မန္တလေးတိုင်းဒေသကြီး၊ အမရပူရမြို့နယ်တွင် ညအချိန်၌ ၃ ဘီးဆိုင်ကယ်ယာဉ်မောင်းအားသတ်ပြီး ဖုန်းနှင့်ပိုက်ဆံလုယက်မှု ဖြစ်ပွားခဲ့ကြောင်း သတင်းရရှိသည်။ြ ဖစ်စဉ်မှာ အမရပူရမြို့နယ်၊ မြစ်ငယ်နယ်မြေရဲစခန်းပိုင် မြစိမ်းရောင်ခန်းမရှေ့၌ ဇွန်လ ၁၂ ရက်၊ ယမန့်နေ့ ည ၈ နာရီခန့်က ရပ်နားထားသောသုံးဘီးဆိုင်ကယ်မောင်းသူမှာဒဏ်ရာများဖြင့်လဲကျနေသဖြင့် တာဝန်ရှိသူများက သွားရောက်စစ်ဆေးခဲ့ကြသည်။စစ်ဆေးချက်အရ ညာဘက်ရင်အုံ၌ထိုးသွင်းဒဏ်ရာတစ်ချက်ဖြင့် သေဆုံးနေပြီဖြစ်သော အသက် ၃၀ ကျော်ရှိသုံးဘီးယာဉ်မောင်း(အမည်စိစစ်ဆဲ)ကို တွေ့ရှိရသဖြင့် ညိမ်းလူမှုကူညီရေးအသင်းမှ အလောင်းကို ရင်ခွဲရုံသို့ တင်ပို့ပေးခဲ့ကြသည်။
အခင်းမဖြစ်မီ ကျွဲဆည်ကန်ကားကြီးကွင်းမှ ခရီးသည် ၄ ဦးသည် မြစ်ငယ်မြို့ကိုသွားရောက်ရန်ယင်း ၃ ဘီး ဆိုင်ကယ်ကိုငှားခဲ့ကြောင်း၊ ထို့နောက် နတ်ရေကန် စက်မှု(၂)ထိပ်နှင့်မတ္တလာကောလိပ်ကြားအရောက်တွင် ခရီးသည် ၄ ဦးကဆိုင်ကယ်သမားအား ဓားဖြင့်ထိုးသတ်၍ ဖုန်းနှင့်ငွေကျပ် ၅ သောင်းကိုလုယက် ထွက်ပြေးသွားခြင်းဖြစ်ကြောင်း ဒေသခံတစ်ဦး၏ပြောပြချက်အရ သိရသည်။
“ ဒီဖြစ်စဉ်ကတော့ အမှုကြီးထဲမှာပါတယ်ဗျ။လက်ရှိအချိန်မှာ ပြစ်မှုကျူးလွန်သူတွေကို စုံစမ်းရှာဖွေနေဆဲပါ။ ဖြစ်စဉ်အပြည့်အစုံကတော့ အမှုစစ်ဆီကိုတိုက်ရိုက်မေးကြည့်တာ ပိုကောင်းပါတယ်။ ကျွန်တော်တို့ကျတော့ အခုမှဂျူတီဝင်တဲ့သူတွေဖြစ်နေလို့ပါ။စခန်းကိုလာရင်ပိုအဆင်ပြေတယ်” ဟု မြစ်ငယ်နယ်မြေရဲစခန်းမှ တာဝန်ရှိသူတစ်ဦးက ပြောသည်။
ယင်းဖြစ်စဉ်နှင့်ပတ်သက်၍ မြစ်ငယ်နယ်မြေရဲစခန်း၌ အမှုဖွင့်လှစ်ပြီး ပြစ်မှုကျူးလွန်သူများကို ဖမ်းဆီးနိုင်ရေး စုံစမ်းရှာဖွေနေကြောင်း သတင်းရရှိသည်။
No comments:
Post a Comment