Wednesday, July 26, 2017

သီးနှံအစိုဓာတ် တိုင်းတာသည့် ဓာတ်ခွဲခန်း ပထမဆုံး ဖွင့်လှစ်မည်

မြန်မာနိုင်ငံတွင် ပထမဆုံးသီးနှံအစိုဓာတ် တိုင်းတာသည့် ဓာတ်ခွဲခန်းကို သုတေသနနှင့် တီထွင်ဆန်းသစ်မှု ဦးစီးဌာနရှိ ဓာတ်ခွဲခန်းတွင် လာမည့်နှစ်အတွင်း ဖွင့်လှစ်မည် ဖြစ်ကြောင်း ဆန်စပါးအသင်းချုပ်မှ သိရသည်။ ထို့သို့ အစိုဓာတ်တိုင်းတာသည့် စံယူနစ်တခု ထားရှိခြင်းအားဖြင့် လယ်သမားနှင့် ကုန်သည်ကြား၊ ကုန်သည်နှင့် စက် ပိုင် ကြားအပြင် ပြည်ပတင်ပို့နေသည့် လုပ်ငန်းရှင်များအကြားတွင် ဆန်ယူနစ်များ တပြေးညီဖြစ်သွားပြီး အရောင်းအဝယ် လုပ်ဆောင်ရာတွင်လည်း ဈေးနှုန်းကွာဟမှု နည်းပါးနိုင်ကြောင်း၊ ဆန်စပါးလောကကို မည်မျှ အကျိုးသက်ရောက် နိုင် ကြောင်း ၂ နှစ်ကြာ သုတေသန ပြုလုပ်ခဲ့ပြီး လက်ရှိတွင် ယင်းစီမံကိန်းစတင်ရန် လုပ်ဆောင်နေကြောင်း သိရသည်။



မြန်မာနိုင်ငံဆန်စပါးအသင်းချုပ် ဒုဥက္ကဋ္ဌ ဒေါက်တာမျိုးအောင်ကျော်က “ ပညာရေး ဝန်ကြီးဌာနအောက်မှာ ရှိတဲ့ သုတေသနနှင့် တီထွင်ဆန်းသစ်မှု ဦးစီးဌာနမှာရှိတဲ့ ဓာတ်ခွဲခန်းမှာလုပ်မှာ။ စံချိန်စံညွှန်းနဲ့ ပတ်သက်တဲ့ တက္ကသိုလ်ကြီး ဖွင့်ဖို့ သုတေသနကြီးဖွင့်ဖို့ ဆောက်နေတယ်။ ၂၀၁၈ ခုနှစ် ၅ လပိုင်း ၆ လပိုင်းဆို ပြီးပြီ။ အဲဒီဌာနမှာ သီးနှံ အစိုဓာတ်တိုင်း ကိရိယာတွေကို စံတခုသတ်မှတ်ပြီး ထိန်းချုပ်တဲ့စနစ် ဓာတ်ခွဲခန်းတခု ဖွင့်လှစ်ပြီး သမာဓိယူနစ်တခု စထားမှာ ဖြစ်တယ်’’ ဟု ပြောသည်။

‘‘ဒုတိယစံသတ်မှတ်ချက် အနေနဲ့ ဆန်အစိုဓာတ်ယူနစ်တွေ ထားမယ်။ ဓာတ်ခွဲခန်းကနေ ပို့လိုက်တဲ့ ဆန်ယူနစ်တွေကို စမ်းသပ်မယ်။ အရည်အသွေးနဲ့ ကိုက်ညီတယ်ဆိုရင် လက်မှတ်၊ လိုင်စင်ထုတ်ပေးမယ်။ သက်တမ်း ၂ နှစ်ဆို ၂ နှစ်ပေး မယ်။ ဒါတွေကို ထပ်ပြီးတော့ ပြုပြင်ခြင်း၊ ကိုင်တွယ်ခြင်း မလုပ်ရအောင် ထိန်းသိမ်းသွားမှာ ဖြစ်တယ်’’ဟု ဆက်လက် ပြောသည်။

ထိုယူနစ်များကို ဆန်စပါးထုတ်လုပ်သည့် ဧရာဝတီ၊ ရန်ကုန်၊ ပဲခူး နှင့် စစ်ကိုင်းတိုင်းတို့တွင် သတ်မှတ် လုပ်ဆောင် မည်ဖြစ်ပြီး ဆန်စပါးထွက်ရှိသည့် တိုင်းနှင့် ပြည်နယ်များတွင်လည်း လုပ်ဆောင်သွားမည်ဖြစ်ကြောင်း၊ ရန်ကုန်တိုင်း လှည်းကူးမြို့နယ်ရှိ ကုန်ပစ္စည်းစစ်ဆေးရေးနှင့် အရည်အသွေး စီမံခန့်ခွဲ့မှု ဌာနတွင် ဒုတိယအဆင့် စံယူနစ်တခု ထားရှိပြီး ဝန်ထမ်းများအား အစိုဓာတ်တိုင်း ကိရိယာများကို မည်ကဲ့သို့ ကိုင်တွယ်ရမည် ဟူသော နည်းပညာနှင့် သင်တန်းများ ပေးမည်ဖြစ်ကြောင်း ၎င်းက ပြောသည်။

ဆန်စက်များနှင့် စပါးအများဆုံး စိုက်ပျိုးထွက်ရှိသည့် ဧရာဝတီတိုင်း ဒေသကြီးကို ပထမဦးစားပေး လုပ်ဆောင်သွားမည် ဖြစ်ပြီး ပဲခူးတိုင်းဒေသကြီးကို ဒုတိယဦးစားပေး လုပ်ဆောင်မည်ဟုလည်း ဆိုသည်။

ဝါးတန်းလမ်း ဆန်ကုန်စည်ဒိုင်မှ ဆန်ကုန်သည်တဦးက“အစိုဓာတ်ထိန်းတာ လိုအပ်တယ်။ အရည်အသွေး လိုအပ် ချက်ကြောင့် ဈေးကွက် အားနည်းတာတွေ ရှိနိုင်တယ်။ အခုလို မိုးရာသီမှာ အစိုဓာတ် ထိန်းသိမ်းဖို့ ပိုပြီး လိုအပ်ပါတယ်။ ဒါကြောင့် အဆင့် သတ်မှတ်ချက် တခုတည်း ဓာတ်ခွဲခန်းတွေ လုပ်မယ်ဆိုရင် ပိုပြီးကောင်းပါတယ်။ အရည်အသွေးမြင့် ဆန်စက်တွေ လိုအပ်ပါတယ်’’ ဟု ပြောသည်။

အဆိုပါ စီမံကိန်းမှာ JICA Project တခုဖြစ်ပြီး ဂျပန်နိုင်ငံ အစိုဓာတ်တိုင်း ကိရိယာထုတ်လုပ်ရေးကုမ္ပဏီမှ စက်ပစ္စည်း ကိရိယာများကို ဓာတ်ခွဲခန်းတွင် တပ်ဆင်မည် ဖြစ်ပြီး ဓာတ်ခွဲခန်းပြုလုပ်ရန် ကန်ဒေါ်လာ သိန်းဂဏန်းအောက် ကုန်ကျ မည်ဖြစ်ကာ ဂျပန်အစိုးရက ၉၀ ရာခိုင်နှုန်းနှင့် သက်ဆိုင်ရာဌာနများက ၁၀ ရာခိုင်နှုန်း ပါဝင်မည် ဖြစ်သည်။  မျိုးပပစန်း

No comments:

Post a Comment