မွန်ဘိုင်းမြို့က အံသြဖွယ်လက်ရာမြောက် တည်ဆောက်ထား တဲ့ ရွှေတိဂုံ ပုံစံတူစေတီ

ကမ္ဘာ့ဝိပဿနာ စေတီတော်ကြီ ရဲ့အကြောင်း ကို သိပြီး တဲ့ မိတ်ဆွေများတော့ သိပြီးလောက်ပါပြီ ။ ဒီစေတီ ကို အိန္ဒိယနိုင်ငံ မွန်ဘိုင်းမြို့ အနောက်မြောက်ဘက် က Gorai ဆိုတဲ့ ရွာလေးအနီးမှာတည်ထားတာပါ။ Gorai ချောင်းနဲ့ အာရေးဘီးယန်းပင်လယ်ကြားက ၁၁ဧက ကျယ်ဝန်းတဲ့ လှူဒါန်းမြေပေါ်မှာ တည်ထားခြင်းဖြစ်ပါတယ် ။ ဗုဒ္ဓဘာသာ ကို ကမ္ဘာကိုပြန့်ပွားစေခဲ့တဲ့ ဆရာကြီး ဦးဂိုအင်ကာ ဦးဆောင်တည်ထားခဲ့တဲ့စေတီဖြစ်ပါတယ်။



ကမ္ဘာပေါ်မှာ အကြီးဆုံး အမိုးခုံးဘုရားဖြစ်ပြီး တည်ဆောက်ရာမှာ အထောက်အကန်တွေကို မသုံးပဲ ကျောက်တုံးအချင်းချင်း ချိတ်ဆက်တဲ့နည်းပညာကို သုံးပြီးတည်ထားတယ်လို့ သိရပါတယ်။ အလယ်မှာ တိုင်တစ်လုံးမှ မပါတဲ့ပုံစံနဲ့ဆောက်ထားတာပါ။ ပုံမှန်သံကူကွန်ကရစ်နဲ့ မတည်ဆောက်ရခြင်းအကြောင်းကတော့ စေတီတော်ကြီးကို နှစ်ထောင်ချီ တည်တန့်စေချင်လို့ ဖြစ်ပါတယ်။

အင်ဂျင်နီယာ ကျောက်တုံးတွေကို နည်းပညာတွေသုံးကာ အရွယ်အစား အတိအကျ ဖြတ်တောက်ပြီး inter-locking ချိတ်ဆက်တည်ဆောက်ထားခြင်းဖြစ်ပါတယ်။

ရွှေတိဂုံပုံစံတူယူထားပြီး ဥာဏ်တော်ကို ရွှေတိဂုံစေတီထက် ၁ပေနှိမ့်ကာ ၃၂၅ပေ ထားရှိပါတယ်။ အချင်းကတော့ ၂၈၀ပေ ရှိပါတယ်။ ၁၉၉၇ခုနှစ်က စတင်တည်ဆောက်ခဲ့ပြီး ၂၀၀၈ခုနှစ်မှာ တည်ဆောက်ပြီးစီးခဲ့ပါတယ်။ တည်ဆောက်ချိန် ၁၁နှစ်ကြာမြင့်ခဲ့ပြီး စုစုပေါင်း ကျောက်တုံးအရေအတွက် ၂.၅သန်းကို အသုံးပြုတည်ဆောက်ခဲ့ရပါတယ်။

မြတ်စွာဘုရားရဲ့ စွယ်တော်ကို လှိုဏ်ဂူအတွင်း အလယ်ခေါင်၌ ဌာပနာထားတယ်လို့ သိရပါတယ်။ အ၀င်ကြမ်းပြင်ကိုတော့ ကျွန်းသစ်တွေနဲ့ ခင်းထားပါတယ်။ ၃၆ပေကျယ်ပြီး ၂၄ပေ မြင့်တဲ့ ကျွန်းတံခါးကြီးမှာ ပန်းကနှုတ်တွေနဲ့ ရေးခြယ်ထားပြီး ဒီတံခါးဟာ ကမ္ဘာပေါ်က ရွှေ့လျားနိုင်တဲ့ ဒုတိယအကြီးဆုံး သစ်သားတံခါးကြီးလည်း ဖြစ်ပါတယ်။

လိုဏ်ဂူအလယ်တည့်တည့်မှာတော့ လှည့်ပတ်နိုင်တဲ့ စတိတ်ဆင်မြင့်ကိုထားရှိပြီး ၊ လေ၀င်လေထွက်စနစ် နဲ့ ပဲ့တင်သံလျှော့ချခြင်း နည်းပညာတွေကိုလည်း ထည့်သွင်းတည်ဆောက်ထားပါတယ်။

ဒီဘုရားမှာ တရားထိုင်တဲ့ခန်းမတွေ ၊ ဗုဒ္ဓ၀င်ပြခန်း ၊ စာကြည့်တိုက် ၊ စတုရန်းပေ ၆၅၀၀၀ ကျယ်ဝန်းပြီး လူရှစ်ထောင် တစ်ပြိုင်နက် တရားရှုမှတ်နိုင်တဲ့ လှိုဏ်ဂူ နဲ့ ဓမ္မစာပေသင်ကြားတဲ့အခန်း တွေပါဝင်ပြီး တောင်ဘက် နဲ့ မြောက်ဘက်မှာလည်း နောင်တော်ကြီးဘုရားအရွယ်အစား စေတီငယ်နှစ်ဆူကို တည်ထားတယ်လို့ သိရပါတယ်။

နောက်ထပ်ထူးခြားတာတွေကတော့ ဗောဓိပင် ၊ ဗုဒ္ဓရဲ့ဘ၀ဖြစ်တော်စဉ်ကို ပန်းချီကားပေါင်း ၁၃၀ နဲ့ရေးဆွဲကာ အသံနဲ့ရှင်းပြထားတဲ့ ခန်းမ ၊ စကျင်ကျောက်တုံးကြီးကို ထွင်းထုထားတဲ့ ၂၁.၅ပေ မြင့်ကာ အလေးချိန် ၈၇.၅တန် လေးတဲ့ ဗုဒ္ဓဆင်းတုတော်တွေပဲ ဖြစ်ပါတယ်။