုဆောင် ဒါရိုက်တာ ဦးမင်းဇင်က ပြော ကြားသည်။

ဆက်လက်ပြီး ၎င်းက ‘‘အဲဒီ လိုမဟုတ်ရင်တော့ ကိုယ်ကြား လိုတာချည်းပဲ ကိုယ်ပြန်ကြားနေရ ပြီး တစ်ချိန်လည်းကျရော အပျက် အပျက်နဲ့ နှာခေါင်းသွေးထွက် ရော။ ငါ့ကိုအားလုံးက ၀ိုင်းလိမ်နေကြတာပဲဆိုပြီးတော့   ဖြစ်လိမ့်မယ်။ငါ့ကိုအားလုံးဝိုင်းလိမ်နေကြတာ ပဲလို့ မဖြစ်ချင်ဘူးဆိုရင် လွတ်လပ်စွာ ပြောဆိုခွင့်ကို လက်ခံရမယ်’’ ဟု တိုက်တွန်းသည်။

ငြိမ်းချမ်းရေးလုပ်ငန်းစဉ်နှင့် ပတ်သက်၍ အစိုးရထိပ်ပိုင်းခေါင်း ဆောင်များနှင့် တိုက်ရိုက်တွေ့ဆုံ ဆွေးနွေးနေရသော သံတမန်အ သိုင်းအ၀ိုင်းမှ အချို့၏ ပြန်လည် ပြောကြားချက်အရ တိုက်ပွဲများ၊ မြေပြင်အနေအထားများနှင့် ပတ် သက်၍ အစိုးရသစ်၏ သတင်းရ၊ သိရှိနားလည်မှု အားနည်းနေသေး ကြောင်း သုံးသပ်မှုများရှိသည်။ ယင်းနှင့် ပတ်သက်၍ ဒေါ်အောင် ဆန်းစုကြည် အနေဖြင့် ရွေးချယ် နားထောင်နေသည်လား (သို့မ ဟုတ်) သတင်းပေးများက စိစစ် ဖြတ်နေ တောက်နေသည်လား (သို့မဟုတ်) နှစ်ခုစလုံး ဖြစ်နေ သည်လား ဆိုသည်မှာ မေးခွန်း ထုတ်စရာဖြစ်နေသည်။

 ‘‘ကြည့်ရသလောက်တော့ အဲဒီစိစစ်ဖြတ်တောက်နေပုံရတာ တွေက ပြီးခဲ့တဲ့အစိုးရအဖွဲ့က လူ တွေဖြစ်တယ်။ ဒါပေမဲ့ ပြဿနာ က သူတို့ချည်းပဲလို့တော့ ကျွန်မ မယုံပါဘူး။ အဖြေကို သူရဲကောင်း ဆန်ဆန် ရှာဖို့ထက် စုပေါင်းရှာလို တဲ့ ဒေါ်အောင်ဆန်းစုကြည်ရဲ့ နိုင်ငံရေး ဆန္ဒကို မေးခွန်းထုတ်စ ရာပါပဲ’’ဟု ငြိမ်းချမ်းရေးလုပ်ငန်း စဉ်တွင် ပါဝင်နေသော အမည်မ ဖော်လိုသည့် အကျိုးဆောင်တစ်ဦး က ပြောကြားသည်။

လတ်တလော နိုင်ငံမြောက် ပိုင်း တိုက်ပွဲများနှင့်ရခိုင်ဖြစ်စဉ်အ ပေါ် တုံ့ပြန်ကိုင်တွယ်ဆောင်ရွက် သည့် အနေအထားမှာ အစိုးရသစ် ၏ ထိန်းချုပ်နိုင်သည့်အတိုင်းအ တာကို မေးခွန်းထုတ်စရာဖြစ်လာ စေသည်။ ကချင်ပြည်နယ်အတွင်း ဆက်တိုက်ဖြစ်ပွားနေပြီး အရပ် သားများ ထိခိုက်သေဆုံးနေခဲ့ရ သော တိုက်ပွဲများ ရပ်တန့်ရေး အစိုးရကို တောင်းဆိုဆန္ဒပြပွဲများ ကို ကချင်ပြည်နယ်၊ မန္တလေးမြို့ နှင့် ရန်ကုန်မြို့တို့တွင် ပြီးခဲ့သည့် လများက ပြုလုပ်သော်လည်း အစိုးရက တစ်စုံတစ်ရာ တုံ့ပြန်မှု မရှိပေ။ တိုင်းရင်းသားလက်နက် ကိုင်လေးဖွဲ့ပါဝင်သောအဖွဲ့က နိုဝင်ဘာ ၂၀ ရက်တွင် စတင်ထိုး စစ်ဆင်ခဲ့သည့်အခါ အစိုးရက ပထမဆုံးတုံ့ ပြန်ပြောကြားမှုရှိလာ သည့်အပေါ် မြောက်ပိုင်းနေ တိုင်း ရင်းသားများနှင့် အတိုက်အခံများ က ဝေဖန်လာကြသည်။ သို့သော် ဒေါ်အောင်ဆန်းစုကြည်ကို သ တင်းပို့သူများအနက် တစ်ဦးအပါ အ၀င်ဖြစ်သည့် ငြိမ်းချမ်းရေးကော် မရှင်အတွင်းရေးမှူးက ၎င်းတို့အ နေဖြင့်မူ သတင်းများကို အဖြတ် အတောက်မရှိ ပေးပို့ကြောင်း ဆို သည်။

‘‘ကျွန်တော့်အနေနဲ့တော့ သ တင်းအားလုံးကို Report လုပ်ပါ တယ်’’ဟု ငြိမ်းချမ်းရေးကော်မရှင် အတွင်းရေးမှူး ဦးလှမောင်ရွှေက ပြောသည်။

ယခင်စစ်အစိုးရများလက် ထက်တွင် နိုင်ငံ၏ သတင်းနှင့် ထောက်လှမ်းရေးအားလုံးကို ကိုင် ထားသော တပ်မတော်နှင့် အစိုး ရသည် တစ်ဖွဲ့တည်းဖြစ်၍ သ တင်းရရှိမှုကြားခံ အဟန့်အတားမ ရှိခဲ့ကြောင်း နိုင်ငံရေးလေ့လာသူ များက ထောက်ပြကြသည်။ လက် ရှိတွင် ၂၀၀၈ ဖွဲ့စည်းပုံအခြေခံ ဥပဒေအရ အာဏာကြီးသော ၀န် ကြီးဌာနတစ်ခုဖြစ်သည့် နယ်စပ် ရေးရာကို တပ်မတော်က ကိုင် ထားသည်ဖြစ်၍ နယ်စပ်ရေးရာ သတင်းအချက်အလက်အားလုံး သည် တပ်မတော်မှတစ်ဆင့် အ ရပ်သားအစိုးရ ခေါင်းဆောင်များ ထံ ရောက်ရှိနေကြောင်း ၎င်းတို့က သုံးသပ်ပြောကြားသည်။

ယခင်အစိုးရလက်ထက်မှ နေ၍ ယခုအစိုးရလက်ထက်ထိ ဆက်လက်ပါဝင်နေသူတစ်ဦးဖြစ် သည့် သမ္မတရုံးပြောရေးဆိုခွင့်ရှိ သူ ဦးဇော်ဌေးကမူ လက်ရှိအစိုးရ အနေဖြင့် တိုင်းပြည် တစ်ဝန်းမှ သတင်းအားလုံးကို သိရှိကြောင်း ပြောသည်။ ငြိမ်းချမ်းရေးကော်မ ရှင်၊ ပြည်ထဲရေးနှင့် လုံခြုံရေးအဖွဲ့ အစည်းများ စသည့် လမ်းကြောင်း ပေါင်းစုံမှ သတင်းပေါင်းစုံ နေ့စဉ် နိုင်ငံတော် အကြီးအကဲများထံ ရောက်ရှိသည်ဟု ဆိုသည်။

‘‘ကျွန်တော်တို့ ရဲထောက် လှမ်းရေး သတင်းတွေ ရှိတယ်။ ကျန်တဲ့ ထောက်လှမ်းရေးသတင်း တွေရှိတယ်။ နေ့စဉ် ဖြစ်ပျက်သမျှ Report တွေ နေ့တိုင်းတက်တယ်။ အဲဒီ သတင်းတွေရှိတယ်။ အဲဒီ တော့ တိုင်းပြည်မှာ ဘာတွေဖြစ်၊ ဘယ်နေရာဘာဖြစ် ကြီးကြီးမား မားပေါ့။ အသေးအမွှားကတော့ ကျွန်တော်တို့ ဇယားချုပ်နဲ့ တင် တယ်။ ဥပမာ ပြစ်မှုဘယ်နှမှု၊ ဘယ်မှာ မီးလန့်မှု ဘာညာအသေး အမွှားတွေကတော့ ဇယားနဲ့ Daily တင်တယ်။ ကျန်တာတွေကတော့ ထူးခြား ဖြစ်စဉ်တွေ အကုန်လုံး ကျွန်တော်တို့က ၀န်ကြီးဌာနတွေ၊ ပြည်နယ်အစိုးရတွေ ၂၄ နာရီအ တွင်း တင်ရတာရှိတယ်။ နောက်ခု နက ထောက်လှမ်းရေးသတင်း တွေရှိတယ်။ အများကြီး  ရှိပါ တယ်’’ဟု နိုင်ငံတော်အတိုင်ပင်ခံ ရုံး သတင်းထုတ်ပြန်ရေးကော်မတီ ၏ အတွင်းရေးမှူးလည်းဖြစ်သည့် ဦးဇော်ဌေးက ပြောကြားသည်။

ဆက်လက်ပြီး ၎င်းက ‘‘ဒါ အစိုးရယန္တရားထဲက ကိစ္စတွေ၊ အဲ ဒါတော့ အသေးစိတ် ကျွန်တော် ပြောဖို့လည်း မရှိဘူး။ ခြုံပြီးပြောရ ရင်တော့ ခင်ဗျားကို ခုနက ပြောတဲ့ သတင်းအချက်အလက်တွေ၊ တိုင်းပြည်မှာ ဖြစ်ပျက်နေသမျှ မ သိတာမရှိဘူး။ အကုန်လုံးသိပါ တယ်။ ၂၄ နာရီသိတယ်’’ဟု ပြော ကြားသည်။

အစိုးရအနေဖြင့် အတိုက်အ ခံနှင့် အရပ်ဘက်အဖွဲ့အစည်းများ ၏ အသံများကိုလည်း ယခုထက် ပိုမိုနားထောင်ပေးရန် အကြံပြုမှု များရှိနေသည်။ အထူးသဖြင့် အ တိုက်အခံကဲ့သို့ နိုင်ငံရေးအာဏာ ရယူချင်သည့် အကျိုးစီးပွားအပေါ် အခြေခံ ဝေဖန်မှု မပါဝင်သော၊ နိုင်ငံရေးအာဏာယန္တရားထဲတွင် မပါဝင်သော၊ အစိုးရနှင့် အာဏာ ယှဉ်ပြိုင်မှုမရှိသော၊

အစိုးရနှင့် ပြည်သူကြား ပေါင်းကူးတံတားကဲ့သို့ ပါဝင်သော အရပ်ဘက် အဖွဲ့အစည်းများ၏အသံကို ပိုနားထောင်ပေးရန် ဆက်သွယ်ရေး လမ်းကြောင်းများဖွင့်ရေးတောင်းဆိုနေကြသည်။

‘‘သတင်းရင်းမြစ်တွေကို အ မျိုးမျိုးထားဖို့ လိုပါတယ်။ ဆိုလို တဲ့သဘောက ကိုယ့်ဘေးပတ်ဝန်း ကျင်မှာရှိတဲ့ အကြံပေးတွေ၊ကိုယ် ယုံကြည်စိတ်ချရတဲ့သူတွေအပေါ် မှာပဲ မူတည်ပြီးတော့ မဆုံးဖြတ်ဘဲ နဲ့ သတင်းရင်းမြစ်လမ်းကြောင်း တွေ ဖွင့်ထားဖို့ပါ’’ဟု ပြည်ထောင် စုမြန်မာနိုင်ငံ အဝေးရောက် အ မျိုးသားညွန့်ပေါင်းအစိုးရအဖွဲ့ (NCGUB) ၏ ကုလသမဂ္ဂဆိုင်ရာ တာဝန်ခံဟောင်း ဒေါက်တာ သောင်းထွန်းက ပြောသည်။

မြန်မာနိုင်ငံတွင် စစ်အစိုးရ အဆက်ဆက် ဆင်ခြေပေးသူအ ချို့၏ လက်သုံးစကားဖြစ်သည့် ‘‘ခေါင်းဆောင်ကြီးက မသိဘူး။ အောက်ကလူတွေ လုပ်နေတာ’’ ဆိုသည့် အစဉ်အလာဆိုးကို ယခု အချိန်တွင် ထပ်မံဖြစ်ပွားရန် မ သင့်တော့ကြောင်းလည်း အကြံ ပြုကြသည်။

လက်ရှိ ဒီမိုကရေစီတစ်ပိုင်း စပ်ကြား အုပ်စိုးမှုစနစ်တွင် အစိုးရ သစ်သည် သည်းခြေကြိုက် နိုင်ငံ ရေးညွှတ်ချက် ရှိနေသည်ကို တွေ့ ရကြောင်း နိုင်ငံရေးသိပ္ပံပညာရှင် ဦးမင်းဇင်က Myanmar Quar- terly ဂျာနယ်တွင် သုံးသပ်ရေး သားလာသည်။ သည်းခြေကြိုက် နိုင်ငံရေးဆိုသည်မှာ အရပ်ဘက် အဖွဲ့အစည်းများ၊ နိုင်ငံရေးပါတီ များ၊ မီဒီယာများ၊ ပညာတတ်များ စသည့် ကြားခံအဖွဲ့အစည်းများ၏ အခန်းကဏ္ဍကို လျှော့ချပြီး လူထု ကို တိုက်ရိုက်ချဉ်းကပ်သည်ကို ဆို လိုသည်ဟု ၎င်းက ရှင်းပြသည်။

 ဒေါ်အောင်ဆန်းစုကြည် သည် ပြည်ထောင်စု ငြိမ်းချမ်းရေး ညီလာခံ- ၂၁ရာစုပင်လုံညီလာခံနှင့်အပြိုင် အမျိုးသားအဆင့်နိုင်ငံရေးဆွေးနွေးပွဲများကို လူမျိုး အ လိုက်၊ ဒေသအလိုက်နှင့် အ ကြောင်းအရာအလိုက်ဟူ၍ ပုံစံသုံးမျိုးဖြင့် ညွှန်ကြားထားသည်။ အရပ်ဘက် အဖွဲ့အစည်းများ အနေဖြင့် ငြိမ်းချမ်းရေးလုပ်ငန်းစဉ်များနှင့်ပတ်သက်လျှင် ငြိမ်းချမ်းရေးကော်မရှင်ကတစ်ဆင့် နိုင်ငံတော်၏ ထိပ်ဆုံးပုဂ္ဂိုလ်ထံ အိတ်ဖွင့်ပေးစာဖြင့် ဆက်သွယ်သည့် လမ်းကြောင်းရှိသည်ဟု သိရသည်။ ဒေါ်အောင်ဆန်းစုကြည်သည် ၂၁ ရာစုပင်လုံညီလာခံနှင့်အပြိုင် အရပ်ဘက်အဖွဲ့အစည်းများဖိုရမ်ကို ကျင်းပရန်ညွှန်ကြားခဲ့သည်။ သို့သော် အရပ်ဘက်အဖွဲ့အစည်းများ ကို ၂၁ရာစုပင်လုံညီလာခံ၌ တိုက်ရိုက်ပါဝင်ဆွေးနွေးခွင့်မပြုပေ။

‘‘ခွင့်ပြုပေးတဲ့ နေရာတွေ တော့ ရှိတယ်။ သို့သော်လည်းအ ကန့်အသတ်တွေတော့ရှိတယ်။ တစ်ချိန်တည်းမှာပဲ တချို့ကိစ္စတွေကျတော့ ပါလို့ရသလိုလိုနဲ့ တကယ်တမ်း Civil Societies တွေက တင် ပြတဲ့ ကိစ္စရပ်တွေကျတော့  အားလုံး လက်ခံတာမျိုးမရှိဘူးပေါ့။ အ ကြောင်းပြချက်မခိုင်လုံဘဲနဲ့ လက်မခံတဲ့ကိစ္စတွေလည်း အများကြီးရှိတယ်။ အားရစရာတော့ မဟုတ်သေးဘူး။ ဒါပေမဲ့ တိုးတက်မှုတော့ ရှိတယ်လို့ ပြောရမှာပေါ့။ ပြောရမယ်ဆိုရင်တော့ Civil Societyတွေရဲ့ ကဏ္ဍကို  လိမ္မာပါးနပ်စွာ ကိုင်တွယ်တယ်။ အရေးပါတယ် ဆိုတာကို အသိအမှတ်ပြုတယ်။ ဒါပေမဲ့ သူတို့ရဲ့ မူဝါဒနဲ့ ဆန့်ကျင်လာလို့ရှိရင်တော့ မကြားတဲ့ပုံစံ ပဲထားလိုက်တာပေါ့’’ဟု ငြိမ်း ဖောင်ဒေးရှင်း၏ မဟာဗျူဟာနှင့် မူဝါဒဆိုင်ရာလက်ထောက်ညွှန် ကြားရေးမှူး ဆရာမနန်ရော်က ပြောသည်။

၎င်းက‘‘ကချင်ပြည်နယ်ရဲ့ ကိစ္စမှာကျတော့ တစ်မျိုးဖြစ်သွား ပြီပေါ့။ စဉ်းစားကြည့်ရသလောက် တော့ နည်းနည်းပိုပြီး Complex ဖြစ်တဲ့ကိစ္စရပ်မျိုးကျတော့ သူ့မူဝါ ဒပိုင်းကိုပဲ အာရုံစိုက်ပြီးတော့ သူ့ ဆီက Responseကတော့ အခုချိန် အထိ မတွေ့ရသေးဘူး’’ ဟု ဆို သည်။

အရပ်ဘက်အဖွဲ့အစည်းများ အနေဖြင့် ဒီချုပ်အစိုးရကိုထောက် ခံသောလူထု၏ ဖိအားကိုလည်းပုံစံ တစ်မျိုးဖြင့် ကြုံနေရသည်။ နှစ် ပေါင်း (၅၀) ကျော်ကြာမှ ပထမ ဆုံးတက်ခွင့်ရလာသည့် အရပ်သား  အစိုးရသစ်ကို အပြစ်တင်မစောရန် ဖိအားပေးမှုကြောင့် ယခင်ကလို လွတ်လပ်သောဆန်းစစ်ဝေဖန်မှု များပြုလုပ်ရာတွင် အခက်အခဲကြုံ နေရသည်ဟု ဆိုသည်။ တစ်ချိန် တည်းမှာပင် နိုင်ငံတော်နှင့်ပတ် သက်သော အင်အားစုများအနေ ဖြင့် ၎င်းတို့၏ စွမ်းဆောင်ရည်နိမ့် ကျမှုအပေါ် ဝေဖန်သူများကို ပိတ် ဆို့တတ်သည့် အလေ့အထက လည်း ရှိနေသည်။

ဆရာမ နန်ရော်ကမူ ‘‘အရင် ကတော့ ဒါက စစ်အစိုးရဖြစ်တဲ့ အတွက်၊ စစ်အစိုးရတစ်ပိုင်းဖြစ် တဲ့အတွက် ပြောရဲတယ်ဆိုတဲ့ အဖွဲ့တွေရှိတယ်။ ဒါပေမဲ့ အဲဒီလို အဖွဲ့တွေက အခုတိတ်သွားတဲ့ သဘောရှိတယ်။ သတိထားတာ ပေါ့။ အရမ်းသတိထားတယ်။ ကိုယ့်ကိုပြန်ပြီးတော့ အပြစ်တင်ခံ ရမှာ စိုးကြတယ်။ အရပ်သားအ စိုးရက အခုမှတက်တာ တစ်နှစ် တောင်မပြည့်သေးဘူး။ ဒီလောက် ကြီးပြောဖို့ မသင့်ဘူး၊ စောင့်ကြည့် သင့်တယ်ဆိုတဲ့ မှတ်ချက်တွေက နည်းနည်းလေး လေသံဟတာနဲ့ ကြုံကြရတာပေါ့’’ဟု ပြောကြားသည်။

တစ်ချိန်တည်းမှာပင် အစိုးရ အဖွဲ့ကို ဒေါ်အောင်ဆန်းစုကြည် ၏ တာဝန်ပေးလွှဲအပ်ထားမှုနှင့် ၀န်ကြီးအချို့၏ စွမ်းဆောင်ရည် မှာ သတိပြုစရာရှိသည်။ လတ် တလောဖြစ်ပွားခဲ့သော စိုက်ပျိုး ရေးဒုဝန်ကြီးကို ရာထူးမှ ရပ်စဲမှု ကလည်း လူထုအကြား အငြင်း ပွားစရာ ဖြစ်ပေါ်စေခဲ့သည်အထိ  အစိုးရအဖွဲ့ပြင်ပမှ ပါတီထိပ်ပိုင်း ခေါင်းဆောင်က အမိန့်ပေးခဲ့သည့် အနေအထားဖြစ်နေသည်။

‘‘အဓိက အခက်အခဲကအရင် စနစ်နဲ့ တည်ဆဲဥပဒေတွေ၊ အရင် အစိုးရရဲ့လုပ်ငန်းတွေက ဒီအစိုးရ လုပ်ဆောင်မှုအတွက်ဆူးငြောင့် ခလုတ်အတားအဆီးဖြစ်နေတာ။ ဒါတွေတစ်ခါတည်း ဖယ်ရှားရင် ရုတ်ရုတ် ရုတ်ရုတ်ဖြစ်ကုန်မယ် လေ။ ၁၉၉၀တုန်းကဖြစ်တဲ့အမှား ကို ထပ်မှားလို့မဖြစ်နိုင်ဘူးလို့ နှလုံး ပိုက်ထားလို့ အမျိုးသားပြန်လည် သင်မြတ်ရေးမူဝါဒချမှတ်ပြီး သတိ ကြီးစွာဆောင်ရွက်နေတဲ့အတွက် အချိန်ပေးပြီး စောင့်ကြည့်ပါဦး’’ ဟု မြန်မာနိုင်ငံတွင် ဆယ်စုနှစ်များ ချီ တာဝန်ထမ်းဆောင်နေသော သံတမန်တစ်ဦးက ပြောသည်။

အင်စတီကျူးရှင်းအားနည်း နေသေးသော လက်ရှိ စပ်ကြား အုပ်စိုးမှုအောက်တွင် အရပ်ဘက် အဖွဲ့အစည်းများ၊ မီဒီယာနှင့် ပညာရှင်များအနေဖြင့် လွတ်လပ် သော ဆန်းစစ်ဝေဖန်အကြံပေးမှု များ တင်ပြရာ၌ အဟန့်အတား စိန်ခေါ်မှုအချို့ ကြုံနေရသည့်အ ခိုက် နိုင်ငံ့ထိပ်ဆုံး ခေါင်းဆောင် နှင့် အောက်ခြေ လူထုအကြား တိုက်ရိုက်အသံ ဆက်သွယ်မှုမှာ ထင်သလောက် ခရီးမပေါက်သေး ပေ။ တစ်ချိန်တည်းမှာပင် သဘောထား ကွဲလွဲသည့် တင်ပြ ချက်များကို တရားစွဲဆိုမှုများရှိနေ ခြင်းကလည်း အသံကို ကျယ်မ လာအောင် ဟန့်တားသည့် လက် နက်တစ်ခု ဖြစ်နေသည်။ ထို့ ကြောင့်ပင် နိုင်ငံတော်၏အတိုင် ပင်ခံပုဂ္ဂိုလ်အနေဖြင့် လူထုအ သံပိုကြားနိုင်ရေးလမ်းကြောင်းများ တိုးချဲ့နားထောင်ရန် အကြံပြု သံများ ပိုကျယ်လောင်လာသည်။

ငြိမ်းချမ်းရေးနှင့် လူမှုတရား မျှတမှု ဖော်ဆောင်ရေးအဖွဲ့ အမှုဆောင် ဒါရိုက်တာဖြစ်သည့် ဒေါက်တာသောင်းထွန်းက ‘‘ပြည် သူလူထုရဲ့ အသံတွေ၊ ပြဿနာ တွေရဲ့ အချက်အလက်အကျိုးအကြောင်းသတင်းအမှန်တွေကို သိဖို့အတွက် သတင်းရင်းမြစ်ချန် နယ်တွေကို အမျိုးမျိုးထားပြီး  ဒီအပေါ်မှာ အားလုံးကို ချိန်ထိုး သုံးသပ်တာပေါ့။  မီဒီယာတွေ အသံနားထောင်ရမယ်။ Officially ခန့်ထားတဲ့ အရာရှိတွေအသံနား ထောင်ရမယ်။ Civil Society တွေ က ဘာပြောသလဲ နားထောင်ရ မယ်။ အဲဒီအပေါ်မှာ ချိန်ထိုးဆုံး ဖြတ်မယ်ဆိုရင်တော့ မသိဘဲနဲ့ ဖြစ်သွားတယ်ဆိုတဲ့ဟာမျိုး ရှောင် နိုင်မှာပါ’’ဟု အကြံပြုသည်။ ငြိမ်းငြိမ်းပြည့်

No comments:

Post a Comment