Thursday, November 24, 2016

လယ်သမားကြီးများ လယ်ယာလုပ်ငန်းအပေါ် စိတ်ပျက်နေကြသောအခါ...

 ကိုယ့်သားသမီးကို ပြန်မသတ်လို သောကြောင့် စပါးကို ဆက်စိုက် နေရသော အခြေအနေမျိုးဖြင့် ကြုံ နေကြောင်း ဘိုကလေးမြို့နယ် နတ်ချောင်းကျေးရွာသား အသက် (၅၅)နှစ်အရွယ် ဦးခင်ညွန့်က စိတ် ပျက်လက်ပျက် အမူအရာဖြင့် ညည်းတွားသည်။ မိဘလက်ငုတ် လက်ရင်းလယ် ၁၀ ဧကကို ၃၅ နှစ်ကျော် လုပ်ကိုင်ခဲ့သော်လည်း ယခုနှစ်မိုးနှောင်းပိုင်းတွင် ကြုံတွေ့နေရသည့် အခက်အခဲက ဦးခင်ညွန့်ကို လယ်ယာလုပ်ငန်းအပေါ် စိတ်နာစရာဖြစ်လာစေသည်။ မိုးနှောင်းပိုင်း စပါး ရိတ်သိမ်းခါနီး အချိန်တွင် ရာသီဥတုဖောက်ပြန် ပြီး မိုးဆက်တိုက်ရွာသွန်းခဲ့ခြင်း၊ ရက်ကြာမြင့်စွာ ဒီရေလွှမ်းမိုးခဲ့ခြင်းတို့ကြောင့် စိုက်ပျိုးထားသည့်  ၁၀ ဧက၏ သုံးပုံနှစ်ပုံ ဆုံးရှုံးသွားပြီဟု ဦးခင်ညွန့်က ဆိုလေသည်။



‘‘ဆုပ်လည်း စူး၊ စားလည်း ရူးဆိုတဲ့ စကားက ကျွန်တော်တို့ အတွက် အခုအချိန်မှာ ကွက်တိပဲ’’ ဟု ပြောလာသူက ဘိုကလေးမြို့ နယ် မဲစလီကျေးရွာနေ အသက် (၅၀)ကျော်အရွယ်ရှိသူ ဦးမြင့်ဇော် ဖြစ်သည်။

ဦးမြင့်ဇော်တွင် လယ် လေး ဧကရှိပြီး လက်ရှိ မိုးများ၍ ဒီရေ တက်မှုကြောင့် လယ်အားလုံးနီး ပါး ရေမြုပ်ပျက်စီးခဲ့ရသည်ဟုဆို သည်။ တစ်ဧကလျှင် ကျပ်တစ် သိန်းခွဲခန့်ရင်းနှီးမြှုပ်နှံမှုသည် စပါးရိတ်သိမ်းရန် ရက်ပိုင်းအလိုတွင် ရေနစ်မြုပ်၍ ဆုံးရှုံးခဲ့ရခြင်းကြောင့် နွေစပါး ဆက်လက်စိုက်ပျိုးရန် တွေဝေနေရကြောင်း ပြောသည်။

လယ်ယာလုပ်ငန်းခွင်တွင် နှစ်ပေါင်း ၄၀ လုပ်ကိုင်လာသူ ပဲခူးတိုင်းဒေသကြီး ကဝမြို့နယ် သပြေကန်ကျေးရွာသား အသက်(၆၆) နှစ်အရွယ် ဦးညိုအေးကလည်း အထွက်နှုန်းကျဆင်းမှု၊ စပါးဈေး နှုန်းကျဆင်းမှုတို့ကြောင့် လယ်ယာလုပ်ငန်းခွင်ကို ဆက်လက် လုပ် ကိုင်ရန် စဉ်းစားနေသည်။ ဓာတ် မြေသြဇာကုမ္ပဏီတွင် လုပ်ကိုင်နေသည့် သားတစ်ဦး၊ သမီးတစ်ဦး၏ လုပ်ခလစာအပေါ် မှီခိုနေရပြီး လယ် ၁၀ ဧကစိုက်ပျိုးပါက စပါး ၆၂ တင်းခန့်သာ ရရှိခဲ့သည့် အခြေအနေကို ဦးညိုအေး စိတ်ပျက်နေမိ လေသည်။

မြန်မာနိုင်ငံ၏ဆန်စပါး အဓိ ကစိုက်ပျိုးသည့် ဧရာဝတီနှင့်ပဲခူး တိုင်းဒေသကြီးတို့ရှိ လယ်သမား များသည် ရာသီဥတုဖောက်ပြန်မှု၊ မိုးစပါးစိုက်ပျိုးချိန် နှစ်စဉ်ကြုံတွေ့ ရသည့် ရေကြီးနစ်မြုပ်မှု၊ စပါးပေါ် ချိန်တွင် စပါးဈေးကျဆင်းမှုနှင့် ထုတ်လုပ်မှုစရိတ် ကြီးမားမှုတို့ ကြောင့် လယ်ယာလုပ်ငန်းခွင်ကို ဆက်လက်လုပ်ကိုင်ရန် အခက်အ ခဲကြုံနေကြလေသည်။

လယ်ယာလုပ်ငန်းကဏ္ဍ၌ ရာသီဥတုဖောက်ပြန်ခြင်း၊ စပါး သီးနှံတန်ဖိုး ဈေးနှုန်းကျဆင်းခြင်း၊ ထုတ်လုပ်မှု ကုန်ကျစရိတ် မြင့် တက်လာခြင်းတို့က လယ်ယာစက် မှုကဏ္ဍချိန်ခွင်လျှာညီသည့် စီးပွား ရေးပုံစံဖော်ထုတ်မည့် အစိုးရ၏ စီးပွားရေးမူဝါဒကို စိန်ခေါ်နေ ကြောင်း မြန်မာနိုင်ငံဆန်စပါးအ သင်းချုပ်တာဝန်ရှိသူအချို့က သုံး သပ်သည်။

မြန်မာနိုင်ငံတွင် မိုးစပါးစိုက် ဧက ၁၄ သန်းကျော်ရှိပြီး ရေကြီး နစ်မြုပ်မှုကြောင့် ဧက လေးသိန်း ခန့် ပျက်စီးဆုံးရှုံးခဲ့ရသည်။ မိုးစပါးအထွက်နှုန်းမှာ တစ်ဧက ၇၅ တင်း နှုန်း ပျမ်းမျှသတ်မှတ်ထားပြီး ယခု နှစ် မိုးစပါးအထွက် တင်းသန်းပေါင်း ၁,၀၅၀ တင်းကျော်ရှိမည်ဟု စိုက်ပျိုးရေး၊ မွေးမြူရေးနှင့် ဆည် မြောင်းဝန်ကြီးဌာန လက်ထောက် အတွင်းဝန် ဦးမျိုးတင့်ထွန်းက ပြောသည်။ ဧကလေးသိန်းကျော် ရေကြီးနစ်မြုပ်မှုက ယခုနှစ်အသစ် ထွက်လာမည့် မိုးစပါးတင်းသန်း ပေါင်း ၁,၀၅၀ ကျော်မှ စပါးတင်း သန်း ၃၀ ခန့် ဆုံးရှုံးမည်ဟု ၎င်းက ဆိုသည်။



ယခုနှစ်တွင် ရာသီဥတုဖောက်ပြန်မှုကြောင့် ဧရာဝတီတိုင်းနှင့် ပဲခူးတိုင်းရှိ ဒေသအများစုတွင် စပါးအထွက်နှုန်းလျော့ကျခဲ့သည်။ (ဓာတ်ပုံ − ထက်မြက်)


မြန်မာနိုင်ငံတွင် မိုးစပါးစိုက် ပျိုးရာသီ၌ နှစ်စဉ်နီးပါး ရေကြီးနစ် မြုပ်မှုကြောင့် စိုက်ပျိုးသီးနှံများ ပျက်စီးလေ့ရှိပြီး လယ်သမားများ ၏ အရင်းအနှီးဆုံးရှုံးမှုများ ကြုံ တွေ့နေရသည်။ ၂၀၁၆ တွင် မိုး များပြီး ရေကြီးမှုများကြောင့် မြန် မာနိုင်ငံ အနှံ့အပြား၌ လယ်ယာ စိုက်ပျိုးမြေဧက ခုနစ်သိန်းကျော် ရေနစ်မြုပ်ခဲ့ကြောင်း စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနက စာရင်းထုတ်ပြန်ထား သည်။

နှစ်စဉ် မိုးနှင့်နွေစပါးစိုက်ပျိုး မှုမှ ဆန်တန်ချိန် ၁၂ သန်းကျော် ရရှိပြီး တစ်နိုင်ငံလုံးဆန်စားသုံးမှု က တန်ချိန် ရှစ်သန်းကျော်ရှိသည်။ နှစ်စဉ် ဆန်တန်ချိန် နှစ်သန်းကျော် ပိုနေသဖြင့် ပြည်ပဈေးကွက်သို့ တင်ပို့မှုလျော့နည်းပါက ပြည်တွင်းဈေး ကျဆင်းလာသည်။

ယခုနှစ် မိုးစပါးပေါ်ချိန်တွင် မြန်မာနိုင်ငံမှ ဆန်အဝယ်လျော့ နည်းခဲ့ခြင်းကြောင့် ယခုနှစ်ဆန် လက်ကျန်များပြီး ကုန်သည်များက မဝယ်နိုင်သဖြင့် စပါးတင်းတစ်ရာ ကို ကျပ် သုံးသိန်းခွဲခန့်သာ ဈေးရ သည်။ ယခင်နှစ် မိုးစပါးပေါ်ချိန် တွင် တင်းတစ်ရာလျှင် ကျပ်ငါး သိန်းအထက်တွင် ရှိကြောင်း ဆန် ကုန်သည်များက ပြောသည်။

တရုတ်နိုင်ငံ ယူနန်ပြည်နယ် အစိုးရက တရားမဝင် ကုန်သွယ်မှု တားဆီးရေး အစီအစဉ်ကြောင့် ယခုဘဏ္ဍာနှစ် အောက်တိုဘာလ လယ်အထိ ပြည်ပသို့ ဆန်တန်ချိန် လေးသိန်းကျော်သာ တင်ပို့နိုင်ခဲ့ သည်။ ယခင်နှစ်ကာလတူနှင့်နှိုင်း ယှဉ်ပါက တန်ချိန် နှစ်သိန်းကျော် လျော့နည်းကြောင်း မြန်မာနိုင်ငံ ဆန်စပါးအသင်းချုပ်က ထုတ်ပြန် သောစာရင်းများအရ သိရသည်။ ထိုကဲ့သို့ ပြည်ပသို့ ဆန်တင်ပို့မှု ကျဆင်းလာခြင်းကြောင့် ပြည် တွင်းဈေးကွက်တွင် ဆန်ဈေးကျ လာပြီး မိုးစပါးပေါ်ချိန်၌ ဈေးနှုန်း များ ထပ်မံကျဆင်းခဲ့သည်။

လယ်ယာထုတ်ကုန်ဈေးနှုန်း များကျဆင်းမှုကြောင့် တောင်သူ လယ်သမားများ ထိခိုက်နစ်နာမှု နည်းပါးစေရေး ညှိနှိုင်းအစည်းအ ဝေးကိုလည်း နိုဝင်ဘာ ၉ ရက်တွင်နိုင်ငံတော်သမ္မတရုံး အစည်းအ ဝေးခန်းမ၌ တောင်သူလယ်သမား အခွင့်အရေးကာကွယ်ရေးနှင့်အ ကျိုးစီးပွားမြှင့်တင်ရေးဦးဆောင် အဖွဲ့ခေါင်းဆောင် ဒုတိယသမ္မတ ဦးဟင်နရီဗန်ထီးယူက ဦးဆောင် ကျင်းပခဲ့သည်။

ဆန်စပါးအဓိကထုတ်လုပ် သည့် ဒေသများဖြစ်သော ဧရာဝ တီ၊ ရန်ကုန်၊ ပဲခူး၊ စစ်ကိုင်းတိုင်း ဒေသကြီးနှင့် ရခိုင်ပြည်နယ်တို့ တွင် နှစ်စဉ် နိုဝင်ဘာ၊ ဒီဇင်ဘာ၌ စပါးအထွက်များပြီး ဝယ်လိုအား ထက် ရောင်းလိုအားများသည်။ ထို့ကြောင့် စပါးဝယ်ယူရန် လိုအပ် သော မြို့နယ်များသတ်မှတ်ကာ လယ်ယာထုတ်ကုန်စီမံခန့်ခွဲရေး အဖွဲ့မှတစ်ဆင့် ဦးဆောင်အဖွဲ့ ထံ တင်ပြ၍ သိုလှောင်ရုံ၊ ဆန်စက်တို့ကို ဝယ်ယူစခန်းအဖြစ် သတ် မှတ်အခြေချကာ ဝယ်ယူရေးဆိုင် ရာကိစ္စများ ဆောင်ရွက်မည်ဟု ဒုသမ္မတက ပြောသည်။

အဆိုပါအစည်းအဝေးတွင် စီးပွားကူးသန်းပြည်ထောင်စုဝန် ကြီးကလည်း ဝယ်လိုအားမြင့် တက်လာရန် ဆန်စပါးကုန်သည် များကို ထောက်ပံ့ဖြေလျှော့မှုများ ပြုလုပ်ပေးရန် တင်ပြခဲ့သည်။

စပါးဈေးနှုန်း ကျဆင်းမှု လျော့နည်းစေရန် ဒေသခံဆန်စက် လုပ်ငန်းရှင်များ စပါးအပ်ကုန် စနစ်ဖြင့် ဝယ်ယူထားရန် စိုက်ပျိုး ရေး၊ မွေးမြူရေးနှင့် ဆည်မြောင်း ဝန်ကြီးဌာနက စီစဉ်ခဲ့သည်။

နိုင်ငံသားများက ရွေးချယ် တင်မြှောက်လိုက်သည့်အရပ်သား အစိုးရ စတင်တာဝန်ယူပြီး မေလ အတွင်း လယ်သမားများ အရင်း အနှီးတိုးမြှင့်ရရှိစေရန် မိုးစပါးစိုက် ပျိုးစရိတ်ချေးငွေကို ယခင်က တစ် ဧက ကျပ်တစ်သိန်းမှ ယခု ကျပ် တစ်သိန်းခွဲသို့ တိုးမြှင့်ချထားပေးခဲ့ သည်။  လယ်ယာကဏ္ဍတွင် အဓိက လိုအပ်ချက်သည် စပါးဈေးနှုန်း အတက်အကျ၊ ချေးငွေများထက် တစ်ဧက စပါးအထွက်နှုန်းတိုးမြှင့် နိုင်မှု၊ ထုတ်လုပ်မှုကုန်ကျစရိတ် လျှော့ချနိုင်ရေးတို့က အရေးကြီး ကြောင်း မြန်မာနိုင်ငံဆန်စပါးအ သင်းချုပ် အထွေထွေအတွင်းရေး မှူး ဦးရဲမင်းအောင်က ပြောသည်။

မြန်မာနိုင်ငံတွင် လယ်ယာ လုပ်ငန်းခွင်၌ ကုန်ဈေးနှုန်းကြီးမြင့် ပြီး လယ်ယာလုပ်သားရှားပါးမှု ကြောင့် လုပ်အားခသည် ယခင်နှစ် ထက် နှစ်ဆနီးပါး ကျပ်ငါးထောင် မှ ခုနစ်ထောင်ကြား ကုန်ကျနေရ ကြောင်း လယ်သမားအချို့က ပြောသည်။ အထွေထွေကုန်ဈေး နှုန်းမြင့်တက်မှုသည် လယ်သမား များအတွက် လုပ်အားခပိုမိုကုန်ကျ  စေသကဲ့သို့ နိုင်ငံခြားငွေလဲနှုန်း တန်ဖိုးမြင့်တက်မှုကလည်း သွင်း အားစုများဖြစ်သော ဓာတ်မြေသြ ဇာဈေးနှုန်း၊ ပိုးသတ်ဆေးဈေးနှုန်း တို့ကို ပိုမိုမြင့်တက်စေခဲ့သဖြင့် လယ်သမားများ အခက်အခဲဖြစ်ရ သည်။  အရင်းအနှီး ကုန်ကျစရိတ် များချိန်တွင် စတင်စိုက်ပျိုးချိန်က မျှော်လင့်ချက်များဖြင့် ရယူခဲ့သော မိုးစပါးချေးငွေသည် စပါးအသစ် ပေါ်ချိန် ဈေးနှုန်းကျဆင်းမှုက လယ်သမားများအတွက် အခက် အခဲတစ်ခုဖြစ်လာသည်။

‘‘အစတုန်းက စိုက်ဘဏ်ချေး ငွေက အားဖြစ်ခဲ့တယ်။ အခုအချိန် မှာတော့ စပါးဈေးမကောင်းလို့ လယ်သမားတွေအတွက် ဘေးဖြစ် နေပြီ’’ဟု ဓနုဖြူမြို့နယ် နှဲကျိုး ကျေးရွာနေ လယ်သမား ဦးသိန်း အောင်က ပြောသည်။

ယခုနှစ် မိုးစပါးပေါ်ချိန်တွင် စပါးဈေးနှုန်းများစွာ ကျဆင်းမှုမရှိ စေရန် မိုးစပါးစိုက်ပျိုးစရိတ်ချေး ငွေ ပြန်လည်ပေးဆပ်ရမည့်အချိန် ကို တစ်လခန့် ထပ်မံတိုးမြှင့်ပေး ရန် မြန်မာနိုင်ငံဆန်စပါးအသင်း ချုပ်က တောင်းဆိုထားသည်။ လယ်ယာ စိုက်ပျိုးရေးဘဏ်မှ ထုတ်ချေးသော မိုးစပါးချေးငွေ သည် ကာလတိုချေးငွေအမျိုးအ စားဖြစ်ပြီး သီးနှံတစ်ရာသီကုန်ချိန် ၌ ပြန်လည်ပေးဆပ်ရခြင်းကြောင့် လယ်သမားများက စပါးပေါ်ချိန် တွင် ရောင်းချသဖြင့် ဈေးနှုန်းပိုမို ကျဆင်းမှုဖြစ်ပေါ်စေသည်။



ဓာတ်ပုံ − ပြည်သိမ်း

‘‘စပါးဈေးနှုန်းကို အရင်လို အများကြီးမကျအောင် နည်းမျိုးစုံ နဲ့ထိန်းဖို့ ကြိုးစားနေပါတယ်’’ဟု မြန်မာနိုင်ငံဆန်စပါးအသင်းချုပ် ဒုတိယဥက္ကဋ္ဌ ဒေါက်တာစိုးထွန်းက  ဆိုသည်။

အစိုးရသစ်က စပါးဈေးမကျဆင်းရန် ပြင်ဆင်မှုများရှိသကဲ့သို့ မြန်မာနိုင်ငံ ဆန်စပါးအသင်းချုပ် ကလည်း သုံးလအတွင်း ပြည်ပသို့ ဆန်တန်ချိန် သုံးသိန်းရောင်းချနိုင် ရန်စီစဉ်နေသည်။

အစိုးရနှင့် ဆန်စပါးအသင်း ချုပ်တို့က  မိုးစပါးအသစ်ပေါ်ချိန် တွင် စပါးဈေးမကျဆင်းရန် ၀ိုင်းဝန်း အဖြေရှာနေကြသော်လည်း ယနေ့ စပါးဈေးမှာ တင်းတစ်ရာလျှင် ကျပ်သုံးသိန်းခွဲခန့်သာ ဈေးရရှိသည်။‘‘အစိုးရဘက်ကလုပ်နေတာ တွေတော့ ကျွန်တော်တို့မသိဘူး။ စပါးဈေးကတော့ လယ်သမားတွေ ရှုံးတယ်’’ဟု ဖျာပုံမြို့နယ်ရှိအသက်(၆၀)အရွယ် လယ်သမားဦးအောင် ထွန်းက ပြောသည်။

အစိုးရအဆက်ဆက်သည် လယ်သမားများအတွက် ပွင့်လင်း မြင်သာသည့် အကူအညီပေးမှုများ ကို ယနေ့အချိန်အထိမရရှိခဲ့သဖြင့် ဒုက္ခရောက်ပြီးအခက်အခဲကြုံတွေ့ နေချိန်တွင် ကိုယ့်အားကိုယ်ကိုးပြီး ဖြေရှင်းရကြောင်းအသက်(၆၉)နှစ် အရွယ် လယ်သမားဦးဝင်းကပြော သည်။

‘‘လယ်သမားတွေရဲ့ဘ၀က တောင်မင်းကိုမြောက်မင်းမကယ် နိုင်ဘ၀မျိုးဖြစ်နေတယ်’’ဟု ၎င်းက ဆိုသည်။

ယခင်မိုးစပါးပေါ်ထွက်ချိန် တွင် ဆန်ကြမ်းအမျိုးအစားစပါး တင်း ၁၀၀လျှင် ကျပ်ငါးသိန်းခွဲခန့်၊ ဆန်ချောစပါး တင်း ၁၀၀ လျှင်ကျပ်ရှစ်သိန်းအနည်းဆုံးဈေးရရှိခဲ့သည်။ ထို့ကြောင့်လယ်သမားများသည် ယခုနှစ်တွင် မိုးစပါးကိုမျှော်လင့်ချက်ကြီးစွာဖြင့် စိုက်ပျိုးခဲ့သော်လည်း စပါးပေါ်ချိန်၌ ဈေးနှုန်းကျဆင်းမှုကြောင့် အခက်အခဲများဖြစ်ရသည်။

‘‘တောင်သူတွေ စားဖို့တောင် မရတော့ဘူး။ တချို့စိုက်စရိတ်မရှိ လို့ ပိုက်ဆံချေးပြီး စိုက်ပျိုးရတဲ့သူ တွေဆိုရင် ဒီနှစ်ရှုံးပြီး အကြွေးတင် သွားပြီပေါ့။ တချို့ဆိုရင် ရိတ်ခါနီး မိုးရွာလို့ စပါးတွေကလဲပြီး ရေထဲ၊ ရွှံ့ထဲနစ်ပြီး ပျက်စီးသွားကြတာ။  အထွက်နည်းသွားကြတာတွေ လည်း ဒီနှစ်ခံစားရတယ်။ လယ်က တော့ ဘယ်သူမှမစိုက်ချင်ကြတော့ ဘူး’’ဟု ပဲခူးတိုင်း က၀မြို့နယ် သ ပြေကန်ကျေးရွာနေ ဦးသန်းဦးကပြောသည်။

ယခုနှစ်အတွက် စိုက်ပျိုးစ ရိတ်ကုန်ကျမှုသည် တစ်ဧကလျှင် ကျပ်တစ်သိန်းခွဲမှ နှစ်သိန်းကြား ရှိနေသည်။ တစ်ဧကစပါးအထွက်နှုန်းကပျမ်းမျှတင်း ၅၀မှ ၆၀ကြားရှိသဖြင့် လက်ရှိစပါးပေါက်ဈေးဖြင့် ရောင်းချမည်ဆိုပါက တစ်ဧကအတွက် ၀င်ငွေကျပ် နှစ်သိန်းခန့်သာရှိသည်။

‘‘ဒီစပါးဈေးနဲ့ရောင်းချမယ် ဆိုရင် ကြွေးကြော်ဖို့နေနေသာသာ စားဖို့တောင်ကျန်မှာမဟုတ်ဘူး’’ဟု လပွတ္တာမြို့နယ် လွှစာကျေးရွာ နေဦးဌေးလွင်ကပြောသည်။

စပါးဈေးနှုန်းများကျဆင်းနေ မှုကို နိုင်ငံတော်သမ္မတနှင့် နိုင်ငံ တော်၏ အတိုင်ပင်ခံပုဂ္ဂိုလ်ဒေါ် အောင်ဆန်းစုကြည်တို့ သိရှိစေရန် ရည်ရွယ်ပြီးလှည်းကူးမြို့နယ်နေ အသက်(၇၀)ကျော်လယ်သမားအ ဘိုးအိုတစ်ဦးက နိုဝင်ဘာ ၁၄ရက် တွင် ရန်ကုန်မြို့တော်ခန်းမရှေ့၌ ဆန္ဒထုတ်ဖော်ခဲ့သည်။ ရာသီဥတု မမှန်ခြင်း၊ စပါးပေါ်ချိန်တွင် ဈေးနှုန်း မတရားကျဆင်းခြင်းတို့ ကြောင့် လယ်သမားများဒုက္ခမျိုးစုံ ကြုံတွေ့နေရသည်ကို အဖြစ်မှန်သိ ရှိအောင် ဆောင်ရွက်ပေးနိုင်ရန် ရည်ရွယ်ပြီး ဆန္ဒပြခြင်းဖြစ်သည်။

လယ်သမားများ၏ လက်ရှိ အချိန်အလိုအပ်ဆုံးမှာ အသစ်ပေါ် ထွက်လာသည့် စပါးသီးနှံ ဈေး ကောင်းရရှိရေးဖြစ်သည်ဟု လယ် သမားဦးခင်ညွန့်ကပြောသည်။ ရာ သီဥတုကြောင့် စိုက်ပျိုးထားသည့် စပါးများ ပျက်စီးဆုံးရှုံးမှုရှိခဲ့သော် လည်း မပျက်စီးဘဲကျန်ရှိသည့်သီး နှံကို ဈေးကောင်းရရှိရန်လိုလားနေ ကြသည်။

မြန်မာနိုင်ငံ၏ လယ်ယာလုပ် ငန်းခွင်အတွက် လိုအပ်ချက်များမှာ အစိုးရအနေဖြင့် စက်မှုလယ်ယာ ကဏ္ဍကို ဖော်ဆောင်ပေးရာတွင် လိုအပ်သည့်ငွေကြေးထောက်ပံ့မှု၊ စက်ပစ္စည်းများဝယ်ယူရာတွင် နှစ် ရှည်ချေးငွေများလိုအပ်နေသည်။ လယ်ယာလုပ်ငန်းခွင်တွင် လုပ် သားရှားပါးမှု၊ ကျွဲ နွားတိရစ္ဆာန်ရှား ပါးမှုတို့ကြောင့် စက်မှုလယ်ယာသို့ ကူးပြောင်းနေရပြီဖြစ်သည်။ ထို့အ ပြင် ရာသီဥတုဖောက်ပြန်မှုကြောင့် လည်း အချိန်တိုအတွင်းရိတ်သိမ်း နိုင်ရန် စက်ပစ္စည်းသည် ယနေ့ လယ်သမားများအတွက် အလို အပ်ဆုံးဖြစ်သည်ဟု ဦးညိုအေးက ပြောသည်။ ထက်မြက

No comments:

Post a Comment