ပြီးခဲ့တဲ့ သီတင်းပတ်ကုန်ရက်များအတွင်း မိုးအဆက်မပြတ် ရွာသွန်းမှုတွေကြောင့် အမေရိကန် ဝါရှင်တန်ဒီစီမြို့တော်နဲ့ ဗာဂျီးနီးယားပြည်နယ်မြောက်ပိုင်းတို့မှာ ရုတ်တရက် ရေကြီးမှုတွေဖြစ်ပေါ်ကာ ယာဉ်အသွားအလာ အခက်အခဲများ ကြုံခဲ့ရပါတယ်။ ဝါရှင်တန်ဒီစီမှာ လမ်းမများ ရေလွှမ်းမိုးသွားခဲ့ပြီး မြစ်ချောင်းသဖွယ် ဖြစ်သွားခဲ့တယ်လို့ဆိုပါတယ်။ အမေရိကန် မိုးလေဝသဌာန (National Weather Service) က ရုတ်တရက် ရေကြီးမှုအန္တရာယ် သတိပေးချက်ကို ဝါရှင်တန်ဒီစီမြို့တော်ဧရိယာအတွက် ယမန်နေ့ မွန်းလွဲ ၁ နာရီဝန်းကျင်မှာ ပြန်ရုပ်သိမ်းလိုက်ကြောင်း သိရပါတယ်။Reagan National လေဆိပ်မှာ ၂ နာရီအတွင်း မိုးရေချိန် ၃.၄ လက်မအထိ ရွာသွန်းခဲ့ပါတယ်။ ထို့အတူ မာရီလန်းပြည်နယ် ဖရီဒါရစ်ခ်မြို့မှာ မိုးရေချိန် ၆.၃ လက်မနဲ့ ဗာဂျီးနီးယားပြည်နယ် အာလင်တန်မြို့မှာ မိုးရေချိန် ၄.၅ လက်မအထိ မိုးသည်းထန်စွာရွာသွန်းခဲ့ကြောင်း သိရပါတယ်။
အာလင်တန်မြို့ရဲ့ မိုးရေချိန်ဟာ တစ်နာရီအတွင်း ၃.၃ လက်မအထိ ရှိခဲ့ကြောင်းနဲ့ ထိုပမာဏဟာ ပုံမှန်အားဖြင့် တစ်လအတွင်း ရွာသွန်းတဲ့မိုးရေချိန်နီးပါး ဖြစ်ခဲ့တယ်လို့ မိုးလေဝသသတင်းဝက်ဘ်ဆိုက် AccuWeather က ဖော်ပြခဲ့ပါတယ်။ ဝါရှင်တန်မှာ ရေကြီးမှုအတွင်း မော်တော်ယာဉ်မောင်းနှင်သူ တစ်ဒါဇင်ကျော်ဟာ အာရီဇိုနားလမ်းမကြီးအနီး ကန်နယ်လ်လမ်းတစ်လျှောက် ကားခေါင်မိုးတွေပေါ်မှာ သောင်တင်ခဲ့ကြပါတယ်။ ဝါရှင်တန်ဒီစီရဲ့ အခြားနေရာတွေမှာ ရေကြီးမှုအတွင်း ကားအတွင်း ပိတ်မိခဲ့သူအချို့ကို ကယ်တင်ခဲ့ရကြောင်း Washintgon Post သတင်းက ဖော်ပြပါတယ်။
ရေကြီးမှုဖြစ်ပြီးနောက် ဆေးရုံပို့ရသူနဲ့ ထိခိုက်ဒဏ်ရာရသူ မရှိခဲ့ဘူးလို့ ဝါရှင်တန်ဒီစီ မီးသတ်ဌာနမှ ပြောခွင့်ရပုဂ္ဂိုလ်က ပြောပါတယ်။ ရာသီဥတုဆိုးရွားမှုကြောင့် Amtrak ရထားလိုင်းရဲ့ ဝါရှင်တန်တောင်ပိုင်း ရထားခရီးစဉ်တွေကို မနက် ၁၀ နာရီကျော်မှာ ရပ်ဆိုင်းခဲ့တယ်လို့ဆိုပါတယ်။ Amtrak ရထားခရီးစဉ်တွေကို မနက် ၁၁ နာရီ ၄၀ မိနစ်မှာ ပြန်လည်ပြေးဆွဲခဲ့ကြောင်း သိရပါတယ်။
မာရီလန်းပြည်နယ်မှာလည်း တနင်္လာနေ့ အစောပိုင်းက ရေကြီးမှုကြောင့် ဖုန်းခေါ်ဆို အကူအညီတောင်းမှု ၃၀ ကျော်ရှိခဲ့ကြောင်းနဲ့ ကယ်ဆယ်မှု ၈ ကြိမ် လုပ်ဆောင်ခဲ့ရပြီး ထိခိုက်ဒဏ်ရာရသူ မရှိခဲ့ကြောင်း မီးသတ်ဌာနက တာဝန်ရှိသူတွေက ပြောပါတယ်။ မိုးသည်းထန်ပြီး ရာသီဥတုဆိုးရွားမှုကြောင့် လူဦးရေ ၈,၀၀၀ ခန့် တနင်္လာနေ့ နေ့လယ်ပိုင်းအထိ လျှပ်စစ်ဓာတ်အားပြတ်တောက်မှု ကြုံခဲ့ရကြောင်း Washington Post က ဖော်ပြပါတယ်။
No comments:
Post a Comment