Friday, December 2, 2016

ဧရာဝတီတိုင်းဒေသကြီးအတွင်း မူးယစ်ဆေးဝါးဖမ်းဆီးမှုများတွင် ရဲတပ်ဖွဲ့အနေဖြင့် အဂတိလိုက်စားမှုများ ရှိနေပြီး သက်သေများကိုပါ ဖျောက်ဖျက်မှုများ ရှိနေဟု တိုင်းဒေသကြီး လွှတ်တော်ကိုယ်စားလှယ် ပြောကြား

ဧရာဝတီတိုင်းဒေသကြီးအတွင်း မူးယစ်ဆေးဝါများ ဖမ်းဆီးရာတွင် ရဲတပ်ဖွဲ့အနေဖြင့် အဂတိလိုက်စားမှုများ ရှိနေပြီး အမှုဖြစ်စဉ်တွင်  ပါဝင်နေသည့် သက်သေပစ္စည်များကိုပါ ဖျောက်ဖျက်မှုများ ရှိနေကြောင်း ညောင်တုန်းမြို့နယ် မဲဆန္ဒနယ် အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဒေါ်နီနီမိုးက တိုင်းဒေသကြီး လွှတ်တော်အတွင်း သက်သေများနှင့်တကွ ပြောကြားသည်။ ဒီဇင်ဘာ ၁ ရက်တွင် ပြုလုပ်သည့် ဒုတိယအကြိမ် ဧရာဝတီတိုင်းဒေသကြီး လွှတ်တော် တတိယပုံမှန်အစည်းအဝေး အဋ္ဌမနေ့တွင် တိုင်းဒေသကြီး လွှတ်တော်ကိုယ်စားလှယ် ဒေါ်နီနီမိုးက ဧရာဝတီတိုင်းအတွင်းရှိ မြို့နယ်အနှံ့အပြားတွင် မူးယစ်ဆေးဝါးများဖြစ်သော ဆေးခြောက်များ၊ WY ဟုခေါ်သည့် စိတ်ကြွ ရူးသွပ်ဆေးဝါးများအား ရောင်းဝယ် ဖောက်ကားနေမှုများကို အမြစ်ပြတ် ရှင်းလင်း ဖယ်ရှားပေးရန်နှင့် သက်ဆိုင်ရာနယ်မြေအာဏာပိုင်များ၊ ရဲတပ်ဖွဲ့များ၏ အဂတိလိုက်စားမှုများကို ၀န်ထမ်းစည်းမျဉ်းနှင့်အညီ ပြတ်ပြတ်သားသား အရေးယူပေးရန်ရှိ မရှိ လွှတ်တော်သို့ မေးခွန်းမေးမြန်းရာတွင် ညောင်တုန်းမြို့နယ် ရဲတပ်ဖွဲ့မှ မူးယစ်ဆေးဝါးရောင်းချနေသည်ဟု တိုင်ကြားချက်တစ်ခုအား သွားရောက်ဖမ်းဆီးရာတွင် ကြိုတင်သတင်း ပေါက်ကြားမှုများ ရှိနေခြင်း၊ ဖမ်းဆီးရမိသည့် သက်သေခံပစ္စည်းများအား ဖျောက်ဖျက်ခြင်းများကို ဥပမာပေး၍ မေးမြန်းရာ၌ ယခုကဲ့သို့ ထည့်သွင်းပြောကြားခဲ့ခြင်း ဖြစ်သည်။



“ရောင်းချသူ ရောင်းချသည့်နေရာ သုံးစွဲနေသည့် အမည်စာရင်းနှင့်တကွ အချက်အလက်ပြည့်ဝသော ပြည်သူတို့၏တိုင်စာကို ၉ ရက် ၉ လ ၂၀၁၆ ရက်တွင် ကျွန်မကိုယ်တိုင် နယ်လုံဝန်ကြီးထံသို့ ပေးပို့ခဲ့ပါတယ်၊ ၁၀ ရက် ၉ လ ၂၀၁၆ ရက် နံနက် ၉ နာရီခန့်မှာ မအူပင်ခရိုင်မှ ဒုစရိုက်နှိမ်နှင်းရေး တပ်ဖွဲ့နှင့် ညောင်တုန်းမြို့နယ်မြေ (၁) ရဲတပ်ဖွဲ့ဝင်များစုပေါင်း၍ သတင်းပေးထားသောနေရာများကို ၀င်ရောက် ဖမ်းဆီးခဲ့ပါတယ်၊ သို့ပါသော်လည်း မည်သူတစ်ဦးတစ်ယောက်မျှ ဖမ်းဆီးအရေးယူနိုင်ခြင်း မရှိခဲ့ပါ။ သုံးစွဲရောင်းချသူ တစ်ဦးထံမှ ဆေးသုံးစွဲရာတွင် အသုံးပြုသော ဆက်စပ်ပစ္စည်းများကို မျက်မြင်သက်သေများနှင့်အတူ တွေ့ရှိခဲ့ပါတယ်။ ဖမ်းဆီးရာတွင် လိုက်ပါသွားသော ရပ်ကွက်အုပ်ချုပ်ရေးမှူးနှင့် ပြည်သူများက ရှာဖွေပုံစံဖြင့် သိမ်းဆည်းရန် ပြောကြားခဲ့သော်လည်း မသိမ်းဆည်းခဲ့သည့်အပြင် ထိုသက်သေပစ္စည်းများကို ဖုန်းဖြင့် ဓာတ်ပုံရိုက်ယူခဲ့သော ရပ်ကွက်အုပ်ချုပ်ရေးမှူး၏ ဖုန်းထဲရှိ ဓာတ်ပုံများကိုပါ အတင်းအဓမ္မ ဖျက်ခိုင်းခဲ့ပါတယ်။ ထိုအခြင်းအရာကို ကြည့်ခြင်းအားဖြင့် ပြည်သူတွေကို ကူညီပါရစေဟု ပြောသည့်ဌာနအနေဖြင့် သက်သေခံပစ္စည်းများ ဖျောက်ဖျက်နေကြောင်း ထင်ရှားစွာပေါ်လွင်နေပါတယ်” ဟု ဒေါ်နီနီမိုးက လွှတ်တော်အတွင်း မေးခွန်းမေးမြန်းရာတွင် ထည့်သွင်းပြောကြားသည်။

ပြည်သူများမှ သတင်းပေး တိုင်ကြားလာမှုကို လုံခြုံရေးနှင့် နယ်စပ်ရေးရာဝန်ကြီးထံ တိုင်ကြားပြီးနောက် ၀င်ရောက်စစ်ဆေးရာတွင် မူးယစ်ဆေးဝါး ရောင်းချသူများအား ဖမ်းဆီးရမိခြင်း မရှိခြင်းမှာ ကြိုတင်သတင်း ပေါက်ကြားခဲ့မှုကြောင့်ဖြစ်ကြောင်း၊ ကြိုတင်သတင်းပေးပို့ခဲ့သည့် ဓာတ်ပုံမှတ်တမ်းများကိုပါ ရရှိထားပြီး သက်ဆိုင်ရာဌာနများကို အသိပေး အကြောင်းကြားခဲ့သော်လည်း အရေးယူမှု တစ်စုံတစ်ရာ လုပ်ဆောင်ခဲ့ခြင်းမရှိကြောင်း လွှတ်တော်ကိုယ်စားလှယ် ဒေါ်နီနီမိုးက The Daily Eleven သတင်းစာ၏  မေးမြန်းမှုအား ပြန်လည်ဖြေကြားရာတွင် ထည့်သွင်းပြောကြားခဲ့သည်။

“ကျွန်မတို့ ညောင်တုန်းက ပြည်သူတစ်ယောက်က မအူပင်ခရိုင်ကို ဖုန်းဆက်ပြီးတိုင်တယ်။ တိုင်တာကို ခရိုင်က ညောင်တုန်းမြို့နယ်ရဲတပ်ဖွဲ့ကို ပြန်ပြီးတော့ပို့တယ်။ ပို့တဲ့စာကို ညောင်တုန်းမြို့နယ် ရဲတပ်ဖွဲ့ထဲကနေ တစ်ဦးက ဆေးရောင်းချနေတဲ့သူကို ဗိုက်ဗာနဲ့ပြန်ပို့ပြီး သတိပေးထားတဲ့ပုံကို အစ်မရထားတယ်။ တကယ်သွားဖမ်းတော့ ဖမ်းမမိတော့ဘူး။ ဒါက အဂတိလိုက်စားမှုတွေရှိနေတယ်။ ဒါကြောင့် အစ်မက ဒါကို အဆိုအဖြစ်တောင်မှ လွှတ်တော်မှတင်သွင်းဖို့ ကြိုးစားခဲ့တာမှာ တိုင်းဒေသကြီးအနေနဲ့ ဖြေရှင်းလို့ရတဲ့ ကိစ္စမဟုတ်လို့ မေးခွန်းအဖြစ် ပြန်လည်မေးရတာပါ” ဟု ဒေါ်နီနီမိုးက ပြောကြားသည်။

ဧရာဝတီတိုင်းဒေသကြီးအတွင်း ၂၀၁၄ ခုနှစ်အတွင်းတွင် မူးယစ်ဆေးဝါးနှင့် ပတ်သက်သည့် ဖမ်းဆီးရမိသည့်အမှုပေါင်း ၂၆ မှု၊ ၂၀၁၅ ခုနှစ်အတွင်းတွင် မူးယစ်ဆေးဝါးနှင့် ပတ်သက်သည့် ဖမ်းဆီးရမိသည့်အမှုပေါင်း ၂၄ မှု၊ ၂၀၁၆ ခုနှစ် ဇန်န၀ါရီမှ အောက်တိုဘာလကုန်အထိ မူးယစ်ဆေးဝါးနှင့် ဘိန်းဖြူ ဖမ်းဆီးရမိမှု နှစ်မှု၊ ဆေးခြောက်ဖမ်းဆီးရမိမှု ကိုးမှု၊  WY ဆေးပြားများ ဖမ်းဆီးရမိသည့်အမှု ၄၄ မှု၊ အခြားအမှု သုံးမှု စုစုပေါင်းမူးယစ် ဆေးဝါးနှင့်ပက်သတ်သည့် ဖမ်းဆီးရမိသည့် အမှုပေါင်း ၅၈ မှုရှိကြောင်း သိရသည်။
Writer:
မင်းသူဝင်းထွဋ်

No comments:

Post a Comment