ပြင်သစ်နိုင်ငံ၊ ပဲရစ်မြို့မှာ ကျင်းပမယ့် ၂၀၂၄ ခုနှစ် အိုလံပစ်အားကစားပွဲမှာ ဘရိတ်ဒန့်စ်လို့ လူသိများတဲ့ Breaking အကပြိုင်ပွဲ ပါဝင်မယ်ဆိုတဲ့ အကြောင်း ပွဲကျင်းပရေးကောင်စီက ပြောပါတယ်။ အပြည်ပြည်ဆိုင်ရာ အိုလံပစ်အဖွဲ့အစည်း IOC (International Olympic Committee) ရဲ့ ပြောကြားချက်အရ ဂျပန်နိုင်ငံ၊ တိုကျိုမှာ ပြုလုပ်မယ့် ၂၀၂၀ အိုလံပစ်မှာ ပြိုင်ပွဲတွေကို ပွဲဦးထွက် ပြိုင်ခိုင်းဖို့ ရှိတယ်လို့ ဆိုပါတယ်။ထပ်မံထည့်သွင်းမယ့် အားကစားတွေထဲမှာ Breaking အက၊ စကိတ်စီးခြင်းနဲ့ ရေလွှာလျှောစီးခြင်း စတာတွေ ပါရှိလာမယ်လို့ သိရပါတယ်။ “ကျနော်တို့ အနေနဲ့ ဒီကစားအသစ်တွေကို ထည့်သွင်းရခြင်းကတော့ ကျား၊ မ သာတူညီမျှမှုနဲ့ လူငယ်ဆန်မှုကို ဦးစားပေးချင်လို့ ဖြစ်ပါတယ်။ နောက်တက်လာမယ့် မျိုးဆက်တွေအတွက် ကောင်းမွန်တဲ့ အခွင့်အလမ်းတွေပေးရင်း သူတို့နဲ့ နီးစပ်မှုကို ရချင်လို့ ဖြစ်ပါတယ်”လို့ IOC ရဲ့ ဥက္ကဋ္ဌ Thomas Bach က ဇွန်လ ၂၅ ရက်နေ့မှာ ပြုလုပ်ခဲ့တဲ့ သတင်းစာရှင်းလင်းပွဲမှာ ဖြေကြားခဲ့ပါတယ်။
Breaking အကပြိုင်ပွဲကို ၂၀၁၈ ခုနှစ်က ကျင်းပတဲ့ လူငယ်အိုလံပစ်ပွဲတွေမှာ ပွဲဦးထွက် ပြိုင်စေခဲ့ပြီး အမေရိကန်နိုင်ငံ ကိုယ်စားပြု အားကစားသမားတော့ မပါဝင်ခဲ့ဘူးလို့ သိရပါတယ်။ ရုရှားက အကသမား (B-boy) Sergei Bumblebee Chernyshev နဲ့ ဂျပန်က အကသမား (B-girl) Ramu Kawai တို့က ရွှေတံဆိပ်တွေကို ပိုင်ဆိုင်နိုင်ခဲ့ပါတယ်။ ဒီသတင်းဟာ B-boy, B-girl တွေအတွက် သတင်းကောင်းဖြစ်ပြီး နိုင်ငံတကာက အကပညာရှင်တွေလည်း ပါဝင်ယှဉ်ပြိုင်ဖို့ စိတ်အားထက်သန်နေကြတယ်လို့ သိရပါတယ်။
No comments:
Post a Comment