အပူဒဏ်ကြောင့် လူ့ခန္ဓာကိုယ်အပူချိန်မြင့်မားခြင်းကို ပါရာစီတမော ကိုယ်အပူကျဆေးတိုက်ခြင်းသည် လွဲမှားသည့်အယူအဆတစ်ရပ်ဖြစ်၍ရှောင်ကြဉ်သင့်ကြောင်း အထွေထွေသမားတော် ဒေါက်တာ မိုးအောင်ကျော်နိုင်က ပြောသည်။ အပူချိန်မြင့်မားခြင်းကြောင့် ချွေးထွက်လွန်၍ ကိုယ်အပူချိန် မြင့်မားခြင်းအား အကိုက်အခဲပျောက်ဆေး တိုက်ကျွေးမှုများရှိသည့်အပေါ် ယခုကဲ့သို့ပြောခြင်း ဖြစ်သည်။
“လူဟာ သွေးနွေးသတ္တ၀ါထဲမှာ ပါတဲ့အတွက်ကြောင့် ခန္ဓာကိုယ်ကို ၃၇ ဒီဂရီဆဲစီရပ်မှာ ထိန်းသိမ်းထားရတယ်။ အဲဒီတော့ ပတ်ဝန်းကျင်အပူချိန်မြင့်မားရင်ခန္ဓာကိုယ်က ချွေးထွက်တာနဲ့ ၃၇ ဒီဂရီဆဲစီရပ်မှာ ထိန်းသိမ်းထားရတယ်။ နွေရာသီမှာဆို ပတ်ဝန်းကျင်အပူဓာတ်တွေက ကိုယ့်ရဲ့ ခန္ဓာကိုယ်ထဲ အဲဒီအပူဓါတ်တွေက စီးဝင်လာတယ်။ အဲဒီအချိန်တွေမှာ လူ့ခန္ဓာကိုယ်က အပူချိန်ကို ပါရာစီတမော်လို ဆေးမျိုးပေးပြီး ကိုယ်အပူချလို့မရပါဘူး။ ပါရာစီတမောလိုဆေးဟာ ခန္ဓာကိုယ်ထဲက အပူချိန်ကို ချွေးထွက်အောင်လုပ်ပြီးမှအပူချိန်လျှော့ချတဲ့နည်းပါ။ အခုဟာက ချွေးထွက်စရာမရှိတော့တဲ့အတွက် မည်သည့်အပူကျဆေးပေးပေးအပူမကျတဲ့အပြင် ဆေးရဲ့နောက်ဆက်တွဲဆိုးကျိုးတွေပါ ထပ်မံခံစားသွားရမယ်’’ ဟု အထွေထွေသမားတော် ဒေါက်တာမိုးအောင်ကျော်နိုင်ကပြောသည်။
ခန္ဓာကိုယ်တွင်အပူဒဏ်ကြောင့်ချွေးထွက်လွန်ပါက ရေများများသောက်ပေးခြင်း၊ အပူရှိန်မြင့်မားပါက လေအေးခံခြင်း၊ ရေစိုဝတ်ကပ်ပေးခြင်း ၊အရိပ်ရ၍ လေရသောနေရာတွင် သက်တောင့်သက်သာနေပေးခြင်းတို့ ပြုလုပ်ရန် လိုအပ်ကြောင်း သိရသည်။
“အဲဒီလို ပြင်ပအပူဒဏ်ကြောင့်ခန္ဓာကိုယ်ပူနေရင်တော့ ရေခဲရေတိုက်တာတို့၊ ပန်ကာလေခံတာတို့၊ ဒါမှမဟုတ် အဲယားပွန်းခန်းထဲမှာ ထားတာတို့၊ ရေပတ်အ၀တ်ကိုအုပ်ထားပေးတာ ဒီနည်းနဲ့ သူ့အပူချိန်ကိုချပါမယ်။ လိုအပ်ရင် ရေခဲတုံးတွေဖြည့်ထားတဲ့ရေကန်မှာ သူ့ကို ၃၉ ဒီဂရီဆဲစီရပ်ကျအောင် အပူချိန်ကိုမြန်မြန်ချပေးဖို့ လိုပါတယ်။အဲဒီလိုနည်းနဲ့ ချနိုင်ရင်တော့ အပူကြောင့်သတိလစ်ပြီး အသက်ဆုံးရှုံးခြင်းကို ကာကွယ်နိုင်ပါတယ်’’ ဟု ဒေါက်တာမိုးအောင်ကျော်နိုင်က ဆက်ပြောသည်။
အပူချိန်မြင့်မားပါက လူ့ခန္ဓာကိုယ်တွင် ချွေးထွက်လွန်ခြင်း၊ ခေါင်းမူးဝေခြင်း၊ ခန္ဓာကိုယ်အပူချိန်မြင့်မားခြင်း၊ သတိလစ်ကာ အသက်အန္တရာယ်ထိခိုက်မှုတို့ရှိနိုင်ကြောင်းသိရသည်။
No comments:
Post a Comment