Wednesday, July 26, 2017

အမျိုးသားလွှတ်တော် ကိုယ်စားလှယ် ဒေါ်ထုမေ ALD ပါတီနှင့်ပူးပေါင်းမည်

ရခိုင်အမျိုးသား ပါတီ (ANP) ၏ အမျိုးသားလွှတ်တော် ကိုယ်စားလှယ် ဒေါ်ထုမေသည် ၎င်းပါတီမှ နုတ်ထွက်ပြီးနောက် ရခိုင် ဒီမိုကရေစီအဖွဲ့ချုပ် (Arakan League for Democracy- ALD) ပါတီနှင့် ပူးပေါင်း ဆောင်ရွက်တော့မည် ဖြစ်ကြောင်း သိရသည်။ေ ဒ်ါထုမေသည် ANP ပါတီမှ ဇူလိုင်လ ၂၄ ရက်နေ့က နုတ်ထွက်ခဲ့ပြီးနောက် ALD ပါတီဝင် တာဝန်များကို ထမ်း ဆောင်တော့မည် ဖြစ်ကြောင်း၊ မြန်မာနိုင်ငံ၏ အနေအထား၊ ရခိုင်ပြည်နယ်၏ အခြေအနေများသည် အဘက်ဘက်က နိမ့်ပါးနေသည့်အတွက် ပို၍ကြိုးပမ်း လုပ်ဆောင်နိုင်ရေး၊ ရခိုင်ပြည်နယ် ဖွံဖြိုးတိုးတက်ရေး၊ လူငယ်များ၏ ပညာရေးများ မြင့်မားလာရေးတို့အတွက် လွတ်လပ်စွာ ဆောင်ရွက်နိုင်ရန် ALD ပါတီဝင် တဦးအဖြစ်က ပို၍ လုပ်ဆောင်နိုင်မည်ဟု ယုံကြည်ခြင်းကြောင့် ANP ပါတီမှ နုတ်ထွက်ရခြင်း ဖြစ်ကြောင်း ရန်ကုန်မြို့၊ တော်ဝင်နှင်းဆီ ခန်းမတွင် ပြုလုပ်သည့် ALD ပါတီ၏ သတင်းစာရှင်းလင်းပွဲတွင် ဒေါ်ထုမေ က ပြောသည်။



ဒေါ်ထုမေက “ANP ပါတီက ကျမ ဘာကြောင့်နုတ်ထွက်ရလဲဆိုတော့ ပြတ်သားရမယ့် အချိန်ရောက်လာပါပြီ၊ လူငယ်အမျိုး သမီးတယောက်ဖြစ်လို့ Comfort Zone လို့ပြောတဲ့နေရာမှာ သက်တောင့်သက်သာ နေဖို့မသင့်တော့ပါဘူး၊ ရှေ့ကလူကြီး တွေလုပ်တာကို နောက်က လိုက်လုပ်ပြီးတော့ သက်တောင့်သက်သာ နေဖို့ မသင့်တော့တဲ့အတွက် နုတ်ထွက်ရတာပါ” ဟု ဆိုသည်။

၎င်း၏ နုတ်ထွက်စာအား လူမှုကွန်ရက် ဖေ့စ်ဘုတ်စာမျက်နှာ၌ ဇူလိုင်လ ၂၄ ရက်နေ့ ရက်စွဲဖြင့် ထုတ်ပြန်ခဲ့သည်။

သူသည် ၂၀၁၅ အထွေထွေရွေးကောက်ပွဲ၌ ANP ပါတီ ကိုယ်စားပြု၍ ရမ်းဗြဲမြို့နယ်နှင့် အမ်းမြို့နယ်တို့မှ အမျိုး သား လွှတ်တော် ကိုယ်စားလှယ် အဖြစ် ဝင်ရောက်ယှဉ်ပြိုင် အနိုင်ရခဲ့ပြီး ALD ပါတီသို့ ၂၀၀၆ ခုနှစ်မှ စတင်ဝင်ရောက်ခဲ့ခြင်း ဖြစ်ကြောင်း၊ ရခိုင်ပါတီ ၂ ခု ပူးပေါင်းသည့်အခါ ANP ပါတီဝင် ဖြစ်လာခဲ့ကြောင်း သိရသည်။

၎င်းက “ကျမရဲ့ မိခင်ပါတီ ALD ကို ရောက်လာပြီ ဖြစ်လို့ ရခိုင်ပြည်နယ်အရေး ကိစ္စတွေကို ပိုပြီးတော့ လွတ်လပ်စွာ လုပ် ဆောင်ခွင့် ရတော့မှာပါ” ဟု ဆိုသည်။

ANP ပါတီသည် ၁၉၉၀ ရွေးကောက်ပွဲ အနိုင်ရ ALD နှင့် ၂၀၁၀ ရွေးကောက်ပွဲ အနိုင်ရ ရခိုင်တိုင်းရင်းသားများ တိုးတက် ရေးပါတီ (RNDP) တို့အား ၂၀၁၅ ရွေးကောက်ပွဲ မတိုင်မီ ပူးပေါင်းခဲ့ကြသော်လည်း နှစ်ပါတီ ခေါင်းဆောင်များအကြား သဘောထား ကွဲလွဲမှုများဖြစ်ပေါ်ခဲ့ကြသည်။

ALD ပါတီသည် ANP ပါတီမှ ခွဲထွက်၍ ၂၀၁၇ ခုနှစ် မေလတွင် ပြန်လည် မှတ်ပုံတင်ခဲ့ပြီး ၂၀၁၇ ခုနှစ် ဇူလိုင်လ ၁၈ ရက် နေ့က တရားဝင် မှတ်ပုံတင်ခွင့် ပြုကြောင်း ပြည်ထောင်စု ရွေးကောက်ပွဲ ကော်မရှင် က ထုတ်ပြန်ခဲ့သည်။

အဆိုပါ ပါတီသည် တရားဝင် ပါတီတခု အဖြစ် မှတ်ပုံတင်ခွင့်ရရှိပြီ ဖြစ်၍ ရှေ့လုပ်ငန်းစဉ်များအား ဆက်လက် ဆောင် ရွက်တော့မည် ဖြစ်ပြီး ဗဟိုအလုပ်မှု ဆောင်အဖွဲ့ကိုလည်း မကြာမီ ဖွဲ့စည်းသွားရန် ရှိကြောင်း ပါတီ၏ လက်ရှိ ခေါင်းဆောင် ဦးကျော်မြင့်က ယနေ့ ပြုလုပ်သည့် သတင်းစာ ရှင်းလင်းပွဲတွင် ပြောဆိုခဲ့သည်။

ဦးကျော်မြင့်က “ပါတီက တရားဝင်ပြီဖြစ်လို့ ရခိုင်ပြည်နယ်ရဲ့ အကျိုးစီးပွားတွေနဲ့ ပြည်တွင်း ငြိမ်းချမ်းရေး လုပ်ငန်းစဉ် တွေမှာ ပါဝင်ဆောင်ရွက်တော့မှာပါ၊ အဲဒါအပြင် NLD ပါတီ အပါအဝင် ဒီမိုကရေစီ အင်အားစု အားလုံးနဲ့ ပူးပေါင်းဆောင် ရွက်သွားဖို့ ရှိပါတယ်” ဟု ဆိုသည်။

ALD ၏ မူဝါဒသည် တိုင်းရင်းသား တန်းတူရေး၊ ကိုယ်ပိုင်ပြဋ္ဌာန်းခွင့် ရရှိရေး၊ ရခိုင်အမျိုးသား အကျိုးစီးပွား ဖြစ်ထွန်းရေး၊ ရခိုင်ပြည်နယ်နှင့် လူထု အကျိုးစီးပွားအား ရခိုင်လူမျိုးများက ဦးဆောင်ခွင့်ရရေး၊ ပြည်နယ်ထွက် သယံဇာတ ပစ္စည်းများအား လူထုအတွက် အသုံးပြုခွင့်ရရှိရေး စသည်တို့ ပါဝင်ကြောင်း သိရသည်။

ထို့အတူ တရားဥပဒေ စိုးမိုးရေး၊ လယ်ယာမြေ ပြဿနာ၊ လူငယ်များ၏ ပညာရေး ဖွံ့ဖြိုးတိုးတက်လာရေးနှင့်အလုပ်အကိုင် အခွင့်အလမ်းများရရှိရေး၊ ၂၀၀၈ ဖွဲ့စည်းပုံ ဥပဒေ ပြင်ဆင်ရေးတို့ကို ပါဝင်ဆောင်ရွက်သွားမည်ဟု ဦးကျော်မြင့် က ပြောဆို ခဲ့သည်။

ပါတီ၏ ရှေ့လုပ်ငန်းစဉ်များအား စတင် ဆောင်ရွက်ရန် အဖွဲ့ဝင် ၅ ဦးပါဝင်သည့် ဦးဆောင် ကော်မတီ တခု အား ဖွဲ့စည်းထားပြီး ခေါင်းဆောင် အဖြစ် ဦးကျော်မြင့်ပါဝင်ပြီး ဦးအောင်စိုး၊ ဦးဦး လှမြင့်၊ ဦးသာသာမောင်၊ ဦးမျိုးကျော် စသည်တို့ ပါဝင်သည်။  ခင်ဦးသာ

No comments:

Post a Comment