Friday, December 2, 2016

ကုန်သေတ္တာတင်ယာဉ်နှင့် လုပ်သားများ ညဘက်မှ ထွက်ရမည်ဖြစ်ပြီး ရန်ကုန်မြို့ရှိ တံတားကြီးကိုးစင်းတွင် ကောက်ခံနေသည့် တံတားကြေးများ ၂၀၁၇ ခုနှစ် ဧပြီမှစ၍ ကောက်ခံတော့မည် မဟုတ်ကြောင်း ရန်ကုန်တိုင်းဒေသကြီး ၀န်ကြီးချုပ် ပြောကြား

ကုန်သေတ္တာယာဉ်နှင့် လုပ်သားများ ညဘက်မှထွက်၍ လုပ်ဆောင်ရမည်ဖြစ်ပြီး ရန်ကုန်မြို့ရှိ တံတားကြီးကိုးစင်းတွင် ကောက်ခံနေသည့် တံတားကြေးများ ၂၀၁၇ ခုနှစ် ဧပြီမှစ၍ ကောက်ခံတော့မည် မဟုတ်ကြောင်း ရန်ကုန်တိုင်းဒေသကြီး အစိုးရအဖွဲ့ဝန်ကြီးချုပ် ဦးဖြိုးမင်းသိန်းက ဒီဇင်ဘာ ၁ ရက်တွင် ပြောကြားသည်။  “ကုန်သေတ္တာယာဉ်တွေနဲ့ လုပ်သားတွေအားလုံးက ညဘက်မှာပဲ ထွက်ရမှာဖြစ်ပါတယ်။ အကောက်ခွန်မှာ MACCS စနစ်လုပ်လိုက်ချိန်မှာ ထုတ်လုပ်ရေး အခက်အခဲဖြစ်တယ်လို့ ကြားရပါတယ်။ ဒါနဲ့ပတ်သက်ပြီးတော့ ကျွန်တော်တို့ ဖြေရှင်းပေးပါမယ်။ တိုင်းဒေသကြီးအစိုးရအဖွဲ့က စီမံ/စီးပွားဝန်ကြီးကိုယ်တိုင် တာဝန်ယူပြီး ကုန်စည်စီးဆင်းမှုကို လျင်မြန်ချောမွေ့အောင် ကျွန်တော်တို့ ကြိုးပမ်းမှာဖြစ်ပါတယ်။ အခုနေ့ခင်းမှာ ထွက်တဲ့အတွက် ကုန်စည်စီးဆင်းမှု ကြန့်ကြာစေပါတယ်။ မမြင်ရတဲ့ကုန်ကျစရိတ်တွေ အများကြီးရှိပါတယ်။ ဒီအခြေအနေတွေ အဆင်ပြေချောမွေ့ဖို့အတွက် ပြီးခဲ့တဲ့ သုံးနှစ်တာကာလကတည်းက ပြင်ဆင်ထားတဲ့ စီမံကိန်းဖြစ်ပါတယ်။ ကျွန်တော်တို့ဒီကိစ္စကို အမိန့်ဥပဒေတွေ ထုတ်ပြီးတော့ ဒါလုပ်လို့ဆောင်ရွက်မှာ မဟုတ်ပါဘူး။ ကုန်စည်စီးဆင်းမှု မြန်ဆန်ဖို့အတွက် စရိတ်သက်သာစေဖို့အတွက် ကျွန်တော်တို့ ဆောင်ရွက်သွားမှာဖြစ်ပါတယ်” ဟု ဦးဖြိုးမင်းသိန်းက ပြောကြားသည်။



ထို့အပြင် ကုန်သေတ္တာကို အရေးပေါ်နေ့ခင်းဘက်တွင် ထုတ်ရန်လိုအပ်ပါကလည်း Hotline မှ တစ်ဆင့်ဆက်သွယ်နိုင်မည်ဖြစ်ပြီး ဆိပ်ကမ်းသို့ရောက်လာနိုင်ရန် စီမံပေးမည်ဖြစ်ကြောင်း ဦးဖြိုးမင်းသိန်းက ဆက်လက်ပြောကြားသည်။

အလားတူပင် ရန်ကုန်မြို့တွင်ရှိနေပြီး တံတားဖြတ်သန်းခ ပေးဆောင်နေရသည့် တံတားကြီးကိုးစင်းတွင် ငွေကြေးကောက်ခံမှုများအား လာမည့်ဧပြီမှစ၍ ငွေကြေးကောက်ခံတော့မည် မဟုတ်ကြောင်း ဦးဖြိုးမင်းသိန်းက ဆိုသည်။

“ရန်ကုန်မှာ တံတားကြီးကိုးစင်း ရှိပါတယ်။ ဒီတံတားကြီးကိုးစင်းစလုံးကို လာမယ့်ဧပြီလကစပြီး ငွေကြေးကောက်ခံတော့မှာ မဟုတ်ပါဘူး။ ဒါပေမဲ့ ကားတွေအားလုံးကိုတော့ အာဆီယံစံချိန်စံညွှန်းများနဲ့ ကိုက်ညီတဲ့ ၀င်ရိုးများအဖြစ်ကိုတော့ ကျွန်တော်တို့ ထိထိရောက်ရောက် အရေးယူဆောင်ရွက်မှာ ဖြစ်ပါတယ်” ဟု ဦးဖြိုးမင်းသိန်းက ဆက်လက်ပြောကြားသည်။

တံတားများကို ဖြတ်သန်းခမပေးရသဖြင့် တန်ပိုများတင်မည်ဆိုပါက လမ်းတံတားများ ပျက်စီးမည်ဖြစ်ပြီး အဆိုပါအခြေအနေများအတွက် စည်းမျဉ်းဘောင်အတွင်းမှ လိုက်နာလုပ်ဆောင်ရန် တိုက်တွန်းသွားမည်ဖြစ်ကြောင်းနှင့် လုပ်ငန်းရှင်များနှင့် အနီးစပ်ဆုံးပူးပေါင်း ဆောင်ရွက်မည်ဖြစ်ကြောင်း၊ အစိုးရအဖွဲ့က ဆိပ်ကမ်းများတွင်ရုံးထိုင်ပြီး ကုန်စည်စီးဆင်းမှုအတွက် ကုန်သေတ္တာများ အမြန်ဆုံးဆွဲထုတ်နိုင်ရေးပါ ကူညီမည်ဖြစ်ကြောင်း ဦးဖြိုးမင်းသိန်းက ဆက်လက်ပြောသည်။

အဆိုပါအစိုးရအဖွဲ့က ဆိပ်ကမ်းများတွင် ရုံးထိုင်ခြင်းနှင့် လုပ်ငန်းများကူညီခြင်း Operation Team ကို ဒီဇင်ဘာ ၇ ရက်မှ စတင်မည်ဖြစ်ကြောင်း ဦးဖြိုးမင်းသိန်းက ဆက်လက်ပြောကြားသည်။

အကောက်ခွန်တွင် MACCS စနစ်ကို စတင်ခါစဖြစ်နေသဖြင့် လုပ်ငန်းကျွမ်းကျင်မှုများနှင့် ပတ်သက်၍ အားနည်းမှုများရှိနေသည်မှာ မှန်ကန်ကြောင်း၊ ထိုသို့နှောင့်နှေးကာ ထုတ်မရဖြစ်နေမှုများကို ပြောစေလိုကြောင်းနှင့် ကြန့်ကြာနေမှုကို ချက်ချင်းဖြေရှင်းပေးမည်ဖြစ်ကြောင်း အကောက်ခွန်ဦးစီးဌာနမှ ညွှန်ကြားရေးမှူးချုပ်က ပြောကြားသည်။

“စတင်ခါစမှာ အားနည်းချက်တွေကြောင့် အခက်အခဲလေးတွေ ဖြစ်နေတာကို ကျွန်တော်တို့ကိုလည်း ၀ိုင်းဝန်းကူညီပြီး ဆောင်ရွက်ပေးစေလိုပါတယ်” ဟု အကောက်ခွန်ဦးစီးဌာနမှ ညွှန်ကြားရေးမှူးချုပ်က ပြောကြားသည်။

ရန်ကုန်မြို့လယ်ရှိ ဆိပ်ကမ်းများသို့ ၀င်ရောက်နေသည့် ကုန်သေတ္တာများ၏ ရာခိုင်နှုန်း ၇၀ ခန့်မှာ လှိုင်သာယာသို့သွားနေပြီး ကျန်ရာခိုင်နှုန်း ၃၀ မှာ အခြားနေရာများသို့ သွားရောက်နေကာ အဆိုပါကုန်သေတ္တာတင် ယာဉ်များဝင်ထွက်နေမှုမှာ ယာဉ်ကြောပိတ်ဆို့မှု ဖြစ်စေသည့် အချက်တစ်ခုဖြစ်သဖြင့် ဖြေရှင်းနိုင်ရန် ကြိုးပမ်းနေကြောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့မှ တွဲဖက်အတွင်းရေးမှူး ဦးသန်းဝင်းက ပြောကြားသည်။

အပြည်ပြည်ဆိုင်ရာ ဆိပ်ကမ်းများသည် ရန်ကုန်မြို့လယ်တွင် တည်ရှိနေပြီး မြန်မာနိုင်ငံနှင့် အခြားနိုင်ငံများ၏ ကုန်သွယ်မှုကဏ္ဍအတွက် အဓိကတင်ပို့ တင်သွင်းနေသည့် ရန်ကုန်ဆိပ်ကမ်းများတွင် နေ့စဉ်ကုန်ပစ္စည်းတင် ကွန်တိန်နာအလုံး ၂၀၀ ခန့်နှင့် လစဉ်ကုန်သေတ္တာပေါင်း ၃၀၀၀၀ ခန့် အ၀င်အထွက် ပြုလုပ်နေကြောင်း အကောက်ခွန်ဦးစီးဌာနမှ သိရသည်။
Writer:
ဖြိုးဝေ

No comments:

Post a Comment