အိန္ဒိယနိုင်ငံ ဘီဟားပြည်နယ်တွင် ကလေးငယ် ၃၁ ဦးထက်မနည်းဟာ သဘာဝအလျောက် အဆိပ်အတောက်ဖြစ်နေတဲ့ လိုင်ချီးသီးတွေကို စားမိရာမှ သေဆုံးခဲ့ရကြောင်း ဇွန် ၁၃ ရက်နေ့မှာ သတင်းရရှိပါတယ်။ အဆိုပါကလေးငယ်အားလုံးမှာ ဦးနှောက်အမြှေးရောင်ရောဂါ လက္ခဏာတွေကို တွေ့ခဲ့ရပြီး အများစုဟာလည်း သွေးတွင်းသကြားဓာတ် ရုတ်ချည်းကျဆင်းသွားခဲ့ကြောင်း၊ ၁၀ ရက်အတွင်း ၃၁ ဦးထက်မနည်း သေဆုံးခဲ့ရကြောင်း ကျန်းမာရေးတာဝန်ရှိသူတွေက ပြောကြားခဲ့ပါတယ်။
၎င်းတို့နဲ့ ရောဂါလက္ခဏာတူတဲ့ အခြားကလေးငယ် ၄၀ ဦးထက်မနည်းကိုလည်း အတွင်းလူနာအဖြစ် ကုသပေးနေရကြောင်း သိရပါတယ်။
နေ့အပူချိန် ၄၀ ဒီဂရီဆဲစီးယပ်ကျော်လာလေ့ရှိပြီး လိုင်ချီးသီး ပေါများတဲ့ နွေရာသီတိုင်းမှာ မူဇက်ဖာပူနဲ့အနီးတစ်ဝိုက်ရှိ ခရိုင်များတွင် ထိုသို့ ဖြစ်ပျက်၊ သေဆုံးကြလေ့ရှိပါတယ်။ ၁၉၉၅ ခုနှစ်ကတည်းက ထိုသို့ နှစ်စဉ်ဖြစ်ပွားလာခဲ့ရာ ၂၀၁၄ ခုနှစ်မှာဆိုလျှင် လူ ၁၅၀ ဦးအထိ သေဆုံးခဲ့ရပါတယ်။
၂၀၁၅ ခုနှစ်မှာတော့ အမေရိကန်သုတေသီတွေဟာ ထိုဒေသထွက် လိုင်ချီးသီးတွေမှာ ပါဝင်တဲ့ သဘာဝအဆိပ်ဓာတ်တစ်မျိုးနဲ့ ၄င်းဦးနှောက်အမြှေးရောင်ရောဂါလက္ခဏာတို့ ဆက်စပ်နေကြောင်းကို စတင်တွေ့ရှိခဲ့ပါတယ်။
၎င်းအဆိပ်ဟာ သွေးတွင်းသကြားဓာတ်ကို ကျဆင်းစေကြောင်း၊ မရင့်မှည့်သေးတဲ့ လိုင်ချီးသီးတွေမှာ အာနိသင်ပိုပြင်းကြောင်း၊ ကလေးငယ်တွေမှာ အစာမခံပဲ စားမိပါက သေစေနိုင်သည်အထိ ပြင်းထန်နိုင်ကြောင်းမျှသာ တွေ့ရှိထားသေးပြီး ဆက်လက်သုတေသနပြုဖို့ လိုနေပါသေးတယ်။
ဘင်္ဂလားဒေ့ရ်ှနဲ့ဗီယက်နမ်တို့မှာလည်း လိုင်ချီးသီးရာသီရောက်လျှင် စိုက်ပျိုးရာဒေသတွေမှာ ထိုသို့သော ဦးနှောက်နဲ့အာရုံကြော ရောဂါလက္ခဏာများဖြင့် သေဆုံးရမှုတွေ ဖြစ်ပွားလေ့ရှိကြောင်း သိရပါတယ်။
No comments:
Post a Comment