တပ်မတော်(ရေ)မှ စစ်ရေယာဉ်(ကျန်စစ်သား)နှင့် စစ်ရေယာဉ်(ဆင်ဖြူရှင်)တို့ ပြန်လည်ရောက်ရှိ

စင်ကာပူနိုင်ငံတွင် မေလ ၁၃ ရက်နေ့မှ ၁၆ ရက်နေ့အထိ ကျင်းပပြုလုပ် ခဲ့သည့် နိုင်ငံတကာ ပင်လယ်ရေကြောင်းဆိုင်ရာ ကာကွယ်ရေးပစ္စည်းများပြပွဲ (International Maritime Defence Exhibition and Conference Asia 2019 - IMDEX Asia 2019 )၊ (၆)ကြိမ်မြောက် နိုင်ငံတကာရေကြောင်းလုံခြုံရေးကွန်ဖရင့် (6th International Maritime Security Conference - 6th IMSC) နှင့် စင်ကာပူရေတပ်ဖွဲ့ သတင်းအချက်အလက်ပေါင်းစပ်ညှိနှိုင်းရေးဌာန၏ (၁၀)နှစ်ပြည့် အထိမ်းအမှတ်အခမ်း အနား (10th Anniversary of Information Fusion Center - IFC 10th Anniversary) များသို့ တက်ရောက်ခဲ့သော တပ်မတော်(ရေ)မှ စစ်ရေယာဉ် (ကျန်စစ်သား)နှင့် စစ်ရေယာဉ်(ဆင်ဖြူရှင်)တို့သည် ယနေ့ နေ့လယ်ပိုင်းတွင် ရန်ကုန်မြို့ရှိ အမှတ်(၃)ရေတပ်ဆိပ်ခံတံတားသို့ ပြန်လည်ရောက်ရှိရာ တပ်မတော်(ရေ)မှ အရာရှိ၊ စစ်သည်၊ မိသားစုများက ကြိုဆိုနှုတ်ဆက်ကြသည်။

အဆိုပါအခမ်းအနားများသို့ တက်ရောက်ရန်အတွက် စစ်ရေယာဉ်(ကျန်စစ်သား) သည် မေလ ၇ ရက်နေ့တွင် ရန်ကုန်မြို့မှ စင်ကာပူနိုင်ငံသို့ ထွက်ခွာခဲ့ခြင်းဖြစ်ပြီး စစ်ရေယာဉ်(ဆင်ဖြူရှင်)သည် တရုတ်ပြည်သူ့သမ္မတနိုင်ငံ၊ ရှန်တုန်းပြည်နယ်၊ ချင်းတောင် မြို့တွင် ကျင်းပပြုလုပ်သည့် တရုတ်ပြည်သူ့လွတ်မြောက်ရေးတပ်မတော် ရေတပ်နှစ်(၇၀)ပြည့် အခမ်းအနားနှင့် China-Southeast Asia Maritime Exercise 2019 တို့သို့ ပါဝင်တက်ရောက်ခဲ့ပြီး အပြန်ခရီးစဉ်၌ စင်ကာပူနိုင်ငံသို့ ဝင်ရောက်၍ စစ်ရေယာဉ် (ကျန်စစ်သား)နှင့်အတူ ပူးပေါင်းပါဝင်တက်ရောက်ခဲ့ခြင်းဖြစ်သည်။
စင်ကာပူနိုင်ငံတွင် ကျင်းပပြုလုပ်သည့် အဆိုပါအခမ်းအနားများသို့ နိုင်ငံပေါင်း ၃၇ နိုင်ငံမှ ရေတပ်ဦးစီးချုပ်များနှင့် ကိုယ်စားလှယ်အရာရှိကြီးများ၊ ကမ်းခြေစောင့် တပ်ဖွဲ့နှင့် ရေကြောင်းဆိုင်ရာအေဂျင်စီများမှ ကိုယ်စားလှယ်အရာရှိကြီးများ တက်ရောက် ခဲ့ကြပြီး နိုင်ငံ ၁၄ နိုင်ငံမှ စစ်ရေယာဉ် ၂၁ စီး စေလွှတ်ပါဝင်ခဲ့ကြသည်။
စစ်ရေယာဉ်(ကျန်စစ်သား) ၏ ယခုသွားရောက်ခဲ့သော ရန်ကုန်-စင်ကာပူ- ရန်ကုန် ခရီးစဉ်သည် စုစုပေါင်းရေမိုင် ၂၅၀၀ ကျော် ဖြစ်ပြီး စစ်ရေယာဉ်(ဆင်ဖြူရှင်)၏ ရန်ကုန်-ချင်းတောင်-စင်ကာပူ-ရန်ကုန် ခရီးစဉ်သည် စုစုပေါင်း ရေမိုင် ၇၈၀၀ ကျော် ဖြစ်ကြောင်း သတင်းရရှိပါသည်။