ပြည်သူလူထုက လျှပ်စစ်မီးများများသုံးလေ၊ ရောင်းသူက များများ ရှုံးလေဖြစ်နေ၍ လျှပ်စစ်ဓာတ်အား လုံလောက်စွာမပေးနိုင်ခြင်းဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့၊ ဝန်ကြီးချုပ်ဦးဖြိုးမင်းသိန်းက ပြောကြားလိုက်သည်။ ''လျှပ်စစ်မီးများများ မီးလင်းအောင်လုပ်မယ်ဆိုရင် များများစိုက်ထုတ်ပြီး များများအရှုံးခံရမယ်ဆိုတဲ့ အခြေအနေမျိုး ဖြစ်နေတယ်ဆိုတာ ပြည်သူလူထုကို အသိပေးပြောကြားလိုပါတယ်။ လျှပ်စစ်မီးဟာ LNG ဓာတ်ငွေ့နဲ့လုပ်မယ်ဆိုရင် ထုတ်လုပ်မယ်ဆိုရင် ၁၁ဝ လောက် အနိမ့်ဆုံးကျပါမယ်။ ကျွန်တော်တို့ လျှပ်စစ်မီးကို ပေးနေတာ ၃၅ ကျပ်ကနေ စပေးနေတာဖြစ်တဲ့အတွက် နိုင်ငံတော်ကနေ စိုက်ထုတ်နေရတဲ့အခြေအနေ ဖြစ်ပါတယ်။
ဒါကြောင့်မုိ့လို့ လျှပ်စစ်မီးလုံလုံလောက်လောက်မရရှိဘူးဆိုတဲ့ အခြေအနေဟာ ဈေးရောင်း ဈေးဝယ်စကားနဲ့ပြောမယ်ဆိုရင် ပြည်သူလူထုက များများသုံးလေ ရောင်းရတဲ့သူက များများရှုံးလေဆိုတဲ့ အခြေအနေမျိုးဖြစ်နေတဲ့အတွက် လိုအပ်သလောက် လျှပ်စစ်မီးကိုမပေးနိုင်တဲ့ အခြေအနေဖြစ်နေတယ် ဆိုတာကို ပြည်သူလူထုကို အသိပေးလိုပါတယ်''ဟု ဧပြီ ၂၆ ရက်က ရန်ကုန်တိုင်းဒေသကြီး တောင်ပိုင်းခရိုင်၊ သုံးခွမြို့နယ် မြို့နယ်အားကစားခန်းမ၌ပြုလုပ်သော ပြည်သူများနှင့်တွေ့ဆုံပွဲတွင် ဦးဖြိုးမင်းသိန်းက ပြောသည်။
မြန်မာနိုင်ငံသို့ နိုင်ငံတကာမှ လာရောက်၍ လျှပ်စစ်ဓာတ်အား ရောင်းချလိုသည့် ကုမ္ပဏီအများအပြားရှိနေကြောင်း၊ သို့သော်လည်း လက်ရှိနိုင်ငံတော်အစိုးရ၊ ရန်ကုန်လျှပ်စစ်ဓာတ်အား ပေးရေးကော်ပိုရေးရှင်း (YESC)မှ ပြည်သူလူထုကို ရောင်းချနေသည့် တယူနစ် ၆ဝ ကျပ်ဈေး နှုန်းဖြင့် မရောင်းလိုကြ၍ ပြန်သွားကြသည့် ကုမ္ပဏီများရှိခဲ့ကြောင်း ဦးဖြိုးမင်းသိန်းက ပြောသည်။
''အဲဒီအခါမှာ အခြေခံပြည်သူလူထုကို ၃၅ ကျပ်နဲ့ ရောင်းတဲ့အပေါ်ကနေပြီးတော့ စက်မှုဇုန်တွေကို ၁ဝဝ၊ ၁၅ဝနဲ့ ရောင်းလို့ရတဲ့ ငွေနဲ့ပြန်ပြီး ခုနှိမ်နေရတာဖြစ်ပါတယ်။ ဒါတောင်မှ ဘီလီယံနဲ့ချီတဲ့ စိုက်ထုတ်ငွေတွေကို နိုင်ငံတော်ကနေကျခံပြီး အရှုံးခံပြီး စိုက်ထုတ်ပေးနေရတာ ဒါပြည်သူလူထုကို ပွင့်ပွင့်လင်းလင်းသိထား နိုင်ဖို့အတွက် ဒီနေရာမှ တင်ပြတာပါ။ ဘာကြောင့်လဲဆိုတော့ လျှပ်စစ်မီးမလင်းဘူး။ လျှပ်စစ်မီးပဲ အခက်အခဲတွေ ကြုံနေရတယ်။ ကျွန်တော်တို့ ပြည့်ပြည့်ဝဝဖြစ်အောင် လုပ်ပေးနိုင်ပါတယ်။ ပုဂ္ဂလိက ကဏ္ဍကလည်း လာပြီးတော့ ရောင်းချင်ပါတယ်။ ဒါပေမဲ့ များများရောင်းရင် များများထုတ်လုပ်ရင် များများရှုံးမယ်ဆိုတဲ့ အခြေအနေဖြစ်နေတဲ့အတွက် လိုအပ်သလောက်မပေးနိုင်ခြင်းဖြစ်နေရတဲ့ အခြေအနေဖြစ်ပါတယ်''ဟု ဝန်ကြီးချုပ်က ပြောသည်။
တနိုင်ငံလုံးလျှပ်စစ်ဓာတ်အားသုံးစွဲမှု ပမာဏတဝက်ကို ရန်ကုန်တိုင်းဒေသကြီးက သုံးစွဲနေပြီး NLD အစိုးရ စတင်တာ ဝန်ယူစဉ်က ရန်ကုန်တိုင်းလျှပ်စစ်ဓာတ်အားသုံးစွဲမှု ပမာဏ ၁၃ဝဝ မဂ္ဂါဝပ်ရှိခဲ့ရာမှ ယခုအခါ ၁၆ဝဝ မဂ္ဂါဝပ်ရှိနေပြီဖြစ်ကြောင်း၊ ရန်ကုန်တိုင်းလျှပ်စစ်သုံးစွဲမှုအတွက် နိုင်ငံတော်အစိုးရက နှစ်စဉ်ကျပ် ၄ဝဝ ဘီလီယံ စိုက်ထုတ်ကျခံပေးခဲ့ရာမှ ယခု ၂ဝ၁၉-၂ဝ ဘဏ္ဍာရေးနှစ်အတွင်း ရန်ကုန်တိုင်းလျှပ်စစ်သုံးစွဲမှုအတွက် နိုင်ငံ တော်က ၄၅ဝ ဘီလီယံ စိုက်ထုတ်ရမည့် အခြေအနေဖြစ်နေကြောင်း ၎င်းက ပြောသည်။ လက်ရှိအချိန်တွင် ရန်ကုန်တိုင်းဒေသကြီးအတွင်း လျှပ်စစ်မီး ၇၅ ရာခိုင်နှုန်းရရှိနေပြီဖြစ်ပြီး ကျန်ရှိသည့် ၂၅ ရာခိုင်နှုန်းကို ၂ဝ၂ဝ ပြည့်နှစ်တွင် အပြီးရရှိအောင် ကြိုးပမ်းဆောင်ရွက်သွားမည်ဖြစ်ကြောင်း ဦးဖြိုးမင်းသိန်းက ပြောသည်။
No comments:
Post a Comment