တပ်မတော်ကိုထောက်ခံခြင်းနှင့် ၂၀၀၈ ဖွဲ့စည်းပုံအခြေခံဥပဒေပါ တိုင်းဒေသကြီးနှင့် ပြည်နယ်ဝန်ကြီးချုပ်များ ခန့်ထားရေးဆိုင်ရာ် ပုဒ်မ ၂၆၁ အား ပြင်ဆင်ပေးရေး လူထုဆန္ဒထုတ်ဖေါ်ပွဲ ကို ရှမ်းပြည်နယ်မြောက်ပိုင်း၊ လားရှိုးမြို့တွင် ၂၀၁၉ ခုနှစ်၊ မေလ (၁၉) ရက်နေ့ နံနက်ပိုင်းက ပြုလုပ်ကြသည်။ "အဓိကက ပုဒ်မ ၅၉ ကို မပြင်ဖို့ရယ်၊ ပုဒ်မ ၂၆၁ ကိုပြင်ဖို့နဲ့ ပုဒ်မ ၃၆၁ ကို ကာကွယ်စောင့်ရှောက်ဖို့ အတွက် ရည်ရွယ်ပြီးတော့ လူထုထောက်ခံပွဲ ပြုလုပ်တာပါ။ ရှမ်းမြောက် ဒေသက ဒေသခံ ၁၅၀၀၀ လောက် ပါဝင်ဖို့ ဖိတ်ကြားထားပါတယ်" ဟု လူထုထောက်ခံပွဲဖြစ်မြောက်ရေးအဖွဲ့မှ ဦးအောင်လှက တာချီလိတ်သတင်းအေဂျင်စီသို့ ပြောသည်။ဆန္ဒထုတ်ဖေါ်သူများက နံနက် (၈)နာရီတွင် မြို့တော်ခန်းမ၌ စုဝေးကြပြီး တပ်မတော်အား ထောက်ခံကြောင်း၊ ပုဒ်မ ၅၉၊ ပုဒ်မ ၃၆၁ တို့ အားကာကွယ်စောင့်ရှောက်ရေး၊ ပုဒ်မ ၂၆၁ နှင့် ဖွဲ့စည်းပုံအခြေခံဥပဒေအား ဥပဒေနှင့် အညီပြင်ဆင်ပေးရေး၊ တိုင်းနှင့်ပြည်နယ်ဝန်ကြီးချုပ်အား တိုင်းရင်းသားများမှ စိတ်ကြိုက်ရွေးချယ်တင်မြောက်ခွင့်ရရှိရေးနှင့် တပ်မတော်အား အစဉ်ဝန်းရံပေးရေး စသည့်စာသားများပါသည့် ဗီနိုင်းများကိုင်ဆောင်ကာ သိန်းနီလမ်းမကြီးအတိုင်း ပြည်ထောင်စုအားကစားကွင်းသို့ ချီးတက်ကြသည်။
ထောက်ခံပွဲသို့ လီဆူ၊ လားဟူ၊ မုန်းဝန်း-ဗမာ၊ ကိုးကန့်၊ ရှမ်း၊ ကချင် တိုင်းရင်းသား ယဉ်ကျေးမှုအဖွဲ့များ၊ မြို့ပေါင်း (၁၈)မြို့၏ဆိုင်းဘုတ်များကိုင်ဆောင်ထားသည့် အစုအဖွဲ့များဖြင့် ချီတက်ကြခြင်းဖြစ်သည်။
လားရှိုးမြို့တွင် မေလ ၁၁ ရက်နေ့ကလည်း ၂၀၀၈ ဖွဲ့စည်းပုံအခြေခံ ဥပဒေတွင်ပါဝင်သည့် ပုဒ်မ များထဲမှ ပုဒ်မ ပေါင်း ၁၆၈ ခုကို ပြင်ဆင်ပေးရေးအတွက် လားရှိုးမြို့နယ်အတွင်းရှိ ကျေးရွာပေါင်း (၁၂) ခုမှ ဒေသခံများနှင့် သီပေါ၊ ကျောက်မဲမြို့များမှ ဒေသခံအချို့ပါဝင်သည့် လူထုထောက်ခံပွဲ ပြုလုပ်ခဲ့သည်ကို တွေ့ရသည်။
No comments:
Post a Comment