ကျောက်ဖြူ အထူးစီးပွားရေးဇုန်စတင်နိုင်ရန် EIA/SIA ဆောင်ရွက်ရဦးမည်ဟု ဆို

ကျောက်ဖြူအထူးစီးပွားရေးဇုန်ကို EIA/SIA ဆောင်ရွက်ပြီးမှသာ Master Plan ရေးဆွဲ၍ စီမံကိန်း စတင်နိုင်မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။ အဆိုပါ ပတ်ဝန်းကျင်ထိခိုက်မှုအနည်းဆုံးလေ့လာဆန်းစစ်မှု (EIA/SIA) သည် ၂ နှစ်ကြာမြင့်ဦးမည်ဖြစ်ကြောင်း သိရသည်။ “EIA/SIA လုပ်တာတင် အချိန် ၂ နှစ်ကြာမယ်။ အဲဒါပြီးမှ စီမံကိန်းစတင်နိုင်မှာ ဖြစ်ပါတယ်။ အကောင်အထည်ဖော်ဆောင်ရွက်မယ့် အထူးစီးပွားရေးဇုန် ၂ ခုရှိတယ်။ ထားဝယ်နဲ့ ကျောက်ဖြူပေါ့။ ကျောက်ဖြူကတော့ စနေပြီ။ မြန်မာတွေကိုပဲ အလုပ်အကိုင်အခွင့်အလမ်း ရာနှုန်းပြည့်နီးပါးပေးမယ်လို့ သူတို့ဘက်က ကတိပေးထားတယ်”ဟု စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူတစ်ဦးက ပြောသည်။

ယင်းအပြင် စီမံကိန်းစတင်ဆောင်ရွက်ပါက ရေနက်ဆိပ်ကမ်းစီမံကိန်း၏ ပထမအဆင့်တွင် သင်္ဘောကျောက်ချ လုပ်ငန်းနှင့် ဆိပ်ခံတံတားနှစ်ခုတည်ဆောက်သွားမည်ဖြစ်ပြီး ယင်းအတွက် ကုန်ကျငွေကို ကန်ဒေါ်လာ ၁ ဒဿမ ၃ ဘီလျံထက်မကျော်အောင် သုံးစွဲသွားမည်ဖြစ်ကာ စီမံကိန်းပြီးဆုံးပါက တန်ချိန်မြင့်သင်္ဘောများ ဆိုက်ကပ်နိုင်ပြီဖြစ်ကြောင်း သိရသည်။

ကျောက်ဖြူအထူးစီးပွားရေးဇုန်အကောင်အထည်ဖော်ရန် ရှယ်ယာပိုင်ဆိုင်မှုကို မြန်မာဘက် က ၃၀ ရာခိုင်နှုန်း နှင့် တရုတ်အစိုးရပိုင်ကုမ္ပဏီက ၇၀ ရာခိုင်နှုန်းဖြင့် သဘောတူညီခဲ့ပြီး စီမံကိန်း စတင်အကောင်အထည်ဖော် ဆောင်ရွက်ရာတွင်လည်း ဦးသိန်းစိန်အစိုးရလက်ထက်တွင် သဘောတူထားသည့် ရေနက်ဆိပ်ကမ်းစီမံကိန်းနှင့် အထူးစီးပွားရေးဇုန်ကိုသာ စတင်အကောင်အထည်ဖော်မည်ဖြစ်ကြောင်း သိရသည်။
ကျောက်ဖြူအထူးစီးပွားရေးဇုန်စီမံကိန်းစတင်နေသော်လည်း ထားဝယ်အထူးစီးပွားရေးဇုန်မှာ အမြန်ဆုံး စတင်နိုင်ရန် ဆွေးနွေးညှိနှိုင်းမှုများ ပြုလုပ်နေကြောင်း၊ ယင်းစီမံကိန်းသည် လုံးဝရပ်ဆိုင်းထားသည့် စီမံကိန်းဖြစ်ပြီး အသစ်ပြန်လည်စတင်ရသည့် စီမံကိန်းဖြစ်သည့်အတွက် အချိန်ကာလကြာမြင့်ဦးမည် ဖြစ်ကြောင်း သိရသည်။