Sunday, November 27, 2016

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် နိုင်ငံတော်ကာကွယ်ရေးတက္ကသိုလ်မှ သင်တန်းသားအရာရှိကြီးများအား တွေ့ဆုံအမှာစကားပြောကြား

နိုင်ငံတော်ကာကွယ်ရေးတက္ကသိုလ်၏ ရည်မှန်းချက်ဖြစ်သည့် နိုင်ငံရေးအမြင်၊ ကာကွယ်ရေးအမြင်၊ စီးပွားရေးအမြင်နှင့် အုပ်ချုပ်ရေးအမြင်များကို နိုင်ငံတကာအမြင်နှင့် နှိုင်းယှဉ်ပေါင်းစပ် တွေးခေါ်မြော်မြင်၍ မှန်ကန်သောအယူအဆများ၊ တိကျပြတ်သားသော ဆုံးဖြတ်ချက်များ ချမှတ်လုပ်ဆောင်နိုင်ရေးအတွက် တိုင်းပြည်၏ ပကတိအခြေအနေမှန်များကိုသိရှိပြီး အတွေးအခေါ်မမှားစေရန်၊ မှန်ကန်သော အတွေး အခေါ်များရရှိစေရန် သင်တန်းတွင် ဆွေးနွေးပို့ချမှုများကို နားထောင်မှတ်သားခြင်း၊ ကိုယ်တိုင်ဖတ်ရှု လေ့လာခြင်း၊ အပြန်အလှန်ဆွေးနွေးခြင်းများဖြင့် ကြိုးစားလုပ်ဆောင်ကြရမည်ဖြစ်ကြောင်းဖြင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် က ယနေ့ နံနက် ၈ နာရီခွဲတွင် နိုင်ငံတော်ကာကွယ်ရေးတက္ကသိုလ်၊ သင်တန်းခန်းမ၌ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ နည်းပြအရာရှိကြီးများ၊ သင်တန်းသားအရာရှိကြီးများနှင့် တပ်နယ်မှ အရာရှိကြီးများအား တွေ့ဆုံအမှာစကား ပြောကြားရာတွင် ထည့်သွင်းပြောကြားသည်။


တွေ့ဆုံပွဲသို့ တပ်မတော်ကာကွယ်ရေးဦးစီးချုပ်နှင့်အတူ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်း၊ ညှိနှိုင်းကွပ်ကဲရေးမှူး(ကြည်း၊ရေ၊လေ) ဗိုလ်ချုပ်ကြီး မြထွန်းဦး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ခင်အောင်မြင့်၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ နေပြည်တော်တိုင်းစစ်ဌာနချုပ် တိုင်းမှူး၊ နိုင်ငံတော်ကာကွယ်ရေးတက္ကသိုလ်မှ ကျောင်းအုပ်ကြီးနှင့် နည်းပြအရာရှိကြီးများ၊ တပ်နယ်မှ အရာရှိကြီးများနှင့် သင်တန်းသားအရာရှိကြီးများ တက်ရောက်ကြသည်။
ဦးစွာ နိုင်ငံရေးအမြင်နှင့်ပတ်သက်၍ ရှင်းလင်းပြောကြားရာတွင် မိမိနိုင်ငံ၏သမိုင်းကို မှန်မှန်ကန်ကန်သိရှိရန်မှာ များစွာအရေးကြီးကြောင်း၊ နိုင်ငံ၏သမိုင်းကြောင်း နှင့်ပတ်သက်၍ ၁၈၈၆ ခုနှစ် သူ့ကျွန်ဘ၀မကျရောက်မီအထိ ဘုရင်နိုင်ငံများ တည်ထောင်ခဲ့ပြီး ကိုယ့်ထီး၊ ကိုယ့်နန်းဖြင့်နေထိုင်ခဲ့သည့် အခြေအနေများ၊ ယင်းဘုရင် နိုင်ငံများ၏ ရှေးဟောင်းယဉ်ကျေးမှုအနုပညာများ အဆင့်မြင့်မားခဲ့မှု၊ အမျိုးသားရေး သမိုင်းအထောက်အထား များနှင့် သက်ဆိုင်ရာဘုရင်များ၏ ကွပ်ကဲမှုအောက်တွင် ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်၊ ရှမ်း စသည်ဖြင့် တိုင်းရင်းသားလူမျိုးများ စုစည်းညီညွတ်စွာ နေထိုင်ခဲ့မှုအခြေအနေများ၊ ကိုလိုနီကာလနယ်ချဲ့များ၏ သွေးခွဲအုပ်ချုပ်ရေးစနစ်ကြောင့် နိုင်ငံအုပ်ချုပ်မှုဖရိုဖရဲဖြစ်ခဲ့ရပြီး လူမျိုးရေး၊ ဘာသာရေး၊ တောင်တန်းမြေပြန့် သွေးကွဲမှုများ၊ ကွဲပြားမှုများဖြစ်ခဲ့ရသည့် အခြေအနေများ၊ နယ်ချဲ့တို့၏ မြန်မာနိုင်ငံသယံဇာတများကို ထုတ်လုပ်ရောင်းချရေးကိုသာ အဓိကထားသည့် စီးပွားရေးစနစ်ကြောင့် နိုင်ငံဖွံ့ဖြိုးရေးကျဆင်းခဲ့ရသည့် အခြေအနေများ၊ လွတ်လပ်ပြီးစ မြန်မာနိုင်ငံအနေဖြင့် ပြည်တော်သာစီမံကိန်းကဲ့သို့ ပြန်လည်ထူထောင်ရေး ကိုသာ အလေးပေးပြီး စီးပွားရေးဖွံ့ဖြိုးတိုးတက်အောင် လုပ်ဆောင်နိုင်မှုမရှိသည့် အခြေအနေများနှင့် တိုင်းရင်းသားများ၏ မကျေနပ်မှုများ၊ လက်နက်ကိုင် အခွင့်အရေးတောင်းဆိုမှုများကြောင့် နိုင်ငံရေး မတည်ငြိမ်မှုနှင့် စီးပွားရေးကျဆင်းမှုများ ဖြစ်ပေါ်ခဲ့ရမှု အခြေအနေများ၊ ယင်းကာလမြန်မာနိုင်ငံအတွင်း ဖြစ်ပေါ်ခဲ့သည့် အရင်းရှင်စနစ်နှင့် ဆိုရှယ်လစ်၊ ကွန်မြူနစ်စနစ်များ နိုင်ငံရေးအားပြိုင်မှုအခြေအနေများ၊ အယူဝါဒရေးအရ၊ တိုင်းရင်းသားရေးအရ၊ ပါတီရေးအရ ကွဲပြားမှုများကြောင့် ၁၉၆၂ ခုနှစ်တွင် တိုင်းပြည် ပြိုကွဲမည့် အန္တရာယ်ကြောင့် အာဏာသိမ်းခဲ့ရမှု အခြေအနေများ၊ ၁၉၇၄ ခုနှစ်တွင် မြန်မာ့ဆိုရှယ်လစ် လမ်းစဉ်ပါတီမှ လမ်းစဉ်ပါတီအုပ်ချုပ်ရေးစနစ်ဖြင့် အုပ်ချုပ်ခဲ့ပြီး အားနည်းချက်များကြောင့် ၁၉၈၈ ခုနှစ် အရေးအခင်းဖြစ်ပွား၍ အစိုးရပြိုကွဲသွားပြီး တပ်မတော်မှ ထိန်းသိမ်းခဲ့ရမှု အခြေအနေများ၊ နိုင်ငံရေးအရ ပြည်သူလူထုတောင်းဆိုသည့် ပါတီစုံဒီမိုကရေစီစနစ် ပြောင်းလဲကျင့်သုံးရန် မြန်မာ့ဆိုရှယ်လစ်လမ်းစဉ်ပါတီ အစည်းအဝေးနှင့် ညီလာခံများတွင် ချပြဆွေးနွေးမှု၊ န၀တ တပ်မတော်အစိုးရလက်ထက် အမိန့်ကြေညာချက် တွင် ပါတီစုံသွားမည့်အကြောင်း ထည့်သွင်းဖော်ပြခဲ့မှု အခြေအနေများ၊ ပါတီစုံဒီမိုကရေစီစနစ် ကျင့်သုံးရန် အတွက် ၂၀၀၈ ခုနှစ်၊ ဖွဲ့စည်းပုံအခြေခံဥပဒေ ရေးဆွဲပေါ်ပေါက်လာမှုနှင့် ဖွဲ့စည်းပုံအခြေခံဥပဒေနှင့်အညီ ပြည်သူလူထုက ရွေးချယ်တင်မြှောက်သည့် ဒီမိုကရေစီ အစိုးရများ ဖြစ်ပေါ်လာမှုတို့အား ရှင်းလင်းပြောကြား၍ ယင်းသမိုင်းကြောင်းဆိုင်ရာ ဆက်နွှယ်မှုများအရ ဒို့တာဝန်အရေးသုံးပါးဖြစ်သည့် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေးနှင့် အချုပ်အခြာအာဏာတည်တံ့ ခိုင်မြဲရေးတို့သည် နိုင်ငံအတွက် မဖြစ်မနေလိုအပ်သည့် အမျိုးသားရေးတာဝန်ဖြစ်ကြောင်း မှာကြားသည်။
ဆက်လက်ပြီး နိုင်ငံရေးအရ တည်ငြိမ်မှုနှင့် တိုင်းရင်းသားရေးအရ တည်ငြိမ်မှုများရှိရန်အတွက် တပ်မတော်အနေဖြင့် အမျိုးသားနိုင်ငံရေးအခန်းကဏ္ဍတွင် ဆက်လက်ပါဝင်နေရခြင်း ဖြစ်ကြောင်း၊ တပ်မတော်သည် ပါတီနိုင်ငံရေးလုပ်ဆောင်ခြင်း မဟုတ်ကြောင်း၊ သို့ဖြစ်၍ ၂၀၀၈ ခုနှစ်၊ ဖွဲ့စည်းပုံ အခြေခံဥပဒေတွင်လည်း “ အရေးပေါ် ကာလဆိုင်ရာပြဌာန်းချက် ” များကို ထည့်သွင်းပြဋ္ဌာန်းထားကြောင်း၊ တပ်မတော်နှင့် နိုင်ငံတော်၏ ပကတိအခြေအနေမှန်များ၊ သမိုင်းကြောင်း အချက်အလက်များကို သိရှိ ထားရန်လိုကြောင်း၊ တိုင်းရင်းသားအရေးကိုလည်း အလေးထားလုပ်ဆောင်ရမည် ဖြစ်ကြောင်း၊ တိုင်းရင်းသားများ၏ အကျိုးစီးပွားကိုဖော်ဆောင်ပေး၍ လိုအပ်ချက်များကို ဖြည့်ဆည်းဆောင်ရွက်ပေး ရမည်ဖြစ်ကြောင်း ထည့်သွင်းပြောကြားသည်။
နိုင်ငံခြားရေးမူဝါဒနှင့် နိုင်ငံတကာဆက်ဆံရေးအခြေအနေများ နှင့် ပတ်သက်၍ ပြောကြားရာတွင် နိုင်ငံ၏ တည်နေရာ၊ သမိုင်းကြောင်းနှင့် ဒေသအတွင်းအခြေအနေ၊ နိုင်ငံတကာအခြေအနေတို့ကြောင့် မြန်မာနိုင်ငံအနေဖြင့် ငြိမ်းချမ်းစွာ အတူယှဉ်တွဲနေထိုင်ရေးမူ(၅)ချက် အပေါ်အခြေခံ၍ လွတ်လပ်တက်ကြွပြီး ဘက်မလိုက်သော နိုင်ငံခြားရေးဝါဒနှင့် နိုင်ငံအချင်းချင်း မိတ်ဝတ်မပျက် ပေါင်းစပ်ဆက်ဆံရေးမူဝါဒများ ကျင့်သုံးနေမှု အခြေအနေ၊ နိုင်ငံတကာဆက်ဆံရေး၌ “ အမြဲတမ်းမိတ်ဆွေ၊ အမြဲတမ်း ရန်သူဟူ၍ မရှိ၊ အမြဲတမ်း အကျိုးစီးပွားသာရှိသည် ” ဆိုသည်ကိုသတိထားပြီး အချိန်နှင့်အမျှ ပြောင်းလဲဖြစ်ပေါ်နေသည့် နိုင်ငံတကာရေးရာများကို မျက်ခြေမပြတ်လေ့လာ၍ ချမှတ်ထားသည့် နိုင်ငံခြားရေးမူဝါဒများနှင့်အညီ လိုက်နာကျင့်သုံးရန် လိုအပ်မှုအခြေအနေများ၊ မြန်မာ့တပ်မတော်နှင့် နိုင်ငံတကာတပ်မတော်များ၏ ဆက်ဆံရေး အခြေအနေများအား ရှင်းလင်း ပြောကြားခဲ့သည်။
စီးပွားရေးအမြင် နှင့်ပတ်သက်၍ ပြောကြားရာတွင် စီးပွားရေးသည် တိုင်းပြည်၏ မောင်းနှင်အားဖြစ်သည်နှင့် အညီ စီးပွားရေးဖွံ့ဖြိုးတိုးတက်ရန် လိုအပ်ကြောင်း၊ ဈေးကွက်စီးပွားရေးစနစ် ပီပြင်ကောင်းမွန်မှုရှိရန်စီးပွားရေးကို အဓိကအထောက်အကူ ဖြစ်စေသည့်ထုတ်ကုန်ပမာဏ ကြီးမားတိုးတက်စေရေးအတွက် ကုန်ထုတ်လုပ်မှု ဖွံ့ဖြိုးတိုးတက်ရေး အားပေးလုပ်ဆောင်ရန်၊ ထုတ်ကုန်များပြည်ပဈေးကွက် ယှဉ်ပြိုင်နိုင်စွမ်းရှိရန် မိမိနိုင်ငံ၏ အခြေခံစီးပွားရေးလုပ်ငန်းဖြစ်သည့် စိုက်ပျိုးရေးနှင့် မွေးမြူရေးလုပ်ငန်းများအပါအ၀င် ခေတ်မီနည်းစနစ်များဖြင့် အထွက်တိုးအောင် မြှင့်တင်လုပ်ဆောင်ရေးအားပေးရန် လိုအပ်မှုအခြေအနေများ၊ စပါးစိုက်ပျိုးရေးတွင် ရေ၊ မြေ၊ မျိုး၊ နည်းကို လိုက်နာပြီး အထွက်ကောင်းမျိုးများကို တစ်ဧကလျင် ကောက်ပင် တစ်သိန်းလေးသောင်းနှင့် တစ်သိန်းခုနှစ်သောင်းကြား ၀င်အောင်စိုက်ပျိုးခြင်းဖြင့် အထွက်တိုးနိုင်ကြောင်း၊ ထိုသို့အထွက်တိုးလာပါက ကုန်ထုတ်လုပ်မှုစရိတ်ကျဆင်းပြီး တောင်သူများတွက်ခြေကိုက်နိုင်ကြောင်း၊ အလားတူ မွေးမြူရေးတွင်လည်း “ ရေ၊ ဆေး/အစာ၊ မျိုး၊ နည်း ” မှန်မှန်ကန်ကန်နှင့် အရည်အသွေးပြည့်မီအောင် လုပ်ဆောင်ရမည်ဖြစ်ကြောင်း၊ ကုန်ဈေးနှုန်းမြင့်မားခြင်း၊ စီးပွားရေးကျဆင်းခြင်းတို့ကြောင့် စားသုံးသူပြည်သူများ ဒုက္ခရောက်ပြီး သောကများရသည့် အခြေအနေများ၊ ပြည်တွင်းဖြစ်ကိုအားပေးရန်နှင့် စားရေးသည်အဓိကကျခြင်းကြောင့် တပ်မတော်၏ တပ်ပိုင်နှင့်တစ်ပိုင်တစ်နိုင် စိုက်ပျိုးရေးလုပ်ငန်းများအား အောင်မြင်အောင်လုပ်ဆောင်ရေး၊ ထုတ်လုပ်မှုကုန်ကျစရိတ် အနည်းဆုံးဖြစ်အောင် စီမံခန့်ခွဲလုပ်ဆောင်ရေး၊ ယင်းသို့ ထုတ်လုပ်မှုကုန်ကျ စရိတ်နည်းသည့်အပြင် အမြတ်အစွန်းအနည်းငယ်ဖြင့် ရောင်းချခြင်းဖြင့် ထုတ်ကုန်ပမာဏ ပိုမိုတိုးတက် ကြီးမားလာအောင် လုပ်ဆောင်ရန်လိုအပ်မှု သဘောတရားများကို မိမိတပ်ရင်းတပ်ဖွဲ့များမှ မိမိနိုင်ငံအတွက် အထိရည်မှန်း၍ သိမြင်နားလည်မှုရှိရန် လိုကြောင်း၊ ၎င်းအပြင်ထုတ်ကုန်လုပ်ငန်းများ ဖွံ့ဖြိုးတိုးတက်ရေးအတွက် မိမိနိုင်ငံ၏ ပြည်တွင်းဖြစ်များကို အားပေးရန်၊ မလိုအပ်သည့် အသုံးအဖြုန်းများကို ခြိုးခြံချွေတာရန် လိုအပ်ကြောင်း၊ အများပြည်သူတိုက်ရိုက်အကျိုးရှိပြီး သင့်တင့်သော ကုန်ကျစရိတ်ဖြင့် အလျင်အမြန် ပို့ဆောင်ပေးနိုင်သော ရထားပို့ဆောင်ရေးစနစ်ကိုလည်း အားမြှင့်လုပ်ဆောင်ရန်လိုကြောင်း မှာကြားသည်။
အုပ်ချုပ်ရေးအမြင် နှင့် ပတ်သက်၍ အုပ်ချုပ်ရေးတွင် တရားဥပဒေစိုးမိုးရေး၊ စီမံခန့်ခွဲရေးကိစ္စရပ်များ ပါဝင်ကြောင်း၊ တရားဥပဒေစိုးမိုးရေးသည် မြန်မာနိုင်ငံ ရဲတပ်ဖွဲ့တစ်ခုတည်း၏ တာဝန်မဟုတ်ဘဲ ပြည်သူများကလည်း လိုက်နာဆောင်ရွက်မှု၊ ပူးပေါင်းပါဝင်မှုလိုအပ်ကြောင်း၊ တိုင်းသူပြည်သားများအနေဖြင့် ဘာသာရေးဆိုင်ရာ အဆုံးအမများ၊ လောကနီတိတရားများနှင့်အညီ နေထိုင်ကြရန်လိုကြောင်း၊ တရားဥပဒေ စိုးမိုးရေးနှင့် ဆက်စပ်နေသည့် လူမှုနီတိများ၊ စည်းကမ်းလိုက်နာမှုများအား အလေးထားလိုက်နာ ဆောင်ရွက်ရမည်ဖြစ်ကြောင်း၊ ထို့အပြင် အုပ်ချုပ်ရေး၏ အခြေခံဖြစ်သည့် ပညာရေး၊ ကျန်းမာရေး ဆိုင်ရာမြှင့်တင်မှုများ ပြုလုပ်ရန်လိုအပ်ကြောင်း၊ လက်ရှိမြန်မာနိုင်ငံ၏ လူ့သက်တမ်းမှာ ၆၅ နှစ်နှင့် ၆၇ နှစ်ခန့်သာရှိပြီး ကမ္ဘာ့နိုင်ငံအချို့နှင့် နှိုင်းယှဉ်ပါက နိမ့်ကျနေကြောင်း၊ ကျန်းမာကြံ့ခိုင်အောင် နေထိုင်စားသောက်ရန်နှင့် အားကစားလှုပ်ရှားမှုများ လုပ်ဆောင်ခြင်း၊ ကျန်းမာရေးနှင့် ညီညွတ်သည့် အာဟာရ ပြည့်ဝအောင်စားသောက်ခြင်း၊ ကျန်းမာရေးနှင့်ညီညွတ်အောင် နေထိုင်ခြင်း၊ ကျန်းမာရေးကိုထိခိုက်စေသည့် အရက်၊ ဆေးလိပ်၊ ကွမ်း၊ မူးယစ်ဆေးဝါး သုံးစွဲမှုများ ရှောင်ကြဉ်ခြင်းတို့ဖြင့် သက်တမ်းစေ့နေထိုင်နိုင်မည့်အပြင် လူ့သက်တမ်းပိုမိုမြင့်မား တိုးတက်စေနိုင်ကြောင်း ထည့်သွင်းပြောကြားသည်။
ပညာရေး နှင့်ပတ်သက်၍လည်း ၂၀၀၂ ခုနှစ်တွင် မူလတန်းတက်ရောက်သူ ၁၂၆၉၃၃၇ ဦးအနက် အလယ်တန်းပညာ သင်ကြားနိုင်သူ ၅၉၇၀၀၀ ဦးသာရှိပြီး ၄င်းတို့အနက် တက္ကသိုလ်ဝင်တန်းအောင်မြင်သူ ၁၁၀၁၂၄ ဦးသာရှိခဲ့သည့်အတွက် ၈ ဒသမ ၆၂ ရာခိုင်နှုန်းသာ အဆင့်မြင့်တက္ကသိုလ်များသို့ တက်ရောက်နိုင်ခဲ့ကြောင်း၊ ၂၀၀၃ ခုနှစ်တွင်လည်း မူလတန်းတက်ရောက်သူ ၁၂၆၃၅၄၄ ဦး အနက် အလယ်တန်းပညာ သင်ကြားနိုင်သူ ၆၂၂၉၈၁ ဦးသာရှိပြီး ၎င်းတို့အနက် တက္ကသိုလ်ဝင်တန်းအောင်မြင်သူ ၁၂၃၄၀၁ ဦးသာရှိခဲ့သည့်အတွက် ၈ ဒသမ ၉၇ ရာခိုင်နှုန်းသာ အဆင့်မြင့်တက္ကသိုလ်များသို့ တက်ရောက်နိုင်ခဲ့ကြောင်း၊ ၂၀၀၄ ခုနှစ်တွင်လည်း မူလတန်းတက်ရောက်သူ ၁၂၇၀၄၄၀ ဦးအနက် အလယ်တန်း ပညာသင်ကြားနိုင်သူ ၆၁၈၀၂၇ ဦးသာရှိပြီး ၎င်းတို့အနက် တက္ကသိုလ်ဝင်တန်းအောင်မြင်သူ ၁၂၉၀၀၀ ဦးသာရှိခဲ့သည့်အတွက် ၁၀ ဒသမ ၇ ရာခိုင်နှုန်းသာ အဆင့်မြင့်တက္ကသိုလ်များသို့ တက်ရောက်နိုင်ခဲ့ကြောင်း၊၂၀၀၅ ခုနှစ်တွင်လည်း မူလတန်းတက်ရောက်သူ ၁၁၅၃၅၉၇ ဦးအနက် အလယ်တန်းပညာ သင်ကြားနိုင်သူ ၆၄၇၀၀၀ ဦးသာရှိပြီး ၎င်းတို့အနက် တက္ကသိုလ်ဝင်တန်း အောင်မြင်သူ ၁၁၃၃၆၀ ဦးသာရှိခဲ့သည့်အတွက် ၉ ဒသမ ၈၉ ရာခိုင်နှုန်းသာ အဆင့်မြင့်တက္ကသိုလ် များသို့ တက်ရောက်နိုင်ခဲ့ကြောင်း၊ အထက်ပါကိန်းဂဏန်းများကိုကြည့်ပါက တန်းစဉ်ကူးပြောင်းမှု ရာခိုင်နှုန်း လွန်စွာနည်းပါး၍ တိုးတက်မြင့်မားလာစေရေး လုပ်ဆောင်ရန်လိုအပ်ကြောင်း၊ ၄ နှစ်စာ စာရင်းသာမက နှစ်စဉ်စိစစ်တွေ့ရှိနေရသဖြင့် ကျောင်းသူ၊ ကျောင်းသားထက်ဝက်ခန့်မှာ မူလတန်းအဆင့်နှင့်ပင် ပညာရေးဆုံးခန်းတိုင် သွားသည်ကိုတွေ့ရကြောင်း၊ ၎င်းအပြင် သက်ဆိုင်ရာအတန်းအလိုက် အမှန်တကယ် စာတတ်မြောက်ပြီး တန်းစဉ်ကူးပြောင်းသွားရန်လည်း လိုအပ်ကြောင်း၊ တပ်မတော်အနေဖြင့် တပ်မတော်သား များ၏ ပညာရည်မြှင့်တင်ရေး၊ တပ်မိသားစုဝင်များ၏ ပညာရည် မြှင့်တင်ရေးတို့အား အလေးထား လုပ်ဆောင်လျက်ရှိကြောင်း၊ တာဝန်ရှိသူများကလည်း အားပေးရန်၊ ပူးပေါင်းပါဝင်ဆောင်ရွက်ရန်လိုကြောင်း၊ မိမိခရီးသွားရောက်သည့်ဒေသများတွင်လည်း ပညာရေးအားပေးရန်လိုအပ်မှု၊ ပညာရည်မြှင့်တင်ရေးအတွက် ကျောင်းသား၊ ဆရာ၊ မိဘသာမက အုပ်ချုပ်သူများကပါ ပူးပေါင်းဆောင်ရွက်ရန်၊ ပညာရေးကို အားပေးမြှင့်တင်ရန် လိုအပ်မှုအခြေအနေများကို ထည့်သွင်းပြောကြားခြင်း၊ တတ်နိုင်သည့်ဘက်မှ အားပေးမြှင့်တင်ခြင်းများ လုပ်ဆောင်ပေးလျက်ရှိကြောင်း ရှင်းလင်းမှာကြားသည်။
ကာကွယ်ရေးအမြင်နှင့်ပတ်သက်၍ ပြောကြားရာတွင် တရားဥပဒေစိုးမိုးရေး၊ လုံခြုံရေးနှင့် ကာကွယ်ရေးဟူ၍ အဆင့် ၃ ဆင့်ရှိကြောင်း၊ တရားဥပဒေစိုးမိုးရေးအား သက်ဆိုင်ရာအုပ်ချုပ်ရေးအဖွဲ့များနှင့် မြန်မာနိုင်ငံ ရဲတပ်ဖွဲ့တို့ ပူးပေါင်းဆောင်ရွက်ကြောင်း၊ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ မြေစာရင်းဦးစီးဌာန အပါအ၀င် စီမံခန့်ခွဲရေးအဖွဲ့များကလည်း ပါဝင်ဆောင်ရွက်ပေးကြောင်း၊ ယင်းအဖွဲ့များက တရားဥပဒေစိုးမိုးရေးကို ဥပဒေနှင့်အညီ ထိန်းသိမ်းဆောင်ရွက်ရကြောင်း၊ လုံခြုံရေးတွင်မူ မြန်မာနိုင်ငံ ရဲတပ်ဖွဲ့တွင် တာဝန်ရှိကြောင်း၊ လက်နက်ကိုင်ပဋိပက္ခများ၊ အကြမ်းဖက်မှုများနှင့်ပတ်သက်သည့် လုံခြုံရေး ကိစ္စရပ်များတွင် တပ်မတော်က ပါဝင်ကူညီ လုပ်ဆောင်ရကြောင်း၊ မြန်မာနိုင်ငံရဲတပ်ဖွဲ့ဝင် များအားလည်း လုံခြုံရေးနှင့်ပတ်သက်၍ အဆင့်မြင့်လက်နက်ပစ္စည်းများ တပ်ဆင်ခြင်း၊ စနစ်တကျ လေ့ကျင့်ခြင်းများအား လုပ်ဆောင်ပေးလျက်ရှိကြောင်း၊ ကာကွယ်ရေးအပိုင်းတွင်မူ တပ်မတော်တွင်အဓိက တာဝန်ရှိကြောင်း၊ သို့သော် တပ်မတော်တစ်ခုတည်း လုပ်ဆောင်၍မရဘဲ အုပ်ချုပ်ရေးအဖွဲ့များ၊ မြန်မာနိုင်ငံရဲတပ်ဖွဲ့နှင့် ပြည်သူလူထုတို့က ၀န်းရံလုပ်ဆောင်ကြရမည်ဖြစ်ကြောင်း၊ ပြည်သူမပါဘဲစစ်မနိုင်နိုင်ကြောင်း၊ တရားဥပဒေစိုးမိုးရေး၊ လုံခြုံရေး၊ ကာကွယ်ရေးတို့တွင် ပြည်သူပူးပေါင်းပါဝင်မှသာ အောင်မြင်မည်ဖြစ်ကြောင်း၊ ကာကွယ်ရေးစွမ်းပကားရှိစေရန်၊ တိုက်စွမ်းရည်၊ တိုက်စွမ်းအားရှိစေရန် Standard Army အဖြစ် တည်ဆောက်နေခြင်းဖြစ်ကြောင်း၊ တပ်မတော်အနေဖြင့် ကာကွယ်ရေးအတွက် အမြဲအသင့်ဖြစ်နေရမည်ဖြစ်ကြောင်း၊ ကြိုတင်ပြင်ဆင်ခြင်း၊ လေ့ကျင့်ခြင်း၊ စစ်လက်နက်ပစ္စည်းများ အဆင့်မြှင့်တင်ခြင်းစသည့် တပ်မတော်စွမ်းရည်မြှင့်တင်ရေး လုပ်ငန်းများကို အမြဲမပြတ် လုပ်ဆောင်နေရမည်ဖြစ်ကြောင်း၊ မိမိနိုင်ငံ၏အကျိုးစီးပွားကို ကာကွယ်နိုင်ရန်၊ ကာကွယ်ရေး စွမ်းပကားရှိစေရန်၊ ကာကွယ်ရေးကို အမြဲတည်ဆောက်နေရန်နှင့် ကာကွယ်ရေး တည်ဆောက်မှုကို အားပေးနေရန်လိုကြောင်း၊ တိုင်းပြည်၏ ပကတိအခြေအနေ၊ နိုင်ငံတကာဆက်ဆံရေး အခြေအနေနှင့် တိုင်းပြည်၏ဘဏ္ဍာငွေ အခြေအနေများ ပေါ်မူတည်၍ ကာကွယ်ရေးတည်ဆောက်မှု အခြေအနေများအား သိရှိနားလည်ရန်လိုကြောင်းဖြင့် ရှင်းလင်းပြောကြားခဲ့သည်။
Credit: Senior General Min Aung Hlaing

No comments:

Post a Comment