Monday, November 28, 2016

မာနပြိုင်ခြင်းထက် ငြိမ်းချမ်းရေး ရယူနိုင်ရေး ပြိုင်စေချင်

အစိုးရ၊တိုင်းရင်းသား လက်နက်ကိုင် အဖွဲ့များကြားလည်းကောင်း၊ တပ်မတော်၊ တိုင်းရင်းသားလက်နက်ကိုင် အဖွဲ့များကြားလည်းကောင်း၊ ငြိမ်းချမ်းရေးရယူကာ နိုင်ငံတော်အား ခေတ်မီဖွံ့ဖြိုးတိုးတက်သော နိုင်ငံ တစ်နိုင်ငံအဖြစ် တည်ဆောက်နိုင်ရေးအတွက် ကြိုးစား ဆောင်ရွက်နေကြသည်။  ငြိမ်းချမ်းရေးရယူနိုင်ရေး ကြိုးစား ဆောင်ရွက်နေသည့်အတောအတွင်း မည်သူ(ဝါ)မည်သည့်အစုအဖွဲ့က ငြိမ်းချမ်းရေး ရယူနိုင်သည် ဆိုသော ပြိုင်ဆိုင်မှုမျိုး ဖြစ်စေချင်ပြီး မည်သူမပါရ မည်သူက မည်သို့ လျှော့ပေးဆိုသည့် ပြိုင်ဆိုင်မှုမျိုး မဖြစ်စေလိုပါ။ ယနေ့မြန်မာနိုင်ငံတွင် နှစ်ပေါင်း ၇ဝ နီးပါး ဖြစ်ပွားလာခဲ့သည့် ပြည်တွင်းစစ်ကြီး အဆုံးသတ် ၍ ပြည်တွင်းငြိမ်းချမ်း ရေးရရှိရန်အတွက် အစိုးရ၊ တပ်မတော်၊ တိုင်းရင်းသား လက်နက်ကိုင်၊ နိုင်ငံရေးပါတီ၊ အရပ်ဘက်အဖွဲ့အစည်း၊ လူထုစသည့် မတူညီသည့် အလွှာအသီးသီးမှ တာဝန်ရှိပုဂ္ဂိုလ်များ တွေ့ဆုံ ညှိနှိုင်း ဆွေး နွေးလျက်ရှိကြသည်။



ထိုသို့ တွေ့ဆုံ ဆွေးနွေးမှုများ တွင် မည်သည့်အဖွဲ့(ဝါ) မည်သူက ငြိမ်းချမ်းရေး ရယူနိုင်သည်ဆိုသည့် ပြိုင်ဆိုင်မှုမျိုး ဖြစ်စေလိုပြီး မာနပြိုင်ဆိုင်မှုမျိုးဖြင့် ငြိမ်းချမ်းရေး တည်ဆောက်မှုကိုဖြင့် လူထုမှ မလိုလားသည်မှာ အရှိတရားပင် ဖြစ်ပါသည်။ ဥပမာအဖြင့် မဟာမိတ်သုံးဖွဲ့ (AA, MNDAA, TNLA) တို့ကို UNFC(NCA လက်မှတ်မထိုးရသေးသည့်အဖွဲ့များ)က NCA တွင် ပါဝင်ခွင့်ပြုရန် အစိုးရသို့ တောင်း ဆိုနေသော်လည်း တပ်မတော်မှ ၂ဝ၁၅ ခုနှစ် ဖေဖော်ဝါရီလတွင် ရှမ်းပြည်နယ်(မြောက်ပိုင်း) လောက်ကိုင်ဒေသ၌ MNDAA  နှင့် ဖြစ်ပွားခဲ့သော တိုက်ပွဲများကို အကြောင်းပြု၍ ပါဝင်ခွင့် မပြုနိုင် ကြောင်း ငြင်းပယ်ထားသည်။ သို့သော် တပ်မတော်သည် ဒေါ်အောင်ဆန်းစုကြည်၏ စေ့စပ်ညှိနှိုင်းမှုကြောင့် တစ်ဆင့်လျှော့ကာ မဟာမိတ်သုံးဖွဲ့အား ၂ဝ၁၆ ခုနှစ် သြဂုတ် ၃၁ ရက်မှ စက်တင်ဘာ ၃ ရက်အထိ ကျင်းပခဲ့သော ပြည်ထောင်စုငြိမ်းချမ်းရေး ညီ လာခံ၊ ၂၁ ရာစု ပင်လုံညီလာခံသို့ ပါဝင်ခွင့်ပြုမည်။ သို့ သော် တပ်မတော်ဘက်မှ AA, MNDAA, TNLA တို့အနေဖြင့် 'လက်နက်ကိုင်လမ်းစဉ်ကို အပြီးတိုင်စွန့်လွှတ်ချုပ်ငြိမ်းလိုသည့် ဆန္ဒအပြည့်အဝရှိပါ သည်'ဆိုသော ကြေညာချက်တစ်စောင်ကို ထုတ်ပြန်ပေးရန် တောင်းဆိုခဲ့သည်။


မဟာမိတ်သုံးဖွဲ့ဘက်မှ 'လက်နက်ကိုင် ပဋိပက္ခကို အပြီးတိုင် ချုပ်ငြိမ်းရန် ဆန္ဒအပြည့်အဝရှိသည်'ဟူသော စကားရပ်ကိုသာ ထုတ်ပြန် ပေးနိုင်မည်ဖြစ် ကြောင်း ပြန်လည်အကြောင်းပြန်ခဲ့ခြင်း ကြောင့် ၂၁ ရာစု ပင်လုံ ညီလာခံသို့ တက် ရောက်ခွင့်မရခဲ့သလို လက်ရှိငြိမ်းချမ်းရေး ဆွေးနွေးမှုများမှာလည်း ပါဝင်ခွင့်မရရှိ သေးခြင်း ဖြစ်သည်။ ထိုအခြေအနေကို လေ့လာကြည့်မည်ဆိုပါက တစ်ဖက်နှင့်တစ်ဖက် မာန်မာနများ ပြိုင်ဆိုင်နေ ကြခြင်း ဖြစ်ပြီး ငြိမ်းချမ်းရေးရယူနိုင်ရေး ပြိုင်ဆိုင်မှုကို မမြင်တွေ့ရခြင်းမှာ စိတ်မကောင်းစရာ ဖြစ်ပါသည်။ အဘယ်ကြောင့်ဆိုသော် တပ်မတော်၏ တောင်းဆိုမှုအတိုင်း မဟာမိတ်သုံးဖွဲ့မှ ထုတ်ပြန် ပေးလိုက်မည် ဆိုပါက အားလုံးလွယ်လင့်တကူ ဖြစ်လာမည်။ မဟာမိတ်အဖွဲ့သုံးဖွဲ့ဘက်ကလည်း လက်နက်ကိုင်လမ်းစဉ်ကို အပြီးတိုင်စွန့်လွှတ်ချုပ်ငြိမ်းလိုသည့် ဆန္ဒအပြည့်အဝရှိပါသည်ဆိုသည့် စကားအရ အခက်အခဲဖြစ် စေမည် မှာ မှန်ပါသည်။


သို့သော် မိမိနားလည်သည်မှာ တပ်မတော်က ယခုချက်ချင်း လက်နက်ကိုင်လမ်းစဉ်ကို စွန့်လွှတ်ခိုင်းခြင်းမျိုး မဟုတ်နိုင်ပေ။ ငြိမ်းချမ်းရေးရယူနိုင်သည့် အချိန်မှသာလျှင် လက်နက်ကိုင်လမ်းစဉ် ကိုစွန့်လွတ်ရမည် ဟု ပြောဆိုခြင်းသာ ဖြစ်နိုင်သည်။ ထိုသို့ဆိုပါကလည်း အထူးအဆန်းမဟုတ်ပေ။ NCA စာချုပ်တွင် DDR(လက်နက်ဖျက်သိမ်းရေး၊ တပ်ဖျက်သိမ်းရေး၊ ပြန်လည်ပေါင်းစည်းရေး)၊ SSR(လုံခြုံ ရေး ကဏ္ဍ ပြုပြင်ပြောင်း လဲမှု)ဆိုသည့် အချက်ပါဝင်ခြင်းကြောင့် ငြိမ်းချမ်းရေး ရယူ နိုင်သည့် အခြေအနေတစ်ရပ်ကို တည် ဆောက်နိုင်ပြီဆိုလျှင် လက်နက်ကိုင်အဖွဲ့ အားလုံး ဒီအချက်များကို လုပ်ဆောင်ရမည် ဖြစ်သည်။ ထို့ကြောင့် တပ်မတော်၏ တောင်းဆိုချက်ကို မဟာမိတ်သုံးဖွဲ့အနေ ဖြင့် စိုးရိမ်စရာအဖြစ် ရှုမြင်သုံးသပ်မှု မပြု လုပ်ဘဲ လိုက်လျောကာ ငြိမ်းချမ်းရေး ရယူနိုင်ရေး ဆောင်ရွက်နေသည့် လုပ်ငန်းစဉ်များသို့ ပါဝင်၍ ငြိမ်းချမ်းရေးကို မည်သူက အရင်ရယူနိုင်မလဲဆိုသည့် ပြိုင်ဆိုင် မှုမျိုးဖြင့် ဝင်ရောက်ကာ ငြိမ်းချမ်းရေး လုပ် ငန်းစဉ်များသို့ ပါဝင်ဆောင်ရွက်သင့် ပါသည်။


အလားတူ တပ်မတော်ဘက်မှလည်း မဟာမိတ်သုံးဖွဲ့မှ ထုတ်ပြန်ပေးနိုင်သည့် ကမ်းလှမ်းချက်အတိုင်း လက်ခံလိုက်မည်ဆိုပါကလည်း မည်သို့မှ ဖြစ်မသွား နိုင်ပါ။ ငြိမ်းချမ်းရေးလုပ်ငန်းစဉ်ကိုလည်း ထိခိုက်လာနိုင်စရာ မရှိသကဲ့သို့ တပ်မ တော်အပေါ် လူထုက ပျက်ရယ်ပြု လှောင် ပြောင်လာနိုင်စရာလည်းမရှိဘဲ ဂုဏ်ပြု ချီးမွမ်းမှုများပင် ရှိလာနိုင်ပါသေးသည်။ အဘယ်ကြောင့်ဆိုသော် တပ်မတော်၏ သဘောထားကြီးမြတ်မှုကို လူ ထုက သိရှိခံစားခွင့်ရလိုက်ခြင်းနှင့်အတူ တပ်မတော်မှ မည်သူ(ဝါ)မည်သည့် အဖွဲ့အစည်းများထက် ငြိမ်းချမ်းရေးကို ရယူလိုချင်စိတ် ပြင်းထန်နေသည်ဆိုသော ဖော် ပြချက်တစ်ခုအဖြစ်လည်း ပြသလာနိုင်မည် ဖြစ်ပါ သည်။ ထို့ကြောင့် မာန်မာနပြိုင်ဆိုင်မှုထက် ငြိမ်းချမ်းရေးရယူနိုင်ရေး ပြိုင်ဆိုင်မှုများကို လူထုက ပိုမိုလိုလား တောင့်တနေပြီး မည်သည့်အချိန်တွင် ငြိမ်းချမ်းရေးကို ရယူနိုင်မည်လည်း ဆို သည့် မျှော်လင့်ချက်များ ကိုလည်း အဆုံးသတ်ပေးနိုင်မည် ဖြစ်ပါသည်။ ''မျက်လုံး တစ်လုံးအစား မျက်လုံး တစ်လုံးကို ပြန်ဖောက်ထုတ်ယူမည်ဆိုရင် အကန်းကမ္ဘာကြီး ဖြစ်သွားမှာပေါ့'' ဟု အိန္ဒိယနိုင်ငံ၏ လွတ်လပ်ရေးခေါင်း ဆောင် မဟတ္တမဂန္ဒီက လွတ်လပ်ရေးယူ ပြီးနောက် အိန္ဒိယနိုင်ငံတွင် ဟိန္ဒူဘာသာ နှင့် အစ္စလာမ်ဘာသာဝင်များအကြား ဖြစ်ပွားခဲ့သော အဓိကရုဏ်းကို အကြောင်း ပြုကာ ပြောကြား၍ အမုန်းတရားမှ ချစ် ခြင်းတရား အဖြစ် ပြောင်းလဲပေးခဲ့သည်။


ထို့အတူ မြန်မာနိုင်ငံတွင် ဖြစ်ပွားနေသော ပြည်တွင်းစစ်ကြီးကို ရပ်တန့် နိုင်ရေးနှင့် ပြည်တွင်း ငြိမ်းချမ်းရေး ရယူ နိုင်ရေးတို့အတွက် တစ်ဦးနှင့်တစ်ဦး၊ တစ်ဖွဲ့နှင့်တစ်ဖွဲ့အကြား ပြိုင်ဆိုင်နေသော မာန်မာနများကို ခဝါချ၍ ငြိမ်းချမ်းရေးကို မည်သူ(ဝါ)မည်သည့်အဖွဲ့က ဦးဆုံးရယူနိုင်သည်ဆိုသော ပြိုင်ဆိုင်မှုမျိုးဖြင့် မတူကွဲလွဲနေသော သဘောထားများကို တူညီ သော ရလဒ်များအဖြစ် ပြောင်းလဲပေးရန် လိုအပ်ပါသည်။ ပညာ ရှိ လောင်ဇူက ''နေထိုင် ခြင်းမှာ မြေကြီးနဲ့ ကပ်နေအောင် နှိမ့်ချတတ်ဖို့လိုတယ်။ တွေးတောခြင်းမှာ ရိုးရှင်း ဖို့လိုတယ်။ ပဋိပက္ခ ဖြေရှင်းခြင်းမှာ မျှတဖို့၊ ကြင်နာဖို့ လိုတယ်။ အုပ်ချုပ်ခြင်းမှာ မထိန်းချုပ်မိစေဖို့လိုတယ်။ အလုပ်လုပ် ခြင်းမှာ ကိုယ်ဝါသနာပါရာကို လုပ်ဖို့လိုတယ်။ မိသားစုဘဝမှာ လက်ရှိ ပစ္စုပ္ပန်အ ခြေအနေမှာပဲ နေဖို့လိုတယ်''ဟု ဆိုထားဖူးသည်။ ပညာရှိလောင်ဇူ၏ပြောစကား အရဆိုလျှင် ယခုတပ်မတော်နှင့် မဟာ မိတ် သုံးဖွဲ့အကြား ကွဲလွဲနေသော သဘောထားကို တည့်မှတ်ပေးနိုင်မည် ဖြစ်သကဲ့သို့ လက်ရှိ NCA စာချုပ်တွင် လက်မှတ်ထိုးအဖွဲ့နှင့် မထိုးအဖွဲ့ ကွဲလွဲနေသည့် အ ခြေအနေကိုလည်း ထိန်းသိမ်းပေးနိုင်မည် ဟု ထင်မိပါသည်။



 နိုင်ငံရေးအရ တောင်းဆိုသူသည် အမြင့်ဆုံးဈေးကို တင်၍ တောင်းဆိုလေ့ရှိသည်။ ထိုတောင်းဆိုမှုကို ဖြည့်ဆည်း(ဝါ) ဖြေရှင်းပေးရမည့်သူများမှာ ဈေးဆစ်တတ်ရန်လိုပါသည်။ ထိုသို့ ဈေးဆစ်သည့်အခါမှာ လည်း တောင်းဆိုသူများနှင့် တွေ့ဆုံ ဆွေးနွေသည့် အခါမှာ တောင်းဆိုသူများ အိမ်အပြန်လမ်းခရီး၌ မိမိတို့ဘာမှမရခဲ့(ဝါ)မိမိတို့ ရှုံးနိမ့်ခဲ့သည်ဆိုသော စိတ်ခံစားချက်မျိုး မဝင်မိစေဘဲ မိမိတို့တောင်းဆိုမှုကို မငြင်းပယ် ဘူး နောက် တစ်ခါ တွေ့ဆုံမှုမှာ အဆင်ပြေနိုင်သည်ဆိုသည့် အတွေးလေးဖြင့် အိမ်အပြန်ခရီး ဖြစ်ရန် လိုအပ်ပါသည်။ ပညာရှိလောင်ဇူက ''ကိုယ့်အ ပေါ် ဆက်ဆံပုံက ဥာဏ်နည်းလှရင်တောင် ကိုယ့်ဘက်က ဥာဏ် ရှိရှိနဲ့ တုံ့ပြန်ပေးပါ''ဟု ပြောဆိုခဲ့ဖူးသကဲ့သို့ ''ခင်ဗျား လိုချင်တယ်ဆိုရင် အရင်ဆုံး ပေးဆပ်ရလိမ့်မယ်။ ဒါဟာ ဥာဏ်ပညာရဲ့ နိဒါန်းအစပဲ''ဟုလည်း ဆိုထားဖူးသည်။  လောင်ဇူ၏ အဆိုအမိန့်အရဆိုပါက ငြိမ်းချမ်းရေး ရယူလိုချင်နေသည့်အတွက် ငြိမ်းချမ်းရေးကို မည်သူက အရင်ရယူနိုင်သနည်းဆိုသည့် အားပြိုင်မှုထဲတွင် ပါဝင်နေသူများ အနေဖြင့် အရင်ဆုံး ပေးဆပ်လိုက်ပြီးနောက် ကိုယ်လိုရာခရီးကို ဆက်လျှောက် သင့်ပါသည်။


တပ်မတော်ကပဲဖြစ်ဖြစ်၊ အစိုးရကပဲဖြစ်ဖြစ်၊ တိုင်းရင်းသားလက်နက်ကိုင် အဖွဲ့များကပဲဖြစ်ဖြစ်၊ မိမိလိုရာပန်းတိုင်ကို ရောက်ရန်အတွက် ပညာရှိလောင်ဇူ၏ ''ခင်ဗျားလိုချင်တယ်ဆိုရင် အရင်ဆုံး ပေးဆပ်ရလိမ့်မယ်။ ဒါဟာ ဥာဏ်ပညာရဲ့ နိဒါန်းအစပဲ''ဆိုသည့်အတိုင်း ကျင့်သုံးမည်ဆိုပါက အရင်ဆုံး ငြိမ်းချမ်းရေးကိုရယူနိုင်မည် ဖြစ်သည်။ ထိုမှတစ်ဆင့် ခေတ်မီ ဖွံ့ဖြိုးတိုးတက်သော နိုင်ငံတစ် နိုင်ငံအဖြစ် ရှင်သန်ရပ်တည် လာနိုင်ရေး နှင့် အားလုံး တောင်းဆိုနေသော တန်းတူညီမျှရေးဆိုသည့် အရာကိုလည်း အလွယ်တကူ ဖြည့်ဆည်းလာနိုင်မည် ဖြစ်သည်။ ငြိမ်းချမ်းရေး ရယူလိုသည့် ပန်းတိုင်မှာ တပ်မတော်၊ အစိုးရ၊ လက်နက်ကိုင် အဖွဲ့အားလုံး တူညီသော ပန်းတိုင်တစ်ခု ဖြစ်သည့်အတွက် မာန်မာန ပြိုင်ဆိုင်မှုနှင့် လိုလားချက်၊ တောင်းဆိုချက်များ ပြိုင်ဆိုင်မှုအစား ငြိမ်းချမ်းရေးအား အရင်ရယူနိုင်ရေး ပြိုင်ဆိုင်မှုကို ဦးစား ပေးရန် လိုအပ်ပါသည်။ ငြိမ်းချမ်းရေး ရယူနိုင်ရေး ပြိုင်ဆိုင်မှု ပြင်းထန်လာသည့်နှင့်အမျှ မြန်မာ နိုင်ငံတွင်း ဖြစ်ပွားလာခဲ့သည့် နှစ်ပေါင်း ၇ဝ နီးပါးကြာ ပြည်တွင်းစစ်ကြီးကို အဆုံး သတ်လာနိုင်မည်ဖြစ်ကာ စစ်ကြောင့် ဒုက္ခ ရောက်ခဲ့ကြသော လူထု၏ပြန်လည်ထူထောင် ရေးလုပ်ငန်းများ အပါအဝင် သဘာဝပတ် ဝန်းကျင်ထိန်းသိမ်း စောင့်ရှောက်ရေး စသည့် အခန်းကဏ္ဍများကိုလည်း ဆောင်ရွက်လာနိုင်မည်ဖြစ်သည်။      



ချစ်မင်းထွန်း

No comments:

Post a Comment