Thursday, January 12, 2017

ကြမ်းတမ်းခက်ခဲမှုများဖြင့် ရှည်လျားနေဦးမည့် လမ်း

ပြီးခဲ့သည့်သတင်းပတ်က လူနှင့်သစ်ပင်များအကြောင်း ရေးသားခဲ့ပြီး ယခုတစ်ပတ် တွင်မူ လမ်းအကြောင်းကို ရေးချင်ပါသည်။ တခြားလမ်းကားမဟုတ်၊ ဒီမိုကရေစီ ဟု အမည်ပေးထားသော လမ်းပင်ဖြစ်သည်။ အကယ်စင်စစ် မြန်မာ့ဒီမိုကရေစီခရီးလမ်းကား ကြမ်းတမ်းစွာ၊ ခက်ခဲစွာဖြင့် ရှည်လျားနေဦးမည်ဖြစ်သည်။
ပထမဦးဆုံး အရပ် သားအစိုးရတက်ခဲ့သော ၂ဝ၁၆ ခုနှစ် ဧပြီလအတွင်းက လူထုခေါင်းဆောင်ဖြစ်သော ဒေါ် အောင်ဆန်းစုကြည်က တိုင်းပြည်ကို ပထမဆုံး မိန့်ခွန်းပြောကြားခဲ့သည်။ ယင်းမိန့်ခွန်းထဲတွင် ¤င်းတို့အစိုးရအနေဖြင့် နိုင်ငံတော်အတွက် အဓိကဖော်ဆောင်ရန် လုပ်ငန်းစဉ်ကြီးငါးရပ်ကို ဦးစားပေး လုပ်ဆောင်သွားမည်ဖြစ်ကြောင်း အတိအလင်း ပြောကြားခဲ့သည်။ ယင်းလုပ်ငန်းစဉ် ငါးရပ်မှာ (၁) အမျိုးသား ပြန်လည်သင့်မြတ်ရေး၊ (၂) ပြည်တွင်းငြိမ်းချမ်းရေး၊ (၃) တရားဥပဒေ စိုးမိုးရေး၊ (၄) အခြေခံဥပဒေပြင်ဆင်ရေး၊ (၅) ဒီမိုကရေစီစနစ် ရှင်သန်အမြစ်တွယ်ရေးတို့ဖြစ် သည်။

ဖော်ပြပါ လုပ်ငန်းစဉ်ငါးရပ်သည် အလွယ်တကူပြုလုပ်ရန် ခက်ခဲသော လုပ်ငန်းစဉ်များ သာဖြစ်ကြောင်း ယခု အစိုးရသက်တမ်းတွင်းရှိ ဖြစ်စဉ်ဖြစ်ရပ်များကို ကြည့်၍ သိနိုင်မည်ဖြစ် သည်။ ဆက်စပ်နေလျက်ရှိသော အမျိုးသားပြန်လည်သင့်မြတ်ရေးနှင့် ပြည်တွင်းငြိမ်းချမ်းရေး သည် ယခုအချိန်အထိ အလှမ်းကွာဝေးနေဆဲပင်ဖြစ်ပြီး ၂ဝ၁၇ ခုနှစ်သည် ငြိမ်းချမ်းရေးနှစ် တစ်နှစ် ဖြစ်လာစေရန် ရည်သန်ဆန္ဒရှိကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင် ဆန်းစုကြည်က ဇန်နဝါရီ ၁ ရက်က တရား ဝင် ထုတ်ဖော်ပြောကြားခဲ့သည်။ ယင်းနေ့ နံနက်ပိုင်းက နိုင်ငံတော်၏ အတိုင်ပင်ခံပုဂ္ဂိုလ် သည် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန အဆောက်အအုံသစ် အား ငြိမ်းချမ်းရေး၏ သင်္ကေတဖြစ်သော သံလွင်ပင်အား စိုက်ပျိုးခြင်းဖြင့် ဖွင့်လှစ်ပေး ခဲ့သည်။ ယင်းဗဟိုဌာန ဖွင့်ပွဲအခမ်းအနား တွင် ဒေါ်အောင်ဆန်းစုကြည်က ၄င်း၏ဆန္ဒကို ယခုကဲ့သို့ ထုတ် ဖော်ပြောကြားခဲ့ခြင်း ဖြစ်သည်။
ယင်းအပြင် တိုင်းရင်းသားလက် နက်ကိုင်တပ်ဖွဲ့ အချို့ကြား ဖြစ်ပွားနေသည့် တိုက်ပွဲများကြောင့် ငြိမ်းချမ်းရေးစားပွဲဝိုင်း သို့ ခြေဦးလှည့်ရန် ခက်ခဲနေသည့်အချိန်မျိုး တွင် ပြည်သူလူထု၏ ပူးပေါင်းပါဝင်မှုဖြင့် စစ်မှန်သည့် ငြိမ်းချမ်းရေးကို ရယူသွားရန် တိုက်တွန်းခဲ့ခြင်းဖြစ်သည်။ ¤င်းနောက် ယင်းနေ့ နေ့လယ်ပိုင်းတွင် ဒေါ်အောင်ဆန်း စုကြည်သည် တိုင်းရင်းသားအများစု ပါဝင် သော လူငယ် ၁၈ ဦးနှင့် ငြိမ်းချမ်းစကားဝိုင်း တစ်ရပ် ပြုလုပ်ခဲ့သည်။ ¤င်းလူငယ်များသည် ပြည်သူများထဲက လူငယ်များဖြစ်သဖြင့် ပြည်သူများ၏ ဆန္ဒနှင့် စကားသံကိုလည်း ကြားခွင့် ရခဲ့သည်။ စစ်ပွဲများဖြစ်ပွားနေရာ ဒေသများရှိ ပြည်သူများ၏ ခံစားချက်ကို လူငယ်တချို့က တင်ပြရာ ဒေါ်အောင်ဆန်းစုကြည်က ''အဲဒီစကားလဲ များများပြောပေးပါ။ တချို့က နားလေး တယ်။ နားလေးတော့ များများပြောပေးမှ ကြားနိုင်မယ်''ဟု အဓိပ္ပာယ်ပါသော တိုက်တွန်းမှုတစ် ရပ်ကိုလည်း ပြုလုပ်သွားခဲ့သည်။
ဗဟိုဌာနဖွင့်ပွဲတွင် ပြောကြားခဲ့သော သူ၏မိန့်ခွန်းထဲတွင် တစ်ကမ္ဘာလုံးရှိ မိမိတို့နိုင်ငံအပေါ် စစ်မှန်သော စေတနာထားသည့် မိတ်ဆွေများ၏ ဝန်းရံမှုဖြင့် အမျိုးသားပြန်လည်သင့်မြတ် ရေးနှင့် ငြိမ်းချမ်းရေးအား ရအောင်လုပ်ယူသွားမည့်အကြောင်း ပြည်သူကို အသိပေးလိုကြောင်း ထည့်သွင်းပြောဆိုသွားခဲ့သည်။ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးသည် သက် ဆိုင်သူများသာမက အရပ်လည်းကူ လူလည်းဝိုင်းရမည့် အနေအထားတစ်ရပ် ဖြစ်နေသည်။
အစိုးရအတွက် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးရရှိလျှင် ဆက်လက် လုပ်ဆောင်ရန်မှာ တရားဥပဒေစိုးမိုးရေး၊ အခြေခံဥပဒေပြင်ဆင်ရေး၊ ဒီမိုကရေစီစနစ် ရှင် သန်အမြစ်တွယ်ရေး လုပ်ငန်းစဉ်များ ကျန်နေသေးသည်။ ပထမခြေလှမ်းတစ်လှမ်း အထ မြောက်အောင်မြင်ပါမှ နောက်ခြေလှမ်းတို့ လိုက်ပါလာရမည်မှာ ဓမ္မတာဖြစ်သည်။ မည်သို့ ဆိုစေ လက်ရှိအခြေအနေမျိုးတွင်မူ မြန်မာ့ဒီမိုကရေစီခရီးလမ်းကား ကြမ်းတမ်းခက်ခဲစွာဖြင့် ရှည်လျားနေဦးမည်ဖြစ်သည်။

No comments:

Post a Comment