လက်ရှိတွင် ဆန်ကွဲတစ်တင်းခွဲတစ်အိတ်လျှင် ယခင်နှစ်ကာလတူထက် ဈေးနှုန်းကျပ် ၃၀၀၀ ဝန်းကျင် ကျဆင်းသွားကြောင်း ဘုရင့်နောင်ဆန်စပါးကုန်စည်ဒိုင်မှ သိရသည်။ ယခင်နှစ်၌ ပင်လယ်လမ်းကြောင်းအပြင် နယ်စပ်ကုန်သွယ်ရေးလမ်းကြောင်းမှ တရုတ်နိုင်ငံသို့ ဆန်ကွဲတင်ပို့မှု အားကောင်းခဲ့သဖြင့် တစ်တင်းခွဲပါ ဆန်ကွဲတစ်အိတ်လျှင် ကျပ် ၁၈၅၀၀ ဝန်းကျင်အထိ ဈေးနှုန်း မြင့်တက်ခဲ့သော်လည်း လက်ရှိမေလကုန်ပိုင်းတွင် ဆန်ကွဲတစ်တင်းခွဲပါ တစ်အိတ်လျှင် ကျပ် ၁၅၀၀၀ ဝန်းကျင်သာရရှိကြောင်းသိရသည်။
“ဆန်ကွဲဈေးလည်းကျသွားတာပဲ။ ဆန်ကွဲဈေးကအခုဆန်ကွဲဈေးကကျပ် ၁၅၀၀၀ တစ်ပတ်လည်ပဲ ရှိတော့တယ်။ 234 အမျိုးအစားဆိုရင် ကျပ် ၁၄၂၀၀ ၊ ၁၄၃၀၀ တစ်ပတ်လည်ပဲရှိတော့တယ်။ မနှစ်ကနဲ့ဆိုရင် အများကြီးကွာတယ်။ တစ်အိတ်ကိုကျပ် ၃၀၀၀ လောက်ကွာသွားတယ်။ သင်္ကြန်မတိုင်ခင်က ၁၈၀၀၀ ပတ်လည်ရှိတယ်။ သင်္ကြန်ပြီးနောက်ပိုင်းအခုဈေးပိုကျသွားတာ”ဘုရင့်နောင် ဆန်စပါးကုန်စည်ဒိုင်မှ အထွေထွေအတွင်းရေးမှူး ဦးသန်းဦးက အကုန်သိသတင်းဌာနသို့ ပြောသည်။
ဆန်နည်းတူဆန်ကွဲကိုပါ ပြည်ပသို့ တင်ပို့ရောင်းချကြသော်လည်းလက်ရှိတွင် ပင်လယ်လမ်းကြောင်း တစ်ခုတည်းမှသာ တင်ပို့နေခြင်း၊ ဈေးကွက်အတွင်းဆန်ကွဲကုန်ကြမ်းဝင်ရောက်မှုများနေခြင်း၊ ယင်းအပြင် ပြည်တွင်းပြောင်းဈေးနှုန်းများဆန်ကွဲဈေးနှုန်းထက် ကျဆင်းနေ၍ ဆန်ကွဲအစားပြောင်းကို အစားထိုးအသုံးပြုလာခြင်းတို့ကြောင့် ဈေးနှုန်းကျဆင်းနေခြင်းဖြစ်ကြောင်း သိရသည်။
“ဆန်ကွဲကလည်း ပြည်ပလည်းတင်ပို့တယ်။ ပြည်တွင်းမှာလည်းသုံးတယ်။ မွေးမြူရေးအစာနဲ့ အရက်ချက် စက်ရုံကိုသွားတာ။ဒီနှစ်ကပြောင်းအရမ်းထွက်တယ်။ ပြောင်းကတရုတ်မသွားတော့ ပြည်တွင်းမှာ တစ်ပိဿာကိုကျပ် ၄၂၀ ပတ်ချာလည်ပဲရှိတယ်။ ဆန်ကွဲဈေးရဲ့ အောက်ကိုတောင်ရောက်နေပြီ။ အရက်ချက် စက်ရုံတို့၊ မွေးမြူရေးအစာအတွက်ကပြောင်းနဲ့ ဆန်ကွဲဘယ်ဟာသုံးသုံးရတယ်။ အဲဒီအတွက် သူတို့က ဆန်ကွဲကို ပြည်ပတင်ပို့တဲ့သူဆီကဝင်မလုဘူး။ပြောင်းဈေးကအရမ်းသက်သာတော့ ပြောင်းသုံးလို့ရတယ်လေ” ဟု ဦးသန်းဦးကဆက်ပြောသည်။
မြန်မာနိုင်ငံမှ ဆန်ကွဲကို ဘယ်ဂျီယံနိုင်ငံ၊ အင်ဒိုနီးရှားနိုင်ငံ၊ တရုတ်နိုင်ငံ၊ အမေရိကန်နိုင်ငံနှင့် ပိုလန်နိုင်ငံတို့သို့ အများဆုံးတင်ပို့နေကြောင်း သိရသည်။
၂၀၁၈ ခုနှစ်၊ အောက်တိုဘာလ ၁ ရက်မှ ၂၀၁၉ ခုနှစ် ဧပြီလ ၂၆ ရက်အထိ နိုင်ငံပေါင်း ၂၆ နိုင်ငံသို့ ဆန်ကွဲတန်ချိန်ပေါင်း (မတ်ထရစ်) ၂၅၁၂၈၈ တန်တင်ပို့ထားခဲ့ပြီး ပို့ကုန်ဝင်ငွေ အမေရိကန်ဒေါ်လာ ၄၁ ၂ သန်း ရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှကိန်းဂဏန်းများအရ သိရသည်။
No comments:
Post a Comment