Wednesday, November 30, 2016

ဘရီးဇစ်နှင့် အင်တီအီလစ်

ဖိလစ်ပိုင် သမ္မတရွေးကောက်ပွဲတွင် ရိုဒရီဂိုဒူတာတေးက အီလစ်နိုင်ငံရေးသမားများကို ကျော်ဖြတ်ကာ အပြတ်အသတ် အနိုင်ရရှိခဲ့သည်။ ထို့နောက် အမေရိကန်သမ္မတ ရွေးကောက်ပွဲတွင် ဒေါ်နယ်ထရန့်သည် မမျှော်လင့်ဘဲ အီလစ်နိုင်ငံရေးသမား ဟီလာရီကလင်တန်ကို အနိုင်ရရှိခဲ့ပြန်သည်။ ယခုနောက်ဆုံး ပြင်သစ်သမ္မတ ရွေးကောက်ပွဲ၌လည်း အီလစ်နိုင်ငံရေးသမား ဖရန်ဆွာဖီလွန်သည် အီလစ်ဆန့်ကျင်ရေး အမျိုးသမီး မာရင်းလီပင်းနှင့် အပြင်းအထန် ပြိုင်ဆိုင်ရတော့မည် ဖြစ်သည်။ ဗြိတိန်နိုင်ငံ ပြည်လုံးကျွတ် မဲဆန္ဒခံယူပွဲတွင် ဥရောပသမဂ္ဂမှ နုတ်ထွက်မည့်ဘက် (Brexit-ဘရီးဇစ်) က အနိုင်ရရှိခဲ့ခြင်းကိုလည်း အီလစ်များအပေါ် အင်တီအီလစ်များက အနိုင်ရရှိခဲ့ခြင်းဟု လေ့လာ သုံးသပ်သူတို့က ဆိုကြသည်။

အီလစ် (Elite) ဟူသည့် လူအုပ်စုတစ်ရပ်၌ ဖွဲ့စည်းပါဝင်နေသော လူအချို့၏ သဘောထား သို့မဟုတ် ယုံကြည်ချက်ကို အီလစ်တစ်ဇင် (Elitism) ဟုခေါ်သည်။ အီလစ်ဟူသည် တစ်စုံတစ်ရာသော အဆက်အနွှယ်၊ ကိုယ်ပိုင်အရည်အသွေး သို့မဟုတ် တန်ဖိုး၊ အသိဥာဏ်မြင့်မားမှု၊ ချမ်းသာကြွယ်ဝမှု၊ အထူးလေ့ကျင့်ထားမှု သို့မဟုတ် အတွေ့အကြုံ သို့မဟုတ် ပြောင်မြောက်သော အခြင်းအရာများရှိသည့် လက်ရွေးစင် လူတစ်စု ဖြစ်သည်။ ၎င်းတို့၏ သြဇာ သို့မဟုတ် အာဏာသည် အခြားသူများထက် ပို၍ကြီးမားသည်။ အကြောင်းအရာ တစ်ခုအပေါ် ၎င်းတို့၏ အမြင်အား ပို၍အလေးအနက် ထားကြသကဲ့သို့ ပို၍လည်း သြဇာကြီးမားသည်။ ၎င်းတို့၏အမြင် သို့မဟုတ် လုပ်ဆောင်ချက်များသည် လူ့အဖွဲ့အစည်း တစ်ရပ်လုံးအပေါ် ပို၍ အပြုသဘောဆောင်နိုင်ဖွယ် ရှိသည်။ ၎င်းတို့၌ အထူးသဖြင့် အုပ်ချုပ်ရန် သင့်လျော်သော ထူးချွန်သည့် ကျွမ်းကျင်မှုများ၊ အရည်အသွေးများနှင့် ဥာဏ်ပညာများ ရှိသည်ဟု မှတ်ယူကြသည်။ အီလစ်တစ်ဇင်ဟူသည့် စကားလုံးကို ကန့်သတ် အရေအတွက်ရှိ လူတို့၏ လက်ဝယ်၌ အာဏာစုပုံနေသည့် အနေအထားတစ်ရပ်ကို ဖော်ပြရန်လည်း သုံးစွဲကြသည်။ အီလစ်တစ်ဇင်နှင့် ဆန့်ကျင်ဘက်ဖြစ်သော စကားလုံးများအနက် နှစ်ခုမှာ လူကြိုက်များရေးဝါဒ (Populism) နှင့် အင်တီအီလစ်တစ်ဇင် (Anti-Elitism) တို့ ဖြစ်ကြသည်။
ဗြိတိန်နိုင်ငံ ပြည်လုံးကျွတ် မဲဆန္ဒခံယူပွဲတွင် အီလစ်တို့ကို ခြိမ်းခြောက်လိုက်သည့် ဘရီးဇစ် ရလဒ်ထွက်ပေါ်အောင် ပြုလုပ်ခဲ့ကြသူများမှာ ပို၍ဆင်းရဲသော ပညာတတ်မဟုတ်ကြသည့် ပြည်သူများဖြစ်သည်။ သူတို့သည် ကမ္ဘာကြီး၏ အစီအစဉ်သစ်မှနေ၍ စီးပွားရေး အကျိုးအမြတ်များကို မျှဝေခံစားခဲ့ရမှု မရှိသူများ ဖြစ်ကြသည်။ သူတို့သည် စီးပွားရေး အကျပ်အတည်း၏ အဆိုးရွားဆုံး ကြွင်းကျန်မှုများကို ခံစားရသူများဖြစ်သည်။ ရွှေ့ပြောင်း အခြေချမှုများ မြင့်တက်လာပြီး စီးပွားရေး အနေအထား ပိုမိုဆိုးရွားလာမည်ကို အစိုးရိမ်ဆုံး လူများဖြစ်ကြသည်။ ဒေသအလိုက် သဘောထား ကွဲလွဲမှုများက ဗြိတိန်ပြည်လုံးကျွတ် မဲဆန္ဒခံယူပွဲရော အမေရိကန် သမ္မတ ရွေးကောက်ပွဲအပေါ်ပါ အဆုံးအဖြတ် ပေးသွားခြင်းဖြစ်သည်။ ဗြိတိန်နိုင်ငံတွင် ရွှေ့ပြောင်းလုပ်သားများ ပေါများသည့် ကျေးလက်ဒေသများ၊ စက်မှုထွန်းကားခဲ့ရာ နေရာများနှင့် မြို့ကြီးများတစ်ဝိုက်မှ ဆင်းရဲသားရပ်ကွက်များ၊ တက္ကသိုလ်ပညာ သင်ကြားခဲ့ရခြင်း မရှိသူများနှင့် အသက်ကြီးသူများက ၅၃ ဒသမ ၄ ရာခိုင်နှုန်းရှိပြီး ၎င်းတို့က ဘရီးဇစ်ကို မဲပေးသွားခြင်း ဖြစ်သည်။
အံ့သြတုန်လှုပ်ဖွယ် ဘရီးဇစ်ရလဒ် ထွက်ပေါ်လာပြီးနောက် ပြင်သစ်မှသည် နယ်သာလန်နိုင်ငံအထိ၌ ရှိသော ဥရောပသမဂ္ဂ ဆန့်ကျင်ရေးသမားများ၊ လက်ယာစွန်းပါတီများနှင့် လက်ဝဲ၀ါဒီများက ၎င်းတို့နိုင်ငံများ၌လည်း အလားတူ ဆန္ဒခံယူပွဲများ ပြုလုပ်ရန် တောင်းဆိုလာကြသည်။ ထို့ကြောင့် ဥရောပသည် ဒီမိုကရေစီ အကျပ်အတည်းနှင့် ရင်ဆိုင်နေရပြီဟုပင် ဆိုလာကြသည်။ သြဇာရှိပြီးသား ရှေးရိုးဝါဒကို ဆန့်ကျင်မှုနှင့် အီလစ်များကို ဆန့်ကျင်မှုတို့သည် စီးပွားရေးအရ ရုန်းကန်နေရသူတို့၏အကြား စိုးရိမ်ပူပန်မှု၊ အထိန်းအချုပ်မဲ့သွားမှုနှင့် အစဉ်အလာနှင့် သတ်မှတ်ချက်များ ပျောက်ဆုံးမှုတို့အပေါ် အခြေခံနေသည်။ အီလစ်များအပေါ် အပြစ်မြင်မှုများ မြင့်တက်လာခြင်း၌ အဓိက မောင်းနှင်အား နှစ်ရပ်ရှိသည်ဟု ဆိုကြသည်။ ယင်းတို့မှာ ၂၀၀၈/၂၀၀၉ စီးပွားရေး အကျပ်အတည်းနှင့် ဒုက္ခသည် အကျပ်အတည်းတို့ဖြစ်သည်။ ထို့ကြောင့် နိုင်ငံရေးအီလစ်များ အနေဖြင့် စီးပွားရေး ကျဆင်းမှုဒဏ်ကို အလူးအလဲခံရမည့် ပြည်သူ အများအပြားရှိကြောင်း သတိပြုရမည် ဖြစ်သည်။
မည်သို့ပင်ဆိုစေကာမူ အီလစ်နိုင်ငံရေးသမားများ အနေဖြင့် အများစုဖြစ်သည့် ဆင်းရဲသားပြည်သူများ၏ အကျိုးစီးပွားကို လျစ်လျူပြုထားကြသည့်အခါ အင်တီအီလစ် သဘောထားများ မြင့်တက်လာမည်သာ ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

No comments:

Post a Comment