ရောဂါဝေဒနာတွေ ပျောက်ကင်း သက်သာတယ်ဆိုတဲ့ အစွမ်းထက် power card ဆိုတာတွေကို ထိုင်းနိုင်ငံမြောက်ပိုင်း ဒေသတွေက ဒေသခံတွေအား တစ်ကတ်ကို ဘတ် ၁၅၀၀ နဲ့  ရောင်းချနေကြောင်း ဘန်ကောက်ပို့ စ်သတင်းတစ်ပုဒ်မှာ ဖော်ပြပါတယ်။ ဒီကတ်တွေကို နာကျင်မှုဝေဒနာခံစားရတဲ့ နေရာပေါ် တင်ထားလိုက်မယ်ဆိုရင် နာကျင်တာတွေ ပျောက်ကင်းမှာ ဖြစ်ကြောင်း ကတ်ရောင်းသူတွေက ပြောဆိုစည်းရုံး ရောင်းချကြပါတယ်။ ဒါ့အပြင် အခြား ဖျားနာမှုဝေဒနာတွေအတွက် သောက်ရေထဲကို ကတ်နဲ့ မွှေပြီး သောက်ခြင်း ဒါမှမဟုတ် ကတ်ပေါ်မှာ ရေခွက်တင်ပြီးမှ သောက်ခြင်းလုပ်ရင် သက်သာပျောက်ကင်းနိုင်တယ်လို့  ကတ်ရောင်းသူတွေက ဆိုပါတယ်။ အယုံအကြည်ရှိသူတွေကတော့ ယင်းကတ်တွေကို ဘတ် ၁၁၀၀ ကနေ ၁၅၀၀ ကြားပေးပြီး ၀ယ်ယူနေကြတယ် လို့  သိရပါတယ်။ဥဘောလ်ရတနာဆေးရုံမှ ဆေးရောင်းသူ ပီတွန်ချမ်ဝမ်ဝါပီနဲ့  ဥဘော်ရတနာခရိုင်မှ ကျန်းမာရေး အရာရှိတွေဟာ ဗုဒ္ဓဟူးနေ့ က Srisuk Samran မြို့ ဘန်ဆလာဒင်ကျေးရွာကို သွားရောက်ကာ ATM ကတ်အရွယ်ရှိတဲ့ ယင်း power ကတ်ဆိုတာတွေကို စစ်ဆေးခဲ့ကြပါတယ်။ မိမိတို့ အမြင်အရတော့ ဖျားနာတာတွေ ဒါမှမဟုတ် နာကျင်ဝေဒနာတွေ သက်သာပျောက်ကင်းတဲ့ အစွမ်းရှိတယ်လို့  မထင်ကြောင်း၊ ကတ်တွေထုတ်တဲ့ မူရင်းနေရာ၊ ကတ်နဲ့ ပတ်သက်တဲ့ အချက်အလက်တွေ ဒါမှမဟုတ် ဒါတွေကို ရောင်းချသူ ဘယ်သူဆိုတာ ဖော်ပြထားခြင်းမရှိကြောင်း၊ ကတ်တွေကို အွန်လိုင်းကနေ တိုက်ရိုက်ရောင်းချပုံရကြောင်း မစ္စတာ ပီတွန်က ပြောဆိုခဲ့ပါတယ်။
ခွန်ခန်တိရိစ္ဆာန်ရုံမှာ ကတ်ရောင်းသူတစ်ဦးက စီစဉ်တဲ့ နှစ်ရက်ကြာ သင်တန်းကို သူ တက်ရောက်ခဲ့ ကြောင်း အသက် ၅၇ နှစ်အရွယ် ဒေသခံတစ်ဦးဖြစ်သူ သာဝီးပိုင်အင်က ပြောဆိုပါတယ်။ မိမိ ကတ် ၁၀ ခုကို ဘတ် ၄၄၀၀ နဲ့ ဝယ်ခဲ့ကြောင်းနဲ့  ကတ်တွေကို ၁၀ နှစ်အထိ အသုံးပြုလို့ ရကြောင်း ကုမ္ပဏီက ပြောဆိုခဲ့ တယ်လို့  ၄င်းက ဆိုပါတယ်။ ကတ်တစ်ခုကို မိမိကျောပေါ် တင်ထားကြည့်ရာမှာ နာတာရှည်ခံစားနေရတဲ့ ကျောနာဝေဒနာ ပျောက်ကင်းသက်သာသွားကြောင်း၊ ဒီအကြောင်း မိမိသူငယ်ချင်းကို ပြောပြကာ သူ့ ကို ကတ်တစ်ခုပြန်ရောင်းပေးခဲ့ကြောင်း ၄င်းက ဆက်လက်ပြောဆိုခဲ့ပါတယ်။
ဘန်ဆာလာဒင်ကျေးရွာသူကြီးကတော့ မိမိတို့ ရွာနဲ့ ပတ်ဝန်းကျင် ကျေးရွာတွေမှာ ဒီကတ်တွေ ပျံ့ နှံ့  နေတာ နှစ်လလောက်ရှိပြီဖြစ်ကြောင်း ဆိုခဲ့ပါတယ်။ ကုမ္ပဏီ ကိုယ်စားလှယ်တွေဟာ ရွာသားတွေကို ကတ်အရောင်း ကိုယ်စားလှယ်တွေအဖြစ် စည်းရုံးရောင်းချစေကြောင်း၊ ကျေးရွာတွေမှာ သင်တန်းတွေ စီစဉ်ပေးကြောင်းနဲ့  ဒေသခံအတော်များများ စိတ်ပါဝင်စားနေကြကြောင်း ပြောဆိုခဲ့ပါတယ်။ ရောဂါဝေဒနာတွေ ပျောက်ကင်းတာက တစ်ပိုင်းအပြင် ကတ်ရောင်းသူတွေအတွက် အထွေထွေစရိတ်စက ၀င်ငွေလေးတွေ ရနေကြောင်းလည်း သူကြီးကဆိုပါတယ်။ မိမိ ဇနီးသည်လည်း သင်တန်းသားတစ်ဦးဖြစ်တဲ့ ရွာသားတစ်ဦးထံ ကနေ ကတ်တစ်ကတ် ၀ယ်ခဲ့ကာ သူ လက်နာ၊ ခြေနာတာတွေနဲ့ ကလေးတွေ ၀မ်းချုပ်တာတွေကို ယင်း ကတ်သုံးကာ ကုသခဲ့ရာမှာ ရောဂါလက္ခဏာတွေ ပျောက်ကင်းသွားကြောင်း ၄င်းက ပြောဆိုခဲ့ပါတယ်။
ခွန်ခန်အုပ်ချုပ်ရေးမှူး ဆွမ်ဆက် ဂျန်ထရာကူလ်ကတော့ ဒီကတ်တွေဟာ အတုအယောင် တွေသာဖြစ်ကြောင်း ကြာသပတေးနေ့ (ဇွန် ၁၃) မှာ ပြောဆိုခဲ့ပါတယ်။
“ဒီကိစ္စကို စုံစမ်းစစ်ဆေးဖို့ နဲ့  သံသယရှိသူတွေကို ရှာဖွေဖို့  ရဲတပ်ဖွဲ့ ကို ကျွန်တော် ညွှန်ကြား ခဲ့ပါတယ်။ သူတို့ တွေထဲက တစ်ဦးကိုတော့ ဖော်ထုတ်တွေ့ ရှိခဲ့ပြီဖြစ်ကာ စစ်ဆေးမေးမြန်းမှုတွေ လုပ်ပြီး ဥပဒေအရ အရေးယူဆောင်ရွက်မှုတွေ လုပ်သွားမှာပါ”လို့  အုပ်ချုပ်ရေးမှူးက ပြောဆိုခဲ့ပါတယ်။
No comments:
Post a Comment