ဖုန်းနဲ့ ဆက်စပ်ပစ္စည်း ၀ယ်သူတွေကို ကုန်သွယ်ခွန် ၅ ရာခိုင်နှုန်း လာမယ့် ဇွန်လ ၁ ရက်နေ့ စတင်ကောက်ခံမှာဖြစ်ပြီး စာသုံးသူတွေအား အခွန်တံဆိပ်မကပ်ပေးတဲ့ အရောင်းဆိုင်တွေတွေ့ရှိပါက တိုင်ကြားနိုင်ပြီး တိုင်ကြားသူကို ဆုငွေချေးမြှင့်သွားမယ်လို့ မွန်ပြည်နယ် ပြည်တွင်းအခွန်းများဦးစီးဌာနက ပြောပါတယ်။ လက်ရှိမှာ မွန်ပြည်နယ် ၁၀ မြို့နယ်လုံးက သက်ဆိုင်ရာမြို့နယ် အခွန်ဦးစီးမှူးတွေကနေ တဆင့် ဖုန်းနဲ့ ဆက်စပ်ပစ္စည်းအရောင်းဆိုင်တွေကို အခွန်အမှတ်တံဆိပ်နဲ့ ပတ်သက်ပြီး အသိပညာပေးပြီးဖြစ်တယ်လို့ ဆိုပါတယ်။
လာရောက်ဝယ်သူတွေကို အခွန်အမှတ်တံဆိပ် မကပ်ပေးပါက ပထမအကြိမ် သတိပေးခံရပါက ဒဏ်ငွေ ကျပ် ၂ သိန်း၊ ဒုတိယအကြိမ် ကျပ် ၅ သိန်း၊ တတိယအကြိမ် ကျပ် ၇ သိန်း နဲ့ စတုတ္ထအကြိမ် ကျပ် ၁၀ သိန်းအထိ သတ်မှတ်ထားတယ်လို့ မွန်ပြည်နယ် ပြည်တွင်းအခွန်းများဦးစီးဌာနမှ ညွှန်ကြားရေးမှူး ဦးကျော်သိန်းက ပြောပါတယ်။
“စားသောက်ဆိုင်လုပ်ငန်းတွေနဲ့ သဘာဝချင်းတူတူပါပဲ။ ပြေစာမကပ်ဘူးဆိုရင် ကျနော်တို့ဆီ သတင်းပို့တင်ပြရင် အဲဒီဆိုင်ကိုဒဏ်ရိုက်မယ်။ ဒဏ်ရိုက်လို့ရတဲ့ငွေ ၁၀ ရာခိုင်နှုန်း လာတင်ပြတဲ့သူကို ဆုကြေးအဖြစ် ပြန်ထုတ်ပေးမယ်။ ဥပမာ ၁၀ သိန်း ဒဏ်ရိုက်ရင် လာတိုင်သူက ၁ သိန်းရမယ်။ ဒါပေမယ့် လာတိုင်တဲ့သူကိုတော့ လျှို့ဝှက်ထားပေးမယ်။”
လာရောက်တိုင်ကြားသူတွေအနေနဲ့ အရောင်းဆိုင်တွေပြေစာ ကပ်ထားခြင်းမရှိကြောင်း ပြေစာတင်ပြဖို့ လိုအပ်ပြီး သက်ဆိုင်ရာမြို့နယ်အခွန်ရုံးမှာ အမည်၊ မှတ်ပုံတင်အမှတ်၊ ဖုန်းနံပါတ်နဲ့ ဆက်သွယ်ဖို့ လိပ်စာတို့ကို ပေးပို့တိုင်ကြားနိုင်ပြီး တိုင်ကြားသူရဲ့ကိုယ်ရေးအချက်အလက်တွေ လျှို့ဝှက်ထားပေးမှာဖြစ်ပါတယ်။
မိုဘိုင်းဟန်းဆက်အပါအ၀င် Ear Phone နားကြပ်တွေ၊ ဖုန်းကာဗာတွေ၊ ဖုန်းမှန် Sticker တွေ စတဲ့ ဆက်စပ်ပစ္စည်းတွေ ၀ယ်ယူသူတွေဆီက ကုန်သွယ်လုပ်ငန်းခွန် ၅ ရာခိုင်နှုန်းကောက်ခံသွားမှာဖြစ်ပြီး ဥပမာအားဖြင့် ၁ သိန်းတန် မိုဘိုင်းဟန်းဆက်ဝယ်ယူပါက ကုန်သွယ်ခွန် ၅၀၀၀ ကျပ် ပေးသွင်းရမယ်လို့ ပြည်တွင်းအခွန်များရုံးမှ သိရပါတယ်။
အဲဒီလိုကုန်သွယ်ခွန် ကောက်ခံရပါက ပစ္စည်းတခုရဲ့ မူလတန်ဖိုးထက် အနည်းငယ်ပိုပြီး ဈေးမြှင့်ရောင်းချမှ အဆင်ပြေနိုင်မယ်လို့ မိုဘိုင်းဖုန်းနဲ့ ဆက်စပ်ပစ္စည်းအရောင်းဆိုင် ပိုင်ရှင်တွေက ပြောပါတယ်။
“ကုန်သွယ်ခွန်ဖိုးနဲ့ ပစ္စည်းတန်ဖိုးပေါင်းပြီးတော့ Customer တွေက ပေးရမှာပေါ့။ နည်းနည်းပါးပါးဆိုလည်း ဆိုင်ကစိုက်နိုင်ရင် စိုက်ပေ့ါ။ ရောင်းအားပေါ်မူတည်ပြီးတော့ တံဆိပ်ခေါင်းတွေ ၀ယ်ရတယ်” လို့ မြို့မဂုဏ် မိုဘိုင်းဖုန်း အပိုပစ္စည်းအရောင်းဆိုင်က ဒေါ်စန်းစန်းမြင့်က ပြောပါတယ်။
မိုဘိုင်းဖုန်းသုံးစွဲသူတဦးဖြစ်တဲ့ မုဒုံမြို့နယ်မှ ကိုသော်ဇင်ချမ်းက “ပြည်သူတွေထဲက ကုန်သွယ်ခွန် ကောက်တာတွေက ကိုယ့်နိုင်ငံအတွက်ပဲဆိုတာ နားလည်ပါတယ်။ အခွန်အကောက်ဆိုတာလည်း နိုင်ငံတိုင်းမှာရှိနေတာပဲလေ။ ကိုယ့်နိုင်ငံအတွက် ပေးရတာဆိုတော့ ဘာမှမပြောလိုပါဘူး။ ဒါပေမယ့် ဖုန်းအပိုပစ္စည်းတွေ ၀ယ်ယူနေတဲ့သူတွေက ဒီဘက်ခေတ်မှာ အခြေခံ လူတန်းစားတွေ များတယ်။တကယ်တမ်းအခွန်အခတွေ ရသင့်တဲ့ နေရာတွေမှာ အခွန်တွေဆုံးရှုံးနေတာတွေ အများကြီးရှိတယ်။ ကျောက်မိုင်းတို့၊ စည်ပင်နဲ့ ပတ်သက်တဲ့ အခွန်တို့ အများကြီးပါ။ အဲဒီလို အရေးကြီးတဲ့ အခွန်အကောက်တွေကို ထိထိရောက်ရောက်အရင် လုပ်ပြီးမှ အခုဟာကို လုပ်သင့်တယ်” လို့ ပြောပါတယ်။
အဲဒီလို ကုန်သွယ်ခွန်ကောက်ခံဖို့ မြန်မာတနိုင်ငံလုံး အတိုင်းအတာအနေနဲ့ ၂၀၁၉ ခုနှစ် သင်္ကြန်မတိုင်ကတည်းက ညွှန်ကြားထားတာဖြစ်ပြီး လက်ရှိမေလအတွင်းမှာ အရောင်းဆိုင်တွေအတွက် အခွန်အမှတ်တံဆိပ်ပမာဏကို နေပြည်တော်က မှာယူနေပြီး ဇွန်လ ၁ ရက် စတင်အကောင်အထည်ဖော်မယ်လို့ မွန်ပြည်နယ် ပြည်တွင်းအခွန်များဦးစီးဌာနမှ သိရပါတယ်။
No comments:
Post a Comment