လူမှုဖူလုံရေးအဖွဲ့မှ အငယ်တမ်းစာရေးရာထူးခေါ်ယူရာတွင် အင်ဂျင်နီယာဘွဲ့သတ်မှတ်ချက်များ ပါဝင်ခြင်းကြောင့် အင်ဂျင်နီယာဘာသာရပ်အပေါ်သိမ်ငယ်မိကြောင်း မှော်ဘီနည်းပညာတက္ကသိုလ်မှ ပါမောက္ခချုပ်ဒေါက်တာကေသီလွင်က ပြောလိုက်သည်။ ဇွန်လ ၂၁ ရက်ကမြန်မာ့အလင်းသတင်းစာတွင် လူမှုဖူလုံရေးအဖွဲ့မှ အငယ်တမ်းစာရေးရာထူး ၈၄ နေရာ ခေါ်ယူခဲ့ကြောင်း၊ ၄င်းအတွက် ပညာအရည်အချင်းသက်မှတ်ချက်တွင် BE (EC)၊ BE (EP) ၊BE (IT)ဘွဲ့တို့ ပါဝင်သည့်အပေါ် ယခုကဲ့သို့ပြောခြင်းဖြစ်သည်။
“ အင်ဂျင်နီယာပညာရပ်နဲ့ မူလကျောင်းကသင်ပေးလိုက်တဲ့အရာနဲ့ ဒီစာရေးစာထူးကလွဲနေတယ်ဆိုတာ မှန်ပါတယ်။ အင်ဂျင်နီယာပညာရပ်အတွက် သိမ်ငယ်သလို၊ အငယ်တမ်းစာရေးနဲ့လည်း ဘယ်လိုမှ မအပ်စပ်ပါဘူး။ ဆရာမကြီးလည်း ဒီလိုခေါ်တာကိုဝမ်းနည်းပါတယ်’’ဟု ဇွန်လ၂၅ ရက် အကုန်သိသတင်းဌာနသို့ မှော်ဘီနည်းပညာတက္ကသိုလ်မှ ပါမောက္ခချုပ် ဒေါက်တာကေသီလွင်ကပြောသည်။
လူမှုဖူလုံရေးအဖွဲ့မှ အငယ်တမ်းစာရေးရာထူးခေါ်ယူမှုနှင့်ပတ်သက်ပြီး အင်ဂျင်နီယာပညာရပ်အတွက် ၀မ်းနည်းကြောင်း မြန်မာနိုင်ငံ အင်ဂျင်နီယာအသင်းချုပ်မှ ဇွန်လ၂၅ ရက် ရက်စွဲဖြင့် ကြေညာချက် ထုတ်ပြန်ခဲ့သည်။
အဆိုပါကိစ္စနှင့်စပ်လျဉ်း၍ အလုပ်သမား၊လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန အမြဲတမ်းအတွင်းဝန်သို့ အကုန်သိသတင်းဌာနမှ ဆက်သွယ်ခဲ့သော်လည်း ပြည်ပသို့ အလုပ်သဘောအရ ရောက်ရှိနေကြောင်း သိရှိရသည်။
No comments:
Post a Comment