ခွဲစိတ်လူနာ၏ခါးအတွင်း၌ ကတ်ကြေးကျိုးကျန်စေခဲ့သည်ဆိုကာ လူနာရှင်က Grand Hantha International ဆေးရုံမှခွဲစိတ်ဆရာဝန်များနှင့် ဒါရိုက်တာအဖွဲ့ဝင်များကို ရန်ကုန်မြို့၊ ကမာရွတ်မြို့မရဲစခန်း၌ အမှုဖွင့်ထားကြောင်း သိရသည်။ အမှုနှင့်ပတ်သက်၍ တရားလိုမှာ ဒေါက်တာအောင်အောင်ဖြစ်ပြီးခါးရိုးဆစ်ကျွံသဖြင့် ပြီးခဲ့သည့်ဖေဖော်ဝါရီလ ၁၅ ရက်က Grand Hantha Internationalဆေးရုံကြီး၌ ခွဲစိတ်ကုသမှုခံယူခဲ့ကြောင်း သိရသည်။ထိုသို့ခွဲစိတ်ရာ၌ ခါးအတွင်းကတ်ကြေးထိပ်ပိုင်းကျိုးကျန်နေခဲ့သဖြင့် ဖေဖော်ဝါရီလ ၁၇ ရက်တွင် နောက်တစ်ကြိမ်ထပ်မံခွဲစိတ်ခဲ့ရကြောင်း သိရသည်။
“ကျွန်တော့်ကိုခွဲစိတ်ပေးတဲ့သူက နိုင်ငံခြားဆရာဝန်ပေါ့။ခွဲစိတ်မှုအပြီးမှာတော့ အောင်မြင်တယ်။ ဒါပေမဲ့ ကတ်ကြေးထိပ်ပိုင်းကျိုးကျန်နေခဲ့တာကို ပြဿနာမရှိဘူးလို့ပြောပြီးနောက် ၆ လလောက်နေရင် သူ့ဟာသူခဲပြီး ကျန်နေခဲ့မယ်လို့ ကျွန်တော်ကိုပြောတယ်လေ။ ဒါပေမဲ့ကျွန်တော်ကလည်းမဖြစ်သေးပါဘူးဆိုပြီးတော့ အသိမိတ်ဆွေအရိုးကုဆရာဝန်တွေနဲ့ ပြပြီးဓာတ်မှန်ရိုက်တဲ့အခါမှာ သူပြောတဲ့နေရာနဲ့လွဲနေတာကို သိသွားခဲ့တယ်။ အဲဒါကြောင့် နောက်တစ်ရက်ခြားမှာ အဲဒီဆေးရုံမှာပဲပြန်ခွဲစိတ်တယ်။ခွဲစိတ်ပြီးမကြာခင်မှာပဲ ကျွန်တော့်ကိုခွဲစိတ်ပေးတဲ့ဆရာဝန်က ပြန်သွားတယ်” ဟု အမှုဖွင့်သူ ဒေါက်တာအောင်အောင်က ပြောသည်။
အဆိုပါဖြစ်စဉ်နှင့်ပတ်သက်၍ Grand Hantha International ဆေးရုံမှ ဖြိုးမြတ်ခိုင်၊ ခင်ဌေးလင်း၊ ဝင်းပပ၊ ဇင်မီသိမ့်၊ Mohammad MashfiqulArafinSiddiqui ၊ Chin Pak Lin နှင့် Christine Chan (လက်ထောက် ခွဲစိတ်)တို့ကို ပြီးခဲ့သည့် ဇွန်လ ၂၉ ရက်က ကမာရွတ်မြို့မရဲစခန်း၌ (ပ)၁၃၆၁ ၊ ပုဒ်မ - ၃၃၈ ဖြင့် အမှုဖွင့်ခဲ့ခြင်းဖြစ်ကြောင်း သိရသည်။
အဆိုပါဖြစ်စဉ်နှင့် ပတ်သက်၍ အကုန်သိသတင်းဌာနမှ Grand Hantha International သို့ ဆက်သွယ် မေးမြန်းခဲ့သော်လည်း ဆေးရုံမှ တာဝန်ရှိသူတစ်ဦးဖြစ်သည့် ဒေါက်တာအောင်ကျော်ထက်က လက်ရှိ၌ သတင်းထုတ်ပြန်ရန်မရှိသေးကြောင်း ပြန်လည်ဖြေကြားခဲ့သည်။
No comments:
Post a Comment