Saturday, November 19, 2016

ဒေါ်အောင်ဆန်းစုကြည် ( သို့မဟုတ် ) မြန်မာ့စိန်ခေါ်မှုများကို လက်တွေ့ကျကျ ချဉ်းကပ်နေသူ

ပြီးခဲ့သည့် နိုဝင်ဘာ ၁ ရက်မှ ၅ ရက်အထိ ဂျပန်နိုင်ငံကို အလည်အပတ်ရောက်ရှိနေသည့် နိုင်ငံတော်၏အတိုင်ပင်ခံနှင့် နိုင်ငံခြားရေးဝန်ကြီးဖြစ်သူ ဒေါ်အောင်ဆန်းစုကြည်ကို ကြည့်မည်ဆိုပါက သူ့အတွက် ပခုံးထမ်း တာဝန်ဝတ္တရားများ တဖြည်းဖြည်းနှင့် ပိုမိုများပြားလာသည့် အရိပ်လက္ခဏာများကို တွေ့မြင်လာကြရသည်။ ဂျပန်နိုင်ငံသို့ ရောက်ရှိ နေစဉ် အတောအတွင်း ဒေါ်အောင်ဆန်းစုကြည်က ဂျပန်ဝန်ကြီးချုပ် ရှင်ဇို အာဘေး၊ မြန်မာနိုင်ငံမှနေ၍ ဂျပန်နိုင်ငံတွင် လာရောက်အခြေချနေထိုင်သူများအပြင် ဂျပန်ကျောင်းသားများကိုပါ တွေ့ဆုံခဲ့ပါသည်။ ဂျပန်နိုင်ငံခရီးစဉ်အတွင်း ဒေါ်အောင်ဆန်းစုကြည်၏ ပြောကြားမှုများကို နားဆင်ကြည့် မည်ဆိုပါက သူ့အနေနှင့် လက်တွေ့ကျကျ ပြဿနာဖြေရှင်းသူ ဖြစ်လာသောသဘောကို ညွှန်းဆိုလျက်ရှိပါသည်။




ဂျပန်နိုင်ငံသို့ရောက်ရှိသည့် ဒုတိယမြောက်နေ့တွင် တိုကျိုမြို့မှ ဟိုတယ်တစ်ခု၌ ဒေါ်အောင်ဆန်းစုကြည်က ဂျပန်နိုင်ငံတွင်နေ ထိုင်သော မြန်မာလူမျိုး ၁ဝဝဝ ခန့်နှင့် တွေ့ဆုံခဲ့ပါသည်။ ထိုသို့တွေ့ ဆုံချိန်တွင် ပြော ကြားခဲ့သော သူ၏မိန့်ခွန်းတွင် မြန်မာနိုင်ငံရင်ဆိုင် နေရသည့် စိန်ခေါ်မှုများအကြောင်းကို ပြောကြားရာတွင် ဒေါ်အောင်ဆန်းစုကြည်က သူ၏လက်တွေ့ကျသော သဘောထားထင်မြင်ချက်တစ်ရပ်ကို ဤသို့ ထည့် သွင်းပြောကြားခဲ့ပါသည်။ ''ကျွန်မတို့ မြန်မာ နိုင်ငံမှာ ခိုင်မာတောင့်တင်းတဲ့ ငွေကြေးအခြေခံကို ဖန်တီးဖို့လို အပ်နေတဲ့အချိန်မှာ အခွန်အခပေးတဲ့ အလေ့အကျင့် မရှိဘူးဖြစ်နေတယ်။ ဒီနိုင်ငံမှာ တရားဥပဒေ စိုးမိုးမှုပြု ဖို့အတွက် ခရီးရှည်ကြီးလျှောက်လှမ်းနေရဦးမှာ ဖြစ်တယ်။ ဆိုရရင် ကျွန်မတို့နိုင်ငံမှာ ဥပဒေ ပညာရပ်ကို သင်ယူဆည်းပူးနေတဲ့ ကျောင်းသားတွေတောင် ဥပဒေ ဘာလဲဆိုတာကို မသိကြဘူး'' အစိုးရအတွက် စိန်ခေါ် မှုတွေက များစွာဖြစ်သည်။ စစ်တပ်က ဖွဲ့စည်းပုံအခြေခံဥပဒေ ပြင်ဆင်ရေးကို ကန့်ကွက်နေဆဲရှိသည်။ ရခိုင်ပြည်နယ်တွင် လူအများစုဖြစ်သည့် ဗုဒ္ဓဘာသာဝင်တို့နှင့် မူဆလင် ရိုဟင်ဂျာတို့အကြားတွင် ဖြစ်ပွားနေသည့် ပဋိပက္ခက တငွေ့ ငွေ့နှင့် အရှိန်မသေသေးဘဲ ရှိသည်။ နေစွမ်းအင်ဈေးကွက်က နိုင်ငံ၏ သဘာဝဓာတ်ငွေ့အရင်းအမြစ် ဖွံ့ဖြိုးတိုးတက်မှုကို ဟန့်တားထား လျက်ရှိသည်။ ထို့အပြင် တိုးပွားများပြားလာသည့် ကုန် သွယ်ရေး လို ငွေပြမှုက အများပြည်သူဘဏ္ဍာငွေကို ထိခိုက်စေလျက်ရှိသည်။ ယင်းသည်ပင် အစိုးရအတွက် များပြားလှသော စိန်ခေါ်မှုများကို ရင်ဆိုင်နေရခြင်း ဖြစ်သည်။


ဒေါ်အောင်ဆန်းစုကြည်၏ ဂျပန်နိုင်ငံခရီးစဉ် ဒုတိယမြောက် နေ့တွင် ဝန်ကြီးချုပ် ရှင်ဇိုအာဘေးနှင့် တွေ့ဆုံရာတွင် ဒေါ်အောင်ဆန်းစုကြည်က သူ၏အစိုးရအဖွဲ့က ဦးစားပေး လုပ်ဆောင်မှုများထဲမှ တစ်ခုဖြစ်သည့် ငြိမ်းချမ်းရေးဆောင်ရွက်မှုအကြောင်းကို ပြောကြားခဲ့ရာတွင် နိုင်ငံ၏ ပြည်တွင်းစစ်မှာ လွန်ခဲ့သည့် ရာစုနှစ်ဝက်ခန့် နိုင်ငံလွတ်လပ်ရေးရရှိခဲ့ပြီးကတည်းက ဖြစ်ပွားနေခဲ့သည့် သက်တမ်းရှည်ကြာ ပြည်တွင်းစစ်ကို ငြှိမ်း သတ်နိုင်ရန် သူ့အစိုးရအနေနှင့် ကြိုး ပမ်းနေရခြင်း ဖြစ်သည်။ ၂ဝ၁၅ ခုနှစ် သမ္မတဟောင်းဦးသိန်းစိန်အစိုးရလက်ထက်က တိုင်းရင်းသားလက်နက်ကိုင်အဖွဲ့ ရှစ်ဖွဲ့နှင့်အတူ အစိုးရတို့က အပစ်အခတ်ရပ်စဲရေး သဘောတူညီမှုကို လက်မှတ်ရေးထိုးခဲ့ကြသည်။ သို့ရာတွင် ယခုအချိန်အထိ အစိုးရနှင့် ငြိမ်းချမ်းရေးသဘောတူညီမှု မပြုနိုင်သေးသည့် တိုင်းရင်းသားလက်နက်ကိုင်အဖွဲ့ ၁ဝဖွဲ့ကျော်ခန့် ရှိနေသည်။  မြန် မာပြည်မြောက်ပိုင်း ကချင်ပြည်နယ်တွင် ယခုအချိန်အထိ သေနတ်သံများကို ကြားနေရဆဲ ရှိသည်။ လက်ရှိအစိုးရအနေနှင့် တိုင်းရင်းသားလက်နက်ကိုင်အဖွဲ့များအား ငြိမ်းချမ်းရေး ဆွေးနွေး ပြောဆိုမှုပြုရန် လမ်းဖွင့်ပေးထားဆဲ ရှိသည်။ သို့ရာတွင် အစိုးရနှင့် လက်နက်ကိုင်အဖွဲ့များအကြား ကိုယ်ပိုင်အုပ်ချုပ်ခွင့် ကဲ့သို့သော အရေးကိစ္စများမှာ သိသာထင်ရှားသော သဘောကွဲလွဲမှုများအဖြစ် ရှိနေဆဲဖြစ်သည်။


ဂျပန်နိုင်ငံက လာမည့်ငါးနှစ်အတွင်း မြန်မာနိုင်ငံအား ယန်းငွေ ဘီလီယံ ၈ဝဝ (အမေရိကန်ဒေါ်လာ ၇ဒသမ၇၆ ဘီလီယံ) အကူအညီပေးသွားရန် ကတိပြုခဲ့သည်။ နိုဝင်ဘာ ၄ရက်က တိုကျိုမြို့၌ ကျင်းပသည့် သတင်း စာရှင်းလင်းပွဲတွင် ဒေါ်အောင်ဆန်းစုကြည်က မြန်မာနိုင်ငံ၏ အမျိုးသားပြန်လည်သင့်မြတ်ရေးအတွက် ဂျပန်အစိုးရ၏ အကူအညီအတွက် ကျေးဇူးတင်ရှိကြောင်း ပြောကြားခဲ့သည်။ စင်စစ် မြန်မာအစိုးရအနေနှင့် တစ်ကြိမ်တည်းနှင့် ပြဿနာ ပေါင်း သောင်းခြောက်ထောင်ကို ဖြေရှင်းနေရသကဲ့သို့ ရှိနေချိန်တွင် နိုင်ငံ၏ ပြည်တွင်းပဋိပက္ခ အဆုံးသတ်ရေးမှာ အဓိကစိန်ခေါ်မှုအဖြစ် ရှိနေပါသည်။ မည်သို့ဆိုစေ ပထမဦး ဆုံး အောင်မြင်အောင်ကြိုးပမ်း အားထုတ်ရမည့် အရေးကိစ္စမှာ အပစ်အခတ်ရပ်စဲရေးပင်ဖြစ်သည်ဟု ဒေါ်အောင်ဆန်းစုကြည်ကဆိုပါသည်။ ယခင်အတိုက်အခံဘဝက ဂျပန်နိုင်ငံသို့ လာရောက်စဉ် အတွင်း ဒေါ်အောင် ဆန်းစုကြည်က မြန်မာနိုင်ငံ၏ လက်ရှိဖွဲ့စည်းပုံအခြေခံဥပဒေကို ပြင်ဆင်မှုပြုခြင်း အားဖြင့် နိုင်ငံ၏ သမ္မတဖြစ်လာရန် ကြိုးပမ်းသွားမည်ဖြစ်ကြောင်း ပြောကြားခဲ့ဖူးပါသည်။ အလားတူပင် ထိုအချိန်က ဂျပန်နိုင်ငံ အနေ နှင့် မြန်မာနိုင်ငံ၏ ဖွံ့ဖြိုးတိုးတက်မှုကို အကူအညီပေးရာတွင် မှန်ကန် သော ကူညီပံ့ပိုးမှုများပြုရန်ကိုပါ တောင်းဆိုခဲ့သည်။


ယခုအခါ နိုင်ငံတော်၏အတိုင်ပင်ခံပုဂ္ဂိုလ် ဖြစ်လာချိန်တွင်မူ  ဒေါ်အောင်ဆန်းစုကြည်က ယခင်ကထက်ပို၍ သတိထားပြောဆိုမှု ပြုလျက်ရှိသည်။ နိုဝင်ဘာ ၄ ရက်က တိုကျိုမြို့၌ စီးပွားရေးလုပ်ငန်း ရှင်များနှင့် တွေ့ဆုံ ရာတွင် ဂျပန်စီးပွားရေးလုပ်ငန်းကုမ္ပဏီများအား မြန်မာနိုင်ငံ၌ ရင်းနှီးမြှုပ်နှံမှုပြုရေးကို စည်းရုံးခဲ့ပါသည်။ မြန်မာနိုင်ငံ အနေနှင့် အောက်တိုဘာလအတွင်းက ရင်းနှီးမြှုပ်နှံမှုဥပဒေသစ်ကို အတည်ပြုခဲ့ရာ ယင်းဥပဒေ သစ်သည် နိုင်ငံ၏ ပထမခြေလှမ်းသာရှိ သေးပြီး ဆက်လက်အကောင်အထည်ဖော်ရန် ကျန်ရှိနေပါသေးသည်။ မည်သို့ဆိုစေ အောက်တိုဘာလအတွင်းက သဘောတူလက်ခံခဲ့သည့် ရင်းနှီးမြှုပ်နှံမှုဥပဒေသစ်သည် အပြန်အလှန် အကျိုးကျေးဇူး ဖြစ်ထွန်းစေမည့် ဥပဒေ ဖြစ်လာမည်ဖြစ်သကဲ့သို့ ဂျပန်ရင်းနှီးမြှုပ်နှံ သူတို့အနေနှင့် မြန်မာနိုင်ငံ၌ ရင်ဆိုင်နေရသည့် အခက်အခဲပြဿနာများကို လွတ်လပ်ပွင့်လင်းစွာ ဆွေးနွေးခြင်း အားဖြင့် မြန်မာအစိုးရက အခက်အခဲပြဿနာများ ဖြေရှင်းနိုင်ရေးအတွက် အကူအညီ ပေးသွားမည် ဖြစ်ပါသည်။ ''ဒေါ်အောင်ဆန်းစုကြည်က အလွန်ရိုးသားပွင့်လင်းမှုရှိပြီး အမြော်အမြင်ရှိသူ ဖြစ်တယ်။ ဆိုရရင် သူက ကျွန်တော်တို့ ရင်းနှီး မြှုပ်နှံမှု ပြုချင်လာအောင် ပွင့်လင်းရိုးသားလွန်းသူဖြစ်တယ်''ဟု ဂျပန်ကုန်သည်ကြီးများအသင်းဥက္ကဋ္ဌ အာကီယိုမီမူရာက ပြောကြားခဲ့သည်။ ဆိုရလျှင် ဒေါ်အောင်ဆန်းစုကြည်သည် သူ၏ ရည်မှန်းချက်များ ကြိုးပမ်းအောင်မြင်ရေးအတွက် များစွာ အချိန်ပေးလုပ်ဆောင်နေ လျက်ရှိနေသည်ကတော့ အမှန်ပင် ဖြစ်ပါသည်။          


မြင့်နောင်မိုး

No comments:

Post a Comment