Wednesday, July 26, 2017

ပညာရေးဝန်ထမ်းများအတွက် တိကျတဲ့ ရာထူးတိုး မူဝါဒ​ဆွဲ​ပေးဖို့ ဆရာများအဖွဲ့ချုပ်တောင်းဆို

ပညာရေးဝန်ထမ်းများအတွက် တိကျတဲ့ရာထူးတိုးမူဝါဒတစ်ခုရေးဆွဲဖို့ အစိုးရကို မြန်မာနိုင်ငံလုံးဆိုင်ရာ ဆရာ၊ ဆရာမများ အဖွဲ့ချုပ်က ဒီကနေ့ ရက်စွဲနဲ့ထုတ်ပြန်တောင်းဆိုလိုက်ပါတယ်။ လက်ရှိမှာ ပညာရေးဝန်ကြီးဌာလက်အောက်ရှိ ဝန်ထမ်းချင်းတူပေမဲ့ ဦးစီးဌာနအလိုက်ကမူဝါဒအသီးသီးနဲ့ရာထူးတိုးနေတာကြောင့် လုပ်သက်တူ၊အရည်ချင်းတူ ပညာရေးလောကသားအချင်းချင်း စိတ်ဝမ်းကွဲမှုတွေဖြစ်နေသလို ဆရာဆရာမများမှာလည်း နစ်နာမှုတွေအများကြီးရှိနေတယ်လို့ မြန်မာနိုင်ငံလုံးဆိုင်ရာ ဆရာ၊ ဆရာမများ အဖွဲ့ချုပ်မှပြန်ကြားရေး တာဝန်ခံ ဦးကျော်ဝေဖြိုးက ပေါ်ပြူလာနယူးစ်ကိုပြောပါတယ်။



“အဓိကက ကိုယ့်ဌာနနဲ့ကိုယ် မူဝါဒအသီးသီးနဲ့ တိုးနေတာ။ ပညာရေးဝန်ကြီးဌာလက်အောက်မှာလုပ်နေတဲ့ ဝန်ထမ်းအချင်းချင်းကို လုပ်သက်နဲ့ ပညာအရည်အချင်းတူတာတောင် တိုးတဲ့ဌာနက တိုးတယ် ။မတိုးတဲ့ဌာနက မတိုးဘူး။ ဌာနတစ်ခုတည်းအချင်းချင်းတောင် တိုးတဲ့သူကတိုးတယ်။တစ်ချို့တွေလည်း Jump Promotion နဲ့တိုးနေတယ်။အဲဒီတော့ ဆရာဆရာမတွေမှာ အများကြီးနစ်နာပါတယ်။မတိုးတဲ့ ဆရာဆရာမတွေမှာ တိုးတဲ့သူတွေထက်တောင်လုပ်သက်များတာတွေပါသေးတယ်။ဒီတော့ ပညာရေးဝန်ထမ်းအချင်းချင်းလည်းမကောင်းဘူး။ဒါကြောင့် အားလုံးကိုခြုံမိတဲ့ ရာထူးတိုးမူဝါဒတစ်ခု တိတိကျကျရှိဖို့လိုပါပြီ” လို့ သူကပြောပါတယ်။

ထုတ်ပြန်ချက်မှာ ရာထူးတိုးပြောင်းရွှေ့အမိန့်စာ အမြန်ဆုံးထွက်ပေးရန်၊B.Ed ၊ PPTT နှင့် D.T.Ed ဆင်းများကိုလည်း အမြန်ဆုံးနည်းဖြင့် အသစ်ခန့်အပ်ပေးရန်အခြေခံပညာဦးစီးဌာနကို တိုက်တွန်းကြောင်းပါရှိပါတယ် ။

ဒါ့အပြင် နည်းပညာတက္ကသိုလ်များနဲ့ကျန်းမာရေးဝန်ကြီးဌာနရှိ ဆေးနှင့်ဆေးနှီးနွယ် တက္ကသိုလ်များမှ ဆရာဆရာမများကို ရာထူးတိုးရာမှာ ခိုင်မာတဲ့ မူဝါဒ မရှိဘဲ ယေဘုယျဆန်ဆန် အကြောင်းပြချက်များနဲ့ ရာထူးတိုးပေးနေကြောင်း၊ ဝန်ကြီးဌာနအသီးသီးမှ တက္ကသိုလ်များမှာ ပညာရေး တာဝန်များကို တူညီစွာထမ်းဆောင်နေတဲ့ ဆရာ၊ ဆရာမများဖြစ်ပေမယ့်လည်း ကျောင်းအလိုက်၊ ဦးစီးဌာနအလိုက် ရာထူးတူ၊ အဆင့်တူများကို ရာထူးတိုးပေးရာမှာ ခွဲခြားမှုများ ရှိနေကြောင်း မြန်မာနိုင်ငံလုံးဆိုင်ရာ ဆရာ၊ ဆရာမများ အဖွဲ့ချုပ်က ထုတ်ပြန်ပါတယ်။

ဖြိုးထက်အောင်

No comments:

Post a Comment