ကနေဒါ လေကြောင်းလိုင်းလေယာဉ်တစ်စင်းနဲ့ လိုက်ပါခဲ့တဲ့ ခရီးသည်အမျိုးသမီးတစ်ဦးဟာ တိုရွန်တိုလေဆိပ်မှာ လေယာဉ်ဆင်းသက်ပြီး ခရီးသည်တွေအားလုံး ဆင်းသွားခဲ့ချိန်ထိ အိပ်ပျော်နေခဲ့ကာ လေယာဉ်ပေါ်တစ်ယောက်တည်းကျန်ခဲ့ရင်း ညသန်းခေါင်အချိန် မှောင်မှောင်မည်းမည်းအတွင်း အိပ်ပျော်ရာက နိုးလာခဲ့ကြောင်း သိရပါတယ်။ ယင်းဖြစ်ရပ် ဖြစ်ခဲ့ကြောင်း ကနေဒါလေကြောင်းလိုင်းက အတည်ပြုပြောဆိုခဲ့ကာ ဖြစ်စဉ်ကို စုံစမ်းစစ်ဆေးနေတယ်လို့  ဆိုခဲ့ပါတယ်။
ကျန်ရစ်ခဲ့တဲ့ ခရီးသည်ဖြစ်သူ တစ်ဖနီ အဒမ်စ် က ဖေ့စ်ဘုတ်မှာ ပို့ စ်တစ်ခုတင်ခဲ့ရာမှာ သူဟာ ကွီဘက်ကနေ တိုရွန်တိုမြို့ ကို ပျံသန်းခဲ့တဲ့ လေယာဉ်ပေါ် လိုက်ပါခဲ့ကာ လမ်းတ၀က်အရောက် မိနစ် ၉၀ ကြာ ခရီးတစ်လျှောက်လုံး အိပ်ပျော်သွားခဲ့ကြောင်း ဆိုခဲ့ပါတယ်။ လေယာဉ်ဆင်းပြီး နာရီအနည်းငယ်အကြာ ညသန်းခေါင် ၀န်းကျင်လောက်မှာ သူနိုးလာခဲ့ကာ မှောင်အတိထဲမှာ ထိုင်ခုံပေါ် ခါးပတ်ပတ်လျက်ရှိနေသေးပြီး အေးစိမ့်နေခဲ့တယ်လို့ မစ္စ အဒမ်စ် က ပြောဆိုခဲ့ပါတယ်။
သူ လေယာဉ်ပေါ်မှာ ဖြစ်ပျက်နေတဲ့ အခြေအနေကို သူငယ်ချင်းဖြစ်သူ နိုလ်ဒဲလ်ကို အကြောင်းကြား နိုင်ခဲ့ပြီးနောက် ဖုန်းအားကုန်သွားခဲ့တယ်လို့  မစ္စအဒမ်စ်က ပြောပါတယ်။ လေယာဉ်ပေါ်မှာလည်း လျှပ်စစ်မီး မရှိတော့တာကြောင့် သူ့ ဖုန်းကို အားသွင်းလို့ မရခဲ့ပါဘူး။ အိပ်မက်ဆိုးတစ်ခုအတွင်း ရောက်သလိုဖြစ်နေခဲ့ကာ အသက် မှန်မှန်ရှုရင်း ကြောက်စိတ်ကို ထိန်းခဲ့ရတယ်လို့  မစ္စအဒမ်စ်က ဖွင့်ဟခဲ့ပါတယ်။ ယင်းနောက် လေယာဉ်မောင်းခန်းထဲကတွေ့ တဲ့ ဓါတ်မီးတစ်လက်နဲ့  လေယာဉ်ပြတင်းအပြင်ကို အကူအညီတောင်းတဲ့ အချက်ပြခဲ့ပါတယ်။
နောက်ဆုံးမှာတော့ မစ္စအဒမ်စ်ကို ခရီးဆောင်အိတ်ဌာနမှ ၀န်ထမ်းတစ်ဦးက တွေ့ ရှိခဲ့ကာ လေယာဉ် တံခါးကို ဖွင့်ပေးခဲ့ကြောင်း သိရပါတယ်။
၎င်းက အံ့အားသင့်နေခဲ့ကာ လေယာဉ်ပေါ် မိမိကို ဘယ်လိုဖြစ်ပြီး တစ်ယောက်တည်း ထားရစ်ခဲ့ကြတာလည်းလို့  ရေရွတ်နေခဲ့ကြောင်း သူက ပြန်ပြောင်းပြောပြခဲ့ပါတယ်။ လေကြောင်းလိုင်းက သူ့ကို ဇိမ်ခံကားပေါ်တင်ပြီး ဟိုတယ်မှာတည်းခိုဖို့ ကမ်းလှမ်းခဲ့ပေမယ့် ငြင်းပယ်ခဲ့ကာ အိမ်ပဲ ပြန်မယ်လို့  ပြောခဲ့ပါတယ်။
အခုဖြစ်စဉ်နဲ့ ပတ်သက်လို့  မိမိတို့ တွေ ပြန်လည်စစ်ဆေးမှုလုပ်နေတာကြောင့် အသေးစိတ် ထုတ်ပြန်ဖို့ မရှိသေးပါကြောင်း၊ ခရီးသည်ကို ဆက်သွယ်ကာ မေးမြန်းစုံစမ်းမှုတွေလုပ်နေကြောင်း လေကြောင်းလိုင်းက ပြောဆိုခဲ့ပါတယ်။
No comments:
Post a Comment