ဖူဆယ်အားကစားကို ပရိသတ်စိတ်ဝင်စားမှုများပြားလာပြီဟုဆို

မြန်မာနိုင်ငံတွင် ဖူဆယ်အားကစားကို စိတ်ဝင်စားသည့် ပရိသတ်များပြားလာပြီဖြစ်ကြောင်း မြန်မာနိုင်ငံဘောလုံးအဖွဲ့ချုပ်၊ သဲသောင်ပြင်နှင့် ဖူဆယ်ကော်မတီဥက္ကဋ္ဌ ဦးကြည်မင်းသိန်းက ပြောသည်။ မြန်မာနိုင်ငံဘောလုံးအဖွဲ့ချုပ်အစည်းအဝေးခန်းမတွင် ဇွန်လ(၂၄)ရက်ကကျင်းပသည့် MFF Futsal WarrixCup ပြိုင်ပွဲစပွန်ဆာစာချုပ် ချုပ်ဆိုခြင်းအခမ်းအနားတွင် အထက်ပါအတိ်ုင်းပြောခြင်း ဖြစ်သည်။

“ ဖူဆယ်အားကစားကအရင်ကနဲ့မတူတော့ပါဘူး။ ကျွန်တော်တို့ရဲ့ လက်ရွေးစင်အသင်းကရော၊ ကလပ်အသင်းကပါ နိုင်ငံတကာပြိုင်ပွဲတွေမှာအောင်မြင်မှုတွေကဆက်တိုက်ရလာတဲ့အခါကျတော့ ပရိသတ်တွေကလည်းကစားသမားတွေကိုစောင့်ကြည့်လာကြတယ်။ လွန်ခဲ့တဲ့(၁၀)နှစ်ကထက်စာရင် အများကြီးသိသာလာပါတယ်။ အရင်တုန်းကစလုပ်ခါစဆိုတော့ အသင်းတွေကလည်း အုပ်စုပြုတ်တာက များတယ်လေ။

အခု MIU အသင်းဆိုရင် အာဆီယံဖူဆယ်ကလပ်ပြိုင်ပွဲမှာဆို တတိယ(၄)ကြိမ်ရှိပြီ။ လက်ရွေးစင်အသင်းဆိုရင်လည်းအာရှဖူဆယ်ပြိုင်ပွဲမှာအသန့်ရှင်းဆုံးဆုကိုတောင် ရရှိခဲ့ပါတယ်။ ဒါ့ကြောင့်လွန်ခဲ့တဲ့(၁၀)နှစ်ကထက်စာရင် ပရိသတ်စိတ်ဝင်စားမှုပိုပြီးများလာပါပြီ” ဟု မြန်မာနိုင်ငံ ဘောလုံးအဖွဲ့ချုပ်၊ သဲသောင်ပြင်နှင့် ဖူဆယ်ကော်မတီဥက္ကဋ္ဌ ဦးကြည်မင်းသိန်းက ပြောသည်။

ထို့အပြင် အလွတ်တန်းပြိုင်ပွဲများကျင်းပပေးနေပြီး ယင်းပြိုင်ပွဲမှ ကစားသမားများကို တရားဝင် ကလပ်အသင်းများနှင့် ချိတ်ဆက်ပြီး မြန်မာ့လက်ရွေးစင်ကစားသမားများဖြစ်သည်အထိ လုပ်ဆောင်ပေးသွားရန်ရှိကြောင်းလည်း သိရသည်။

မန္တလေးမြို့တွင် လာမည့်ဇွန်လ(၂၉)ရက်၌ MFF Futsal Warrix Cupအလွတ်တန်းပြိုင်ပွဲကျင်းပသွားမည်ဖြစ်ပြီး ယင်းပြိုင်ပွဲကို နိုင်ငံအနှံ့မှ အသင်းပေါင်း(၄၀)ကျော်မှယှဉ်ပြိုင်ရန် စာရင်းပေးသွင်းထားကြောင်း သိရသည်။

မြန်မာနိုင်ငံတွင် ဖူဆယ်အားကစားကို ပြီးခဲ့သည့် ၂၀၀၂ ခုနှစ်တွင် စတင်ခဲ့ခြင်းဖြစ်ပြီး ပြည်နယ်နှင့်တိုင်းများအလိုက် ပြိုင်ပွဲများစတင်ကျင်းခဲ့ခြင်းလည်း ဖြစ်သည်။