နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေးဗဟို ကော်မတီ ဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် မေ ၁၇ ရက် နံနက်ပိုင်းတွင် မန္တလေးတိုင်းဒေသကြီး၊ ကျောက်ဆည်မြို့နယ် ဘဲလင်း ၂၃ဝ ကေဗွီ ဓာတ်အားခွဲရုံ ဝင်းအတွင်း၌ တည်ဆောက်ပြီးသွားသည့် ၁၄၅မဂ္ဂါဝပ် သဘာဝဓာတ်ငွေ့သုံး ဓာတ်အား ပေးစက်ရုံဖွင့်ပွဲအခမ်းအနားသို့ တက်ရောက်အမှာစကားပြောကြားပြီး ကျောက်ဆည်မြို့ ညောင်ပင်သောက်ကျေးရွာရှိ အနော်ရထာမင်းကြီး တည်ထားကိုးကွယ်ခဲ့သော သမိုင်းဝင်တမုတ် ရှင်ပင်ရွှေဂူဘုရားသို့ သွားရောက်ကာ ပန်း၊ ရေချမ်း၊ ဆီမီးကပ်လှူ ပူဇော်ကာ အလှူငွေများပေး အပ်လှူဒါန်းသည်။သမိုင်းဝင်တမုတ် ရှင်ပင်ရွှေဂူဘုရားသည် မန္တလေးတိုင်းဒေသကြီး ကျောက်ဆည်မြို့ ကြောင်ပန်းကုန်း၊ ညောင်ပင်ဇောက်၊ ငယ်တိုးကျေးရွာအနီးတွင် တည်ရှိပြီး အနော်ရထာ မင်းလက်ထက်တွင် လယ်တွင်း ၁၁ ခရိုင် မြို့များတွင် ရွှေဂူစေတီ ၉ ဆူကို တည်ထားခဲ့ရာ တမုတ်ရှင်ပင်ရွှေဂူကြီးစေတီတော်မှာ တစ်ဆူအပါအဝင် ဖြစ်ကြောင်း၊ နရပတေ့ စည်သူမင်း လက်ထက်တွင် ယိုယွင်းနေသော မူလစေတီတော် အထွဋ်တင် တစ်ထပ်ဂူ ဘုရားငယ်ကို ကွမ်းတောင်ပေါက် နှစ်ထပ်ဂူဘုရားအဖြစ် ပြုပြင်ပြောင်းလဲခဲ့ကြောင်း။
ပင်းယခေတ် ဥစ္စနာမင်းလက်ထက်တွင် စေတီတော်၊ သိမ်တော်၊ ဆင်းတုတော်တို့ကို ထပ်မံလွှမ်းခြုံ၍ စေတီတော်အသစ် တည်ထားခဲ့ကြောင်း၊ သက္ကရာဇ် ၇၁၈ ခုနှစ်တွင် ပင်းယဘုရင် ဆင်ဖြူရှင် ကျော်စွာမင်း တမုတ်ရွှေဂူဘုရားသို့ ကြွရောက်လာပြီး ဘုရားမြေ များနှင့် အမှုအလုပ်ကျွန်များကို လှူဒါန်းခဲ့ကြောင်း၊ ပင်းယခေတ်နောက်ပိုင်း ခေတ် အဆက်ဆက်တွင် ပြုပြင်ထိန်းသိမ်းမှု မရှိခြင်းနှင့် သဘာဝဘေးဒဏ်များကြောင့် ပြိုကျပျက်စီး၍ ဘုရားကုန်းတော် တစ်ခုလုံး တောခြုံများ ဖုံးလွှမ်းခဲ့ကြောင်း။
၁၉၁၅ ခုနှစ်တွင် ကြောင်ပန်းကုန်းကျေးရွာနေ ဦးစံထွားက ပြိုကျပျက်စီးနေသော ဘုရားကုန်းတော်ကြီး၏ ထိပ်တွင် ဥာဏ်တော် ၂၁ ပေရှိ ၉ တောင်ပြည့် စေတီတစ်ဆူကို အသစ်ထပ်မံ တည်ဆောက်ခဲ့ကြောင်း၊ ၁၉၉၃ ခုနှစ်တွင် ဆရာတော် ဘန္တန္ဒစန္ဒောဘာသ သတင်းသုံးနေထိုင်ပြီး ဘုရားကုန်းတော်၏ မြောက်ဘက်ခြမ်းကို ရှင်းလင်းရာမှ မူလ စေတီတော်၏ မြောက်ဘက်မုခ်ကို တွေ့ရှိခဲ့ကြောင်း၊ ၁၉၉၄ ခုနှစ်တွင် ဆရာတော်၏ ဦးဆောင်မှုဖြင့် ဒေသခံရွာသားများက ဆက်လက်ရှင်းလင်းရာ မူလစေတီတော် ပန္နက်၊ ပစ္စယာ၊ လှေကားခုံတို့ကို ထပ်မံတွေ့ရှိခဲ့သဖြင့် ပြုပြင်ခွင့်ကို ယဉ်ကျေးမှုဝန်ကြီးဌာနသို့ တောင်းခံခဲ့ရာ ၂ဝဝ၈ ခုနှစ်တွင် ယဉ်ကျေးမှုဝန်ကြီးဌာနက ရှေးမူမပျက် ပြန်လည်ပြင်ဆင် ခွင့်ပြုခဲ့ကြောင်း၊ ၂ဝဝ၉ ခုနှစ်တွင် အင်္ဂတေပန်းတော့ အနုစိတ် လက်ရာများဖြင့် တန်ဆာ ဆင်ထားသော မြောက်ဘက်မျက်နှာလှည့် နှစ်ထပ် စေတီတော်ကြီး ထပ်မံပေါ်ထွက်ခဲ့ ကြောင်း၊ စေတီတော်ကြီး၏ အတွင်းအပြင်တွင် ပုဂံခေတ် အင်္ဂတေပန်းတော့ ရုပ်ကြွ လက်ရာဒီဇိုင်းများ၊ နံရံဆေးရေးပန်းချီများ၊ ဇာတ်တော်နံပါတ်စဉ်များနှင့် ဇာတ်တော် အမည် ရေးထိုးထားသော ငါးရာ့ငါးဆယ် သရုပ်ဖော် ဖောင်းကြွရုပ်ပုံများ၊ ရုပ်ပွားတော်များနှင့် စေတီတော် လေးမျက်နှာရှိ မုခ်ဦးတံကဲကနုက်ပန်းများ ထွက်ပေါ်လာကြောင်း ၊ တမုတ် ရွှေဂူကြီးဘုရားသည် ပုဂံခေတ်၊ ပင်းယခေတ် ဗိသုကာလက်ရာများ ရှေးမူလက်ရာမပျက် ကျန်ရှိနေခြင်းကြောင့် တန်ဖိုးမြင့် မားသောစေတီတော်ကြီး တစ်ဆူဖြစ်ကြောင်း သိရသည်။
No comments:
Post a Comment