အစိုးရ ဖြုတ်ချရန် အားထုတ်မှုစွဲချက်ဖြင့် အမေရိကန်နိုင်ငံသားတစ်ဦးကို ဗီယက်နမ်တရားရုံးက ထောင်ဒဏ် ၁၂ နှစ် ချမှတ်လိုက်သည်။ အသက် ၅၅ နှစ်အရွယ် မိုက်ကယ် ငုယင်သည် မြို့တော် ဟနွိုင်းနှင့် နိုင်ငံတောင်ပိုင်း ဟိုချီမင်း စီးတီးတို့တွင် အစိုးရဌာနများကို တိုက်ခိုက်ရန် အခြားသူများကိုပါ အားပေးလှုံ့ဆော်ခဲ့ကြောင်း နိုင်ငံပိုင် တူအိုင် ထရီ သတင်းစာက ဇွန် ၂၅ ရက်တွင် ဖော်ပြသည်။ ဟိုချီမင်းစီးတီးတွင် ဇွန် ၂၄ ရက်က ရုံးထုတ်ကြားနာကာ စီရင်ချက်ချမှတ်ခဲ့ခြင်းဖြစ်ပြီး ဗီယက်နမ်နိုင်ငံသား အသက် ၂၃ နှစ်အရွယ် ဟူယင် ဒူ သပ် ဘင်နှင့် အသက် ၂၁ နှစ်အရွယ် ထရန် လောင်ဖီတို့လည်း အလားတူစွဲချက်ဖြင့် ထောင်ဒဏ် ၁၀ နှစ်နှင့် ရှစ်နှစ်စီ အသီးသီး ချမှတ်ခံခဲ့ရသည်။ထိုသုံးဦးကို ပြီးခဲ့သည့်နှစ်ဇူလိုင်က ဟိုချီမင်းစီးတီးတွင် ဖမ်းဆီးထိန်းသိမ်းခဲ့ခြင်းဖြစ်သည်။ ၎င်းတို့ သုံးဦးသည် နိုင်ငံအလယ်ပိုင်းဒေသသို့ ခရီးထွက်ကာ အစိုးရဆန့်ကျင်ရေး လှုပ်ရှားသူများကို စည်းရုံးသိမ်းသွင်းပြီး အပြန်တွင် ဖမ်းဆီးခဲ့ခြင်းဖြစ်ကြောင်း နိုင်ငံပိုင် မီဒီယာက ဖော်ပြသည်။
ငုယင်နှင့် အပေါင်းအပါများ အစိုးရဖြုတ်ချရေး အစီအစဉ်သည် အကောင်အထည် မပေါ်ခဲ့ပေ။ငုယင်သည် အမေရိကန်ပြည်ထောင်စု ကယ်လီဖိုးနီးယားပြည်နယ် အောရိန်းစီရင်စုမှဖြစ်သည်။ ငုယင်၏ ဇနီးသည်ကမူ ထောင်ဒဏ်ချမှတ်ခံရခြင်းအတွက် စိတ်ပျက်မိကြောင်း၊ အမေရိကန်ကို ထိုးနှက်ချက်ဖြစ်ကြောင်း ဝေဖန်ပြောကြားသည်။
ဗီယက်နမ်တွင် အစိုးရဆန့်ကျင်ဆန္ဒထုတ်ဖော်မှုများ အလွန်ရှားပါးပြီး ကွန်မြူနစ်အာဏာပိုင်များသည် အစိုးရကို ဝေဖန်မှုများကို သည်းခံလေ့မရှိကြောင်း တွေ့ရသည်။ပြီးခဲ့သည့်နှစ်အတွင်း လူတစ်ဒါဇင်ကျော် အစိုးရဆန့်ကျင်ရေး လှုပ်ရှားမှုများဖြင့် ရုံးတင်ခံခဲ့ရသည်။
ဗီယက်နမ်သည် မိမိခံယူချက်ကို လွတ်လပ်စွာ ထုတ်ဖော်ပြောဆိုခွင့်အနည်းဆုံး နိုင်ငံများထဲ၌ ပါဝင်ကြောင်း လူ့အခွင့်အရေး စောင့်ကြည့်မှုအဖွဲ့ (HRW) ကလည်း အဆင့်သတ်မှတ်ထားသည်။
No comments:
Post a Comment