မြန်မာ - ထိုင်းနယ်စပ်ဒေသ၊ တာချီလိတ်မြို့၊ ၀မ်လုံးကျေးရွာအုပ်စု၊ ဖာတီမာကုန်းကျေးရွာရှိ နေအိမ် (၁) လုံး အတွင်း ၂၀၁၉ ခုနှစ် ဇူလိုင်လ (၇) ရက်နေ့ နေ့လည် (၁၁)နာရီဝန်းကျင်က မူးယစ်ဆေးဝါးသတင်းအရ ၀င်ရောက် ရှာဖွေရာ တူမီးသေနတ် (၂) လက် အပါအ၀င် မူးယစ်ဆေးဝါးဖြင့် အမျိူးသားတစ်ဦးအား ဖမ်းဆီးရမိ၍ လတ်တလောတွင် မူးယစ်ဆေးဝါးမှုဖြင့် အမှုဖွင့်ထားကြောင်း တာချီလိတ်မြို့မရဲစခန်းမှ သိရသည်။"ကျွန်တော်တို့ လက်ရှိကတော့ မူးယစ်မှုနဲ့တွေ့ရင် မူးယစ်မှုကို အရင်ဖွင့်တာ။ ဥပဒေအကြံပေးက အကြံပေးလို့ရှိရင် လက်နက်အမှုကို ဆက်ဖွင့်မှာပဲလေ။ ချက်ခြင်းကြီးတော့ တွဲမဖွင့်ဘူးဗျ"ဟု တာချီလိတ်မြို့မရဲစခန်းမှ စခန်းမှူး ဒုရဲမှူးသန်းထွန်းအောင်က တာချီလိတ်သတင်းအေဂျင်စီသို့ပြောသည်။
ဝမ်လုံးကျေးရွာအုပ်စု၊ ဖာတီမာကုန်းကျေးရွာအတွင်းရှိ နေအိမ်တွင် မူးယစ်ဆေးဝါးသုံးစွဲရောင်းချနေကြောင်း သတင်းအရ ပူးပေါင်းအဖွဲမှ ၀င်ရောက်ရှာဖွေရာ နေအိမ်ပိုင်ရှင်ဖြစ်သူ လော်ဒါး အိပ်သည့် အိပ်ယာဘေးတွင် WY စာတမ်းပါ လိမ္မော်ရောင်စိတ်ကြွဆေးပြား (၂၆) ပြား နှင့် အလေးချိန် (၆၀)ဂရမ်ရှိသည့် ဘိန်းစိမ်း အပါအ၀င် အရှည် (၁၈) လက်မခန့်ရှိ တူမီးသေနတ် (၁) လက်၊ အရှည် (၅) ပေ (၂) လက်မခန့်ရှိ တူမီးသေနတ် (၁) လက်တို့ကို ရှာဖွေတွေ့ရှိခဲ့ကြောင်း သိရသည်။
နေအိမ်အတွင်း တူမီးသေနတ်အပါအ၀င် မူးယစ်ဆေးဝါးနှင့်အတူ ဖမ်းဆီးရမိသည့် လော်ဒါးကို တာချီလိတ်မြို့မရဲစခန်းတွင် မယ(ပ)၉၃/၂၀၁၉၊ မူး/စိတ်ပုဒ်မ ၁၆(ဂ)/၂၂(ခ) ဖြင့် အမှုဖွင့်အရေးယူထားကြောင်း သိရသည်။
No comments:
Post a Comment