အိန္ဒိယမှာ ဆေးရုံတွင်း အကြမ်းဖက်တိုက်ခိုက်ခံရမှုဘေးရန်ကို အစိုးရအနေဖြင့် ကိုင်တွယ် ဖြေရှင်းပေးဖို့ အရေးဆိုနေတဲ့ ဆရာဝန်တွေဟာ ဇွန်လ ၁၇ ရက်နေ့မှာတော့ ဒုတိယအကြိမ် နိုင်ငံအဆင့် သပိတ်ထပ်မှောက်ကြပြီ ဖြစ်ပါတယ်။ ယခုတစ်ခေါက်ဟာလည်း ဇွန် ၁၄ ရက်နေ့ကအတိုင်း တစ်ရက်သပိတ်သာဖြစ်ကြောင်း ၊ အရေးပေါ်ကျန်းမာရေးဝန်ဆောင်မှုများမှအပ ကျန်ဝန်ဆောင်မှုများအားလုံး ရပ်ဆိုင်းထားကြောင်း သိရပြီး ဆရာဝန်အင်အား သောင်းဂဏန်းပါဝင်ကြောင်း ခန့်မှန်းရပါတယ်။
အိန္ဒိယဆရာဝန်များအဖွဲ့ (IMA) ကတော့ ယခင်အပတ်မှာဖြစ်ပွားခဲ့တဲ့ ဆေးရုံတွင်း အကြမ်းဖက် ရန်ပြုမှုနဲ့ ပတ်သက်ပြီး အခြေခံအဆောက်အအုံများ ချို့တဲ့ညံ့ဖျင်းခြင်း၊ ဝန်ထမ်းအင်အား မလုံလောက်ခြင်းတို့အပြင် ဆရာဝန်တွေအပေါ် လူနာတွေ မျှော်လင့်အထင်ကြီးလွန်းနေခြင်းကိုလည်း ပြစ်တင်ရှုတ်ချခဲ့ပါတယ်။
ဒါ့ပြင် ထိုသို့ အကြမ်းဖက်မှုဖြစ်ရပ်တွေမှာ ကျူးလွန်သူအတွက် ပြစ်ဒဏ်ကို ထောင်ဒဏ်အနည်းဆုံး ၇ နှစ်အဖြစ် တိုးမြှင့်သတ်မှတ်ပေးဖို့ လုံခြုံရေးကင်မရာများ တပ်ဆင်ပေးဖို့စသဖြင့် IMA က တောင်းဆို ထားပါတယ်။
ယခင်အပတ်တုန်းက အနောက်ဘန်ဂေါပြည်နယ် အစိုးရဆေးရုံတစ်ခုမှာ သေဆုံးခဲ့ရတဲ့ လူနာတစ်ဦး အတွက် အငယ်တန်းဆရာဝန် ၃ ဦးကို လူနာရှင်မိသားစုတွေက ဝိုင်းရိုက်နှက်ခဲ့ကြပါတယ်။ ထိုဖြစ်ရပ် အတွက် ပြည်နယ်တွင်းဆရာဝန်တွေက ဇွန် ၁၄ ရက်နေ့မှာ စတင်သပိတ်မှောက်ခဲ့ကြပါတယ်။
၎င်းသပိတ်နဲ့စပ်လျဉ်းပြီး ရဲသားတွေဆိုလျှင် လုပ်ဖော်ကိုင်ဖက်သေလျှင်တောင် သပိတ် မမှောက်ကြောင်း၊ အငယ်တန်းဆရာဝန်တွေ သပိတ်မလှန်လျှင် အဆောင်မှ ထုတ်ပယ် မည်ဖြစ်ကြောင်း ပြည်နယ်ဝန်ကြီးချုပ်က ပြောလိုက်ရာ သပိတ်မီးဟာ တစ်နိုင်ငံလုံးသို့ ပျံ့သွားခဲ့ပါတယ်။
အဆိုပါ လုပ်ငန်းခွင်ဆိုင်ရာ တောင်းဆိုချက်တွေအတွက် အနောက်ဘန်ဂေါဆရာဝန်တွေနဲ့ ပြည်နယ်ဝန်ကြီးချုပ်တို့ ဇွန် ၁၇ ရက်နေ့မှာ တွေ့ဆုံညှိနှိုင်းမည်ဖြစ်ကြောင်း သိရပါတယ်။
လူဦးရေ သန်း ၁,၃၀၀ ကျော်ရှိတဲ့ အိန္ဒိယဟာ ကျန်းမာရေးကဏ္ဍအတွက် GDP ရဲ့ ၂ ရာခိုင်နှုန်း အောက်ကိုသာ သုံးစွဲတဲ့အတွက် နှုန်းထားအရဆိုလျှင် ဗင်နီဇွဲလားနဲ့ အီရတ်ထက်တောင် နည်းပါးနေပါ သေးတယ်။
No comments:
Post a Comment