Wednesday, July 26, 2017

ထားဝယ်တွင် ကြက်သားနှင့်ကြက်ဥ ဖြန့်ဖြူးရောင်းချမှု ယာယီရပ်ဆိုင်း

တနင်္သာရီတိုင်း၊ ထားဝယ်မြို့နယ်ရှိ ကြက်ခြံတခုအတွင်း ကြက်များသေဆုံးမှု ဖြစ်ပွားပြီးနောက် မြို့ပေါ်နှင့် ရပ်ကွက်တချို့ရှိ ကြက်ခြံများနှင့် ဈေးများအတွင်း ကြက်သားနှင့်ကြက်ဥ ရောင်းဝယ်မှုများ ယာယီ ရပ်ဆိုင်းလိုက်ကြောင်း သိရသည်။ ထားဝယ်မြို့နယ် စည်ပင်သာယာရေးကော်မတီ အတွင်းရေးမှူးဦးအောင်ကျော်မျိုးက “ အခု H1N1 ဆိုပြီး ပေါ်လာတဲ့အချိန် ကြက်ခြံတချို့မှာ အစုလိုက်အပြုံလိုက် သေတယ်။ အဲဒီအတွက် ကြိုတင်ကာကွယ်တဲ့အနေနဲ့ အခုလို ဖြန့်ဖြူးခြင်း ရပ်ဆိုင်းခိုင်းထားတာပါ ” ဟု ပြောသည်။ ကြက်သားနှင့် ကြက်ဥရောင်းဝယ်မှုများ ယာယီရပ်ဆိုင်းရန် ထားဝယ်မြို့နယ် စည်ပင်သာယာရေးကော်မတီက ယနေ့ရက်စွဲဖြင့် ထုတ်ပြန်ကန့်သတ်လိုက်ခြင်း ဖြစ်သည်။



ပြီးခဲ့သည့် ဇူလိုင် ၂၃ ရက်က ထားဝယ်မြို့နယ်၊ ထိန်သစ်အုပ်စုအတွင်း ဝဲကျွန်း (ညောင်ရမ်း) ကျေးရွာရှိ ကြက်ခြံတခုအတွင်း ကြက်ကောင်ရေ ၁ ထောင်ခန့် သေဆုံးမှုဖြစ်ပွားခဲ့ပြီးနောက်၊ ခြံအတွင်းကျန်ရှိသည့် ကြက်များကို ရှင်းလင်းခဲ့ပြီး ရန်ကုန်မြို့သို့ ရောဂါရှာဖွေဓာတ်ခွဲစစ်ဆေးရန် နမူနာပို့ဆောင်ထားကြောင်း သိရသည်။

လက်ရှိအချိန်၌ ကြက်များသေဆုံးရခြင်း အကြောင်းအရင်းအဖြေ မရရှိသေးချိန်တွင် ကြိုတင်ကာကွယ်မှုအနေဖြင့် ထိန်သစ်အုပ်စုအတွင်းရှိ ကြက်မွေးမြူရေးလုပ်ငန်းရှင် ၆ ဦးထံလိပ်မူပြီး ယနေ့မှစတင်၍ ကြက်သားနှင့်ကြက်ဥများ ဖြန့်ဖြူးရောင်းချခြင်း မပြုရန် စည်/ပင်မှ တားမြစ်လိုက်ခြင်း ဖြစ်သည်။

ထားဝယ်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးခင်မောင်အေးက “ကြက်ခြံတွေကို လက်တလော ရောင်းချတာတွေ ပိတ်ထားဖို့ ပြောထားတာတွေ့တယ်။ ပြီးခဲ့တဲ့ရက်ကလည်း ကြက်ခြံတခုမှာ ကြက်တွေသေတော့ ကြိုကာတဲ့အနေနဲ့လုပ်တာ ဖြစ်ပါလိမ့်မယ်။ အခြေအနေအတိအကျတော့ မသိရသေးပါဘူး” ဟု ပြောသည်။

လက်ရှိဓာတ်ခွဲခန်းသို့ ပေးပို့ထားသည့် အဖြေမရရှိခင်အချိန်ရှိ အထက်ပါကဲ့သို့ ကန့်သတ်ချက်ကို ဆောင်ရွက်သွားမည် ဖြစ်ကြောင်းနှင့် အဖြေထွက်လာသည့်အပေါ် မူတည်၍ စားသုံးသူများအပေါ် အန္တရယ်မဖြစ်စေပါက ပြန်လည်ရောင်းချခွင့် ပေးသွားမည်ဖြစ်ကြောင်း ဦးအောင်ကျော်မျိုးက ပြောသည်။

လက်ရှိတွင် တုပ်ကွေးရောဂါ H1N1 နှင့်ပတ်သက်၍ ချင်းပြည်နယ်တွင် လူ ၁၀ ဦး ရောဂါခံစားနေရပြီး ၁ ဦး သေဆုံးခဲ့ကြောင်းနှင့် ရန်ကုန်ပြည်သူ့ဆေးရုံကြီးတွင်လည်း တုပ်ကွေးရောဂါ ဖြစ်ပွားနေသည့် လူနာ ၃ ဦး တက်ရောက်ကုသလျှက်ရှိကြောင်း ကျန်းမာရေးဦးစီးဌာနက ထုတ်ပြန်ပြောဆိုထားသည်။

ရာသီတုပ်ကွေးရောဂါ (Seasonal Flu, A/H1N1 2009) ဖြင့် ကိုယ်ဝန်ဆောင် အမျိုးသမီးတဦးနှင့် အမျိုးသားတဦးတို့ ဇူလိုင်လ ၂၄ ရက်က ရန်ကုန်ပြည်သူ့ ဆေးရုံကြီး၌ သေဆုံးသွားကြောင်း ဆေးရုံအုပ်ကြီး ဒေါက်တာအေးကိုကိုက ပြောသည်။

H1N1 သည် ရာသီတုပ်ကွေးတခုသာဖြစ်ပြီး မြန်မာနိုင်ငံသို့ ၂၀၀၁ ခုနှစ်က စတင်ဝင်ရောက်ခဲ့ပြီး ၂၀၀၉ ခုနှစ်တွင် တနိုင်ငံလုံး အတိုင်းအတာဖြင့် ၁၇၆ ဦး ဖြစ်ပွားခဲ့ကြောင်းနှင့် ၂၀၁၆ ခုနှစ်တွင် ၉ ဦး ဖြစ်ပွားခဲ့ကြောင်း သိရသည်။  ထွန်းထွန်း

No comments:

Post a Comment