Victoria အမှု စုံစမ်းရန်လာရောက်သူများကို နေပြည်တော်ရှိ တည်းခိုခန်းနှင့် စားသောက်ဆိုင်အချို့က အခမဲ့ တည်းခိုစားသောက်ခွင့်ပေး

နေပြည်တော် Wisdom Hill မူကြိုကျောင်းမှ ကျောင်းသူလေး Victoria မဖွယ်မရာပြုကျင့်ခံရမှုနှင့်ပတ်သက်၍ အမှန်တရားပေါ်ပေါက်ရေးဆောင်ရွက်ရန်အတွက် နေပြည်တော်သို့လာရောက်သူများကို တည်းခိုခန်းနှင့် စားသောက်ဆိုင်အချို့က အခမဲ့တည်းခိုခွင့်နှင့်စားသောက်ခွင့် ပေးလျှက်ရှိကြောင်း သိရသည်။ “ကျွန်တော်တို့တည်းခိုးခန်းအနေနဲ့တော့ သမီလေး Victoria နဲ့ပတ်သက်ပြီး စုံးစမ်းဖို့လာတဲ့သူတွေကို အခမဲ့ တည်းခိုခွင့် ပြုဖို့အတွက် အချိန်တလသတ်မှတ်ထားပါတယ်။ သတင်းထောက်တွေရော၊ ဘယ်သူပဲဖြစ်ဖြစ်ပေါ့ လာရောက်တည်းခိုနိုင် ပါတယ်။ အခုလို တည်းခိုခွင့်ပြုထားတာ တပတ်လောက်ရှိပါပြီ။ ကျွန်တော်တို့က အမှုမှန်ပေါ်ပေါက်စေချင်တာရယ်၊ သားသမီးချင်းကိုယ်ချင်းစာနာစိတ်ကြောင့်လုပ်တာပါ”ဟု နေပြည်တော် ကျောက်စိမ်းတည်းခိုခန်း ပိုင်ရှင်မိသားစုဝင်တဦးဖြစ်သူ ဦးခင်ထွန်းက ပြောသည်။



အမှုနှင့်ပတ်သက်၍လာရောက်သူများအနေဖြင့် နေထိုင်တည်းခိုရန် အခက်အခဲရှိပါက ကျောက်စိမ်းတည်းခိုခန်းမှ လူ ၁ ဦးလျှင် ၂ ရက် အခမဲ့တည်းခိုခွင့်ပြုကြောင်း၊ ထို့အတွက် လူ ၆ ယောက်တည်းခိုနိုင်သည့် အခန်း ၂ ခန်းစီစဉ်ထားကြောင်း၊ အခမဲ့တည်းခိုခြင်းကို ဇူလိုင်လကုန်အထိ ခွင့်ပြုမည်ဖြစ်ကြောင်း ၄င်းကဆက်လက်ပြေကြားသည်။

အမှတ် (၃၂၉၈) ချယ်ရီလမ်းနှင့်သစ္စာလမ်းထောင့်၊ ဘောဂ၀တီရပ်ကွက်၊ ပျဉ်မနားမြို့ရှိ ကျောက်စိမ်းတည်းခိုခန်းကဲ့သို့ နေပြည်တော်၊ ဧရာဝတီလမ်းမကြီး၊ သပြေကုန်းရှိ ရွှေလာဒ်ကောင် အဆင့်မြင့်လက်ဖက်ရည်၊ စားဖွယ်စုံနှင့် မြန်မာထမင်းဆိုင်ကလည်း အလားတူ ထမင်းဟင်း အခမဲ့ကျွေးမွေးမည်ဖြစ်ကြောင်း သိရသည်။

“ကျွန်မတို့ဆိုင်ကနေ သမီးလေးဗစ်တိုးရီးယားနဲ့ပတ်သက်ပြီးတော့ လာရောက်စုံးစမ်းတဲ့သူတွေကို စားသောက်ဖို့အတွက် ဒါနပြုတာပါ။ ရည်ရွယ်ချက်ကတော့ အမှုမှန်ပေါ်ပေါက်စေချင်လို့ပါ။ အချိန်ကာလကတော့ သတ်မှတ်မထားပါဘူး။ အမှုမှန်ပေါ်ပေါက်ဖို့က အဓိပေါ့။ တကယ်အမှုကို လာစုံးစမ်းတဲ့သူတွေမဟုတ်ဘဲ အသုံးချတဲ့သူတွေကတော့ သူတို့ သိက္ခာနဲ့သူတို့ပေါ့။ ကျွန်မတို့ရည်ရွယ်ချက်ကတော့ အမှုကို လာရောက်စုံးစမ်းဖော်ထုတ်တဲ့သူတွေ စားသောက်ဖို့အခက်အခဲဖြစ်ရင် ဖြည်းဆည်းပေးဖို့အတွက် လုပ်ဆောင်တာပါ” ဟု ရွှေလာဒ်ကောင်မှ တာဝန်ရှိသူတဦးက ပြောသည်။

အသက် ၂နှစ်နှင့် ၁၁ လအရွယ်မိန်းကလေး မဖွယ်မရာပြုကျင့်ခံရမှုနှင့်ပတ်သက်၍ လက်ရှိအချိန်တွင် Wisdom Hill ကျောင်းမှ ကြီးကြပ်ရေးမှူး၏ယာဉ်မောင်းဖြစ်သူ အောင်ကြီး(ခ)အောင်ကျော်မျိုးအား သံသယတရားခံအဖြစ်ဖမ်းဆီးထားသည်။

၎င်းအမှုမှာ တနိုင်ငံလုံးက စိတ်ဝင်တစားစောင့်ကြည့်နေသည့်အမှုဖြစ်ပြီး အမှုမှန်ပေါ်ပေါက်ရေးအတွက် မြို့ ကြီးများတွင် ဆန္ဒထုတ်ဖော်ပွဲများပြုလုပ်လျက်ရှိသည်။