ထိုင်းနိုင်ငံတွင် ဆစ်ဖလစ်ရောဂါကူးစက်မှုမြင့်တက်နေပြီး ယခုနှစ်အတွင်း မိခင်ထံမှ ရောဂါကူးစက်ခံထားရသည့် မွေးကင်းစကလေး ၂၄၉ ဦးအထိရှိလာ

ထိုင်းနိုင်ငံတွင် ဆစ်ဖလစ်ရောဂါဖြစ်ပွားမှု မြင့်တက်လာနေပြီး ၂၀၁၉ ခုနှစ်အတွင်း မွေးကင်းစကလေးငယ်များအနက် (၂၄၉)ဦးမှာ မိခင်ထံမှ ဆစ်ဖလစ်ရောဂါ ကူးစက်ခံထားရကြောင်း ထိုင်းပြည်သူ့ကျန်းမာရေးဝန်ကြီးဌာနက သတင်းထုတ်ပြန်သည်။ “ဆစ်ဖလစ်ရောဂါကူးစက်ခံရတဲ့မိခင်တွေကနေ မွေးလာတဲ့ကလေးတွေကို ကူးစက်တာပါ”ဟု ကျန်းမာရေးဝန်ကြီးဌာန၏ အမြဲတမ်းအတွင်းဝန် ဒေါက်တာ ဆူခွန်ကန်ချနာပီမိုင်က ပြောသည်။



ဆစ်ဖလစ်ရောဂါသည် လိင်မှတစ်ဆင့်ကူးစက်သည့်အပြင် သွေးမှလည်း ကူးစက်နိုင်ပြီး ရောဂါခံစားရသည်ကို မသိကြသဖြင့် အချိန်မီကုသမှုခံယူခြင်းမပြုလုပ်နိုင်ကြခြင်းဖြစ်ကြောင်း သိရသည်။

ထိုင်းနိုင်ငံတွင် ၂၀၁၉ ခုနှစ် ဇန်နဝါရီလ (၁)ရက်နေ့မှ မေလ (၁၃)ရက်နေ့အတွင်း ဆစ်ဖလစ်ရောဂါ ကုသသူ (၃၀၈၀)အနက် (၄၀.၄၂)ရာခိုင်နှုန်းမှာ အသက်(၁၅)နှစ်နှင့် (၂၄)ကြားလူငယ်များဖြစ်ပြီး (၂၄.၄၈)ရာခိုင်နှုန်းမှာ အသက် (၂၅)နှစ်မှ (၃၄)နှစ်ကြားအရွယ်များဖြစ်ကြောင်း သိရသည်။

ထိုင်းနိုင်ငံအတွင်း ဆစ်ဖလစ်ကူးစက်ခံရမှု အရေအတွက်မြင့်လာနေသဖြင့် ဒေသအလိုက် ရောဂါပျံ့ပွားမှုကို ထိန်းချုပ်နိုင်ရေး ဆောင်ရွက်ကြရန် ပြည်သူ့ကျန်းမာရေးဌာနတာဝန်ရှိသူများအား ညွှန်ကြားထားပြီး လိင်ဆက်ဆံရာတွင် ကွန်ဒုံးအသုံးပြုကြရန်၊ လိင်ဆက်ဆံဖော်အများအပြားထားခြင်းကို ရှောင်ရှားရန်နှင့် သွေးစစ်ခြင်းကို ပုံမှန်ပြုလုပ်ကြရန် အသိပညာပေးရန် တိုက်တွန်းထားကြောင်း သိရသည်။

အထူးသဖြင့် ကိုယ်ဝန်ဆောင်အမျိုးသမီးများအနေဖြင့် ၎င်းတို့ကိုယ်တိုင်အပြင် ခင်ပွန်းဖြစ်သူကိုလည်း သွေးစစ်ခြင်းကို ပြုလုပ်သင့်သည်ဟု တိုက်တွန်းထားသည်။