တနင်္သာရီတိုင်းဒေသကြီး မြိတ်ခရိုင် ကျွန်းစုမြို့နယ် ဘန္ဒနဲကျေးရွာအုပ်စု သဲဖြူကျွန်းကျေးရွာအနီး ရေမိုင် ၃ မိုင်ခန့်အကွာအဝေးရှိသောင်ပြင်၌ ဇွန် ၂၃ ရက် နံနက် ၄ နာရီခန့်က မြိတ်- ရွှေဂဲညိုသွား ကုန်တင်စက်လှေတစ်စီး တိမ်းမှောက်မှု ဖြစ်ပွားခဲ့ကြောင်း သိရသည်။ ကျွန်းစုမြို့နယ် ကော်ဇယာကျေးရွာအုပ်စု ကျောက်ပိတ်ကျေးရွာနေ ဦးအောင်ဇော် (၃၈ နှစ်) ရေလုပ်ငန်းလုပ်ကိုင်သူ ပိုင်ဆိုင်သော အလျား ၄၈ ပေ၊ အနံ ၁၂ ပေ၊ ရေစူး ၆ ပေ၊ သစ်သားကိုယ်ထည်၊ စက်မကြီး EK 300 HP ဝမ်းထိုင်စက်တပ်ဆင်ထားသည့် "အောင်မြင့်မြတ်" အမည်ရှိ မြိတ်- ရွှေဂဲညို သွား ကုန်တင်စက်လှေသည် လှေ ရှင်/ပဲ့နင်းဖြစ်သူ ဦးအောင်ဇော်မောင်းနှင်၍ လှေသား ၂ ဦးတို့နှင့်အတူ ဇွန် ၂၃ ရက် နံနက် ၀၀း၃၀ နာရီခန့်ကမြိတ်မြို့မှ ကျွန်းစုမြို့နယ် ကျောက်ပိတ်ကျေးရွာသို့ ဆန်အိတ် ၁၀၀ ၊ ဘိလပ်မြေ အိတ် ၁၅၀ ၊ ဒီဇယ်ဆီ ၁၂ ပေပါနှင့် အခြားစားသောက်ကုန်ပစ္စည်းများတင်ဆောင်၍ ထွက်ခွာလာစဉ် နံနက် ၄ နာရီခန့်တွင် ကျွန်းစုမြို့နယ် ဘန္ဒနဲကျေးရွာအုပ်စု သဲဖြူကျွန်းကျေးရွာ အရှေ့ဘက် ရေမိုင် ၃ မိုင်ခန့်အကွာအရောက်တွင် စက်လှေမှာသောင်ငြိ၍ တိမ်းစောင်းမှောက်မှုဖြစ်ပွားခဲ့ကြောင်း၊ ၎င်းစက်လှေတိမ်းမှောက်မှုကြောင့် လှေပေါ်ပါသူများ ထိခိုက်ဒဏ်ရာရရှိ မှုမရှိဘဲ လှေပေါ်ပါ ဆန်အိတ် ၁၀၀၊ ဘိလပ်မြေ အိတ် ၁၅၀ နှင့် စားသောက်ကုန်ပစ္စည်းအချို့ ရေစိုပျက်စီးဆုံးရှုံးခဲ့ပြီး ဆုံးရှုံးမှု တန်းဖိုးမှာ ငွေကျပ်သိန်း ၄၀ ခန့်ဆုံးရှုံးခဲ့ကြောင်း သိရသည်။
အဆိုပါစက်လှေတိမ်းမှောက်မှု ဖြစ်ပွားရာနေရာသို့ ကျွန်းစုမြို့နယ် ရှော်တောမောနယ်မြေရဲစခန်းမှူး ရဲအုပ်ဝင်းဟန်နှင့် ရဲတပ်ဖွဲ့ဝင်များ၊ ဘန္ဒနဲကျေးရွာအုပ်စု အုပ်ချုပ်ရေးမှူး ဦးမျိုးကိုကိုဦး၊ သဲဖြူကျွန်းကျေးရွာ ရာအိမ်မှူး ဦးဝင်းထွန်းနှင့် ရွာသူ ရွာသားများက စက်လှေများဖြင့်သွားရောက်ကာ လှေပေါ်ပါရှိသော ဒီဇယ်ဆီပေပါများနှင့် ကုန်ပစ္စည်းများအား ကူညီဆယ်ယူ၍ သဲဖြူကျွန်းကျေးရွာသို့ ကူညီပို့ဆောင်ပေးခဲ့ကြောင်း သိရသည်။
No comments:
Post a Comment