တာချီလိတ်တွင် မူးယစ်ဆေးဝါးနှင့်လက်နက်မှုများဖြင့် အလိုရှိနေသူ၏ နေအိမ်မှ ကျွန်းသစ်ခွဲသားမျိုးစုံ (၉)တန်ကျော် သိမ်းဆည်းရမိ

ရှမ်းပြည်နယ်အရှေ့ပိုင်း၊ တာချီလိတ်မြို့တွင် မူးယစ်ဆေး၊လက်နက်ခဲယမ်းများဖမ်းမိသည့်နေအိမ်မှ ကျွန်းသစ်ခွဲသားမျိုးစုံ (၉)တန်ကျော်ကို သိမ်းဆည်းရမိသဖြင့် သစ်တောဦးစီးဌာနက သစ်များကိုသိမ်းဆည်းပြီး ဥပဒေအရ အရေးယူနိုင်ရန် ဆောင်ရွက်နေကြောင်း သိရသည်။ တာချီလိတ်မြို့ ဆေခမ်းရပ်ကွက်မှ ညီညီနိုင်(ခ)ပီနိုင်၏ နေအိမ်အား ၂၀၁၉ ခုနှစ်၊ ဇွန်လ (၂၃)ရက်နေ့က ဝင်ရောက် ဖမ်းဆီးမှုအတွင်း နေအိမ်ဂိုဒေါင်အတွင်းသစ်များတွေ့ရသဖြင့် သစ်တောဦးစီးဌာနက ဇွန်လ (၂၄)ရက်နေ့တွင် သွားရောက်စစ်ဆေးရာ ကျွန်းသစ်ခွဲသားမျိုးစုံ (၂၂၃)ချောင်း (၉.၄၀၆၄)တန်ကို ဖမ်းဆီးရမိခြင်းဖြစ်ကြောင်း သိရသည်။ အဆိုပါသစ်များကို သစ်တောဦးစီးဌာနက သိမ်းဆည်းလိုက်ပြီး ထွက်ပြေးတိမ်းရှောင်နေသည့် ညီညီနိုင်(ခ) ပီနိုင်အား သစ်တောဥပဒေအရ အရေးယူရန်ပြင်ဆင်နေကြောင်း သိရသည်။