ရှမ်းပြည်နယ်မြောက်ပိုင်း၊ သီပေါမြို့နယ်အတွင်း အနာကြီးရောဂါတိုက်ဖျက်ရေးနှင့် ကာကွယ်ရေး လုပ်ငန်းများအတွက် ပြည်သူလူထုအခြေပြု မိသားစုများ တစ်ကိုယ်ရည်သန့်ရှင်းရေး အစီအစဉ် ဖေါ်ဆောင်မည့် စေတနာ့ဝန်ထမ်း ကျေးလက်ကျန်းမာရေးကိုယ်စားလှယ် (၁၀၀)ကျော်ကို သင်တန်းပေးထားပြီးဖြစ်ကြောင်း သီပေါပြည်သူ့ဆေးရုံအုပ်ကြီး ဒေါက်တာနန္ဒဝင်းထံမှ သိရသည်။
“အနာကြီးဝေဒနာသည်တွေရဲ့ ခံစားချက်၊ လိုအပ်ချက်တွေကို စာနာတတ်အောင် စေတနာ့ဝန်ထမ်းအသီးသီးရဲ့ ရင်တွင်းက ကရုဏာစိတ်ကို ဖော်ထုတ်ပေးပါ့မယ်။ တစ်ကိုယ်ရည် သန့်ရှင်းရေး လုပ်ငန်းစဉ်တွေ (လက်သန့်ရှင်းရေး ကအစ အဟာရပြည့်ဝစားသောက်ခြင်း အလယ် စိတ်သန့်ရှင်းခြင်းအဆုံး) လေ့ကျင့်သင်ကြားပေးသွားပါ့မယ် “ဟု အဆိုပါအစီအစဉ်နှင့်ပတ်သက်၍ ဒေါက်တာနန္ဒဝင်းက ပြောကြားထားသည်။
အဆိုအစီအစဉ်အတွက် သီပေါမြို့နယ်အတွင်း ကျေးလက်ကျန်းမာရေးဌာနများမှ အရံသားဖွားလူထုကျန်းမာရေးလုပ်သားနှင့် ငှက်ဖျားစေတနာ့လုပ်သားများအား ၂၀၁၉ ခုနှစ် မေလ (၁၃)ရက်နှင့် (၁၄)ရက်နေ့များက နှစ်ရက်တာသင်တန်းကို မြို့နယ်ပြည်သူ့ကျန်းမာရေးဦးစီးဌာနနှင့် Save the Children International တို့ပူးပေါင်း၍ သီပေါမြို့နယ်ပြည်သူ့ကျန်းမာရေးဦးစီးဌာနတွင် ဖွင့်လှစ်ပို့ချခဲ့ခြင်းဖြစ်သည်။
သင်တန်းသို့ သီပေါမြို့နယ်အတွင်းမှ နမ့်လန်၊ ဆင်ကျော့၊ ဆောင်ကြဲ၊ပုံလျန်း ဒေသတို့ရှိ ကျေးလက်ကျန်းမာရေးဌာနခွဲ အသီးသီးမှ စေတနာ့လုပ်အားရှင် (၁၀၀) ကျော်အပြင် “ဝ” အထူးဒေသကျန်းမာရေးအဖွဲ့မှ အမျိုးသား(၂)ဦးနှင့် အမျိုးသမီး (၂)ဦးလည်းတက်ရောက်ကြကြောင်း သိရသည်။
အဆိုပါသင်တန်းဆင်း ကျန်းမာရေးဝန်ထမ်းများအား အနာကြီးရောဂါခွဲခြမ်းတတ်ရန် ရောဂါလက္ခဏာခွဲခြားခြင်းအား အထောက်အကူပြုမည့် ဓါတ်ပုံပေါင်း (၆၀) ကျော်ကို လက်ကိုင်ဖုန်းများအတွင်း ထည့်သွင်းပေးထားကြောင်း သိရသည်။
“ကျွန်တော် တာဝန်ထမ်းဆောင်ခဲ့တဲ့ ၂၀၁၇ ခုနှစ်၊ စက်တင်ဘာလ (၁၉)ရက်နေ့မှ ၂၀၁၉ ခုနှစ်၊ ဧပြီလ (၃၀)ရက်နေ့အထိ လပါင်း (၂၀)အတွင်း အနာကြီးလူနာသစ် (၅၄) ဦးတွေ့ရှိခဲ့ပါတယ်။ လူနာ(၁၅) ဦးက ဆေးသောက်ပြီး ရောဂါပျောက်ကင်းသွားပြီး (၃၉) ဦးက လက်ရှိဆေးသောက်နေဆဲဖြစ်ပါတယ်”ဟု ဒေါက်တာနန္ဒဝင်းက ပြောသည်။
ရောဂါဖြစ်ပွားသူတွေ့ရှိရသည့်ဒေသများအလိုက် စစ်ဆေးရာ သီပေါမြို့ တောင်ဘက်ခြမ်း ဒေသတွင်းလုံခြုံရေးအခြေအနေကြောင့် ကျန်းမာရေးလွှမ်းခြုံမှုရရှိနိုင်မှု အားနည်းသည့်နေရာများနှင့် တောင်ပေါ်ဒေသတွေ ရေရှားပါးတဲ့ နေရာများတွင် အများဆုံးတွေ့ရခြင်းဖြစ်ကြောင်း ဒေါက်တာနန္ဒဝင်းထံမှ သိရသည်။
No comments:
Post a Comment