Sunday, August 13, 2017

နမ္မတီးလမ်းဂွရွာသို့ ၃ ရက်အတွင်း စစ်ဘေးရှောင် ၁ ထောင်ကျော်ထိ ရှိလာ

မိုးကောင်းမြို့နယ် ကဆုန်းရွာတွင် တပ်မတော်နှင့် KIA တို့ ဖြစ်ပွားသည့် တိုက်ပွဲကြောင့်  ၃ ရက်အတွင်း နမ္မတီးလမ်းဂွရွာရှိ ဘုရားကျောင်း ၂ ကျောင်းသို့ လာရောက်သည့် စစ်ဘေးရှောင်များမှာ ယနေ့ နေ့လည်အထိ ၁ ထောင်ကျော်ခန့်ရှိ လာပြီဖြစ်ကြောင်း ဘုရားကျောင်းအနီးနေထိုင်သည့် ဒေသခံ ဒေါ်ရွယ်ဂျားက ပြောသည်။ “ ကဆုန်းရွာ အဲ့မှာအိမ်ခြေတော်တော်များတယ်ထင်တယ်ကြည့်ရတာ။ လူဦးရေတော့ ၁ ထောင်ကျော်နေပြီ။ မထွက်လာနိုင်သေးတဲ့သူတွေရှိသေးတယ်။ သူတို့က ရွာလယ်ကောင်မှာဖြစ်တာဆိုတော့ ရွာကနှစ်ခြမ်း ဖြစ်သွားတာပေါ့။ တစ်ခြမ်းကသူကတော့ လွတ်တာပေါ့။ တစ်ခြမ်းကလူတွေကတော့ မလွတ်ဘူး။ အဲ့လိုဖြစ်သွားတာလေ မနေ့က “ ဟု ၄င်းကပြောသည်။



သြဂုတ်လ ၁၀ ရက်က ကဆုန်းရွာအလယ်တွင် တိုက်ပွဲများဖြစ်ပွားခဲ့ခြင်းဖြစ်ပြီး သြဂုတ် ၁၁ ရက်တွင် လူမှုရေးအဖွဲ့များက အဆိုပါရွာတွင် ပိတ်မိနေသူများကို သွားရောက် ကယ်ထုတ်ရခြင်းလည်းဖြစ် ဖြစ်ကြောင်း ဒေါ်ရွယ်ဂျား ကပြောသည်။

ကဆုန်းရွာမှ စစ်ဘေးရှောင် ၁ ထောင်ခန့်ကို မိုးကောင်းမြို့နယ် နမ္မတီးလမ်းဂွရွာရှိ ကက်သလစ် ဘုရားကျောင်း နှင့် နှစ်ချင်းဘုရားကျောင်းနှစ်ခုတွင် နေရာချထားပေးခြင်းဖြစ်သည်။

“ တစ်အိမ်ကို ထမင်း နှစ်ထုပ်၊ သုံးထုပ် အဲ့လိုမျိုးကျွေးနေကြတယ် "ဟု ဘုရားကျောင်းအနီးနေထိုင်သည့် ဒေသခံ ဒေါ်ရွယ်ဂျားကပြောသည်။

သို့သော် ရွာမှထွက်ခွာလာနိုင်ခြင်းမရှိသေးသောကြောင့် ဘုရားကျောင်းသို့ စစ်ဘေးလာရှောင်နိုင်ခြင်း မရှိသူများလည်း ရှိနေသေးကြောင်း ၄င်းကဆက်လက်ပြောဆိုသည်။

အဆိုပါ စစ်ဘေးရှောင်များသည် တိုက်ပွဲကြောင့် ရုတ်တရတ်ထွက်ပြေးလာရသောကြောင့် လတ်တလောတွင် အစားအစာ၊ အ၀တ်အထည်ကဲ့သို့ အခြေခံပစ္စည်းများ လိုအပ်လျက်ရှိကြောင်း သိရသည်။ စိုးသူအောင်

No comments:

Post a Comment